Буянзаяа бүсгүй галзуурсан мэт дурласан учир Хангайг гэрлэх санал тавихад маш дуртай хүлээн авчээ. Өөрөөсөө хоёр дүү нөхөртэй болоход зарим найз нь "Чи сэрэмжтэй байгаарай. Цаадах чинь яваандаа чамайг хөгшин гэж голоод залуу хүүхнүүдтэй явалдаж мэднэ шүү" гэж захисан төдийгүй хадам эх нь тун ярдаг яхир авгай болохыг ч сануулсан байна. Нөхөр нь тусдаа амьдрахыг хүсэлгүй ээжтэйгээ гурвуулаа хамт байхыг эрмэлзжээ.

Дуламжаргалан авгай Алтай, Хэнтий, Хангай, Сутай гэдэг дөрвөн хүүтэй охингүй хүн байжээ. Ямартаа л Буянзаяад "Чи надад гурав дөрвөн ач охин төрүүлж өгөөрэй. Тэдэнд би Туул, Орхон, Сэлэнгэ, Хэрлэн гэдэг нэр өгмөөр байна. Талийгаач өвгөн минь тийм охидтой болохыг хүссэн ч надаас охин гараагүй юм" гэсэн аж.

Хоёр жил өнгөрөхөд Буянзаяа бие давхарласангүй. Нөхөр нь хүүхэд хүсч буйг тэр мэдэж байв. Нэгэн удаа ээж хүү хоёрын яриаг тэр сонсчээ. Тэгэхэд хадам эх нь Буянзаяаг "Наад сувай эм чинь хүүхэд төрүүлэх янз алга. Насны эрт дээрээ хөндийр" гэж хэлэхийг сонссон ажээ. Түүнээс хойш Буянзаяа хадам эхээ үзэн ядаж яаж хорслоо тайлахаа боддог болов. Ам зөрөх, муудалцах нь тэдний хооронд жирийн явдал байлаа. Хадам эх дөнгөж жартай учир үхэх цагийг хүлээвэл Буянзаяа өөрөө түүнийг өөд болтол эмгэн болчих юм шиг санагджээ.

Тийн найз хүүхнийхээ танил мэргэч удган дээр очив. Хадам эхийгээ холын ертөнцөд үдэх санаатай яваагаа тэр шулуухан л хэлээд хорвоогоос халиах ямар нэг эм тан, ургамал ногоо өгөхийг хүссэн байна. Мэргэч удган түүнийг хоёр өдрийн дараа ирэхийг хүсээд товлосон өдрөө очиход нунтагласан ургамал жимсний тан боож өгөөд,

- Гурван сарын турш өдөр бүр цай юмуу хоолонд нь бага багаар хандалж хий. Хор аажмаар үйлчлэх учир чамайг ийм зүйл өгснийг хэн ч мэдэхгүй, сэжиглэхгүй. Гэвч чи хэнд чиг хар сэр төрүүлэхгүйн тулд өдөр бүр хадам ээждээ хамгийн сайхан аашилж байх хэрэгтэй. Амттай хоол, өег цай хийж өгөхөө ч бүү март! хэмээн сануулж зөвлөжээ. Яг л үлгэрт гардаг шиг зүйл болсон нь тэр. Буянзаяа түүний зөвлөгөөг ягштал дагав. Урьд тэгж сэтгэл гарган ялдам аашилдаггүй байсан хүн чинь гэнэт л төрөл арилжсан мэт хадамдаа эжий ахай болон үйлчилж эхэлжээ. Буянзаяа гэрийн ажилд сайн боловч хадам эхдээ хэзээч сайхан сэтгэлээр хандаж байсангүй.

Нэг үгээр тэр сайн бэр болж тоглолоо. Үнэхээр ч сайн жүжиглэжээ. Хагас сарын дараагаас хадам эх нь ч бас өөрчлөгдөөд Буянзаяаг нөхөрт нь "Миний бэр чинь ямар сүрхий юм бэ. Намайг орноос босоогүй байхад л цайг минь аваад гүйж ирэх юм. Хоол нь ч яасан сайхан амттай юм бэ" гэж ярьж байхыг сонсов. Нэг сар өнгөрөхөд Буянзаяа хадамтайгаа ганц удаа ам мурийх бүү хэл өөдөөс нь хялайж харсангүй. "Чамайг даа" гэж дотроо хааяа бодовч хадам эхийн ярдаг, голомхой авир алга болсон тул заримдаа ,"Бас ийм сайхан зантай авгай байсан юм гэж үү" хэмээн боджээ.

Нөхөр нь ч сэтгэл тэнэгэр явах болсон бөгөөд эхнэртээ, - Чи ээжийн тахилыг одоо л зөв өрчихлөө. Ээж чамайг өглөө бүхэн надад магтаж ярьдаг, орой болгон миний азтайг талархдаг болсон шүү. Чи минь ёстой мундаг юмаа. Ээж чамайг хэнээр ч солихгүй гэдэг шүү хэмээн ярьжээ. Хоёр сар болоход Буянзаяа жирэмсэн болсноо мэдэв. Орой ажлаасаа тарж ирээд хадам эхдээ хар шөл хийж өгчээ. Хадам нь сармисанд нугасгүй. Тийн хоёр сармис цэвэрлээд хишиглэж байтал гэнэт огиудас нь хүрч золтой бөөлжихөө алджээ. Сармистай халуун шөлийг хадамдаа барих үед дахиад хий огиултал ээж нь гэнэтхэн баяртайгаар инээмсэглээд,

- Хүүш ээ, миний охин бие давхар болчихсон юм биш үү! гэж уулга алджээ. Буянзаяа үнэхээр жирэмсэлжээ. Тэр өдрөөс хойш хадам эх нь өөртөө цай хоол хийлгэхийн оронд өөрөө урьтаж босоод бэрийнхээ төлөө сайхан цай, амттай хоол хийгээд урд нь бөхөлзөн гүйдэг болсон төдийгүй,

- Миний охин жаахан хэвт. Жирэмсэн хүн амрах хэрэгтэй гэнэ. Нөхөр нь ч бөөн баяр. Тэрхүү өдрөөс хойш Хангайн гэр бүл бөөн хөөр баяраар амьсгалж, хүн бүр царайдаа мишээл тодруулж нөхөр, хадам хоёр нь Буянзаяаг чухамдаа бурхан багш лугаа тахин халамжилдаг болсон байна. Яг энэ үест Буянзаяа бүсгүйн сэтгэл шаналлаар халгиж эхэлжээ. Хадам эхийнхээ хоол цайнд хийдэг хортой ургамлын ханд тун удахгүй үйлчилж нас барах болоод байв.

Бүсгүй сүүлийн нэг сарын хугацаанд мөнөөх хортой хандыг хадмынхаа хоол цайнд хийхээ больсон төдийгүй яг гурав дахь сар дээр нь нөгөөх мэргэч удганыд очжээ. Тэр өөрийгөө хүүхэд олсноо яриад хадамдаа өгдөг хортой хандыг дарж чадах бэлдмэл эм өгөхийг гуйв. Ээжийгээ үхүүлэх эрмэлзэлгүй болсноо ч хэлээд "Би яах гэж тийм муухай зүйл хийвээ. Хүүд минь миний энэ муухай зүйл нөлөөлөхгүй биз дээ. Та туслаач" хэмээн уйлан гуйсан байна. Хариуд нь мэргэч удган мөн л өөр өнгөтэй ханд өгч,

- Бүтэн сар ээжийнхээ цайнд хийж уулга. Чи өөрөө ч уу. Хэн хэнд чинь сайн гэсэн байна. Хадам эх нь нэг өдөр ханиад хүрч хэвтэрт ороход Буянзаяа маш их айж сандарсан агаад түргэн тусламж даруй дууджээ. Ээж нь ашгүй маргааш нь өндийж босохдоо эрүүл болсон байв. Тэгэхэд Буянзаяа шиг баярласан хүн байхгүй. Сарын дараа нөгөө удганыд очиход,

- Чамд өгсөн ургамлын ханд бол зүгээр л биеийн тамирын сэргээх бэлдмэлийн тан байсан юм. Тэр бол ердөө л амин дэм. Хадамд бинь тэжээл болохоос хор болохгүй. Харин жинхэнэ хор чиний сэтгэлд байжээ. Одоо тэр хор гадагшилж арилсанд би баярлаж байна! хэмээн хэлжээ. Одоо Буянзаяа хоёр ихэр охин төрүүлсэн бөгөөд хадам ээжийнхээ хүссэнээр Сэлэнгэ, Хэрлэн гэдэг нэр өгчээ.

А.Өгөөмөр

ЭХ СУРВАЛЖ: БОЛСОН ЯВДАЛ

Ааштай хадам ээжийгээ бэр нь хорлох гээд эцэстээ төрсөн ээж, охин мэт ижилджээ /Болсон явдал/
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ийм байдаг бол сайхан л байна ккк манай хадам бол ********ийн ургам******** хүүгээс ни с********ж байж л ********ийн ургамлаас с********лаа гэж одоо 2 0хинтойгоо сайхан байноо гэж

2013-09-24 | 23:14:04 | 112.72.13.148 |

Зочин
гоё гоё

2013-09-24 | 17:22:48 | 103.11.193.78 |

Мэдээ
Гадаад мэдээ
Видео