Хорт хавдар бол үхэл биш

2013-09-30

Дэлхийн хэмжээний алдартнууд ч бас бусдад тохиолддог асуудалтай тулгарах нь мэдээж. Магадгүй алдартай, мөнгөтэй

хүмүүст элдэв бэрхшээл, ялангуяа өвчин зовлон асуудал биш байдаг байх гэж зарим хүн төсөөлдөг байж болох юм. Хүн хэчнээн их мөнгө олж алдар хүндэд хүрлээ, энэ нь үхлийн өвчнөөс хамгаалах даатгал болж чадахгүй. Латви, Оросын нэрт дуучин, жүжигчин Лайма Вайкуле, Америкийн жүжигчин Кайли Миноуг, Майкл Дуглас, Роберт Де Ниро зэрэг олон алдартан хорт хавдрын өвчлөлтэй өвчинтэй нүүр тулсныхаа дараа түүнийг ялан дийлж, амьдралыг шинээр харан аз жаргалтай амьдарч байна.

Лайма Вайкуле
Хүсэл мөрөөдлөөр жигүүрлэсэн, амжилттай, аз жаргал дүүрэн эмэгтэй. Сая сая хүний хайр хүндэтгэлийг хүлээсэн дуучин болно гэдэг тийм ч хялбар зүйл биш. Гэвч түүний амьдралд бүх зүйл орвонгоороо эргэсэн хар өдөр тохиж байсан талаар хүн бүр төдийлөн мэдэхгүй. Тэртээх 22 жилийн өмнө тэрбээр тархины хорт хавдартай гэсэн аймшигт онош сонсчээ. Амьд үлдэх боломж ердөө л 20 хувь гэж эмч нар дуулгасан аж. Энэ хатуу үгийг сонссон Лайма эрүүл мөртлөө байнга л ямар нэг зүйлд сэтгэл дундуур, асуудал тоочиж явдаг хүмүүсийг чин сэтгэлээсээ үзэн ядаж байсан гэдгээ хожим ярьсан байдаг. Түүний нөхөр, продюсер Андрей Лаймаг цаг үргэлж дэмжин сэнхрүүлж, юу ч тохиолдсон байнга хамт байхаа амладаг байжээ. Түүний эрүүл хүмүүст өширхсөн бухимдал аажимдаа шаналал болон өөрчлөгдсөн байна. Тэрбээр өөрийг нь нас барсны дараа уншиг гэсэн үүднээс ойр дотныхоо бүх хүнд хандан тус бүрт нь захидал бичжээ. Мөн Библийн сургаал уншиж эхэлсэн байна. “Энэ бол миний хувьд сорил байсан юм. Би үнэхээр л үхлийн ирмэгт тулж очсон. Гэвч намайг хамгаалагч-ангел сайн ажилладаг юм билээ. Биднийг улам илүү болж өөрчлөгдөөсэй гэж томоохон сорилт тулгардаг юм шиг ээ” гэж Лайма онцолсон байдаг. Түүний мэс засал амжилттай болсон юм. Тэрбээр сорилт түүнийг эрс өөрчилсөн гэж ярих дуртай. Эд материал ямар ч тохиолдолд хоёрдугаарт жагсдаг болохыг тэрбээр сайн ойлгожээ. Харин бүхий л амьд биест туслах, энэрэх их хүслийг нэгдүгээрт тавих болжээ.

Евгения Власова
Дуучин бүсгүй бүхнийг даван туулж чадсанаараа бахархдаг. Залуухан, эрүүл бүсгүйд ямар төрлийн хорт хавдар тусдаг юм бол. Бүх зүйл санаандгүй болжээ. Эмч нар яаралтай мэс засал хийж, хавдрыг авах хэрэгтэй хэмээн зөвлөжээ. Гэвч мэс засал 100 хувь үр дүнтэй болсонгүй. Тэрбээр найдвараа гээлгүй химийн курс эмчилгээнд тогтмол явав. Түүний үс туг тугаар унах болж, “нүднээс гартлаа” туржээ. Гэвч Евгения энэ бүхэнд итгэхийг ч хүсэхгүй байсан төдийгүй түүний амьдрал зөвхөн өөрийнх нь гарт бий гэдэгт итгэлтэй байжээ. Тэрбээр “Би дээд тэнгэрт хандаж, чин сэтгэлээсээ залбирдаг байсан болохоор өөрийгөө аварч чадсан” гэж ярьдаг. Түүнийг сүмд очиж залбирал үйлдэж чадахгүй үед санваартан гэрт нь хүрэлцэн ирж, залбирал үйлдэхэд нь тусалдаг байжээ. Найз нөхөд нь ч их дэмждэг байв. Удалгүй бүсгүй эрүүл болж, аймшигт өвчнийг ардаа орхиж чаджээ. Үхэл гэгч аймшигтай бараг нүүр тулгараад буцаж чадсан бүсгүй нэг л зүйлийг ухаарсан нь “Чин сэтгэлээсээ хүссэн үед хайрладаг бүхэн дэргэд байдгийг мэдэрсэн явдал” гэжээ.

Кайли Миноуг
Австралийн поп дуучин Кайли Миноуг 2005 оны хавар хөхний хорт хавдар гэсэн онош сонссоноор дэлхийн аялан тогтлолтоо цуцалж байсан билээ. Харин 2006 он гэхэд химийн эмчилгээ хийлгэн өвчнөө бүрэн дийлсэн дуучин эрүүл болсноо аялан тоглолтоо сэргээх, хорт хавдартай эмэгтэйчүүдийг дэмжих тэмцлийн төлөөх сайн үйлсэд оролцох зэргээр тэмдэглэсэн юм.

Майкл Дуглас

“Оскар”-ын хоёр удаагийн эзэн, алдарт жүжигчин Майкл Дуглас 2010 оны наймдугаар сард төвөнхний хорт хавдартай болохоо мэдсэн бөгөөд энэ тухайгаа нэгэн ток-шоунд оролцох үедээ олноо мэдэгдсэн байна. Тэрбээр эхнэр Кэтрин Зета Жонсын хамтаар бүх зураг авалтын гэрээгээ цуцлан өвчинтэйгээ тэмцэхэд анхаарлаа хандуулж эхэлсэн. Дуглас энд тэнд ярилцлага өгөх үедээ өөрийгөө эцэг, эх шигээ урт наслах ёстой бөгөөд тун удахгүй эрүүл болно гэдэгтээ эргэлзэхгүй байгаа талаараа байнга онцолдог байж. Хэдэн сарын турш өвчнийхөө эсрэг эмчилгээ хийлгэн уйгагүй зүтгэсэн жүжигчин 2011 оны нэгдүгээр сард хорт хавдрыг ялсан бөгөөд ажилдаа эргэн ороход бэлэн гэдгээ олонд баяртайгаар мэдэгдсэн юм.

Роберт Де Ниро
Орчин үеийн хамгийн аугаа жүжигчдийн нэг Роберт Де Ниро 2003 онд “түрүү булчирхайн хорт хавдар” гэсэн онош сонссон байна. Тухайн үед 60 настай байсан жүжигчинд эмч нар цоо эрүүл болно гэсэн амлалттайгаар эмчилгээ эхэлсэн аж. Өвчин дөнгөж эхний шатандаа байснаас гадна жүжигчний биеийн ерөнхий байдал нэн сайн байсан нь ийм амлалт гаргахад нөлөөлсөн гэдэг. Де Нирогийн хорт хавдар өвчнөөөс хэрхэн ангижирч чадсан бодит түүхийг хэвлэлийнхэн өнөө хүртэл жишээ болгон магтан бичдэг.

Шэрон Осборн

Телевизийн хөтлөгч, зохиолч, продюсер Шэрон Осборн бүдүүн гэдэсний хорт хавдрыг ялж чадсан нэгэн. Түүний өвчний талаар мэдсэн гэр бүлийнхэн нь гүн хямралд орж байсан тухай Шэроны нөхөр Оззи Осборн хожим дурссан байдаг. Тэр байтугай хүү нь ээжийнхээ өвчнөөс болж амиа хорлохыг завдаж байжээ. Өвчнийг бүрмөсөн ялан дийлэх магадлал 40 хувиас ч бага гэж эмч нар хэлсэн байна. Гэсэн ч тэрбээр бие, сэтгэлийн хүчээр хорт хавдрыг бүрэн зогсоож чадсан байна. Өвчин сэдэрч болзошгүй аюулаас улбаалан 2012 онд Шэрон хоёр хөхөө авахуулсан ч амжилттай ажил хэрэгч эмэгтэй, сайн ээж, эхнэр хэвээр үлдэхэд энэ нь саад болоогүй юм.

Анастейша
Поп-дива, дуучин Анастейша хөхний хот хавдартай хамгийн зоригтойгоор, нийтэч байдлаар тэмцэж, ялж чадсанаараа алдартай. Энэхүү аюулт өвчний оношийг 2003 онд мэдсэн тэрбээр өөрийгөө энэ өвчинд алдахгүй гэдгээ хэвлэлээр зарлаж мэс засал, эмчилгээ хийлгэх бүх үйл явцын талаар бичлэг хийн сурвалжлах эрхийг сэтгүүлчдэд олгосон байдаг.

Майкл С.Холл

“Декстер” теле цувралын од Майкл тунгалаг эсийн хорт хавдартай болохоо мэджээ. Түүнийг 11 настай байхад эцэг нь мөн хорт хавдрын улмаас хорвоог орхиж байсан тул эл өвчинтэй эцсээ хүртэл тэмцэхэд бэлэн байсан гэдэг. Хорт хавдрыг тодруулах үед дөнгөж эхний шатандаа явагдаж байсан тул хэдхэн сарын эмчилгээний дараа жүжигчин цоо эрүүл болсон юм.

Дарья Донцова
Нэрт зохиолч Дарья Донцова хөхний хорт хавдартай гэдгээ бүр сүүлийн шатанд нь мэдсэн гэдэг. Эмч нар хэдий 100 хувь бүрэн эдгэрнэ гэсэн амлалт өгч чадахгүй байсан ч уйгагүй зүтгэлийнхээ ачаар өвчнөө ялан дийлээд зогсохгүй анхны номоо гаргаж бестселлер болгож байсан юм. Тэрбээр өдгөө “Хөхний хорт хавдрын эсрэг хамтдаа” хөтөлбөрийн албан ёсны элчийн алба хашдаг.

Синтия Никсон

“Их хотын секс” киноны од Синтия хөхний хорт хавдартай гэсэн онош сонссоныхоо дараа энэ тухай олонд мэдэгдэхийг хүсэхгүй байж. Түүний ээж нь ч мөн ийм өвчин тусч эмчлүүлж байсан аж. Гэвч мэс засал хийлгэн химийн эмчилгээнд явж байхдаа Синтия халзан толгойтой гэдгээ ч үл ойшоон олон нийтийн арга хэмжээнд оролцох болж, дэлхийн эмэгтэйчүүдийг хорт хавдар гэгч өвчинд бууж өгөхгүй байхыг уриалж байжээ.