Bolod.mn сайт долоо хоног бүрийн ням гарагт улс төр нийгэм эдийн засгийн хүрээнд болж өрнөсөн онцлох үйл явдлыг тоймлон хүргэдэг. Эдгээр өдрүүдэд Засгийн газрын "5Ш" ажиллагааны хүрээнд хэрэгжиж эхэлсэн шувуу ажиллагаагаар Флиппин улс руу оргон зугтсан Т.Бадамжунайг эх оронд нь албадан авчирж хорих 461-р анги руу хүргүүлсэн.

Түүнчлэн сошиал орчноо лайв бичлэг хийдэг, Хөх хотын консулаар ажиллаж байсан Д.Мөнх-Эрдэнэд холбогдох хэргийн шүүх хурал болсон. Эдгээр болон бусад онцлох үйл явдлын тойм мэдээллийг хүргэж байна.

Хөхдэлийн уурхайн нууранд осолдсон жолоочийг эрэн хайх ажиллагаа үргэлжилж байна

Дундговь аймгийн Баянжаргалан сум, 2 дугаар баг, Энгэр ус баг Оорцог гэх газарт үйл ажиллагаа явуулдаг Бор-Өндөрийн уулын баяжуулах үйлдвэрийн харъяа Хөхдэлийн уурхайн гүний усыг ашиглалтын нөлөөгөөр үүссэн нууранд хүн осолджээ. Уг ослын тухай мэдээлэл цагдаагийн байгууллагад энэ сарын 01-ний өдрийн 14:50 цагт иржээ.

“Экскаватор тогтоол ус уруу унаж, жолооч нь гарч ирээгүй байна” гэх дуудлага, мэдээллийн дагуу аймгийн цагдаагийн газраас шалгалтын ажиллагаа явуулахад 36 настай, эрэгтэй “Ц” гэгч нь Hyundai маркын экскаватороор хөлдсөн тогтоол усан дээр газар шорооны ажил хийж байгаад мөс цөмөрч тээврийн хэрэгсэлтэйгээ живсэн байна. Экскаватор болон амь хохирогчийг татан гаргахаар Онцгой байдлын алба хаагчид өнөөдрийг хүртэл ажиллаж байгаа юм байна. Хэргийг мөрдөн шалгах ажиллагаа үргэлжилж байна.

Д.Мөнх-Эрдэнэд 3 жил 10 сар хорих ял оногдууллаа

Д.Мөнх-Эрдэнэ нарт холбогдох хэргийн урьдчилсан хэлэлцүүлэг болон цагдан хорих шүүх хурал Баянзүрх, Чингэлтэй, Сүхбаатар дүүргийн анхан шатны шүүхэд болсон.

Түүнийг Монгол Улсаас Бүгд Найрамдах Хятад Ард улсын Өвөр Монголын өөртөө засах орны Хөх хотод суух Ерөнхий консулаар ажиллаж байхдаа эрх мэдэл, албан тушаалын байдлаа урвуулан ашиглаж өөртөө болон бусдад давуу байдал бий болгосон, төсвийн хөрөнгийг зориулалтын бусаар зарцуулсан, бусдын нэр төр, алдар хүндэд халдсан илт худал мэдээллийг олон нийтэд тараасан, хууль сахиулагчийг албан үүргээ биелүүлэхтэй нь холбогдуулан хүч хэрэглэж эсэргүүцсэн.

Мөн Монгол Улсын Байгаль орчин, аялал жуулчлалын яамны тусгай хамгаалалттай нутгийн удирдлагын газрын даргын албан үүргийг түр орлон гүйцэтгэж байсан Д.Батмөнх, Богдхант Уулын дархан цаазат газрын хамгаалалтын захиргааны газрын даргын албан үүргийг түр орлон гүйцэтгэгчээр ажиллаж байсан Н.Пүрэвжав нарт албан тушаалын байдалтай холбогдуулан хахууль өгсөн гэх хэрэгт Эрүүгийн хуулийн 22.1 дүгээр зүйлийн 1, 22.4 дүгээр зүйлийн 1, 22.5 дугаар зүйлийн 1-т зааснаар яллах дүгнэлт үйлдсэн байдаг юм.

Тэгвэл Д.Мөнх-Эрдэнэ нь холбогдсон хэргийн хохирол болох 82 сая төгрөгийг шүүхийн дансанд байршуулсан хэдий ч шүүх хурлын шууд дамжуулалтын үед Д.Мөнх-Эрдэнэд 4 жилийн хорих ял оногдуулж байна гэсэн хэдий ч шууд дамжуулалт зогссоны дараа 3 жил 10 сар хорих ял оногдуулж байна хэмээн залруулжээ.

Т.Бадамжунайг эх оронд албадан авчирч хорих 461-р ангид аваачлаа

Засгийн газраас "5Ш" ажиллагааг хэрэгжүүлж эхэлсэн. "5Ш"ажиллагааны нэг болох "Шувуу" ажиллагааг олон нийт илүүтэй анхаарч байна.

Учир нь, томоохон хэрэгт шалгагдаж байгаад оргон зайлсан хүмүүсийг энэхүү ажиллагааны хүрээнд гадаад улсаас эх оронд нь албадан авчирч шалгах ажиллагаа юм. Оргон зайлсан эдгээр хүмүүсийн нэлээдгүй нь улстөрчид, тэр дундаа Ерөнхий сайд, УИХ-ын гишүүд байгаа юм. Мөн бизнес эрхлэгчээс, Улсын шүүхэд шүүгчээр ажиллаж байсан хүмүүс ч үүнд багтаж байгаа юм. Энэ хүрээнд "Эрдэнэт үйлдвэрийн зэсийн баяжмалыг гадаад оронд худалдаж их хэмжээний мөнгө угаасан хэргээр" шалгагдаж байгаа Т.Бадамжунайг Флиппин улсаас баривчлан албадан эх оронд нь явчиран хорих 461-р ангид саатуулан шалгаж байна.

Засгийн газрын шувуу ажиллагаа хүрээнд дараагын удаа гадаадаас авчрах 20 орчим хүний нэрсийг гаргаад байгаа аж. Энэхүү ажил нь тодорхой хэмжээнд үр дүн үзүүлэх төдийгүй, гэр бурууг зөвхөн шүүх шүүнэ хэмээн АТГ-аас мэдээлэв.

Петро Чайн Дачин Тамсаг ХХК-ийн талбайд 32 нэр төрлийн 592 тонн аюултай химийн бодис хадгалагдаж байжээ

"ПетроЧайна Дачин Тамсаг" ХХК-иас химийн аюултай бодисонд хордсон их хэмжээний зээрийг шөнийн цагаар нууцаар булах гэж байна гэх мэдээлэл цахим орчинд тархсан.

Газрын тосны бүтээгдэхүүн хуваах гэрээт 19 дүгээр талбайд ажиллаж, зэрлэг амьтан их хэмжээгээр хорогдсон шалтгаан нөхцөлийг тодорхойлох ажлын хэсгийн явцын талаар БОАЖЯ-наас мэдээлэл өглөө.

Шалгалтын ажиллагаагаар устгах шаардлагатай 32 нэр төрлийн 592 тонн химийн бодис хадгалагдаж байсныг устгах шаардлагыг хүргүүлсэн байна. "ПетроЧайна Дачин Тамсаг" ХХК эдгээр химийн бодисуудыг 2009 оноос импортлон оруулж ирсэн бөгөөд хадгалалтын буруутай үйл ажиллагаанаас шалтгаалан ашиглалтын шаардлага хангахгүй аюултай хэмжээнд хүрсэн аж. Улмаар дээрх 32 нэр төрлийн 577 тонн аюултай хог хаягдлыг устгасан талаарх мэдээллийг ирүүлсэн байна.

Харин зээр олноор үхсэн асуудал дээр хяналт шалгалтын ажлын хэсгийн дүн, шинжилгээний дүн эцэслэж гараагүй байгаа ажээ.

С.Батдөлд авсан таслан сэргийлэх арга хэмжээний хугацааг сунгалаа

Нийслэлийн Прокурорын газрын хяналтын прокуророос яллагдагч С.Батдөлд авсан “Цагдан хорих” таслан сэргийлэх арга хэмжээний хугацаа сунгуулах тухай саналыг БГД-ийн Эрүүгийн хэргийн анхан шатны шүүхэд хүргүүлсэн. Шүүх прокурорын саналыг энэ сарын 6-нд прокурор, яллагдагч, түүний өмгөөлөгч нарыг оролцуулан хянан хэлэлцээд Эрүүгийн хэрэг хянан шийдвэрлэх тухай хуулийн 14.10 дугаар зүйлийн 2 дахь хэсэг дэх заалтаар яллагдагч С.Батдөлд авсан “Цагдан хорих” таслан сэргийлэх арга хэмжээний хугацааг 1 сарын хугацаагаар сунгаж шийдвэрлэв.

Өөрөөр хэлбэл шүүх дээрх хуулийн заалтын “Хэргийн ээдрээ төвөгтэй байдлыг харгалзан яллагдагчийг цаашид цагдан хорих.....” гэснийг үндэслэсэн байна.

Д.Монголхүүг хорихоор болжээ

Баянзүрх дүүргийн Эрүүгийн хэргийн анхан шатны шүүхийн байранд 4-р сарын 3-нд иргэн Д.Монголхүүг хорих талаар шүүх хурал болжээ. Түүнийг шүүхээс хорих шийдвэр гаргасан байна. Тодруулбал, иргэн Д.Монголхүүг 2022 оны тавдугаар сард Баянзүрх дүүргийн Эрүүгийн хэргийн анхан шатны шүүхээс зургаан цагдааг зодсон гэх хэргээр 12 сарын турш зорчих эрхийг нь хязгаарлах шийдвэрийг гаргасан. Тэрбээр зорчих эрхийг хязгаарлах ялыг сүүлийн гурван сарын хугацаанд хоёр удаа зөрчсөн учраас зорчих эрхийг хязгаарлах ялыг хорих ялаар сольсон байна. Түүнийг зургаан сар найм хоногийн хугацаанд хорихоор болжээ.

Түүнийг оршин суугаа Баянзүрх дүүргийн нутаг дэвсгэрээс гарахгүй байх ял оноосныг нийслэлийн давж заалдах шат болон Улсын дээд шүүхээс хэвээр үлдээсэн тул ялыг хэрэгжүүлж цахим гав зүүхээр болсон юм. Д.Монголхүүг зорчих эрхийг нь хязгаарласан үлдсэн хугацаанд хорих гэнэ.

BOLOD ДОЛОО ХОНОГИЙН ТОЙМ: Шувуу ажиллагаагаар Т.Бадамжунайг эх оронд нь авчирч, Д.Мөнх-Эрдэнэд 3 жилийн хорих ял оноолоо
Tweet
Bolod.mn