Архив ангилал

Танилц: Үндэсний их баяр наадмын энэ жилийн нээлт, хаалтын ёслолын агуулга, онцлог

2023-07-11

Тулгар төрийн 2232 жил, Их Монгол Улс байгуулагдсаны 817 жил, Үндэсний эрх чөлөө, Тусгаар тогтнолоо сэргээн мандуулсны 112 жил, Ардын хувьсгалын 102 жилийн ойн Үндэсний их баяр наадам “Эв мөнхийн тусгаар Монгол” нэрийн дор зохион байгуулагдаж байна. Үндэсний их баяр наадмыг зохион байгуулах хорооны 2023 оны 05 дугаар сарын 04-ний өдрийн 03 дугаар тогтоолоор энэ жилийн Үндэсний их баяр наадмын нээлт, хаалтын ёслолыг зохион байгуулах багийг залуу үеийнхнээр бүрдүүлсэн нь олон нийтэд хүлээлт үүсгээд байгаа билээ.

Эвийн хүчээр мөнхөд тусгаар Монгол улс оршихыг бэлгэдсэн нээлтийн ёслолд өнгөрсөн, одоо, ирээдүй гурван цагийн намтар түүх, Монголчуудын үнэт өв, нэгдмэл оюун санаа, эв нэгдэл, эрх чөлөө, түүхэн хөгжлийг орчин цагийн урлагийн бүхий л төрөл, хэлбэрээр дамжуулан нийт 6 бүлгийн хүрээнд илэрхийлэн үзүүлжээ.

Зургаан бүлгийн агуулгыг танилцуулбал:

Эв мөнхийн дуулал. Монгол орны дөрвөн зүг найман зовхист орших төрийн тахилгат 12 хайрхнаа алдаршуулан аргадаж, сүр хүчээр бадраан тахих бол бидний өвөг дээдсийн хүчирхэгжин мандсан XIII зууны эв эеийг сахих сургаал нь Монголчуудын нийгэм, төрийн оршихуй, тэнгэрлэг зарчим төдийгүй хүний өөрийнх нь мөн чанартай холбогдож, нийгмийн нэгжээс эхлэн олон улсын хүрээнд байх ёстой зохистой хэм хэмжээг учирлан “Айл хүний амь нэг, саахалт хүний санаа нэг” гэсэн ардын зүйр цэцэн үгнээс улбаатай Алунгоо хатны эв эеийг сахих сургаал, “Монголын нууц товчоон”-д дурдсанчлан эв эеийг сахиж төгөлдөржин хүчирхэгжихийг бэлгэдэх, эвлэлдэн нэгдсэн ард түмэн гэх утга санааг илэрхийлнэ.
Хөлгөн туульс. Энэхүү уул хайрхдын магтуу шинэ дуу нь төрийн тахилгатай Бурхан халдун, Хан Хөхүй, Отгонтэнгэр, Суварга хайрхан, Сутай хайрхан, Алтан хөхий, Алтайн таван Богд, Сутай хайрхан, Их Богд, Ноён уул, Говь гурван сайхан, Алтан овоо хайрхдад зориулсан этник магтлага дуу байх бөгөөд тухайн 12 нутаг усны онцлог хөгжмийн зэмсгийг шингээн багтаасан байна.
Их Монголын заяан цаг. Эцэг өвгөд, дээдсээс уламжлагдан ирсэн бидний үнэт өв, бахархалт дүр төрх, түүхийн гайхамшиг, нүүдэлчдийн хосгүй хувь тавилан, бусдаас ялгарах ялгамж бүхнийг алдаршуулан бадрааж бахархуулан сэрээхэд энэ үзэгдлийн гол зорилго оршино.
Гурван цагийн нүүдэл. Монгол түмний байгаль эх дэлхийтэйгээ шүтэлцэн мөнхөд амьдрах гүн утга агуулга нь өнгөрсөн, одоо, ирээдүй гурван цагийн хэлхээсэнд их түүх соёл уламжлалаа үл мартан үр хойчдоо өвлүүлэн үлдээх зорилго дор дэлхийд ганцхан наран дор баярлан наадах “Эрийн гурван наадам” хийж бахархал омогшлоо бадрааж, нэг үндэстэн нэгэн цул гэсэн нэгдмэл сэтгэлгээний чанар бий болгож, түүнээс оюун санааны эрч хүч, энергийн төвлөрөл бий болж дараа жилийн наадам хүртэл хүн ардын бие бялдар хүчирхэг бат бөх, холч мэргэн ухааны охь, бодол санаа тэнүүн, хурдан шаламгай, туйлдашгүй хүчтэй байхыг бэлгэдэл болдог юм гэсэн агуулгыг харуулах юм.
Алтан тэвшийн хөндийн хөг аялгуу. Бидний угсаатан, ястны түүх уламжлал, зан заншил, өв соёлын утга чанар үндэстний онцлог, нэгдмэл чанар зэргийг товойлгон үзүүлж, цаад агуулгаараа нүүдэлчин удмынхны тэмцэл ялалт, оршин тогтнохын үндэс суурь, ирээдүйн зүй тогтол, хөгжил хөдөлгөөнийг өнөө цагийн нүдээр харж, өргөн утгаараа уламжлал шинэчлэлийг болон Ардын дууны далд гүнзгий утга санааг бүжиг, зан үйл, түүхэн үйл явцтай хослуулан харуулах зорилго, санааг агуулсан билээ.
Дэлхийн Монгол. XXI зууны залуус бид гадны соёлыг даган бишрэхээс илүүтэй дэлхийн хаана ч үгүй өөрсдийн түүх, өв соёл, зан заншил, үнэт зүйл, үндэсний онцлогийг урлагаар дамжуулан орчин үеийн техник технологитой хоршуулж хамтатгаж чадваас дэлхийн бүх оронд эх орноо сурталчлан таниулж байлдан дагуулах дундаршгүй өв их эрдэнэ буйг мэдрүүлэх явдал билээ.

Энэхүү үзэгдэл нь ХХ-XXI зууны орчин үеийн хөгжмийн хөгжил, дэвшлийн тухай өгүүлэх юм. Үндсэн санаа нь Олон Улсад өөрсдийн уламжлалт аялгуу, хэв шинжид шингээн төгөлдөржүүлж, төрөл зүйлд хувирган, урсгал чиглэл, онцлогийг харуулна. Монгол гэдэг нэрийн дор дэлхийд гарах зорилго өвөртөлж нэгэн зүгт харж нэгдэж чадваас “ЭВИЙН ХҮЧЭЭР МӨНХӨД ТУСГААР ОРШИХ МОНГОЛ” болох учраас урлагаар дамжуулан дэлхийн улс орнуудыг морин хуурын хоёр чавхдасаар уярааж чадах ард түмэн гэдгийг дахин сануулахыг зорьсон бүтээлч сэтгэлгээний илэрхийлэл байх юм хэмээн тайлбарлажээ.

Дэлхийн хөгжил дэвшил, цаг хугацаа дунд өнөөдөртэй мөр зэрэгцэн оршин буй, монгол ёс заншил, ёс жудаг, эрхэмсэг амьдралын баялаг сайхан уламжлал, түүний мөн чанарыг ойлгуулан таниулахаар Дэлхийн бүхий л улс үндэстэнд дэлгэсэн тэрлэг шиг газар нутгаа дэлгэн нээж хүндэтгэн угтаж буйг илэрхийлэн үзүүлэхийг зорьсон байна.

Нээлтийн үйл ажиллагааны онцлогуудаас дурдвал:

● Орчин үеийн технологийн шийдлийг ашиглан шаардлагатай бүхий л мэдээлэл, тусламж, үйлчилгээг авах боломжтой баяр наадмын виртуал хөтөч

● Бодит орчинд хийсвэр элементүүдийг нэмж харуулдаг AR технологийн тусламжтайгаар наадмын нээлтийн шууд дамжуулалтыг шинэлэг байдлаар үзэх боломж

● Монголч түмний сүр, хүч, хийморь, зоригийг бадраах эрчит 120 морьтны үзүүлбэр

● Бүжгийн урлагийн бүх төрлүүдийг багтаасан сонирхолтой, шинэлэг бүжгийн найруулга

● Шинэ залуу уран бүтээлчдийн үзүүлбэрүүдийг багтааж үе үеийн үзэгч, наадамчдад сонирхолтой, хүртээмжтэй байхыг зорьжээ.

Хаалтын үйл ажиллагааны тухай:

Харин наадмын хаалтын үйл ажиллагаа маргааш буюу долдугаар сарын 12-ны өдрийн 21:00 цагаас буюу үзүүр, түрүүний бөхийн шагналыг гардуулсны дараа, есөн хөлт цагаан тугийг төрийн ордон луу залах ёслолоор эхлэнэ. Хаалтын үйл ажиллагаанд Номин талст хамтлагийн дуучин А.Хаянхярваа, S4 хамтлаг, Sweetymotion хамтлаг, хөгжмийн зохиолч Б.Чинбат, Н.Халиун, гитарчин Өөжгий, Том Жагаа буюу Г.Жаргалсайхан нарын Монгол эх орноо магтан дуулсан урлагийн үзүүлбэр болон дрон шоу, ёслолын буудлага зохион байгуулагдах юм. Наадмын нээлт, хаалтын ёслолын үйл ажиллагаанд мэргэжлийн урлагийн байгууллагууд болон чөлөөт уран бүтээлчид, хувийн студи, продакшнуудын хамтарсан 1,500 орчим уран бүтээлчид оролцжээ.

Наадмын нээлт, хаалтын үйл ажиллагааг зохион байгуулах багийн гишүүдийг дурдвал:

Ерөнхий найруулагч: Б.Анар /Скин энтертайнментын найруулагч/

Уран бүтээлийн найруулагч: А.Чингүн /УДЭТ-ын найруулагч, СТА/

Хөгжим, уран бүтээлийн найруулагч: Д.Мөнх-Оргил /333. энтертайнментын ерөнхий найруулагч, Жонон хамтлагийн ахлагч/

Бүжгийн ерөнхий найруулагч, продюсер: Ш.Баасан /Монголиа энтертайнментын үүсгэн байгуулагч, СТА/

Ерөнхий продюсер: Э.Ганболор /Скин энтертайнмент/

Гүйцэтгэх продюсер: Д.Цэрэнсамбуу /УДЭТ-ын захирал, УГЗ/

Гүйцэтгэх продюсер: Н.Батхуяг /333. энтертайнментын ерөнхий продюсер/

Хөгжмийн зөвлөх: Ц.Чулуунбат /Төрийн соёрхолт, УГЗ/

Менежментийн зөвлөх: Н.Ганболд /Жи энтертайнментын үүсгэн байгуулагч/

Уран сайхны удирдаач: Р.Тулга /Скин энтертайнмент/

Ерөнхий зураач: Б.Тэгшсүрэн /Лимон продакшнын сцен зураач, СТА/

Ерөнхий бүжиг дэглээч: Л.Баттөр /ЦДБЭЧ-ын Уран сайхны удирдаач, хошууч/

Хөгжийн зохиолч, найруулагч: Б.Цогбаяр /Жонон хамтлагийн лимбэчин, СТА/, Б.Чинбат /УГЗ/, Ц.Байдраг

Тайзны найруулагч: Б.Батцэрэн /333. энтертайнментын тайзны найруулагч/

Зургийн дарга: Б.Жаргалсайхан /УДЭТ-ын жүжигчин, АЖ/

Ерөнхий менежер: О.Анужин /Скин энтертайнментын менежер/

Ерөнхий зохион байгуулагч: С.Энхболд /УДЭТ-ын Маркетинг, төлөвлөлтийн албаны дарга/

3D тайзны зураач: Д.Түвшин /Скин энтертайнмент/

BOLOD.MN