Улсдаа ганц, ачааллаа дийлдэггүй гэж Хавдар судлалын үндэсний төвийг монголчууд байнга эвийлж хөөрхийлж ирсэн. Үнэхээр ч байдал ямар хүнд гэдгийг түүгээр ороод гарсан хүн бүр мэдэрдэг. Тиймээс ХСҮТ-ийн төсөв мөнгө, хавдартай хүмүүсийн эмчилгээний зардлын талаар асуудал сөхөгдөх бүрт олноороо дэмжиж, төр, засаг ч гар таталгүй өгч ирсэн. Гэвч байдал өчүүхэн ч дээрдээгүйгээр барахгүй улам л муудаад байгаа нь хачирхалтай.

ХСҮТ-ИЙН УДИРДЛАГА, АЖИЛЧДЫН ДУНД ХАГАРАЛ ҮҮСЖЭЭ

Өдгөө ХСҮТ-ийн эмчилгээ, үйлчилгээ тун хүнд нөхцөлд явж байгаагаас гадна байгууллагын уур амьсгал туйлын таагүй болоод буй аж. Тодруулбал, 2019 оны арванхоёрдугаар сарын 30-нд ХСҮТ-ийн захирлын суудлыг найзаасаа “шинэ жилийн бэлэг” болгон авсан Н.Эрдэнэхүү хамт олонтойгоо нэг л эв зүйгээ олохгүй байгаагаас гадна мөнгө санхүүтэй холбоотой олон асуудал тэнд үүсэж, асуулт, асуудал дагуулаад буй гэнэ.

Энэ талаар ХСҮТ-ийн Үйлдвэрчний эвлэлийн хорооны дарга, анагаах ухааны доктор, клиникийн профессор Б.Болормаа бидэнд хандсан юм. Мэдээгүйжүүлэг, хагалгааны тасагт их эмчээр 21 дэх жилдээ ажиллаж яваа мэдлэг, туршлага ханасан боловсон хүчин, хамт олныхоо дуу хоолой болж, эрхийг нь хамгаалж чадах хүн хэмээн итгэл хүлээсэн Үйлдвэрчний зөвлөлийн дарга тэрбээр эмнэлэгтээ болж буй бусармаг явдлуудыг олон нийтэд хүргэж, хянаж шалгах үүрэгтэй холбогдох байгууллагуудын анхааралд аваачихыг хүсжээ.

Тэрбээр “Н.Эрдэнэхүү захирлаар ирснээс хойш ХСҮТ-ийн эмч, ажиллагсадын ажиллах нөхцөл, цалин, урамшуулал эрс муудсан. 2020 он гарсаар ажилчдын цалин хөлс, илүү цаг, төлбөрт үйлчилгээний урамшуулал хасагдлаа. Эмч, сувилагч нараас цалин, орлого багаслаа, байрны лизинг, түлээ түлшний өртөгт цалин минь хүрэлцэхээ болилоо гэсэн санал гомдол олон ирсэн. Энэ эмнэлэгт 20 гаруй жил ажилласан, хүмүүсийнхээ ажил, амьдралыг мэдэх хүний хувьд, Үйлдвэрчний эвлэлийн хорооны даргын хувиар Н.Эрдэнэхүүтэй хэд хэдэн удаа уулзаж “Хүмүүсийн халаас руу гараа битгий дүр” гэж янз янзаар хэлсэн. Дөрөв, тавдугаар сард эмч, сувилагчдад илүү цагийн мөнгө, төлбөрт тусламж үйлчилгээний урамшуулал юу ч өгөөгүй. Хэлэхээр “Наадмын үеэр өгчихнө. Тэр үед боломжтой болно” гэж байсан. Түүнээс хойш янз бүрийн шалтгаан хэлж хойшлуулсаар найм, есдүгээр сард илүү цаг, урамшуулал өгч байгаа нэртэй үнэртүүлээд өнгөрсөн.

Манай хамт олон сайн, муу янз бүрийн зүйл үзэж туулсаар хатуужиж, төлөвшсөн улс. Хийх ажил нь ихэссэн хэрнээ авдаг хэд нь багасаад, эмнэлгийн удирдлага халаас руу нь гараа шургуулаад байхад харьцангуй тэвчээртэй хүлээсэн. Есдүгээр сараас хойш ажилчид гайхаж, эргэлзэж эхэлсэн. Ажилчдын хандлага тиймэрхүү болоод ирэхээр хүмүүсийн хэл амыг дарж, айлгах гэсэн тактик юм уу, өөрсдийнх нь үгээр хөдлөхгүй хүмүүсийг халсан. Манай эмнэлгийн бүх л ажилд хөдөө гадаа, шөнө оройгүй явдаг, яаралтай хагалгаа хийх боллоо гэхэд олоход хэцүү гэртэй эмч, сувилагчийн үүдэнд бэлэн зогсож байдаг, 20 гаруй жил ажилласан сайн жолооч, дараа нь Аж ахуйн албаны дарга халагдав. Хүмүүс Үйлдвэрчний эвлэлийн хорооны даргын хувьд надад ханддаг. Жолооч маань “Би машинаа хашаандаа засаад, дугуйгаа өөрөө сольчихдогийг олон жил хамт ажилласан нөхөд маань мэднэ. Өвөл, зуны дугуйгаа хашаандаа хадгалж байгаад улирал нь болохоор сольж тавьдаг юм. Энэ өвөл тавих дугуйгаа хашаандаа хураачихсан байтал ирж зургийг нь аваад, чи хулгайч гээд халчихлаа” гэсэн.

Аж ахуйн дарга “Ажлын байранд архидан согтуурахад байраар хангасан гээд халчихлаа. Өрөөний хоёр хүн гаднаас савтай шар айраг барьж ирээд ширээн дээрээ дөнгөж тавьтал араас нь захирал ороод ирсэн. Би тэдэнтэй нийлж уугаагүй, тийм юм авч ирж байгааг ч мэдээгүй, оролцоогүй. Энэ явдал шалтаг болсон болохоос биш жинхэнэ шалтгаан нь биш. Би аж ахуйн ажлаа мэддэг, мөнгө төгрөг хассан танасан асуудлыг ярьж ордог болохоор ингэж байгаа юм” гэсэн.

Дараа нь, асрагч, сувилагч нарын ахлагчийг “Асрагч, сувилагч нарт өгөх ёстой саванг өгөөгүй” гээд халчихсан. Гэтэл үнэн хэрэгтээ сар бүр өгдөг ариутгалын бодис, саван, угаалгын нунтагийн мөнгийг эмнэлгийн удирдлага аль 2018-2019 оноос эхлээд гуравны нэгээр танасан. Өмнө нь надад сар бүр хоёр төө цагаан даавуу, хоёр саван, гар ариутгагч нэг ирдэг байсан. Тэр ирэхээ болиод, тасалдаад байхаар нь “Өдөр, шөнөгүй хагалгаанд орж, цус нөжтэй холилддог хүмүүст гараа угаах саванг нь яагаад өгөхгүй байна” гэхэд “Цаанаасаа өгөхөө больсон. Хоёрын дунд нэг, гурвын дунд нэгийг өг гээд байгаа” гэж байсан. Эмч, сувилагч нар “Засаг, төр юм өгөхөө больсон юм байх даа” гэж үглээд заримдаа хүний юм хэрэглээд, заримдаа гэрээсээ саван авчирч гараа угаагаад хоёр жил болж байгаа болохоор эмнэлгийн удирдлага танасныг нь бид мэдэж байгаа юм. Энэ нь явсаар асрагч, сувилагч нар “Саван, угаалгын нунтаг шал угаахад хүрэлцэхгүй байна” гэж хэл ам хийхэд ахлагчийг нь “Саван, угаалгын нунтаг тарааж өгөөгүй, өөрөө авсан” гээд халчихсан. Халагдсан хүмүүсийн оронд дандаа өөрсдийнхөө харцаар хөдлөх хүмүүсийг авчирсан. Аж ахуйн даргаар л гэхэд Ж.Чинбүрэнгийн арван жилийн найзын эхнэрийг тавьсан. Одоо хамт олон, удирдлагын хооронд үл ойлголцол улам гүнзгийрч байна” хэмээн ярьсан.

ХСҮТ-Д НААЛДСАН “ШИМЭГЧ”-ДИЙГ ИЛ БОЛГО

ХСҮТ-ийн хамт олон, удирдлагын хооронд үл ойлголцол, таагүй харилцаа үүсэж, энэ нь байгууллагын хэвийн үйл ажиллагаанд нөлөөлөхүйц нөхцөл бий болгосноос гадна мөнгө санхүүтэй холбоотой олон ноцтой асуудал тэндээс гарч мэдэх нь. ХСҮТ-ийн Үйлдвэрчний эвлэлийн хорооны дарга, анагаах ухааны доктор, клиникийн профессор Б.Болормаагийн ярианд анхаарахгүй орхиж боломгүй ноцтой асуудал хөндөгдсөн нь олон нийт, холбогдох байгууллагын анхааралд хүрээсэй. Тэрбээр “Эмнэлгийн хоёр нягтланг тэтгэвэрт нь гаргаж, ХСҮТ-д өмнө нь юу байсан, одоо юу байгааг ойлгохгүй залуус оронд нь авсан. Одоо компьютер томограф, бусад төлбөртэй шинжилгээний мөнгө эмнэлгийн дансанд орохгүй, өөр данс руу орж байгаа гэсэн. Яг хаашаа гэдэг нь тодорхойгүй. Эмнэлгийн хуучин удирдлагатай холбоотой, хавдрын эсрэг нэртэй баахан төрийн бус байгууллага байдаг, тэр рүү нь ордог байх. Сүүлийн 2-3 жил тийм байсан юм шиг билээ.

Үүнээс ч илүү ноцтой нь, манай эмнэлэг Эрүүл мэндийн даатгалын санд 600 саяын өртэй, 2018-2020 оны нийгмийн даатгалын өр гэж бүр замбараагаа алдсан, нийт өр 15 тэрбум төгрөгт хүрсэн гэсэн мэдээлэл ирсэн. Яагаад тийм их өртэй болчихдог юм бэ гэтэл Эрүүл мэндийн даатгалын өр нь “Санчир ундрах” гэдэг эм ханган нийлүүлэх байгууллагатай холбоотой юм байх.

Нийгмийн даатгалын тухайд, яах аргагүй хэрэг гарч, хэл ам хийж хөөцөлдсөн хүмүүсийнхийг нь бөглөөд, бусдыг нь 2018 оноос хойш бөглөөгүй байсан. Тэгээд тийм их өр үүссэн юм билээ. Бидний цалин хөлс төсвөөс тоо ёсоороо ирдэг. Эмнэлэг өмнөхөөсөө илүү ачаалалтай ажиллаж, тэр дунд төлбөрт үйлчилгээ ч нэмэгдэж байхад нийгмийн даатгалд төлөх мөнгийг өгөлгүй 2-3 жил болсон нь ямар учиртай вэ. Тэр мөнгийг зээлсэн үү, эргэлдүүлсэн үү, ямар байдлаар ийм удаан хугацаанд ашигласан бэ гэдэг асуулт гарцаагүй гарч байгаа юм.

Сая арваннэгдүгээр сард зарим өрөө төлж дууссан юм уу, Н.Эрдэнэхүү захирал “Өрийг нь арай гэж төлж санаа амарлаа” гэж санхүүгийнхэнд хэлсэн байна билээ. Ер нь Н.Эрдэнэхүү гэдэг хүн ХСҮТ-ийн ажлыг сайхан болгох гээгүй, хавдраар өвдсөн хүмүүст ч туслах гээгүй, эмч, эмнэлгийн ажилчдын тухай ярих ч зүйлгүй, тэр зүгээр л Ж.Чинбүрэн найзынхаа хийсэн хар барааныг арилгаж цэвэрлэх үүрэг хүлээсэн хүн юм гэсэн дүгнэлтэд би хувьдаа хүрсэн.

Ж.Чинбүрэнгийн тавьсан их өрийг дарах гэж ажилчдын халаас руу халдаж, нэмэгдэл, урамшууллыг нь хассан гэж ойлгож байгаа. Эмч, сувилагч нар эмнэлгийн эмчилгээ эрхэлсэн захирал, ерөнхий захиралтай уулзаж цалин хөлс багаслаа, илүү цаг, төлбөрт тусламж үйлчилгээний урамшуулалаа авмаар байна гэхэд “Өмнөх захирлын чинь өрийг дарж байна” гэж хэлсэн байсан. Эмнэлгийн өмнөх удирдлагын тавьсан өр, “Санчир ундрах” гэдэг хувийн компанийн төлөх ёстой мөнгийг бидний цалин хөлснөөс авч төлсөн юм биш биз гэдэг хардлага бидэнд төрж байгаа. Үүнийг тодорхой мэдмээр байна.

“Яригдаад байгаа өрийн учрыг олъё, юун өр хаанаас үүсэв гэдгийг тодруулъя. Баримт мэдээлэл өгөөч” гэж холбогдох байгууллагад хандахаар “Хувь хүний хүсэлтээр өгөхгүй” гэдэг. Бид аудит оруулж шалгуулъя гэсэн шаардлага тавьсан. Гэтэл Ж.Чинбүрэн, Н.Эрдэнэхүү нарын хоёр найз ирж шалгасан нэр зүүгээд, “Өндөр өртөгтэй эм, эмнэлгийн хэрэгсэл худалдан авах ажлыг хариуцдаг Дэнсмааг таван сая төгрөгөөр торголоо” гэсэн. Тэр бол нүд хуурч, гал унтраах гэсэн арга ядсан ажил. Дэнсмааг торголоо гэсэн таван сая төгрөгийг эмнэлэг төлсөн. Дэнсмаа нь ЭМЯ-ны санхүү хариуцсан Батбаяр гэдэг хүний эхнэр. Эхнэр, нөхөр хоёр Ж.Чинбүрэнтэй нийлээд “Санчир ундрах” гэдэг компаниар дамжуулаад мөнгө оруулж, гаргадаг гэсэн яриа олон жилийн өмнөөс гарсан. “Санчир ундрах” гэдэг эм ханган нийлүүлэх байгууллагад Баянзүрхийн шүүх эрүүгийн хэрэг үүсгэн шалгаж байгаа гэсэн. Тэнд нэлээд асуудал байгаа шиг бололтой.

Ер нь мөнгө санхүүтэй холбоотой олон зүйл яригддаг. Төлбөрт хагалгааны мөнгө эмнэлгийн дансанд орохгүй, хаачсан нь мэдэгдэхгүй алга болсон тохиолдол бий. Элэг шилжүүлэн суулгах мэс засалд улсаас 78 сая төгрөг авдаг. Гэтэл Ж.Чинбүрэнгийн ахалдаг элэг шилжүүлэн суулгах мэс заслын баг өвчтөнүүдээс давхар төлбөр авсан гэсэн гомдол ЭМЯ-нд очсон байна. Нэг айлаас 60 сая төгрөг авсан, үүнийг улс даахгүй байсан уу гэсэн гомдол манай эмнэлэг дээр ч яригдаж байсан. Элэг шилжүүлэх мэс заслын төлбөр 78 сая төгрөгийг эрүүл мэндийн даатгалын сангаас аваад, өвчтөнөөс давхар төлбөр авах ёстой, эсэх, авсан бол хэрхэн зарцуулдаг, багийн гишүүдэд ямар нэг урамшуулал өгдөг, эсэх талаар эмнэлгийн удирдлага хамт олондоо лав огт тайлагнаагүй. Үүнийг тодруулж, тогтоож өгөх шаардлагатай.

Манай эмнэлэг өдөрт 1000-1300 хүнд үйлчилдэг, мэс заслын зургаан тасагтай, тэгээд ч ачааллаа дийлдэггүй байсан. Өнгөрсөн жил М.Билэгтийн барилгыг түрээсэлж авахгүй бол болохгүй нь гэсээр байгаад төсөвт олон тэрбум төгрөг суулгуулсан. Тэр мөнгөөрөө яриад байсан барилгаа ч түрээслээгүй, дөрөвдүгээр давхарт засвар хийж, шинэ тоног төхөөрөмж суурилуулна гээд тэнд ажиллаж байсан мэс заслын тасгуудаа дүүргийн эмнэлгүүдэд тараачихсан. Дүүргийн эмнэлгүүдэд мэс засал хийлгэж сургана гэсэн сайхан үгээр халхавчлаад, үнэндээ бол байргүйн улмаас ерөнхий мэс заслын тасаг маань Баянгол дүүргийн эмнэлэгт, Толгой, хүзүүний мэс заслын тасаг маань Хоёрдугаар төв эмнэлэгт, Эмэгтэйчүүдийн мэс заслын тасаг маань “Амгалан” төрөхөд толгой хоргодож байгаа шүү дээ. ХСҮТ-д Элэг, цөсний мэс заслын тасаг л үлдсэн, тэнд өдөр, шөнөгүй тасралтгүй хагалгаа хийж байгаа. Улсад ганц байгаа хавдрын эмнэлгийн нөхцөл байдал үнэхээр хүнд хэрнээ эмнэлгийн зүүн жигүүрийг тэр чигт нь “Мед портал” гэдэг хувийн эмнэлэгт өгөөд удаж байна. Тэр эмнэлэг хэдэн төгрөгийн түрээсээр, ямар журмаар ажилладгийг бид мэдэхгүй. Ж.Чинбүрэнгийн хамааралтай эмнэлэг л дуулддаг, тэнд оношилгоо, эмчилгээ хийдэг. Хавдартай хүмүүс тэднийхийг манай эмнэлгийн нэг хэсэг, төлбөртэй үйлчилдэг тасаг л гэж боддог байх. ХСҮТ энэ мэтээр шимэгчдэд баригдсан гэдгийг хүмүүс тэр бүр мэддэггүй” гэсэн.

ХСҮТ-ИЙГ ХУВЬЧИЛЖ АВАХ ТӨЛӨВЛӨГӨӨ ЭХЭЛСЭН ҮҮ

Өнөөгийн ХСҮТ-ийг менежментээр хувьчилж, хавдрын ВИП эмнэлэг болгох, Сонгинохайрхан дүүрэгт шинэ эмнэлэг барьж ХСҮТ-ийг тийш нь нүүлгэх төлөвлөгөөг Ж.Чинбүрэн хэрэгжүүлж байгаа, үүний тулд худал үнэн ярьсаар улсын төсөвт олон тэрбум төгрөг суулгуулж, түүгээрээ шинэ тоног төхөөрөмж авч суурилуулаад, хувьчилж авах гэж байна гэсэн хардлага, таамаглалын завсар дахь яриа тус эмнэлгийн хамт олны амнаас ам дамжиж байна. Энэ талаар Б.Болормаа эмч ч яриандаа дурдсан. Тэр “М.Билэгтийн байшинг авна гэж Засгийн газраас мөнгө гаргуулсан нь асуудалтай л юм билээ. Одоо тэр мөнгөөрөө хуучин байрныхаа дөрөвдүгээр давхрыг засаж байгаа. Засаж дуусаад менежментийн хувьчлалд оруулах юм гэсэн. Н.Эрдэнэхүү эмнэлгийн ажилчдад “Эмнэлэг удахгүй ТУЗ-тэй болно. Тэгэхээр энэ хэл ам хийгээд байгаа хүмүүс ажилгүй болно. ТУЗ-ийн гишүүнээр хэн хэнийг сонгох нь тодорхой болсон. Та нар УИХ-ын гишүүнийг дийлэхгүй” гэх мэтийн зүйл ярьсан байна билээ. Түүгээр барахгүй өнгөрсөн сард ТУЗ байгуулах гэж оролдсон. Ж.Чинбүрэн, Н.Эрдэнэхүү хоёр бараг нууцаар шахам, өөрсдийнхөө гар хөл болдог хүмүүсийн хүрээнд бүх ажилчдын хурал зарласан. Мессежээр зар тараасан гэж байгаа ч тэр нь бүх ажилчдад хүрээгүй, тухайлбал, надад ирээгүй. Манайхан дүүргүүдэд хуваагдаад тарчихсан гэж дээр хэлсэн шүү дээ. Ажилчдын 50 хувь нь цуглах боломжгүй байхад бүх ажилтныг биш, өөрийнхөө үгэнд орох хэдэн хүнээр ирц бүрдүүлээд хурал хийж, ТУЗ сонгох гэж байсныг нь би мэдээд хамт олондоо хэл хүргэж цуглуулсан. Манайхан ч олуулаа ирсэн. Улсын эмнэлгүүдийг менежментээр хувьчлах ажил эхэлсэн шүү дээ. ТУЗ байгуулна гэдэг эм эмнэлэг албан ёсоор менежментийн хувьд бие даасан тогтолцоонд шилжинэ гэсэн үг.

УИХ-ын гишүүн, ХСҮТ-д хамааралгүй болсон Ж.Чинбүрэн манай хамт олны хуралд ирсэн нь “ТУЗ байгуулж, өөрөө орж, нөгөө олон төрийн бус байгууллагын төлөөллөө оруулаад, ХСҮТ-ийн удирдлагыг дахин атгах төлөвлөгөөтэй байгаа” гэсэн ам дамжсан яриаг баталгаажуулсан. Тиймээс би түүнд “Биднээр битгий тогло. Бид хорин жил хамтарч ажилласан, бие биенийхээ сайн, мууг мэднэ. ХСҮТ, энэ эмнэлгийн хамт олон чиний өгсөж, уруудах бүх үед түшиг тулгуур болохдоо болж, шат гишгүүр болохдоо болж ирлээ. Үүнээс хойш бидний ажил амьдралд бүү оролц, энэ эмнэлгийг орхи. УИХ-ын гишүүний ажлаа хий. Дахиж элдвийн юм ярьж, ТУЗ байгуулах гэж ирэх юм бол бид хатуу ярина” гэсэн. Бусад эмч, ажилтнууд ч бас “УИХ-ын гишүүнийхээ л ажлыг хий, энэ эмнэлгийн хамт олны хуралд юу хийж яваа юм бэ” гэх мэтийн хатуу үг хэлж, шүгэлдэж, Ж.Чинбүрэнг хөөгөөд гарсан” гэв.

ДҮГНЭЛТИЙН ОРОНД

ХСҮТ-д бодит байдал ийм байна. Улсдаа ганц хавдарын эмнэлэг, мэргэшсэн хамт олныг үймүүлж, бужигнуулж байгаа энэ байдлыг салбарын удирдлага, цаашлаад Ерөнхий сайд мэдэж байх хэрэгтэй болов уу. Тэнд бугшсан завхрал, наалдчихаад салж өгөхгүй байгаа шимэгчдийг холбогдох байгууллага нь анхааралдаа авч, шалгаасай.

Тус эмнэлгийн хамт олон бол эрүүл мэнд, нийгмийн даатгалтай холбоотой өр гэх мэт өмнөх удирдлагын тарьсан балгийн үнэн мөнийг тодруулах, Н.Эрдэнэхүүгийн дураараа авирлахыг хазаарлаж, шударга, ил тод сонгон шалгаруулалтаар ажилдаа тэнцэх захирлыг тодруулахыг хүсэж байна.

Б.Болормаа “Ж.Чинбүрэн араа цэвэрлүүлэх гэж авчирж, албан тушаалаа залгамжлуулж үлдээсэн найзыгаа одоо ав, өөрөө ч ХСҮТ-ээс гараа татаж, УИХ-ын гишүүний ажлаа хий. ХСҮТ-ийг тайван байлга, хүмүүсийг тайван ажлыг нь хийлгэ л гэж байгаа юм. Хамт олон Ж.Чинбүрэнг ажлаа өгч, өөр хүн авчрах гэж байгаа гэж огт мэдээгүй байхад Н.Эрдэнэхүүг ямар ч сонгон шалгаруулалтгүйгээр, 2019 оны арванхоёрдугаар сарын 30-ны 18.00 цагт тушаалыг нь гаргасан шүү дээ. Оны сүүлчийн ажлын өдөр дуусаж, хүмүүс баярын ширээний юмаа цуглуулахаас өөр юм анзаарах сөхөөгүй байх үед Ж.Чинбүрэн ХСҮТ-ийн захирлын ажлаа найздаа өгсөн. Шинэ оны баяр, олон хоногийн амралт гээд энэ том эмнэлгийн захирлаар хаанаас юун хүн авчраад, ямар ч сонгон шалгаруулалтгүй шууд тулгаад тушаал гаргачихав гэдгийг сонирхсон хүн байхгүй, тэгсхийгээд мартагдсан.

Тэр сайн удирдагч, менежер байгаад, бидний ажил, амьдрал асуудалгүй үргэлжлээд явсан бол бид ингэж хэл ам, хэрүүл тэмцэл хийхгүй. Үнэхээр болохгүй асуудлууд байгаа учраас захирлын сонгон шалгаруулалт явуулж, чадвар, туршлагатай, энэ албанд тохирох хүнийг томилж өгөөч гэсэн өргөх бичигт 101 эмч гарын үсэг зурж, 460 эмч, ажилтан дэмжиж, сайд Т.Мөнхсайхан, УИХ-ын гишүүн М.Оюунчимэг, Шадар сайд Л.Оюун-Эрдэнэ сайдад хүргүүлсэн. Үүнд маань тодорхой хариу өгөөгүй учраас дээр дурдсан яриа таамаг, хардлагуудад цэг тавьж, бүх баримтуудыг ил болгож, хөндлөнгийн аудит оруулан шалгаж, үнэн зөв мэдээлэл өгөөч гэсэн хүсэлтээ хэвлэл мэдээллийн хэрэгслээр дамжуулан холбогдох байгууллагад хүргэж байна.

Эмнэлэг бужигнаантай, хөл толгойгоо олохгүй байгаа нь эмчилгээ үйлчилгээнд ч нөлөөлж байгаа. Бүх зүйлийг хасаж танаснаар эм, эмчилгээ, бүх юм нь дутагдалтай байна. Эрчимт эмчилгээний сувилагч нар хүнсний зориулалттай бээлий өмсөөд хүн эмчлэхийг үзлээ. Зүгээр л, есдүгээр сарын 1-10-нд хэдэн хүн сэхээнд орж, хэд нь нас барсныг хараарай. Тодорхой жишээ хэлэхэд, есдүгээр сарын эхний долоо хоногийн бямба, ням гарагт эрчимт эмчилгээний тасагт 4-5 хүн нас барсан. Тэгэхэд би “Би эрчимтэд жижүүр хийхдээ хоёр хүн нас барвал сүнсээ зайлтал айдаг. Гэтэл энэ юу болж байна аа. Хэдэн хүн нас бараад байгаа юм бэ” гэж эмчилгээ эрхэлсэн захиралын өрөөнд ороод “Хуцалгүй дуугүй яв. Олон юм хуцаад байв. Санууллаа шүү” гэж Н.Эрдэнэхүүд зануулсан. Би тэр тухайгаа өргөдөл бичиж өгсөн” хэмээн ярьсан. ХСҮТ-д байдал ийм л байна.

Бэлтгэсэн: Н.Амар

Unuudur.mn