Ерөнхийлөгчийн сонгууль дөхөж буй энэ эгзэгтэй цаг мөчид УИХ- ын хаврын чуулган эхлэх гэж байгаа нь Ц.Элбэгдоржийн бас нэгэн ээлжит шоуны талбар болохоор харагдаж байна.

Тэр тусмаа өнөөдрийн Засгийн газрын үйл ажиллагааг шүүмжилж, Ерөнхийлөгчийн цөсийг хөөргөх гишүүд олон бий. Энэ ч утгаараа УИХ-ын чуулган халуухан эхлэх нь тодорхой. Дотоодын дайнд аль хэдийнээ мордсон “ардчилагчид” Ерөнхийлөгчийн сонгуульд хэнийгээ сойхоо албан ёсоор шийдээгүй байгаа. Өдгөөгийн Ерөнхийлөгчийг намаасаа дахин нэр дэвшүүлбэл ялагдал хүлээнэ гэсэн яриа АН дотор сэм өрнөсөөр байна. Ер нь нийгэм тэр чигээрээ ийм хандлагатай байгаа. Тиймээс Ерөнхийлөгчийн сэнтийг сэмхэн дотроо зүүдэлж яваа нөхөд бүр “хар даран цочих” болсон нь нам доторхи Ерөнхийлөгчийн сунгаа ч халуухан болохыг харуулсан хэрэг. Тиймээс Ц.Элбэгдорж нам доторхи энэ учир битүүлэг ярианд цохилт өгөхийн тулд юуны өмнө Н.Алтанхуягийн Засгийн газрыг шүүмжлэх боллоо. Өөрөөр хэлбэл, хүчирхэг фракцыг тэргүүлдэг Н.Алтанхуягийг Засгийн газраар нь барьцаална гэдгээ хэлж буй хэрэг.

   Ц.Элбэгдоржийн арга уг нь туйлын зөв. Яагаад гэхээр “Алтангадас” өдгөө Засгийн газрыг ч тэр, АН-ыг ч тэр хойморлон сууж байгаа. Удаа дараа Үндсэн хуулийн цэцэд бүдэрч, суудлаа ганхуулаад байгаа Н.Алтанхуягийн чихийг зөөлөн байлгах нь түүнд харьцангуй амар байгаа нь мэдээж. Өөр ч арга алга байгаа нь туйлын үнэн. Гэтэл нам доторхи Ерөнхийлөгчийн сунгаанд нэр нь дуулдах болсон Х.Баттулгыг чухам юугаар барьцаалах гэж байгаа нь хэнд ч сонин санагдана. АН доторхи томоохон фракцын толгойлогч Х.Баттулгыг барьцаална гэдэг тун ч хүнд. Тиймээс Ц.Элбэгдорж мөн л нэг томоохон фракцын тэргүүн З.Энхболдыг өөрийн талд элсүүлсэн гэх мэдээлэл бий. Гэхдээ З.Энхболд зүгээр ч нэг Ц.Элбэгдоржид “найруулчих” нөхөр биш. Тиймээс тэрбээр Ерөнхийлөгчийн сунгаанд нам дотроо өнгөлөх юм бол Н.Алтанхуягийн Засгийн газрыг З.Энхболдод авч өгөх тохироо хийсэн хэмээн эх сурвалж хэлэв. Уг нь Н.Алтанхуягийн дараа “женко” засгийг тэргүүлнэ гэсэн нууц гэрээ тэдний дунд бий гэх. Тэгэхээр “женко” зүгээр ч нэг буугаад өгчихгүй нь лавтай учраас АН дотор жинхэнэ түймэр дэгдэж эхэлсэн бололтой. Өнгөрөгч сонгуулийн дараа Засгийн газар байгуулахдаа фракц хооронд тохирч, хоёр хоёр жилээр засгаа барина гэсэн гэрээ хийсэн гэдэг. Харин гэрээнд заасан хоёр жил гэдэг дэндүү хол санагдсан учраас Х.Баттулга Н.Алтанхуяг уруу нэг дайрч үзээд тогтсон. Яагаав өнөөх М.Энхсайханыг МТЗ-ын даргаас буулгаж, буулгахдаа Н.Алтанхуягт мэдэгдэлгүй, Зам тээврийн сайдтайгаа унагачихсан шүү дээ. Одоо бол энэ үймээн дунд жинхэнэ угсраа мэх хийхээр төлөвлөж суугаа нь мэдээжийн хэрэг.

    Тэгэхээр Ц.Элбэгдорж Н.Алтанхуягийг Засгийн газраар барьцаалж, З.Энхболдыг дараагийн засгийн тэргүүн хэмээх өгөөшөөр өөртөө татаж, сунгаанд орох нь тодорхой болж байна. Уг нь үнэхээр л Ц.Элбэгдоржийг Ерөнхийлөгчийн сонгуульд дахин сойгоод амжилт үзүүлэхгүй гэж бодож байгаа бол тэд өөр тактик хэрэглэх байсан юм. Элбэгийг зөнд нь орхиод З.Энхболд Н.Алтанхуягтайгаа ч юм уу, Х.Баттулгатайгаа нийлэх байв. Бүр гурвуулаа нэгдсэн бол зам нь улам л дардан байх нь дамжиггүй. Гэхдээ Ерөнхийлөгчийн сонгуулийн сунгаа зөвхөн энэ хэдхэн хүний тоглолтоор дуусчихгүй. Өнөөх улстөрийн карьер нь хотын захирагчаар дуусчих гээд амь дүйж яваа Э.Бат-Үүл баатраа яах болж байна. Түүнийн улстөрийн амьдралд гарч байгаа эхний бөгөөд эцсийн боломж нь энэ удаагийн Ерөнхийлөгчийн сонгууль. Ийм боломжийг тэр зүгээр алдахыг хүсэхгүй нь мэдээжийн хэрэг. Тэгэхээр Үүл баатартай “бяцхан” тохироо хийх хэрэг гарч ч мэднэ. Магадгүй гэнэт намынхандаа “найрагдаж” хотын дарга болсон нь ч цаанаа учиртай байж таарна. Намынхан нь улстөрийн тэтгэвэрт гаргахаар хотын захирагч болгож зайлуулсан Э.Бат-Үүл мөнхийн сонирхлоо асаавал бас л тоглолтын тактик өөрчлөгдөхөөс өөр гарцгүй.

   Үүл баатарт бол алдах юм нэгээхэн ч үгүй. Түүний данслагддаг “Зүүн Хойд Ази” хэмээх фракц бол угаасаа хол явахгүй. Л.Гүндалай энэ тэрхэн бол жаал хашхирахаас хэтрэхгүй. Тиймээс алсуураа МҮДН фракцаа түшиглэх учраас тоглолтын дүрэмд зайлшгүй өөрчлөлт орно. Гэхдээ тэгтлээ агуулгын өөрчлөлт бол орохгүй гэсэн үг. Зөвхөн үүгээр ч зогсохгүй залуучуудын нэгдлийг бүрдүүлж байдаг “Нэг ардчилал”-ынхан ч хэн нэгний ашиг сонирхолд татагдаж таарна. Гэтэл Х.Тэмүүжингийн хувь заяа дээсэн дөрөөн дээр дэнжигнэхээс эхлээд юм юм л болж байна. Агуулгаар нь аваад үзэх юм бол эдгээр фракцууд дунд Ц.Элбэгдоржийг дагаад яаран харайх хүн тун ховор харагдлаа. М.Батчимэг, Ц.Оюунгэрэл гээд нөлөө багатай цөөн тооны хүн байна уу даа гэж харагдахаар байна. Түүнээс биш М.Батчимэг Засгийн газар, УИХ-ыг шүүмжлээд АН уруу нулимах хэмжээнд арай хүрээгүй гэдэгт хэн ч эргэлзэхгүй. Түүний хэвлэлд өгсөн ярилцлагын цаана арга тасарсан Ц.Элбэгдоржийн дүр л харагдахаас биш М.Батчимэг гэж ерөөсөө буухгүй байгааг хэн ч мэдэж байгаа. Одоо Соёл спорт аялал жуулчлалын сайд Ц.Оюунгэрэл нэг дуугарах байх. Тэгээд ерөнхийдөө Ц.Элбэгдоржийн “захиалгат нэвтрүүлэг” Засгийн газар, парламент хавьд бараг дуусна. Парламент, Засгийн газрын гаднаас бол түүнийг дэмжих хүн олон байгаа ч дэндүү хүчгүй юм билээ. Хүчтэй байна гээд ч яах юм билээ, улстөрийн гортигны цаана хэчнээн мундаг бархирлаа ч тэндээ л дуу нь шингэж таарах байх.

С.УУГАНБАЯР

Ц.Элбэгдорж Н.Алтанхуягийг засгаар барьцаалж, З.Энхболдыг бараадав
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Ерөнхийлөгчөө одоо ичээч. Монгол улс даргын биш хуулийн засагл********тай боллоо гэж яаж хэлж чадаж байна аа. Одоо Монголын ард түмнийг хошгируулахаа боль боль. Тийм л хуулийн засагл********тай болсон юм бол тэр Увсын гишүүдээ шударга шүүх чинь яасан юм. Энэ цаг үед ажиллаж байгаа шүүгч нар таны томилсон шүүгч, прокорууд байгаа шүү.

2013-04-05 | 15:30:37 | 175.253.100.6 |

Зочин
ТӨВ АЙМГИЙН БАЯНЖАРГАЛАН СУМЫН НУТАГТ ДЭД БҮТЭЦ САЙН ХӨГЖСӨН ГАЗАР ОРШИХ ХӨМӨӨЛТ, БАЯНЖАРГАЛАНГИЙН ХҮРЭН НҮҮРС, ШАТДАГ ЗАНАРЫН ТОМ ОРДУУДЫГ ТӨР МЭДЭЛДЭЭ АВАХ ХЭРЭГТЭЙ БАЙНА??? ЭДГЭЭР ОРДУУДЫН ХҮРЭН НҮҮРСНИЙ НӨӨЦ 2.0 ТЭРБУМ ТОНН, ШАТДАГ ЗАНАРЫН НӨӨЦ 4.0 ТЭРБУМ ТОННООР ТООЦОГДДОГ МАНАЙ УЛСЫН ТОМООХОН НҮҮРСНИЙ ОРД ЮМ???ХӨШӨӨТИЙН УУРХАЙГ ХУУЛЬ БУСААР ЭЗЭМШИЖ БАЙГАА “МОНЭНКО” КОМПАНИЙ ЗАХИРЛААР АЖИЛЛАЖ БАЙСАН ӨВӨР МОНГОЛ НАЦАГДОРЖ ГЭГЧ ЭТГЭЭД ГАДНЫ ЛУЙВАРЧИДТАЙ НИЙЛЖ ” КОММОНМАКС” КОМПАНИЙ НЭР ДЭЭР ДЭЭРХИ ОРДУУДЫГ ЛУЙВРЫН АРГААР АВЧ ЭЗЭМШИЖ БАЙНА?? МОНГОЛ ТӨР ИЙМЭРХҮҮ ТОМ ОРДУУДЫГ ӨӨРИЙН МЭДЭЛ ЭЗЭМШИЛДЭЭ ЭРТХЭН АВАХГҮЙ БОЛ ОДООГИЙН ОЮУТОЛГОЙ БОЛОН ГАЗРЫН ТОС ГЭХ МЭТ ОЛОН ОРДУУДАА АЛДСАН ШИГЭЭ АЛДАХАД ТУН ОЙРХОН БАЙНА ШҮҮ?????

2013-04-05 | 10:07:20 | 122.201.18.184 |

Зочин
АН ёстой аймаар эв нэгдэлгүй юмаа. МАХН-ыг атаархсаар байгаад хаг********ж дөнгөсөн, одоо нам дотроо фракц болчихжээ. Эрх мэдлийн төлөөх цусгүй дайн гэж .............

2013-04-05 | 10:00:39 | 202.9.47.130 |