Иргэдийн 20 сая доллар бүхий хадгаламжийг Олон улсын банканд барьцаалчихсан юм биш үү

2011-10-24

Олон-Овоотыг дагаад олон асуудал босох нь. О.Чулуунбат гишүүн «Хадгаламж» банкны мэдэлд өдгөө шилжсэн Олон-Овоотыг

гадны зах зээлд гаргаж зараад даруйхан төрийн 100 гаруй тэрбумыг эргүүлж өг гэсэн шаардлагыг тавьснаас болж бидний мэдэхгүй олон хэрэг ил гарах нь бололтой. Тухайлбал манай сонинд гарсан «Хулгайчийг бариарай гэж бусдаас чанга хашгирахын учир» нэртэй нийтлэлийг хуулбарлан тавьсан вэб сайтад бичигдсэн нэгэн зочны сэтгэгдлийг онцоллоо.

Нийтлэлийн дор «УИХ-ын гишүүд, Монголбанкны удирдлагууд дараах зүйлийг анхаарна уу. «Жаст»-ын Ш.Батхүү «Хадгаламж» банкны иргэдийн 20 сая долларыг авч Москвагийн Олон улсын банканд барьцаалаад өөрийн компанидаа 20 сая долларын зээл авсан. Түүнийгээ төлж чадахгүй явна. Олон улсын банканд Монголын иргэдийн хадгаламжийг суутгасан. Үүнийг шалгаж, зөрчлийг илрүүлээч ээ. Би энэ банкны дотор нь ажилладаг мэргэжилтэн нь байна» гэж бичсэн байв. Энд тэндхийн сайтад янз бүрийн л нийтлэл бичиж, түүний дор иргэд төрөл бүрийн сэтгэгдлээ үлдээсэн байдаг. Хэн нь мэдэгдэхгүй зочны үнэн, худал нь үл нотлогдох сэтгэгдлийн алийг тэр гэх вэ гэж гэж бодогддог ч хэлье гэвч хэлж чадахгүй олон асуудлыг энэ л «самбар»-т иргэд чин сэтгэлээсээ бичиж үлдээх нь бий.

Магадгүй тухайн нийтлэлээс илүү иргэдийн сэтгэгдлийг уншвал бусармаг, болох болохгүй асууд¬лыг мэдэж авах боломжтой юм шиг санагддаг. Тэгвэл «Хулгайчийг бариарай гэж бусдаас чанга хашгирахын учир» нийтлэлийн дор бичсэн Ш.Батхүүтэй холбоотой зочны сэтгэгдэл анхаарал татахгүй байхын аргагүй. Уг асуудлыг өмнө нь нэг бус удаа сонсож байсны хувьд энэхүү зочны сэтгэгдлийг иш татахаар шийдсэн юм. Тодруулбал Жаст» группийн захирал Ш.Батхүү «Хадгаламж» банкны үйлчлүүлэгчдийн олон сая доллар бүхий хадгаламжийг Олон улсын банканд барьцаалчихаад өрөө төлж дийлэхгүй байна, үүнийг нь Монгол банкны удирдлагууд мэддэг ч амаа хамхихаас өөр аргагүй болсон, учир нь Монгол банкны нэгэн эрх мэдэлтэн Олон улсын банканд зуучилж өгөх ажлыг хийсэн, тиймээс л иргэдийн хадгаламжийг үрэн таран хийж буй асуудлыг харсан ч хараагүй мэт яваа тухай мэдээллийг өмнө нь хэд хэдэн сонин, сайтад бичсэн байсан.

Мэдээж дээрх мэдээлэл нотлогдсон зүйл биш болохоор сэтгүүлч хүнийхээ хувьд хардах сэтгэл төрж буйгаа энэ удаа илэрхийлмээр байна. Сэтгүүлчдэд хардах эрх бий. Энэ утгаараа «Жаст»-ын Ш.Батхүү үнэхээр өөрийн банкны хадгаламж эзэмшигчдийн мөнгийг үрэн таран хийж байгаа юм биш биз, давхар давхар луйвар хийгдээд байгаа юм биш үү гэдгийг холбогдох байгууллагуудын анхааралд хүргэхээр шийдэв. Монгол банк, АТГ гэх мэтийн байгууллагууд ажлаа хийж, Ш.Батхүү гэгч иргэдийг хохироосон эсэх эсвэл зуучилсан гэх О.Чулуунбат хоёрын асуудлыг яагаад шал¬гаж болохгүй гэж. Юмыг яаж мэдэх вэ, шалгаад үзэхэд илүүдэхгүй шүү дээ. Тэгэхдээ дээрх уншигчийн сэтгэгдэл сэтгүүлч бидэнд нотлох баримт болохгүй ч хардах, асуудал хөндөх эрх хэвлэлийнхэнд бий гэдгийг энд дахин дурдах нь зүйтэй биз ээ.

Өөрөөр хэлбэл Ш.Батхүүд эсвэл О.Чулуунбатад асуудал байгаа юм биш үү гэж хардаж, асуудал хөндсөнийг уншигч та ойлгоно байх. Тийм болохоор «Хадгаламж» банкны ТУЗ-ийн дарга, «Жаст» группийн захирал Ш.Батхүүг бүгдэд буруутай мэт чичилж болохгүй биз.. Түүний МҮОНРТ-ийн эфирт өгсөн нэг цагийн шууд ярилцлагаас харахад Ш.Батхүүгээс бурууг хайгаад хэрэггүй мэт санагдсаныг нуух юун. Нөгөөтэйгүүр Олон-Овоотыг зарж борлуулаад, төсвийг хохиролгүй болго гэдэг асуудлыг дориухан тавьж буй О.Чулуунбат гишүүнийг ч нийгэм янз бүрээр харж байна. Олон-Овоотын лицензийг барьцаалаад зээл авъя гэсэн Ц.Мянганбаярыг «Голдман сакс» компанитай холбож өгөөд 30 сая ам.доллар авч өгсөн гэх. Зуучилж өгсний хөлс гурван сая долларыг О.Чулуунбат гишүүн өөрөө халаасалж, 27 сая долларыг Ц.Мянганбаярын данс руу шилжүүлсэн боловч цагтаа манай тэргүүн баянаар тодорч явсан «Монгол газар»-ын эзэн дампуурсан бололтой.

Аргаа барсан тэрбээр олон газар барьцаанд байсан Олон-Овоотын лицензийг хүчингүй болгуулж, шинээр лиценз үйлдүүлээд «Хадгаламж» банкны ТУЗ-ийн дарга Ш.Батхүүд зарсан гэгдэх юм билээ. Мэдээж Ш.Батхүү нь «Анод», «Зоос» зэрэг банкууд дахь Олон-Овооттой холбоотой өрийг тэглэж, нэг ёсондоо зээлээс нь суллаж өгөх ёстой байсан болов уу. Гэвч Ш.Батхүү амласандаа хүрсэн эсэхийг хэлж мэдэхгүй ч Олон-Овоотын лицензийг барьцаалж, зээл авсан «Голдман сакс»-ын 30 сая долларын өрийг тэглэхээ мартсан аж. Мартсан ч гэж дээ, лицензийг нь хүчингүй болгуулж, шинээр үйлдүүлэх маягаар «Голдман сакс»-ыг мурьчихсан юм биш үү. Ийнхүү О.Чулуунбат гишүүн зуучилж өгсөн гэдэг утгаараа Голдман сакс»-ийн өмнө буруутан болсон учраас Олон-Овоотыг ядаж гадны зах зээлд гаргаж зараад бусдыг хохиролгүй болгооч ээ гэдэг асуудлыг шуурхай тавьж байна гэж хувьдаа ойлгов.

О.Чулуунбат гишүүн манай сонинд өгсөн ярилцлагадаа «Нээлттэй, ил тодоор зах дээр зарагдахаар банкууд ч гэсэн зээлдүүлсэн хувь хэмжээгээрээ төлбөрөө авна. Ийм зохицуулалтад банкууд баярлана. «Голомт», «Хад¬галамж», «Анод», «Зоос» гээд бүгд л баярлана. Тэгэхээр ийм том мөнгийг төсвөөс өгчихөөд олон улсын практик, хуулиин дагуу зохицуулалт хийхгүй байгаа нь л хамгийн сонин байна» хэмээсэн билээ. Одоо бодоход «Голомт», «Хадгаламж», «Анод», «Зоос» гээд бүгд л баярлана» гэдэг өгүүлбэрийн цаана «Голдман сакс» ч гэсэн баярлана шүү гэж хэлсэн бололтой. Үүнээс үзвэл бусдын өрийг барагдуулахын төлөө яваа үүрэг хариуцлагыг ухамсарлаж буй О.Чулуунбат гишүүнийг буруутгах аргагүй. Харин гадны компанийг луйвардаж, Монголын нэр хүндийг дэлхийд унагасан хөрөнгөтнүүд, цаашилбал лицензийг дахин үйлдсэн АМГ-ын дарга Д.Батхуяг нарыг буруутгах хэрэгтэй юм шиг.

Ямартай ч О.Чулуунбат, Ш.Батхүү гэх хоёр том эрх ашгийн эзэд сүүлийн үед хэвлэлээр дориухан хэрэлдэх болсон нь араасаа олон чиргүүл дагуулах магадлалтай байна. Өөрсдийн үйлдлээ өмөөрч буй тэдний чухам хэнд нь итгэж, хэнийх нь хэлснээр явбал Монгол Улс, тэр дундаа хохирол амссан байгууллага, хувь хүнийг гомдоолгүй үлдээх вэ гэдэг асуудлыг төр улсын маань томчууд тооцож, шийдвэрлэх биз ээ. Ийнхүү Олон-Овооттой холбоотой асуудлыг ургуулаад цааш явбал олон даргыг хөлдөө чирэх болохоор энэ хүрээд өндөрлөе.

С.Бэлэгмаа
сурвалжлагч

ogloonii sonin