хэргийн шүүх хурал өчигдөр өглөөний 09.30 цагт эхэллээ.

Таван сарын турш шалгагдсан энэ хэргийн Ерөнхий шүүгчээр Л.Ганзориг дагалдан шүүгчээр Т.Шинэбаяр, Ч.Отгонбаяр, улсын яллагчаар Н.Отгонцэцэг, Б.Эрхэмбаяр, өмгөөлөгчөөр Ж.Яринпил, Д.Цэндсүрэн, Д.Одонтунгалаг, Ш.Мягмарцэрэн, Н.Батбаатар, Л.Данзанноров, Ж.Эрдэнэбулган, Ц.Монгол, Э.Туул, Д.Наранбулаг, Т.Энхтөр, Б.Болдбаатар, С.Дондов, М.Энхжаргал, Г.Тунгалаг зэрэг 20 гаруй шүүгч оролцсон Мөн хохирогчоор Б.Баасанцогт, гэрчээр С.Туяа, О.Тамир, П.Энхцэцэг, О.Сэр-Од, Л.Сайнжаргал, Д.Цэцэгбаяр, О.Хайнзан, Х.Буянхишиг, Ц.Эрдэнэбилэг Б.Баясгалан, Д.Батбилэг, Ш.Чулуунаа, Б.Цогоо, Б.Махбал нар оролцсон юм.

Шүүх хурал эхэлж ерөнхий шүүгч өмгөөлөгч нараас ямар нэгэн хүсэлт байгааг асууж саналыг нь сонслоо. Хамгийн эхэнд шүүгдэгч н.Гантөмөрийн өмгөөлөгч н.Жанцан гадаадад албан томилолтоор явсан учир шүүх хурлыг хойшлуулах хүсэлтийг гаргасан Мөн шүүх хуралд гэрчээр оролцож байгаа “МИАТ”-ийн Санхүүгийн албаны дарга н.Баясгаланг гэрчээр бус шүүх бүрэлдэхүүний нэг хэсэг болгож оролцуулахыг хүссэн юм.

Түүнчлэн Ч.Хоролсүрэнгийн өмгөөлөгч Б.Шинэн 23 дахь хавцаст хэрэгт Монгол банкнаас гаргасан тайлангийн дээд талд маш нууц гэж бичсэн байсан. Тийм ч үүднээс хурлыг хаалттай явуулах ёстой. Мөн манай үйлчлүүлэгч ходоодны хорт хавдартай учир батлан даалтад гаргахыг хүсч байгаагаа хэлсэн юм. Шүүгдэгч Г.Саранчимэгийн өмгөөлөгчийн хувьд түүний биеийн байдал муу байгаа буюу дэлхийд ховор байдаг мэдрэлийн гаралтай өвчтэй учир мөн л батлан даалтад гаргаж өгөхийг хүслээ.

Ингээд шүүх бүрэлдэхүүн түр завсарлаж өмгөөлөгчдийн тавьсан хүсэлтийг хэлэлцэхээр орсон юм. 30 гаруй минут завсарласаны дараа шүүх бүрэлдэхүүн шийдвэрээ танилцууллаа. Тэд “Шүүгч нарын тавьсан саналыг хүлээж авахгүй гэдгээ мэдэгдэж, шүүгдэгч Н.Гантөмөрийн хэргийг тусгаарлаж шүүхээр болсон юм. Мөн шүүх хурлыг хаалттай явуулах ямар нэгэн үндэслэл байхгүй” гэснээр шүүх хурал эхэллээ.

Улсын яллагч шүүгдэж байгаа зургаан шүүгдэгчид ямар үндэслэл, нотлох баримтаар яллах дүгнэлт үйлдэж байгаа гэдгийг уншиж танилцууллаа. Мөн гэрчүүдийн мэдүүлгийг ч уншсан. Улсын яллагчдын зүгээс Эрүүгийн хуулийн 150.3, 166.1.3, Эрүүгийн хуулийн тусгай зүйл ангийн 35.3, 35.5, 35.6 журамлаж, нийт 17 үйлдлээр гүйлгээ хийж улсад 9.365 569 134 төгрөгийн хохирол буюу онц их хэмжээний хохирол учруулсан хэмээн үзсэн байна. Мөн улсын яллагч гэрч нарын мэдүүлгээс уншиж танилцуулсан.

Тухайлбал, О.Тамир буюу Ч.Хоролсүрэнгийн гэрийн үйлчлэгч хүүхдийг нь хардаг байсан тэрбээр гэрчээр оролцож байгаа. Түүнийг гэрчээр оролцуулах болсон шалтгаан нь Ч.Хоролсүрэн түүний нэр дээрх дансанд их хэмжээний мөнгө шилжүүлж буцааж авсан байна. Тэрбээр энэ тухай мэдүүлэхдээ “Би Ч.Хоролсүрэнгийн гэрт үйлчлэгч хийж, хүүхдүүдийг нь хараад сургалтийн төлбөрөө хийдэг. Нэг өдөр хичээл дээр сууж байхад Ч.Хоролсүрэн ах залгаад хичээлээсээ чөлөө аваад хүрээд ир гэхээр нь Сүхбаатарын талбай дээр очсон. Намайг очиход Н.Гантөмөр гээд хүний хамт байсан.

Тэгээд нэг зүйл дээр гарын үсэг зуруулаад, чи хараад хэрэггүй байх гэж хэлсэн. Тэгээд “Голомт” банкны гурван давхарт нэг өрөөнд очоод удаж байгаад гарч ирээд намайг одоо явж болно гэсэн. Надад тэр мөнгө ямар ч хамаагүй” хэмээн мэдүүлжээ. Энэ мэт шүүх хурал оролцох 14 гэрчийн мэдүүлгийг уншиж танилцууллаа. Үүний дараа шүүгдэгчид Улсын яллагчтай санал нийлж байгаа эсэх, асууж лавлах зүйлээ асуусан юм.

Тэдний ихэнх нь зүйлчилж байгаа зүйл заалттай буюу Эрүүгийн хуулийн 150.3 санал нийлэхгүй байгаа гэдгийг илэрхийлсэн. Харин улсын яллагчийн зүгээс ямар учраас 150.3-аар буруутгасан гэдгийг тайлбарлалаа. Энэ мэт үргэлжилсээр шүүх хурал 13.00 цагийн үед завсарлаж, 14.00 цагт үргэлжлэхээр боллоо. Хурал засварлах үеэр шүүгдэгчид өмгөөлөгчтэйгээ аминчлан ярьж, гэр бүлийнхэн нь хооллож, зарим өмгөөлөгчид шүүх хурал яагаад хойшилсонгүй вэ хэмээн ямар ч бэлтгэлгүй байсан бололтой харагдаж байлаа. Ингээд шүүх хурал эхэлж, шүүгдэгч нар энэ хэрэгт ямар учраас холбогдсон, болоод гэм буруутай гэдгийг хүлээн зөвшөөрч байгаа болоод улсын яллагч нарын асуултад хариулсан юм.

Шүүгдэгч Б.Эрдэнэбилэг: “2006 оны тавдугаар сарын 1-ээс 2009 оны гуравдугаар сарын 11-ны хооронд “МИ АТ” компанийн гүйцэтгэх захирлаар ажиллаж байсан. Миний хувьд 2005-2007 оны хооронд таван удаа гүйлгээ хийсэн. Би мөнгө шамшигдуулаагүй. Намайг яагаад ийм зүйл заалтаар зүйлчилж буруутган яллах дүгнэлт үйлдэж байгааг ойлгохгүй байна. Японы хөрөнгө оруулалттай “Best Wealth AlGroup” удирдлагуудтай нэг ч удаа уулзаж байгаагүй. 2008 онд нэг удаа гэрээ явуулж байсан. Гэрээ цахим шуудангаар ирдэг байсан. Тухайн үед би гэрээг өмнө нь байгуулсан байсан учраас шалгаж үзэлгүй сунгаж үргэлжлүүлсэн. Гэрээг нэг л удаа үзэж байсан. Тэгэхэд захирал нь Ч.Хоролсүрэн гэж байсан байх. Ч.Хоролсүрэнгээс авсан, өгсөн мөнгө байхгүй. Гэхдээ түүний ХЗХ-оос гурван удаа мөнгө зээлж байсан”.

Шүүгдэгч Г.Саранчимэг: “Голомт” банкны Анхны 24 цагийн сүлжээ банкны салбарын захирлаар ажиллаж байсан. Ч.Хоролсүрэнгийн хувьд манай салбарын мөнгөний 20-30 хувийг эзэлдэг том харилцагч. Ч.Хоролсүрэн нэг удаа данс нээгээд өгөөч гээд гадаадаас ярьсан.Тэгэхээр нь хөдөө байдаг өөрийн найз С.Туяагийн нэр дээр данс нээж өгсөн. Энэ данс руу хоёр удаа мөнгө шилжиж орж ирсэн. Гэхдээ би нэг ч удаа мөнгөнөөс авч байгаагүй. Миний хувьд данс нээж өгсөнөөс өөр хийсэн буруу зүйл байхгүй. Би данс нээж өгсөндөө харамсч байна. Тэгээд ч би тэр явдлаас болж ажлаас халсан. Намайг бусадтай бүлэглэн мөнгө шамшигдуулсан гэдэгтэй санал нийлэхгүй. Энэ хүмүүсийг би одоо л харж байна. Хоригдож байх 83 хоногийн хугацаанд огт уулзаж байгаагүй”

Шүүгдэгч Б.Бат-Эрдэнэ: “2009 оны гуравдугаар сарын 13-наас намайг Солонгос улсад байхад гүйцэтгэх захирлыг үүрэг гүйцэтгэгчээр ажилла гээд би ажилласан. Улмаар 2010 оны нэгдүгээр сарын 26-наас тавдугаар сарын 26-ны хооронд гүйцэтгэх захирлаар ажилласан. Дайны эрсдэлийн гэрээ нь НҮБ-ын конвенцод эрсдэлийн сан байгуулах ёстой гэж заасан учраас үүнийг үргэлжлүүлэх ёстой гэдэг үүднээс гэрээнд гарын үсэг зурсан. Тухайн үед үүргээ гүйцэтгэж байна гэж бодож байсан. Компаний эзэдтэй нэг ч удаа уулзаж байгаагүй. Би хариуцлага хүлээхгүй гэж хэлэхгүй. Үүрэгт ажилдаа хайнга хандсан зэрэг асуудал би. Хамгийн гол нь зүйлчилж байгаа зүйл заалттай санал нийлэхгүй байна. ”

Шүүгдэгч Ц.Орхон: “Миний хувьд захирлын ажлыг хүнд үед хүлээж авсан. Анх би “МИ АТ”-ийн маркетингийн албаны даргаар ажиллаж байсан. Тэгээд 2010 оны тавудгаар сарын 27-нд гүйтцэтгэх захирлаар ажиллаж эхэлсэн. 2010 оны долоо, ес, аравдугаар саруудад гурван удаа мөнгө шилжүүлсэн. Миний хувьд гадаадад данс байхгүй. Харин 2002 онд Ч.Хоролсүрэн манай эхнэртэй хамт Гонконг явж байсан. Тэгэхдээ нэг хамтын данс нээлгэсэн юм билээ. Тэрийг гэхдээ ББСБ, ХЗХ үйл ажиллагаатай холбоотойгоор нээлгэсэн. Би “Best Wealth AlGroup” удирдлагуудтай нэг ч удаа уулзаж байгаагүй”.

Шүүгдэгч Ч.Хоролсүрэн: “Би 2005 оны гуравдугаар сарын 14-өөс 2006 оны тавдугаар сарын 10-ны хооронд Каммер эрхэлсэн захирал, 2008 зургадугаар сарын 6-наас Токио хотод ажиллаж байгаад ирсэн. Тэгээд 2010 онд ажлаа өгсөн. Миний хувь нэг ч удаа гэрээ хийж байгаагүй. Мөнгө шилжүүлж байсан удаа байгаа бол Б.Бат-Эрдэнийн даалгавараар шилжүүлж байсан байх. “Best Wealth AlGroup” компаний захирал Тони Ли гээд 40 орчим насны эрэгтэйтэй нэг удаа уулзаж байсан. Миний хувьд гадаадад амьдардаг байсан учраас хүний дансан дээр мөнгө хүлээж авдаг байсан. Тэр хүлээж авсан мөнгөний зургаан хувийг би авдаг байсан. Гэхдээ гурван болзолтойгоор. Үүнийг би хавцаст хэрэгт хэлсэн байгаа.

Б.Эрдэнэбилэг, Ц.Орхон, Б.Бат-Эрдэнэ нарын хүмүүс намайг урамшуулал авдаг гэдгийг мэдээгүй. Харин Н.Гантөмөр хэд хэдэн удаа дансруу мөнгө хийж байсан. Н.Гантөмөрийн тухайд миний анхлан үүсгэн байгуулсан “МАК” компанид ажилладаг байсан Г.Саранчимэгийг сайн таньдаг учраас данс нээгээд өгөөч гэж гуйсан. Түүний хувьд ямар нэгэн буруу байхгүй. Н.Мандахбаяр гэж хүний данс руу шилжүүлсэн мөнгийг Б.Эрдэнэбилэг дүүдээ ч гэлүү машин байшин авч өгөх гэсэн юм гээд авч байсан. Гэхдээ буцаан төлөгдсөн энэ мөнгө. Миний хувьд гэм буруугаа хүлээж, хариуцлага хүлээхэд бэлэн байна. Улсад ямар нэгэн хохирол учруулсан бол төлнө. Харин хажуудаа хэдэн сар энэ хүмүүсийг зовоосондоо санаа зовж байна”.

Шүүгдэгч Ч.Суурьтогтох: “Би яагаад энд байгаа гэдгийг ойлгохгүй байна. Тэр дундаа хамжигчаар оролцож байгаа гэхээр ойлгохгүй байна. Ахын/Ч.Хоролсүрэн/ компани миний нэр дээр байдаг. Түүнээс өөр зүйл байхгүй” гэсэн юм. Энэ мэт “Дайны эрсдэл”-ийн гэх тодотголтой шүүх хурхал үргэлжилсээр оройн 19.00 цагийн үед завсарлаж өнөөдөр 09.00 цагт үргэлжлэхээр болсон юм.

Г.Төгс

Ч.Хоролсүрэн: Би улсад учруулсан 4.3 тэрбум төгрөгөө төлж, гэм буруутайгаа хүлээхэд бэлэн
Tweet
Bolod.mn