1. Удирдлага, зохион байгуулалт, эдийн засгийн бодлогын хүрээнд:

7-р сарын 4-ний өдөр удирдах ажилтны сонгон шалгаруулалтыг зохион байгуулсан ба 12 ажлын байранд 29 иргэн өрсөлдөж, 11 ажлын байранд 20 иргэн тэнцсэн ба удирдах албан тушаалд томилогдох төрийн жинхэнэ албаны удирдах ажилтны нөөцөд бүртгэлээ.
Ардын хувьсгалын 92 жил, аймгийн баяр наадам, “Эрдэнэт үйлдвэр” ХХК-ийн 35 жилийн ойг тохиолдуулан Эрдэнэт хотын түүхэн хөгжил, бүтээн байгуулалтад оруулсан онцгой хувь нэмрийг үнэлж Монгол УИХ-ын даргын зөвлөх Д.Одхүү, “Эрдэнэт үйлдвэр” ХХК-ийн анхдагч, Монгол улсын Хөдөлмөрийн баатар Д.Жаргалсайхан нарыг “Эрдэнэт хотын Хүндэт иргэн” медалиар, эрхэлсэн ажилдаа хөдөлмөрийн өндөр амжилт гаргасан зарим иргэдийг төрийн дээд шагнал болон аймгийн Иргэдийн Төлөөлөгчдийн хурал, Засаг даргын нэрэмжит шагналаар тус тус шагнаж урамшууллаа.
7 дугаар сарын 10-нд “Монгол Улсын төрийн далбааны өдөр”-ийг тэмдэглэж, Зэвсэгт хүчний 186 дугаар анги,  Цагдаагийн газар, Онцгой байдлын газар, Дотоодын цэргийн 816 дугаар тусгай салбарын цэргийн алба хаагчид ёслолын жагсаал зохион байгуулсан ба аймгийн баяр наадамд бэлтгэх, зохион байгуулах салбар комиссууд 7-р сарын 10-11-ний өдрүүдэд баяр наадмын үйл ажиллагааг амжилттай зохион байгууллаа.
Аймгийн Засаг даргын шийдвэрээр аймгийн баяр наадмын үндэсний сурын харваанд түрүүлсэн “Металл индустрал” ХХК-ийн тамирчин В.Бат-Эрдэнэд “Аймгийн мэргэн” цол, хүчит бөхийн барилдаанд 8 давж түрүүлсэн Завхан аймгийн Завханмандал сумын харъяат Б.Уртбаярт “Аймгийн арслан”, 7 давж үзүүрлэсэн Булган аймгийн Сэлэнгэ сумын харъяат Б.Гантөмөрт “Аймгийн заан”, 5 давж шөвгөрсөн Булган аймгийн Сэлэнгэ сумын харъяат М.Туваантай, Булган аймгийн Сайхан сумын харъяат Х.Жаргаланбаатар, Орхон аймгийн Баян-Өндөр сумын харъяат Б.Маргад-Эрдэнэ, Увс аймгийн Түргэн сумын харъяат З.Төртогтох нарт “Аймгийн начин” цолыг тус тус олголоо.
Аймгийн ЗДТГ-ын дэргэдэх “Нэг цонхны үйлчилгээ”-гээр 500 гаруй иргэн үйлчлүүлсэн ба “Иргэдийн санал хүсэлтийг хүлээн авах төв”-д 327 иргэнээс 397 гомдол, санал, хүсэлт ирснээс 219-ийг шийдвэрлэж, 178 гомдол, саналыг холбогдох байгууллага, албан тушаалтанд уламжилсан байна.
 “Иргэдээ сонсоё” 70353511 утсанд ирсэн гомдол, санал, хүсэлт, өргөдлийн дагуу Иргэний танхимд холбогдох байгууллага, албан тушаалтнуудтай уулзалт хийж, хэвлэл мэдээллийн хэрэгслээр дамжуулан иргэдэд тайлбар, мэдээлэл хийлээ.
Иргэдээс төрийн байгууллага, албан тушаалтанд гаргасан өргөдөл, гомдлыг шийдвэрлэх  талаарх 2013 оны эхний хагас жилийн тайлан, Засгийн газрын тогтоол, шийдвэрийн хэрэгжилтийн 2013 оны эхний хагас жилийн тайланг ЗГХЭГ-т хүргүүлэв. Засгийн газрын 125 тогтоолын 149 заалтын хэрэгжилт 62.4 хувьтай буюу 2013 оны I улирлаас 14.3 хувиар өссөн байна.
Тайлангийн хугацаанд аймаг, сумдын Засаг даргын Тамгын газар болон хэлтэс,  албадууд, төрийн чиг үүрэг бүхий байгууллага, ажилтанд нийт 16128 өргөдөл, гомдол ирсний 8730 нь шийдвэрлэх хугацаа болоогүй, 7398 буюу 45,8  хувь нь хуулинд заагдсан хугацаанд шийдвэрлэгдлээ. Дээрх ирүүлсэн нийт өргөдлөөс аймгийн Засаг даргын Тамгын газарт 3794 өргөдөл, гомдол, санал, хүсэлт ирүүлсний 2794 нь амаар болон утсаар, 1000 нь бичгээр ирсэн байна. Үүний 2106 нь хүсэлт, 1378 нь гомдол, 270 нь санал, 40 нь талархал байна. 
Монгол Улсын Ерөнхийлөгчийн Тамгын газраас 1, Улсын Их хурлын Тамгын газраас 2, Засгийн газрын Хэрэг эрхлэх газраас 1 албан бичгээр нийт 4 иргэний өргөдөл шилжүүлснийг хуулинд заасан хугацаанд судалж шийдвэрлэн холбогдох байгууллагад хариуг хүргүүлсэн. 
Мөн аймгийн Засаг даргын Тамгын газарт 2013 оны эхний хагас жилд  байгууллага, аж ахуйн нэгжээс нийт 1274 албан бичиг ирсний 95 нь хариутай байснаас 93-ийг хугацаанд нь шийдвэрлэн хариуг холбогдох байгууллагуудад хүргүүлсэн байна.
Статистикийн мэдээгээр 7 сарын эхний байдлаар аймгийн төсөвт 15.5 тэрбум төгрөгийн орлогыг төвлөрүүлж, төсвийн гүйцэтгэл 98.0 хувьтай ба татварын бус орлого 3.3 дахин давж биелж, татварын орлого 2.8 хувиар тасарсан байна. Нийт орлогын 1.2 хувийг татварын бус орлого, 98.8 хувийг татварын орлого эзэлснээс 60.2 хувийг орлогын албан татвар, 14.5 хувийг өмчийн татвар, 3.8 хувийг тусгай зориулалтын орлого, 21.5 хувийг бусад татвар эзэлж байна.
Орон нутгийн төсвөөс төлөвлөгөөт зардлын 92.2 хувийг санхүүжүүлж 23.1 тэрбум төгрөгийн зарлага санхүүжилт хийсний 4.8 хувийг нийгмийн даатгалын шимтгэлд, 11.7 хувийг хөрөнгийн зардалд, 16.3 хувийг бараа үйлчилгээний зардалд, 23.5 хувийг татаас ба урсгал шилжүүлэгт, 43.7 хувийг цалин хөлсний зардалд зарцуулжээ.
2.    Хууль, эрх зүйн бодлогын хүрээнд:
Цагдаагийн газрын мэдээгээр 7 сарын эхний байдлаар иргэд, аж ахуйн нэгж, байгууллагаас 4809 гомдол, мэдээлэл, санал хүлээн авсны 1304 буюу 27 хувь нь гэмт хэргийн шинжтэй, 73 хувь нь захиргааны зөрчлийн шинжтэй гомдол, мэдээллүүд эзэлж байна. Гэмт хэргийн шинжтэй 374 гомдол, мэдээлэлд эрүүгийн хэрэг үүсгэж, 892 гомдлыг прокурорын байгууллагад хүргүүлж, 38-ыг шалгаж байна.
Мөн хугацаанд тус цагдаагийн газарт бүртгэгдсэн 351 гэмт хэргээс сэжигтнээр тооцвол зохих этгээд нь тогтоогдоогүй 86 хэргийн илрүүлж, илрүүлэлт 52 хувьтай байгаа ба одоогоор 77 хэргийн эзэн холбогдогч нь тогтоогдоогүй байна.
Архивын тасгаас 16 хадгаламжийн нэгжийн 3296 хуудас баримтыг цахимд  хэлбэрт оруулсан ба 43 иргэнд лавлагаа өгөв. Ажилласан жил, тэтгэвэрийн даатгалын шимтгэлийг нөхөн тооцох тухай хуулийн дагуу өөрөөс үл хамаарах шалтгаанаар 1990-1995 оны хооронд ажил хөдөлмөр эрхлээгүй буюу эрхлэх боломжгүй байсан иргэний  ажилласан жил нь тасарсан хугацааг ажилласнаар нөхөн тооцох, 1995-2000 оны хооронд нийгмийн даатгалын шимтгэл нь төлөгдөөгүй буюу төлөх боломжгүй байсан иргэний   даатгуулагч өөрөө төлөх 10 хувийг тухайн онуудын хөдөлмөрийн хөлсний доод хэмжээнээс тооцож төлөх хүсэлтэй иргэдэд архивын холбогдох лавлагаа мэдээлэл, зөвлөгөө өгөх ажил явагдаж байна.
Мөн Архивын Ерөнхий газрын арга зүйн удирдлагын газрын ажлын хэсэг  манай аймагт ажиллаж байна.
3.    Боловсрол, эрүүл мэнд, урлаг, спорт, нийгмийн хамгааллын бодлогын хүрээнд:
Багшийн мэргэжил дээшлүүлэх институттэй хамтран “Хүүхэд нэг бүрийг хөгжүүлэх сургалтын арга зүй” сэдэвт сургалтыг зохион байгуулж 850 багшийг хамрууллаа. 
“Тогтвортой амьжиргаа-II” төсөл, “Бичил санхүүгийн хөгжлийн сан”-тай хамтран “Хөдөө орон нутгийн иргэдийн санхүүгийн боловсролыг дээшлүүлэх нь” сэдэвт сургалтыг зохион байгууллаа. Уг сургалтанд жижиг, дунд бизнес эрхэлдэг 60 гаруй иргэд, банк санхүүгийн ажилтнууд оролцсон бөгөөд бизнесээ хэрхэн төлөвлөх, хэрхэн хуримтлал үүсгэх, зах зээлийн чиг хандлагын талаар мэдээлэл солилцов.
7-р сарын 1-4-ний өдрүүдэд Солонгос улсаас 21 хүний бүрэлдэхүүнтэй нүдний эмч нарын баг манай аймагт ажиллан 685 иргэнд үнэ төлбөргүй үзлэг, 49 иргэнд нүдний мэс ажилбар хийсэн байна.
 “Монголын тамирчдын өдөр”, “Олимпийн хөдөлгөөнийг дэмжих” сарын аяны бүх нийтийн гүйлтийн арга хэмжээг зохион байгуулж, төрийн болон төрийн бус байгууллагын 90 гаруй ажилтан, албан хаагч, тамирчид оролцов.
Хөдөлмөрийн хэлтсээс “Ажилтай орлоготой-Монгол хүн” хөтөлбөрийн хүрээнд үндэсний мэргэжилтэй ажилтан бэлтгэх сургалтанд хамрагдсан 138 иргэнд сертификат олгож, ажил олгогч суралцагчдын хооронд хөдөлмөрийн гэрээ хийлээ.
Аймгийн Засаг даргын Тамгын газар нь хөгжлийн бэрхшээлтэй иргэдэд төрийн үйлчилгээ үзүүлэхэд таатай орчныг бүрдүүлэхэд чиглэсэн босгогүй хаалга, бие засах газруудыг хийж тохижуулсны зэрэгцээ хөгжлийн бэрхшээлтэй хүүхдийн “Найдвар” төвийн үйл ажиллагаанд дэмжлэг үзүүлж 30.0 сая, хөгжлийн бэрхшээлтэй хүүхдүүдийн эцэг эхийн холбооны үйл ажиллагааны зардалд 10.0 сая төгрөгийг орон нутгийн төсвөөс санхүүжүүлж, хөгжлийн бэрхшээлтэй иргэдийн 8 төрийн бус байгууллагатай хамтран нийт 11,7 сая төгрөгийн ажил үйлчилгээг гэрээгээр гүйцэтгүүлсэн байна.
Улсын бүртгэлийн хэлтсийн мэдээгээр 7 сарын эхний байдлаар 297 өрхийн 1188 хүн шилжин явж, 267 өрхийн 1069 хүн шилжин иржээ. Шилжин ирэгсдийн 28.7 хувь нь Улаанбаатар хотоос, 21.1 хувь нь Булган аймгаас, 10.5 хувь нь Сэлэнгэ аймгаас шилжин ирсэн нь дийлэнх хувийг эзэлж байна.
4.    Хүнс, хөдөө аж ахуй, байгаль орчны бодлогын хүрээнд:
Энэ намрын ургац хураалтанд ажиллах техник, тоног төхөөрөмжийн засварын ажил хийгдэж байгаа бөгөөд одоогоор 5 үтрэм, 3 комбайн, 20 хадагч, төмс ухагч 8, будаа цэвэрлэгч 25, сортлогч 3 болон бусад техникүүд бэлэн болоод байна.
Эрчимжсэн мал аж ахуйн сүүний чиглэлийн 4000 үхэрт бруцеллёз, лейкозын шинжилгээ хийлээ.
7 сарын эхний байдлаар мал эмнэлэгийн байгууллагууд 109.8 мян.толгой малд үзлэг, үүнээс халдварт өвчнөөс урьдчилан сэргийлэх арга хэмжээнд 151.3, паразит өвчнөөс урьдчилан сэргийлэх арга хэмжээнд 203.3 мянган малыг хамруулсан байна.
Оны эхний төллөх эх малын 87.3 хувь буюу 77.1 мянган хээлтэгч мал төллөж, гарсан төлийн 99.4 хувь нь бойжиж байна. Өмнөх оны мөн үеэс төллөлт 1.8 пунктээр, төл бойжилт 0.8 пунктээр их, төлийн хорогдол 53.4 хувиар бага байна.
Аймгийн хэмжээнд 1623 толгой том мал зүй бусаар хорогдож, мал онд оролт 99.12 хувьтай байна. Баян-Өндөр сумын төллөх эх малын 88.9 хувь, Жаргалант сумын төллөх эх малын 89.6 хувь нь төллөж , гарсан төлийн 99.4-99.6 хувь нь бойжиж байна.
5.    Үйлдвэрлэл үйлчилгээ, байгаль орчин, дэд бүтцийн салбарын бодлогын хүрээнд:
7-р сарын 4-5-нд Орхон-Булган аймгийн Худалдаа Аж Үйлдвэрийн Танхимтай хамтран аймгийн үйлдвэрлэл эрхлэгчдийн “Эрдэнэтэд үйлдвэрлэв-2013” үзэсгэлэн яармагийг Найрамдал талбайд зохион байгууллаа. Уг үзэсгэлэн худалдаанд хүнсний үйлдвэрлэл, сүлжмэл, оёдол, бэлэг дурсгал, арьс ширний,  барилгын, хэвлэлийн гэх мэт 12 төрлийн  600 гаруй нэрийн бүтээгдэхүүнээр  нийт 60-аад иргэн, аж ахуйн нэгжийн төлөөлөл оролцлоо.
7 сарын эхний байдлаар аж үйлдвэрийн салбарт 582.1 тэрбум төгрөгийн бүтээгдэхүүн үйлдвэрлэн, 596.5 тэрбум төгрөгийн бүтээгдэхүүн борлуулсан ба худалдаа нийтийн хоолны 803 цэг салбар 35.4 тэрбум төгрөгийн бараа гүйлгээ хийж, бараа гүйлгээний нийт хэмжээ өнгөрсөн оны мөн үеэс 39.6 хувиар өсчээ.
Монгол улсын Ерөнхийлөгчийн зарлигийн дагуу “Нэг иргэн-1, нэг аж ахуйн нэгж, байгууллага-5 мод” тарих хөдөлгөөн өрнүүлэн Хүрэн булагийн ам, Эрдэнэт голын эх, Найрамдал өндөрлөг, Сархиа уул болон байгууллага, аж ахуйн нэгжүүд орчиндоо нийт 3080 гаруй улиас, хайлаас, гацуур, шар хуайс, монос, нарс, шинэс мод тарьж, хотын ногоон байгууламжийг сэргээх, шинээр байгуулах зорилгоор нийт 57 машин буюу 456 м3  хар шороо, 30 кг зүлэгний үр тараасан бөгөөд “Эрхэсийн гялбаа” ХХК-наас 800 гаруй хөдөлмөрийн багаж төхөөрөмж нийлүүллээ.
Цэвэрлэх байгууламжийн өргөтгөлийн шав тавих ёслолын ажиллагаа болж, нээлтийн ажиллагаанд Бүгд Найрамдах Франц улсаас манай улсад сууж буй онц бөгөөд бүрэн эрхт  элчин сайд, Барилга хот байгуулалтын яам, Худалдан авах ажиллагааны газар болон аймгийн удирдлагууд, гүйцэтгэгч компанийн төлөөлөл оролцлоо.
Жаргалант сумын Улаантолгой багийн нутаг дэвсгэрт байрлах Хангал голын дагуух бөөн бургасыг нөхөн сэргээх үүднээс 1 га газарт 2500 ширхэг мод тарьж, усалгааны шуудуу татах, хашааг засварлах ажил сарын хугацаанд хийж байгаа ба модны ургалт 85%-тай байна.
“Тогтвортой амьжиргаа-II” төслөөс Жаргалант суманд хогны менежментийг сайжруулах зорилгоор хог тээвэрлэх зориулалтын авто машинтай болгосноор орон сууц, гэр хорооллын айл өрхүүдийн хог хаягдлыг хуваарийн дагуу тээвэрлэх ажлыг зохион байгуулж байна.
Монгол улсын иргэнд газар өмчлүүлэх тухай хуулийг хэрэгжүүлж эхэлсэн хугацаанд газар олгох талаар хүсэлт гаргасан 15.0 мянган өрхөд 1179,11 га газрыг гэр бүлийн хэрэгцээний зориулалтаар олгосноос 24,13 га газрыг энэ оны эхний хагас жилд олгосон байна.
7 сарын эхний байдлаар тээврийн байгууллагууд 34.0 мянган тн ачаа тээвэрлэн, 11.3 сая.тн/км-ийн ачаа эргэлт, 4.1 сая зорчигч тээвэрлэн, 58.7 сая хүн/км–ийн зорчигч эргэлт хийж, тээврийн үйлчилгээнээс 6.4 тэрбум төгрөгийн орлоготой ажиллажээ. Өнгөрсөн оны мөн үеэс тээврийн орлого 6.2, ачаа эргэлт 8.2 хувь, зорчигч эргэлт 0.3 хувь, тээсэн ачаа 8.6 хувиар өсч, тээсэн зорчигч 0.1 хувиар буурсан байна. Одоогоор зорчигч тээврийн үйлчилгээнд 266 микроавтобус, 461 такси гарч тэдгээрт 960 хүн ажиллаж байна.