бизнесийн аль ч төрөлд амжилттай карьер илэрхийлэгч нэгэн. Дуулж, бүжиглэж, нэвтрүүлэг хөтлөхөөс гадна кино, сурталчилгаанд ч чадварлаг тоглодог. Энэ бүх мэргэжлийн чадвараа сайн ээж, сайхан эхнэрийн үүрэгтэйгээ ч гайхамшигтай зохицуулдаг. Ажил, амьдралын олон албаа хэрхэн чадварлаг удирдан зохицуулдаг, түүний хажуугаар хэрхэн гоё сайхан харагддаг нууцаасаа “Оддын амьдрал” цахим сэтгүүлд өгсөн ярилцлагадаа дэлгэрэнгүй ярьжээ.

-Вера, Таны карьер яг одоо оргил үедээ яваа мэт. Дуулсан дуу болгон тань хит хэвээрээ, тоглосон кинонууд тань аль ч прокатад тэргүүлсээр байна. Таны хувьд дуу хөгжим, кино хоёрын аль нь илүү сонирхолтой байна?
-Шинэ бүхэнд өөрийгөө сорих нь надад сонирхолтой байдаг. Гэтэл кино энэ хүсэлд маань сайхан боломжийг бүрдүүлдэг. Гэхдээ би дуучин хүн болохоор дуу хөгжим миний карьерт нэгдүгээрт оршино. Аль ч тохиолдолд би өөрийгөө улам дээшлүүлэх, хөгжүүлэхийн тулд суралцсаар байх болно.

-“Ширэнгэн ой” нэртэй шинэ төслийнхөө талаар танилцуулаач. Эл ажлаараа нэг сарын турш Таиландад амьдарсан гэсэн?
-Гэр бүлийн халуун дулаан уур амьсгалыг илэрхийлсэн кино. Он солигдохын өмнөхөн дэлгэцнээ гарах болов уу. Хүний амьдралын хамгийн чухал сэдэв болсон эр, эмийн харилцааны асуудлыг энд хөндсөн. Сергей бид хоёр эхнэр, нөхрийн дүр бүтээсэн.

-Кино зураг авалтын үед хамгийн хэцүү нь юу байв?
-Удаан хугацаагаар гэртээ байхгүй нь хэцүү байсан. Киноны үйл явдлын дийлэнх хэсэг нь хүн амьтангүй арлын ширэнгэн ойд өрнөдөг. Энэ хэсгийн зураг авалтыг Таиландад хийсэн юм л даа. Гэр бүлийнхэнтэйгээ удаан хугацаагаар хамт байгаагүй ч байнга л утсаар ярьж холбогддог байлаа. Мэдээж өглөөний дөрвөн цагт босч зураг авалтад орох, цаг агаарын эрс өөр нөхцөлд дасах зэрэг бэрхшээлүүд байсан.

-Таны тоглосон кинонуудаас аль нь танд илүү таалагддаг вэ?
-Тэдгээрийг харьцуулах аргагүй. Бүгд л өөрийн гэсэн онцлог түүхтэй. Тиймээс тэр нь сайн, муу гэх утгагүй. Бүтээсэн дүр бүхэн маань хөдөлмөр шаардсан онцгой ажил байсан болохоор эцэст нь бүгдээс нь асар их таашаал мэдэрдэг.

-Та хоёр хүүхэдтэй. Хувийн амьдрал, ажлаа хэрхэн зохицуулдаг вэ?
-Ажлынхаа графикийг би өөрөө гаргадаг болохоор гэр бүлдээ зарцуулах цагаа аль болох уртасгахыг хичээдэг. Ямартаа ч энэ хоёр ажлаа сайн зохицуулж байгаа гэж өөрийгөө дүгнэдэг.

-Ажил төлөвлөөгүй өдрөө хэрхэн өнгөрүүлдэг вэ?
-Нэн тэргүүнд 10.00 цаг хүртэл унтна. Хэдийгээр ийм өдөр ховорхон тохиолддог ч буйдан дээр амарч өнгөрүүлэх нь хамгийн төгс хувилбар. Чөлөөт цагаа гэр бүл, найз нөхөдтэйгөө өнгөрүүлэх дуртай. Заримдаа зөвхөн өөртөө анхаарал хандуулах өдөр гэж гаргах нь ч бий. Сэтгэл зүрх маань юу хүсч байна, тэр бүхнийг гүйцэлдүүлэхийг хичээдэг.

-Хүүхдүүддээ хоол бэлтгэж өгдөг үү. Танд гарын хоол гэж байдаг уу?
-Ер нь бол хоол хийж чадна л даа. Гэхдээ хийдэггүй. Өөртөө олгосон чөлөөт цагаа гал тогоонд бус хүүхдүүддээ зарцуулахыг илүүд үздэг. Харин гэр бүлийн хүрээнд амарч буй үедээ хамтдаа хоол хийнэ.

-Нэгэнт хоолны талаар ярьсных, биеийн галбираа хэрхэн төгс хэвээр нь хадгалдаг нууцаасаа дэлгээч. Удамшлын ач гавьяа юу таны хүч хөдөлмөрийн үр дүн үү?
-Хоол хүнсэнд ач холбогдол өгдөг ч хамгийн чухалд тооцдоггүй. Хоолны дэглэм барих тал дээр муу. Өөрөө өөртөө хориг тавьчихаад түүнийгээ эвдэж байгаа мэт үйлдэл болчихдог. Тиймээс арай хөнгөн хоолны дэглэмд шилжихийг илүүд үздэг. Энэ талаар би “Вера Брежнева. Гоо сайхны нууцууд” гэсэн видео хуурцаг гаргасан. Энэхүү хуурцагтаа зөв хооллолтын талаар төрөл бүрийн зөвлөмж, биеийн галбираа хамгаалах цогц дасгал зэргийг багтаасан. Зөв хооллолтын тал дээр хамгийн чухал зөвлөгөө бол их энгийн шүү дээ уг нь. Амттаны хэрэглээгээ багасгаж, хийжүүлсэн, чихэрлэг ундаа, талх, согтууруулах зүйлсээс татгалзахад л үр дүн нь илэрч эхэлнэ. Мөн унтахаас дөрвөн цагийн өмнө оройн хоолоо идсэн байх. Зургаан цагаас хойш идэхийг хориглосон алтан дүрэмтэй.

-Спортоор хичээллэдэг үү. Ямар дасгалыг түлхүү хийдэг вэ?
-Киевт байх үедээ долоо хоногт 3-4 удаа зааланд хичээллэдэг. Ер нь бүх булчингаа ажиллуулсан дасгал хийхийг зорьдог. Энэ тэрүүгээр явахдаа ч буудлын өрөөнд дасгалуудаа тогтмол хийхийг хичээдэг.

-Гоо сайхандаа хэрхэн анхаардаг вэ. SPA салоноор тогтмол үйлчлүүлдэг үү?
-Сард дунджаар хоёр удаа гоо сайханд ордог. Миний арьсанд ямар арчилгаа шаардлагатайг мэргэжилтэн хэлээд өгдөг. SPA салонд орохдоо гол төлөв чийгшүүлэх, нөхөн сэргээх үйлчилгээг хийлгэдэг. Ялангуяа зуны улиралд ийм үйлчилгээ зайлшгүй шаардлагатай болдог. Мөн салонд төрөл бүрийн массаж хийлгэн хэвтэх нь асар их таашаал өгдөг.

...Вера 1982 оны хоёрдугаар сарын 3-нд Украины Днепропетровск мужийн Днепрожержинск хотод мэндэлсэн. 2003-2007 онд “ВИА Гра” хамтлагт харьяалагдаж байгаад 2008 оноос бие даан уран бүтээл туурвих болсон. Поп чиглэлээр уран бүтээлээ туурвидаг тэрбээр хамтлагийн бүрэлдэхүүнд байхдаа зургаан цомог, гурван видео хуурцаг гаргасан бөгөөд бие дааснаасаа хойш уран бүтээлийн нэг цомог, гоо зүйн зөвлөмжийн видео хуурцаг гаргажээ. Мөн 2003- 2013 оны хооронд тайз дэлгэцийн 10 кинонд гол болон туслах дүр бүтээсэн. 2008 оноос телевизийн салбарт ажиллаж буй. Өдгөө тэрбээр хоёр охины хамт амьдарч байна. Том охин Соня нь хэдэн жилийн турш хамтран амьдарсан Виталий Войченкогийн хүүхэд. Вера 2006 онд Украины бизнесмен Михаил Кипермантай хуримлан Сара гэх охинтой болсон. Гэвч өнгөрсөн жилийн аравдугаар сард тэд албан ёсоор салснаа мэдэгдсэн...

-Та тайзан дээр тачаангуй төрхийг илтгэдэг. Жирийн амьдралд ямархуу загварыг эрхэмлэдэг вэ. Та ямар загвартай хувцас өмсөх дуртай вэ?
-Тайзнаас гадуур биед эвтэйхэн мөртлөө гоёмсог хувцаслахыг хичээдэг. Би тийм ч их хувцас хэрэглэлтэй биш. Ер нь шопинг хийх дуртай биш гэх үү дээ. Гэхдээ хэзээ ч өмсөхөд тааламжтай, заримдаа бүр бүтэн улирлын турш хагацдаггүй хувцас байдаг.

-Загвар хэр хөөдөг вэ. Загварын сэтгүүлүүд худалдан авах, загварын долоо хоногоор эргэлдэх мэтээр анхаарал хандуулдаг уу?
-Хэрвээ чөлөөт цаг гарвал дуртайяа сэтгүүл үзнэ. Гэвч нислэгийн үед болон нислэг хүлээх зуур л хийдэг ажил маань болж дээ. Мэдээж нийгэмдээ хөл нийлүүлэн алхахыг хичээдэг боловч хэт загвар хөөх нь миний тухай л лав биш. Өөртөө зохисон зүйлсийг л худалдан авч чадна.

-Хэдэн хос гуталтайгаа нэрлэж чадах уу?
-Хангалттай бий.

-Та дээдсийнхний арга хэмжээнд бараг оролцдоггүйгээрээ бусад алдартнаас ялгардаг. Ийм зүйлд зарцуулах цаг байдаггүй юм уу эсвэл сонирхолгүй юу?
-Цаг хугацааг ингэж өнгөрүүлэх байдал надад таалагддаггүй. Чөлөөт цаг гарвал гэр бүлийнхэнтэйгээ байсан нь илүү дээр.

-Ямар нэг хобби бий юу? Зураг зурах юмуу элдвийг цуглуулдаг уу?
-Үгүй. Амьдрал маань олон төрлийн ажлаар дүүрэн болохоор хобби гэх зүйлд зарцуулах цаг байдаггүй.

-Сүүлийн үед уншсан номнуудаас тань онцгойлон таалагдсан зохиол байна уу?
-Стиг Ларссоны “Луун шивээст бүсгүй” гэдэг ном таалагдсан. Хамгийн тайван, нам гүм гэгддэг Шведэд хүртэл орчин үеийн нийгэм ямар харгис, хэрцгий асуудлаар дүүрэн болохыг илтгэсэн, эмэгтэйчүүдийн эрхийн төлөөх тэмцэл ямар байдгийг тод илэрхийлсэн сонирхолтой зохиол байна лээ.

-Та байнга л гадагш аялдаг. Хамгийн их дурсамж үлдээсэн аяллынхаа талаар дурсаач?
-Ихэвчлэн Европын орнуудаар л аялдаг. Амралтын өдрүүдэд ч тийш нисчих боломжтой болохоор. Хамгийн сүүлд Лос-Анжелесийг зорьсон. Хагас жилийн өмнө Мексикт очсон. Тэнд олон зүйл надад таалагдсан болохоор хамгийн дурсамжтай аяллуудын нэг гэж болно. Мексикчүүд сайхан сэтгэлтэй, эелдэг хүмүүс болохоор жуулчин болгонд энэ нь мэдрэгдэж, таалагддаг. Хамгийн анх “ВИА Гра” хамтлагт байхдаа гадаад явж байлаа. Харин сүүлийн үед аяллаас эрч хүч авч, сэтгэлээ сэргээх зорилгоор гадагш явдаг болсон.

-Том охин Соня тань хэдийнэ 11 нас хүрчээ. Орчин үеийн хүүхдүүдийг өмнөх үеэс эрс ялгаатай гэдэг. Та хүүхэдтэйгээ хэл амаа ойлголцож чаддаг уу?
-Охин маань гадаад төрх төдийгүй зан аашаараа ч надтай их адилхан. Хэдийгээр 11- хэн настай хүүхэд ч заримдаа өөрийнхөөрөө зүтгэх үе бишгүй бий. Асуудал тулгарах үед би тайван ярилцаж, тайлбарлахыг хичээдэг. Гэвч заримдаа албан хүчээр өөрийнхөө үгэнд оруулах шаардлага гардаг. Хүүхэд бүрийн насны онцлогтой хамааралтай хэцүүхэн үеүүдийг гэр бүл бүр туулж гардаг. Хамгийн гол нь тэднийг байгаа чигээр нь хайрлах нь чухал.

-Урлагийнхан хүүхдүүдээ шоу бизнест багаас нь хөтлөх юмуу замыг заах нь түгээмэл. Охин тань бас бүжигчин юмуу жүжигчин болно гэвэл Та хэрхэн хүлээн авах вэ?
-Одоохондоо сайн мэдэхгүй байна. Тэгээд ч түүний өмнөөс төлөвлөгөө гаргана гэдэг утгагүй. Хүүхдэд хүүхэд нас гэж байх ёстой.

-Та өөрөө төлөвлөгөө гаргадаг уу?
-Огтхон ч үгүй. Өөрөө бий болох зүйлийг хүлээх дуртай ч юм уу. Түүнээс гадна ямар нэг гайхамшиг тохиолдоно гэдэгт үргэлж итгэдэг.

-Амжилттай яваа эмэгтэй бүр өөрийн гэсэн давтагдашгүй стильтэй байдаг. Та дүр төрхөө өөрөө бий болгодог уу имиж мейкерийн зөвлөгөө юу?
-Миний дүр төрх бол би. Харин загвар бол сэтгэл санааны байдал, сонирхлын маань илэрхийлэл. Зураг авалтын үед мэргэжилтнүүдийн тусламжийг авдаг. Харин өдөр тутмын амьдралдаа өөрийнхөөрөө л байдаг. Найз нөхөд, ойр дотныхон янз бүрийн зөвлөгөө хэлбэл баяртайгаар хүлээн авдаг.

-Хүний төрх байдалд хамгийн чухал нь юу бол?
-Мэдээж сэтгэл санааны байдал. Дүр төрхийг хамгийн тодоор илэрхийлэгч дотоод сэтгэл л хамгийн чухал чимэг гэж боддог. Гоёмсог чамин хувцас, арчилж тордсон үс, арьс гээд техник талын зүйлсийг хэн ч бий болгож чадах ч аз жаргалтай, эрч хүчтэй, дотоод гоо сайхныг зөвхөн тухайн хүн л өөрөө бий болгож чадна.

-Коко Шанель “Хэрвээ эмэгтэй хүн нүүрээ буддаггүй бол өөртөө хэт итгэлтэйн шинж” гэж хэлсэн байдаг. Та үүнтэй санал нийлэх үү?
-Энэ бол хувь хүний л үзэл. Бүх зүйл тухайн орчин нөхцөлөөс хамаарна шүү дээ. Мэдээж улаан хивсний ёслол дээр будаггүй ирвэл жинхэнэ утгагүй тоглоом болох байх. Түүнээс гадна нүүрээ будах нь хүн тус бүрийн онцлогтой хамааралтай асуудал. Би хувьдаа өдөр тутмын амьдралд аль болох будагнаас хол байж, бага хэрэглэхийг илүүд үздэг. Өөгүй цэвэрхэн арьстай хүн заавал будах шаардлагагүй байж болно.

Ц.МӨНХ