Уг мэдээллийг хийх болсон шалтгаан нь зарим улс төрийн нам тус газарт шалгагдаж байгаа хэргүүдийг улстөржүүлж, нийгэмд ташаа мэдээлэл өгч байгаа учраас тайлбар хийж байна" гэсэн юм. Энэ үеэр Ц.Батсүх сэтгүүлчийн асуултанд хариулсан юм.

-О.Эрдэнэсолонгыг ямар шалтгааны улмаас шалгах болсон юм бэ?

-Өнгөрсөн гуравдугаар сарын 20-ны өдөр иргэн Ч нь Цагдаагийн ерөнхий газарт гомдол гаргасан. Тэрээр гомдолдоо "намайг Энхтайвны гүүрэн дээр явж байхад хэсэг залуус зодоод, "Ланд 200" маркийн машиныг минь дээрэмдээд явчихлаа гэж" гэсэн байсан. Харин байцаалтанд иргэн Ч нь "Ё.Отгонбаяр БСШУЯамны сайд байхдаа Налайх дүүрэгт байрлах миний өөрийн эзэмшлийн барилгын ашиглалтын зөвшөөрлийг өгөхгүй байсан. Хүлээж авахад 232 сая төгрөг өгөхийг хүнээр дамжуулан надад санал болгосон. Энэ мөнгийг надаас нэхээд байсан. Би өгөөгүй болохоор хүмүүс явуулан зодуулж, дээрэмдлээ" гэж мэдүүлсэн. Цагдаагийн байгууллага энэ асуудлыг шалгахад үнэн болох нь тогтоогдсон юм. Харин зодсон хүмүүс, хахууль өгөхийг зуучилсан хүмүүс нь тодорхой байгаа. Ё.Отгонбаяр нь тухайн үед түүнд дансны дугаар өгөөд "Энэ данс руу хий эсвэл бэлнээр өг" гэсэн байгаа юм. Цагдаагийн байгууллагаас түүнийг шалгах болсон. Харин шалгалтын явцад түүний эхнэр О.Эрдэнэсолонгын нэр дээрх дөрвөн банкны 26 дансаар их хэмжээний гүйлгээ орж, гарсан нь тогтоогдсон. Жишээлбэл, 2010 оны есдүгээр сарын 30-ны өдөр 300 сая, 420 сая, 338 сая, 80 сая төгрөг гэх мэтчилэн нэг өдөр их хэмжээний мөнгө ордог байсан нь тогтоогдсон. Харин эдгээр мөнгөнүүд нь дахин хоёр дансаар дамжин өөр банкны дансанд төвлөрдөг байсан. Үүний дараагаар энэ мөнгийг хэн авсан нь мэдэгдэхгүй алга болсон нь байсан. Харин эдгээр данснууд О.Эрдэнэсолонгын нэр дээр байгаа учраас ямар учиртай мөнгө болохыг асууж, шалгах ёстой учраас саатуулсан.

-Ё.Отгонбаяр гишүүн хахуулийн мөнгө нэхэж, захиалгаар хүнийг зодож, дээрэмдүүлсэн гэж ойлгож болох уу?

-Ё.Отгонбаяр тэр хүнтэй хамт хоолонд орохдоо хахуулийн мөнгө нэхэж, мөнгөний хэмжээний талаар тохиролцож байгаа баримт бий. Зодсон, хээл хахууль өгөхийг санал болгож зуучилсан хүмүүс нь ч бүгд тэр талаар гэрчилж байгаа.

-Шалгалтын явцын ямар шатандаа явж байна?

-Шалгах ажиллагаанд Монгол-банкны Санхүүгийн мэдээллийн албанаас тодорхой мэдээлэл авч, мөрдөн байцаалтын явцад нотлох баримт цуглуулсан байгаа. Бид одоогоор дөрвөн банкинд шалгалт оруулаад байгаа. Эдгээрээс Зоос, Анод банк дампуурсан байгаа. Гэхдээ энэ хоёр банкийг болон бусад хоёр банкны санхүүгийн мэдээлэл, дансанд хоёр талаас орж, гарсан мөнгөний хэмжээг шалгаж байгаа. Мөнгөний хэмжээ хэд ч байж болно. Ямартай ч нилээдгүй их хэмжээний мөнгө байгаа гэдгийг л хэлье.

-Ё.Отгонбаярын эхнэрийг шалгаж байгааг сонгуультай холбоотой хэмээн ярих хүн цөөнгүй байна?

-Сонгуулийн үйл ажиллагаа эхлэхээр мөрдөн байцаалт түр зогсоно гэсэн хууль хаана ч байхгүй. Тиймээс энэ хэргийг шалгаж байгааг сонгууль, улс төртэй холбож тайлбарлах шаардлагагүй гэдгийг албан ёсоор мэдэгдмээр байна.

-О.Эрдэнэсолонгыг хуурч авчраад баривчилсан гэж байсан?

-Тийм зүйл байхгүй. Өөрт нь энэ асуудлын тухай мэдэгдсэн. Хууль ёсны дагуу саатуулсан.

-Мөн түүнийг хүн амины гэмт хэрэгтэнтэй хамт хорьж байгаа гэсэн мэдээлэл байна?

-Тэр асуудлыг бид нар мэдэхгүй. Хэнтэй, хаана хорьж байгааг саатуулж байгаа газар нь мэднэ. Энэ бол 461 дүгээр ангийн дотоод асуудал.

-УИХ-ын гишүүн Ё.Отгонбаяр эхнэрээ гадуур шалгуулах хүсэлт гаргаад байгаа гэсэн?

-Ар гэрийнхэн болон өмгөөлөгч нь О.Эрдэнэсолонгыг өвчний улмаас гадуур шалгаад өгөөч гэсэн санал ирүүлсэн. Бид хүсэлтийг хүлээн авч, О.Эрдэнэсолонгыг шалгах шалгалтын явц удаан явагдах учир таслан сэргийлэх арга хэмжээг өөрчлөх хүсэлтийг өнөөдөр прокурорт хүргүүлсэн. Тиймээс түүнийг гадуур шалгана. Ингэхдээ барьцаатайгаар батлан даалтанд гаргана.

-Н.Хүрэлбаатар өөрийн хүсэлтээр шалгуулахаар ирсэн гэж байсан?

-Эрүүл мэндийн яамны төрийн нарийн бичгийн дарга асан Н.Түмэндэмбэрэл нарт холбогдох хэргийг шалгаж эхэлсний маргааш Н.Хүрэлбаатар нь гадаад руу дүрвэсэн. Цагдаагийн байгууллагаас хүүхдийг нь сатуулсаны үндсэн дээр Н.Хүрэлбаатар ирсэн. Мөрдөн байцаах газар шалгах болсон шалтгаан нь түүний гэрт байсан хоёр сая 145 мянган юаньтай холбоотой гэнэ. Цагдаагийн байгууллага түүнийг нь хураасан хэдий ийм их хэмжээний валют төрийн албан хаагчийн гэрт байсан шалтгааныг бид асуух үүрэгтэй. Түүнээс биш Улс төртэй ямар нэгэн холбоо байхгүй.

-"Петро Чайна дайчин тамсаг" ХХК-ийн асуудлын талаар дэлгэрүүлээч. Ямар ямар албан тушаалтнуудыг шалгаж байгаа юм бэ?

-Энэ хэрэг манай эдийн засгийн хэлтэс дээр шалгагдаж байгаа. Уг компани нь 2007 оноос хойш манай улсын Засгийн газартай газрын тос борлуулалтын гэрээтэйгээр ажиллаж эхэлсэн. Гэтэл орлогоос тодорхой хэмжээний мөнгө Хонгконгийн тодорхой банкуудын дансруу нууцаар шилжиж байна гэсэн мэдээллийг аваад шалгаж байна. Өнөөдрийн байдлаар санхүүгийн хоёр талын байгууллагын аудитын дүгнэлтээр 417 мянган барелл буюу 40.5 сая долларын дутагдал гарсан гэсэн тооцоо гарсан. Энэ асуудал дээр Хятадын талаас үүргээ бүхэн биелүүлж байгаа. Манай төрийн албан хаагчид эндээс нууц аргаар мөнгө шилжүүлсэн. Хамгийн сүүлд 216 мянган доллар шилжүүлсэн байгаа юм. Одоо санхvvгийн шалгалт хийж байгаа. Газрын тосны хэрэг эрхлэх газрын дарга байсан н.Амарсайхан нарын хүмүүсийг шалгаж байгаа. Энэ бол оны эхнээс явж байсан процесс.

-Тагнуулын ерөнхий газрын Сөрөх тагнуулын хэлтсийн дарга, хурандаа Д.Цогтбаатарыг шалгах үйл ажиллагаа юу болж байна?

-Бид нар энэ хүнийг шалгаж байгаа. Шалгах ч ёстой. Герман улсын Цагдаагийн байгууллагын Мөрдөх байцаах албанаас хоёр мөрдөн байцаагч ирж байгаа. Өнөөдөр /өчигдөр/ өглөө энд ирсэн. Сая бид нар уулзаад хамтран ажиллах, шалгах ажлынхаа талаар ярилцсан. ХБНГУ-ын иргэн Монголд амьдрахаар ирээд 13 сая евротойгоо сураггүй алга болсон хэрэгт сэжиглэн шалгаж байгаа. Хэзээ ч, ямар ч үед мөрдөн байцаан шалгах үйл ажиллагаа явагдах л ёстой.