Ё.Отгонбаяр парламентаас явж, Д.Түмэнжаргал гишүүн болох уу

2013-09-04

УИХ-ын ээлжит бус чуулган эхлэхэд арав гаруйхан хоног үлдээд байна.

Ээлжит бус чуулганы хуралдаанаар мэдээж нийгэм эдийн засгийн амьдралд үүсээд байгаа таагүй нөхцөл байдлыг хэрхэн даван туулах вэ гэх асуудлаас гадна улсын төсөвт тодотгол хийх эсэх асуудлыг мөн хэлэлцэж ярилцахаар болжээ.

Ээлжит бус чуулган хуралдаж дуусангуут үргэлжүүлэн ээлжит хуралдаанаа хийх бөгөөд чуулган завсарлах хугацаанд өргөн баригдсан, хэлэлцүүлэгт бэлтгэсэн хуулийн төслүүдийг батлах юм байна.

Үүнээс гадна, энэ намрын чуулганаар хоёр, гурван ч анхаарал татсан асуудлыг хэлэлцэх бололтой. Нэгдүгээрт, УИХ дахь МАН-ын гишүүд Ерөнхий сайдыг огцруулах хүсэлтийг УИХ-ын даргад хүргүүлэх талаар ярьж байгаа бөгөөд өмнөхөөс нэлээд ул суурьтай үндэслэл, шалтгаануудыг энэ хугацаанд бэлтгэн боловсруулсан гэх.

Хоёрдугаарт, УИХ-ын гишүүн Г.Уянгын УИХ-ын даргад хүргүүлсэн шаардлага, хүсэлтийн дагуу Оюутолгойн далд уурхайн хөрөнгө оруулалт зогссон, үүнээс үүдсэн эдийн засаг таагүй нөхцөл байдлын асуудлаар Оюутолгойд Монголын талыг төлөөлдөг ТУЗ-ийн гишүүдийг чуулганд суулгаж, мэдээлэл авах тухай асуудал юм.

Харин гурав дахь нь УИХ-ын гишүүн Ё.Отгонбаярын бүрэн эрхийг түдгэлзүүлэх эсэх. Энэ гурван асуудлын эхний хоёр нь одоогоор тодорхой бус, дөнгөж мэдээлэл төдий байгаа бол Ё.Отгонбаярын талаархи мэдээлэл баттай болжээ.

Прокурорын байгууллагаас УИХ-ын чуулган хуралдаж эхлэнгүүт бүрэн эрхийг нь түдгэлзүүлж өгөх тухай албан бичгийг хүргүүлэх аж. Түүнийг шалгаж, байцаалт явуулахад бүрэн эрх нь саад болоод байгаа учраас тэд хүсэлтээ хүргүүлэхээр болсон гэдгийг албаны эх сурвалж баталж байгаа.

Ингэсэн тохиолдолд Ардын намынхан яагаад ч Ё.Отгонбаярыгаа авч үлдэж чадахгүй. Эхнэртэйгээ нийлж их хэмжээний мөнгө авлигад авсан, ажлаа хийж байсан албан хаагчаас авлига нэхэж, зодож, дарамталсан цаашлаад БСШУ-ы сайд байхдаа хойш, урагш нь хольж хутгасан тендер гээд олон асуудлаар шалгуулах нь тодорхой болчихсон.

Идэж уухын хэнээ туссан Ардын намынхны нэгэн төлөөлөл болсон энэ эрхэмд бүхэл бүтэн нэг улсын боловсролын салбарыг атгуулж л байдаг. Ард түмэн бид ч тэнэг юм, Ё.Отгонбаяр ч зайтай эр юм. Ё.Отгонбаярын хувьд одоо шалгуулах цаг нь болсон. Улс төрийн аль зөөлөн сандал болгоныг дамжиж, халаасандаа чамгүй ихийг хуримтлуулчихаад төр засгийг занаж байсан нь саяхан.

Гэтэл нэг л өдөр ханд нь хага дарагдаж, ор сураггүй болсон ч хуулиас хаашаа ч зугтаж чадахгүй гэдгийг прокурорын байгууллага харууллаа. Одоогоор хаана, юу хийж яваа нь тодорхойгүй, түүнийг мөрдөн байцаах газар, прокурорын байгууллагаас дуудсан зүйл байхгүй байгаа.

Гэхдээ л донтох шахтлаа дурлаад байсан жиргээнд нэгдэхгүй, хэвлэл мэдээлэлд ам алдахгүй байх даалгаврыг өмгөөлөгчөөсөө авч энэ зун усанд хаясан чулуу шиг алга болсон юм. Эхнэрийгээ баривчлагдсаны дараа чаддаг юм бол намайг шалга хэмээн ам бардам дуугарч байсан түүний ханд нь хага дарагдаж, бардам ам, шалдан гуя болчихоод байгаа. Одоо ээлжит бус чуулган хуралдахад тэр хүссэн ч, эс хүссэн ч ажилдаа ирнэ.

Харин түүнийг гэнэтийн бэлэг хүлээж байх нь ээ. Олонхи буюу АН-ынхан ч үүнийг тэсэн ядан хүлээж суугаа. Тэд дуун дээрээ олонхиор хүч түрэн түүний бүрэн эрхийг түдгэлзүүлчихнэ. Ингэсэн тохиолдолд дараагийн хувилбар юу байх бол гэсэн асуудал олон таамаг дэвшүүлэхэд хүргэжээ.

Тодруулбал, Ё.Отгонбаярын бүрэн эрхийг түдгэлзүүлсэн тохиолдолд МАН-аас жагсаалтаар нэр дэвшүүлсэн хүмүүсийн дараагийн дугаарт бичигдсэн Л.Оюун-Эрдэнэ УИХ-ын гишүүн болох хувилбар байгаа гэж “цуурчээ”. У.Хүрэлсүх татгалзаж, Д.Сарангэрэл орж ирсэн шиг. Гэхдээ энэ нь боломжгүй. Учир нь Ё.Отгонбаяр гишүүн тойрогт ялалт байгуулсан учраас жагсаалтаар нэр дэвшсэн гишүүн орыг нь залгах ямар ч боломжит хувилбар байхгүй. Хууль эрх зүйн талаасаа ч боломжгүй.

Харин УИХ-ын сонгуулийн хуульд зааснаар бол тойрогт нэр дэвшсэн гишүүн бүрэн эрхээсээ татгалзсан, эсвэл эргүүлэн татсан бол 28-аас дээш хувийн санал авсан дараагийн нэр дэвшигч гарч ирэх ёстой. Эсвэл 28-аас дээш хувийн саналыг өрсөлдөгч нэр дэвшигч нь авч чадаагүй бол тухайн тойрогт нөхөн сонгууль болох учиртай.

Тэгэхээр энэ хуулийн заалтын дагуу Булган аймагт нэр дэвшин 46.35 хувийн саналаар ялалт байгуулсан Ё.Отгонбаяр бүрэн эрхээсээ татгалзвал дараагийнх нь хүн болох 28.95 хувийн санал авсан Ардчилсан намын Үндэсний зөвлөлдөх хорооны гишүүн Д.Түмэнжаргал парламентад автоматаар орж ирэх нь гарцаагүй юм байна.

Өөрөөр хэлбэл, дараагийн нэр дэвшигч нь 28-аас дээш хувийн санал авсан учир нөхөн сонгууль явуулах ямар ч шаардлагагүй гэсэн үг. Энэ нөхцөл байдлаас үзэхэд МАН-ынхан дахин нэг суудлаа намрын чуулганаар алдаж, “сэтгэлийн шарх” амсах бололтой.

Тэд нэг суудлаа олонхид алдахыг хүсэхгүй байгаа ч хууль эрх зүйн талаасаа яах ч аргагүй байдалд орж, ацан шалаанд оржээ. Прокурорын байгууллага УИХ-д хүсэлт хүргүүллээ л бол Ё.Отгонбаяр, бас Ардын намын амьдрал шийдэгдлээ гэсэн үг. Прокурор, мөрдөн байцаах албаныхан ямар шийдвэр гаргах вэ гэдэг нь өнөөдрийн хувьд сонирхол татсан асуудал боллоо.

Гишүүн болох ирээдүй нь бараг л “гэрэлтчихээд” байгаа Ардчилсан намын Үндэсний зөвлөлдөх хорооны гишүүн Д.Түмэнжаргал “Үндэсний үнэт цаас” ХХК-ийн ерөнхий захирал, “ТМ” телевизийн үндсэн хөрөнгө оруулагч. Тэрбээр Булган сумын нэгдүгээр дунд сургууль, ОХУ-ын Олон улсын харилцааны дээд сургуулийг олон улсын худалдааны эдийн засагч мэргэжлээр төгсчээ. Түүнчлэн Худалдаа үйлдвэрийн яам болон Гадаад харилцааны яаманд мэргэжилтнээр ажиллаж байжээ. Тэрбээр Булган аймагт нэр дэвших бэлтгэлээ 2009 оноос хойш хийсэн гэдэг юм билээ.

Б.Өнөртогтох
Эх сурвалж: www.mminfo.mn