ийслэлд зөвшөөрөлгүй үйл ажиллагаа явуулдаг, чанарын шаардлага хангахгүй, хотын өнгө үзэмжид сөргөөр нөлөөлж байгаа ТҮЦ-үүдийг нурааж байгаа. Уг асуудлын хажуугаар өнгөрсөн сарын дундуур “Киг” компани Хятадаас дотроо био 00-той, амрах өрөөтэй, халаалтыг нь бүрэн шийдсэн киоскийг оруулж ирээд байгаа юм.

Ингэхдээ эхний ээлжинд И.Шастины нэрэмжит гуравдугаар эмнэлгийн урд талын буудлын дэргэд туршилтын журмаар нэг киоск байршуулсан байгаа аж. Нийт 50 киоск захиалснаас 15 ширхгийг нь оруулж ирээд байгаа гэнэ. Тус компанийн оруулж ирээд буй уг киоск нь хэд, хэдэн төрөлтэй бөгөөд урсдаг зар, сурталчилгааны гэрэлт самбар, гаднах талбайн гэрэлтүүлэгтэй гээд олон авууштай тал бий. Гэвч нөгөөтэйгүүр чанарын шаардлага хангасан гэгдэх киоскуудыг байршуулах зөвшөөрлийг өгөөгүй байгаа аж. “Киг” компанийн хувьд Хятадын хэд, хэдэн компанийг судалж үзсэний үндсэнд өнгөрсөн хоёрдугаар сараас хойш киоск оруулж ирэх төсөл, тооцоогоо гаргасан байжээ.

Д.Мөнхбат: ТҮР БАЙРШИЛ ОЛГОХЫГ Л ХҮССЭН

Энэ талаар “Киг” компанийн захирал Д.Мөнхбатаас цөөн асуултад хариулт авсан юм.

-Нийслэлээс зөвшөөрөлгүй гэгдэх ТҮЦ-үүдийг буулгаж эхлээд байгаа. Танай компани оруулж ирж буй киоскоо байршуулах зөвшөөрлийг авсан уу?

-Чанарын шаардлага хангаагүй, зөвшөөрөлгүй ТҮЦ-үүдийг буулгаж байгаа. Тэгвэл би европ стандартаар Хятад улсын “Кө Хун” ХХК-д үйлдвэрлэсэн чанарын шаардлага хангахуйц технологийг оруулж ирж байна. Үүнд тохирсон байршлыг нь гаргаж өгөхийг л хотын удирдлагаас хүсэж байгаа. Би эхлээд нийслэлийн Засаг дарга Э.Бат-Үүлд хүсэлт гаргасан. Хүсэлтийг энэ оны наймдугаар сарын 30-нд хүргүүлсэн юм. Уг хүсэлтдээ туршилтын журмаар нэг дүүрэгт дөрвөн байршил, нийт 24 түр байршлыг бидний ажлыг дэмжин хурдан хугацаанд гаргах өгөхийг хүссэн. Хэрвээ дээрх киоск нь чанарын шаардлага хангахгүй, хотын өнгө үзэмжид сөргөөр нөлөөлөх зэрэг асуудал гарвал үүнийгээ буцаан авч, гарсан хохирлыг манай компани 100 хувь төлж барагдуулна гэдгээ ч тусгаж өгсөн. Үүний хариуд Улаанбаатар хотын менежер Б.Бадрал зөвшөөрч гарын үсэг зурж баталгаажуулсан. Гэтэл одоо эсрэг юм яриад байж байна. Уг нь гаргасан хүсэлтийн дагуу ажлын хэсэг гаргаж, бидний ажилтай танилцах ёстой. Гэтэл хүнсний зориулалтаар шинээр оруулж ирсэн киоскийг хараагүй байж зөвшөөрөхгүй гээд байгаа нь ямар учиртай болохыг ойлгохгүй байна.

-Нэг киоскыг байршуулж, иргэнтэй гэрээ хүртэл хийсэн гэсэн. Зөвшөөрөл өгөх эсэх нь тодорхой бус байхад ингэж болж байгаа юм уу?

-Ер нь бол мэргэжлийн хяналт болоод Стандарт хэмжил зүйн газраас зөвшөөрлийг олгочихсон байгаа. Харин эргэж буцсан нийслэлийн Захирагчийн ажлын албанаас киоск байршуулах зөвшөөрөл өгөхгүй гэсээр л байна. Гадаадын аль ч улсад автобусны буудлынх нь хажууд түргэн үйлчилгээний цэг байдаг. Гэтэл нийслэлд нэг жижигхэн талбай эзэмшиж байгаа иргэдийн газрыг авах гэж байгааг ойлгохгүй байна. Зөвшөөрөл гэдгийг чинь сүүлдээ өөрөө ч ойлгохоо болчихоод байна шүү дээ.

-Нэг талаар энэ ажил зөв ч, зөвшөөрлийн асуудал нь шийдэгдээгүй байхад иргэдтэй гэрээ хийж байгаа нь буруу юм биш үү?

-Би элдэв асуудал үүсэхээс айхгүй байна. Намайг золино гэдэг чинь 50 орчим иргэнийг гаргуунд хаяна гэсэн үг юм. Уг төслийг хэрэгжүүлэхийн тулд бид банкнаас их хэмжээний зээл авчихсан байгаа шүү дээ. Нэг зүйлийг нэмж хэлэхэд би чанарын шаардлага хангаагүй, хотын өнгө үзэмжид муугаар нөлөөлөх баталгаагүй зүйл оруулж ирчихээд иргэдэд шахаад байгаа юм биш. Харин зөвшөөрөл олгочихоод одоо болохоор зөвшөөрөл өгөхгүй гэж байгаа хотын удирдлагуудыг гайхаж байна.

О.Нарантуяа: НЭГИЙГ НЬ БУУЛГАЧИХААД, НӨГӨӨГ НЬ ЗӨВШӨӨРНӨ ГЭЖ БАЙХГҮЙ

Энэ талаар нийслэлийн Захирагчийн ажлын албаны Хүнс, худалдаа, үйлчилгээний хэлтсийн дарга О.Нарантуяагаас тодруулсан юм.

-“Киг” компанид нийслэлийн Захирагчийн ажлын албаныхан зөвшөөрөл өгөхгүй байгаа гэсэн. Энэ талаар та дэлгэрэнгүй мэдээлэл өгөхгүй юу?

-Тус компаниас нийслэлийн зургаан дүүргийн 24 байршилд туршилтын журмаар киоск байршуулахыг хүссэн. Үүний да-гуу нийслэлийн Захирагчийн ажлын албаны Хүнс, худалдаа, үйлчилгээний хэлтэс хүлээн авч, нийслэлийн Мэргэжлийн хяналтын газар хүргүүлсэн. Харин нийслэлийн Мэргэжлийн хяналтын газраас ажлын хэсэг гарч, тухайн киосктой танилцсаны үндсэнд чанарын шаардлага хангахгүй гэдэг хариу өгсөн байгаа. “Киг” компанид зөвшөөрөл олгоогүй байхад дур мэдэж, иргэдийг залилж, 25 сая гаруй төгрөг авч байна. Ингэхдээ бүр эхний ээлжинд дээрх мөнгөний 30 хувь гэх мэтээр залилан хийж байгаа юм. Уг асуудлыг бид нийслэлийн Засаг даргын Тамгын газрын Хуулийн хэлтэст шалгуулахаар өгчихөөд байна. Үүнийг цаашид зохих хууль хяналтын байгууллагад өгнө. Мөн “Киг” компанийн захирал Д.Батмөнх нь нийслэлээс зөвшөөрсөн гэж иргэдэд итгүүлж, бүр киоскоо газартай нь зарна гэж байгаа юм.

-Тус компани нь оруулж ирсэн киоскоо эхнээс нь байршуулжээ. Угтаа бол албаны хүмүүс олон нийтийн эзэмшилд ТҮЦ байрлуулахгүй гэсэн. Энэ ямар учиртай юм бэ?

-Тус компани нь хэн гэдэг албан тушаалтны зөвшөөрлын дагуу ийм хууль бус үйлдэл хийж байгааг мэдэхгүй. Чанарын шаардлага хангахгүй, зөвшөөрөлгүй гэгдэх ТҮЦ-үүдийг буулгах ажил дуусаагүй, цаашлаад тэнд ажиллаж байсан иргэдийн ажлын байрны асуудал, үүнтэй холбоотой дүрэм журмын асуудлыг шийдэж дуусаагүй байна. Гэтэл хөндлөнгийн нэг хүн хаа нэг газраас дулаан, бохирын асуудал нь шийдэгдээгүй зүйл оруулж ирчихээд биднээс зөвшөөрөл нэхэж байгааг хүлээн авахгүй. Нэгийг нь буулгачихаад нөгөөг нь зөвшөөрнө гэж байхгүй.

-“Киг” компани нь өнгөрсөн наймдугаар сарын 30-нд нийслэлийн Засаг даргад хүсэлт тавьсан байсан. Энэхүү хүсэлтийн хариуд УБ хотын менежер Б.Бадрал зөвшөөрсөн гэсэн гарын үсэг зурсан байсан?

-Тэр бол зөвшөөрөл биш. Нийслэлийн Засаг дарга огт зөвшөөрөл өгөөгүй. Б.Бадрал нь тухайн чиглэлд бодлого барин ажиллаж байгаа хүмүүст тухайн хүсэлтийг авч хэлэлцээд, судалж үз гэсэн баримт юм. Тэрбээр ийн ярьсан юм.

Б.Азжаргал: ЗАСВАР ҮЙЛЧИЛГЭЭГ НЬ ХАРИУЦНА ГЭСЭН

Ингээд тус компанийн оруулж ирсэн киоскийг худалдан авсан иргэнээс зарим зүйлийг тодруулав.

-“Киг” компанийн киоскийг ямар журмаар авсан юм бэ?

-Өнгөрсөн есдүгээр сарын 17-нд гэрээ байгуулсан. Ингэхдээ эхний ээлжинд 25 сая 785 мянган төгрөгийн 30 хувийг бэлнээр өгч, үлдэгдэл 70 хувийг гурван жилийн хугацаатайгаар Хас банкны лизингээр өгөх гэрээг байгуулсан байгаа. ТҮЦ-үүдийг хотын өнгө үзэмжид сөргөөр нөлөөлж, чанарын шаардлага хангахгүй байгаа гэж буулгаж байгаа. Эхнээс нь энэ хавийн ТҮЦ-үүдийг буулгаж эхэлсэн. Тиймээс чанарын шаардлага хангах ТҮЦ-ийг нь авч, өөртөө ажлын байр л бий болгох гэснээс өөр зүйлгүй.

-Тус компанид киоскоо байршуулах зөвшөөрлийг өгөөгүй гэж байна. Үүнийгээ анх гэрээ байгуулахдаа танд танилцуулав уу?

-Анхнаасаа зөвшөөрлийн тал дээр асуудал байгаа гэдгийг хэлсэн. Хэдий асуудалтай ч тэр болгон ажлын байраа түгжчихээд 00 хайгаад гүйх шаардлага алга. Мөн амрах өрөө, халаат гэх мэт давуу талтай. Тэгээд ч гурван жилийн хугацаанд ямар нэгэн асуудал гарлаа гэхэд тус компани засвар үйлчилгээг нь хариуцна гэсэн. Энэ асуудлыг хариуцсан мэргэжилтнүүд нь шийдээд өгчихвөл бидэнд ч амар болно.

Т.Болорцэцэг