-Өдрийн мэнд Жастин, бид хоёр чиний хамгийн дуртай шарсан төмсийг идэхээр Чикагогийн “Райд Флор” ресторанд сууж байна. Бидний ярилцлагыг АНУ, Орос, Канад, Итали, Австрали Руминд үзэх болно. За яриагаа эхлэх үү?

-Танд ч бас өдрийн мэнд. Намайг ярилцлагадаа урьсанд маш их баярлалаа. Опратай ярилцаж байгаагаа нэр төрийн хэрэг гэж бодож байна. Хөөх, бүр Руминд хүртэл гарах хэрэг үү?
-Тийм ээ, Руминд хүртэл гардаг болсон. Би ч бас чамтай уулзаж байгаагаа нэр төрийн хэрэг гэж бодож байгаа шүү. Яагаад гээч, би анх удаагаа ингэж бүтэн хоногоор дэлхийг тойрч явлаа. Ингэхэд чамайг барьж авах гэж олон хоног араас чинь явлаа. Их ч хол явж...
-Тийм үү. Ямар гоё юм бэ. Сэтгэл их хөдөлж байна (инээв).
-Чамд Майкл Жесксонд тавьж байсан асуултаа тавья гэж бодлоо. Би түүнтэй ярилцахаар очоод маш их сандарч байсан. Гэрт нь очоод шууд нэвтрүүлэг эхлэх гэж байтал өвдөг чичрээд л. Тэгээд би ярилцлага эхлэхээс өмнө түүнээс “Та сандарч байна уу” гэж асуусан юм. Тэр “үгүй дээ” гэж хариулсан. Харин одоо чамаас ингэж асуумаар байна?
-Үгүй ээ. Би сандрахгүй байна.
-Тэгвэл би сандарч байна...
-Сандрах хэрэггүй дээ. Хоёулаа л сандрахгүй чөлөөтэй байцгаая л даа.
-За тэгье. Чи хэзээ хамгийн сүүлд ингэж аюулгүй газар тайван суув?
-За байз... Жилийн өмнө л ингэж тайван сууж байсан санагдана. Ер нь ресторанд тайван суугаад хооллоно гэдэг амаргүй байдаг юм. Хооллоод сууж байтал хүмүүс дөхөж ирээд л хамт зургаа авахуулъя гэж гуйдаг. Заримдаа ажил ихтэй үед үүнээс болоод их ядраад байдаг юм.
-Чамайг бүр дасчихсан байх гэж боддог байлаа...
-Тийм ээ. Гэхдээ л хаа явсан газар хүмүүс дагаад байхаар тэднээс бултах хэрэг гардаг л даа. Дуртай хоолоо идээд л дуртай газраа сууж баймаар болдог үе байдаг.

-Ямар хоолонд дуртай вэ?
-Кекс (инээв). Би ер нь түргэн хоол идчих гээд байдаг юм. Бас маханд их дуртай.
-Чиний талаар нэлээд зүйл уншлаа л даа. Бусад хүмүүс шиг л байхыг хүсдэг энгийн залуу гэж их ярьсан байх юм. Чи үнэхээр энгийн байхыг хүсдэг гэж үү?
-Би жирийн л амьдрахыг хүсдэг. Бусдаас өөр амьдрал таалагддаггүй.
-Ээж чинь 11 настай хүүгийнхээ дуулж байгаа бичлэгийг интернетэд тавьсан тэр цагаас хойш бараг таван жил өнгөрч байна. Одоо дэлхий дахинд чамайг од гэдэг болж?
-Баярлалаа. Надад уран бүтээлийнхээ төлөө олон зүйл золиослоход их хэцүү байсан. Гэсэн ч тэгэх хэрэгтэй болсон. Анх Канадад байхад Ашертай уулзаж хамт дуулах завшаан тохиосон. Мэдээж энэ бүхэн ээжийн минь интернетэд тавьсан видео бичлэгийн ач.
-Скотер Браун чамайг Ашертай уулзуулсан гэсэн?
-Тиймээ. Тэр 11 настай бяцхан хүү интернетээр дуулж байхыг хараад таалагдаад түүнийг заавал олно гэж хайсан гэсэн. Тэгээд Ашер намайг бичлэгтээ урьсан юм.
-Чиний концертыг үзэхэд хамгийн их таалагдсан зүйл нь тайзан дээр “Сүүлчийн ганцаардмал охин”-ыг сонгон гаргаж ирээд түүнд зориулж дуулан цэцэг өгдөг уламжлал байлаа. Чи үүнийг маш уярмаар хийдэг. Концерт дээр чинь тайз руу гарсан Жанна охиныг хараад миний сэтгэл яг түүн шиг догдолсон. Бүр уйлсан шүү...
-Баярлалаа. Таныг уйлж байхыг анх удаа харсан шүү. Би концерт болгон дээрээ үүнийг хийдэг юм. Энэ уламжлал их гоё байдаг л даа. Би “Сүүлчийн ганцаардмал охин”-д сэтгэлээсээ дуулж өгдөг.
-Өчигдөр чиний тоглолт руу чинь явж байхдаа өөрийгөө Жастины оронд төсөөлж байлаа. Тойрон хүрээлэгчдээ хэрхэн сонгодог вэ?
-Тэднийг сонгоход их хэцүү байдаг. Надад бусдад үнэн сэтгэлээсээ ханддаг хүмүүс л үнэтэй байдаг даа. Би цөөхөн найзтай. Хоёр гуравхан дотны найз бий. Тэдэнтэйгээ хэзээ ч, хаана ч явсан утсаар ярьж, интернетээр холбогддог.
-Чамайг их өөрчлөгдөж гэж хэн нэгэн хэлж байна уу. Жишээ нь, би л гэхэд олны танил болоод нэг их өөрчлөгдөөгүй. Харин эргэн тойрныхон маань л өөрчлөгдөөд байгаа юм шиг санагддаг...
-Өөрчлөгдсөн гэж фэнүүд маань хэлдэг. Заримдаа интернетээр “Бид хуучин Жастинийг хүсч байна” гэж бичдэг шүү. Би “Залуус аа, би урьдын Жастин хэвээрээ л байгаа шүү дээ. Зүгээр л би өсч том болсон” гэж хариулдаг. Харин ч том болсон болохоор над руу охид хашгираад л, хайртайгаа хэлэхэд гоё байдаг (инээв).
-Чи дуулахаа больсон ч охид чамд дурлана гэж бодож байна...
-Баярлалаа. Хүмүүс миний уран бүтээлд дурлаасай, түүний минь төлөө намайг хайрлаж хүндлээсэй гэж хүсдэг. Гадаад төрх хэнд хамаатай юм бэ. Гоё үстэй байна уу, үгүй юу чухал биш.
-Ингэхэд үсний засалтаа өөрчлөх гэж удаан бодсон уу?
-Надад урт үс маань их таалагддаг байсан. Гэхдээ байнга л нэг хэв маягаараа яваад байхыг хүсээгүй ээ. Гадаад төрхөө жаахан өөрчилмөөр санагдсан.

Аав, ээж дүүгийн хамт

-Шинэ үсний засалт чинь их зохиж байна гэж хэлэх гээд мартчихаж...
-Баярлалаа. Хүн болгон ингэж хэлдэггүй юм (инээв). Таны үс ч гэсэн сайхан харагдаж байна.
-Яг чам шиг од өмнө нь байгаагүй гэдгийг мэдэх үү?
-Яагаад тэр вэ?
-За яахав, чамд тайлбарлая л даа. Чиний концертод ирж байгаа хүмүүс яг л Майкл Жексон агсан, бас домогт “Битлз”-ийн тоглолтод ирдэг шиг олноороо цуглардаг. Жишээ нь, би чиний өчигдрийн концертыг л гэхэд Пол Маккартнигийн концерттой зүйрлэсэн. Леди Гага хэдийгээр алдартай ч түүний тоглолт дээр ийм олон хүн байгаагүй. Яаж ингэж шүтэн бишрэгчдээ татаж байна?
-Би зүгээр л шүтэн бишрэгчидтэйгээ байнга харилцдаг. Интернетээр, “Facebook”-ээр гээд л. Тэдний асуултад хариулж харилцан коммент бичилцэж байдаг юм. Шууд ярилцаж суухаас өөр ч гэсэн сонирхолтой байгаа нь мэдэгддэг.
-Шүтэн бишрэгчид чинь хэдэн сая шүү дээ. Тэдэнд бүгдэд нь хариулах боломжтой гэж үү?
-Яг ч бүгдэд нь бишээ. Гэхдээ боломжоороо байнга утастайгаа явж тэдэнтэй харьцаж байхыг хүсдэг. Аль болох эерэг коммент бичихийг хичээдэг дээ.
-Чи 11 настай байхдаа гитар бариад гудамжинд дуулж байсан гэсэн. Алдар хүнд олох гэж тэр үү, эсвэл зүгээр л хүмүүсийг хөгжөөх гэж үү?
-Зүгээр л дуртай болохоороо тэгсэн юм. Дуучин болно гэж бол төсөөлөөгүй.
-Ганцаардаж байв уу?
-Ганцаардалгүй яахав. Заримдаа надад гунигтай, ганцаардсан үе их тохиолддог. Хэн нэгэн дэргэд минь байгаасай гэж их хүсдэг. Мэдээж стрессэнд гүн орж байгаа юм биш л дээ. Гэхдээ хэд хоногоор гуниглах үе байдаг. Олон зүйлийн талаар бодоод унтаж чадахгүй ч үе байна.
-Яагаад тэр вэ?
-Яагаад гэвэл би чинь хүн шүү дээ (инээв).
-Аавтайгаа ямар харилцаатай байдаг вэ. Чамайг есхөн сартай байхад эцэг, эх чинь салсан гэсэн?
-Аавтайгаа энгийн харилцаатай байдаг. Бусад хүүхдүүд аавтайгаа яаж харьцдаг тэдэн шиг л. Бас хоёр дүүтэйгээ байнга уулздаг.
-Аавын чинь дараагийн эхнэрийн хүүхдүүд үү?
-Тийм ээ. Дүү Жейн маань дөрөв, харин Жейсон хоёр настай. Тэд ямар хөөрхөн гээч. Хоёр дүүдээ их хайртай.
-Ээжийнхээ талаар яриач?
-Ээж маань их сайхан сэтгэлтэй хүн. Хүнд үед дандаа хамт байдаг. Гэхдээ заримдаа намайг загнадаг юм (инээв).
-Аав, ээж хоёр чинь чиний насан дээр чамайг төрүүлсэн. Харин чи одоо аав болоход бэлэн байна уу?
-Үгүй дээ , бэлэн биш байна. Арай эрт байна.
-20 нас хүрээд гэрлэнэ гэж ярьж байсан?
-Тийм ээ. 20 хүрээд гэрлэмээр байна.
-Арай эрт биш үү?
-Опра Уинфри эртэднэ гэж хэлж байгаа бол энэ талаар дахин бодож үзнэ ээ.

-Чи төмсөө идэхгүй юм уу. Дуртай гэсэн болохоор чинь би чамайг дайлж байгаа юм...
-Үнэхээр гоё амттай төмс байна. Иднэ ээ. Зүгээр л амандаа төмс чихчихээд яриад баймааргүй байна.
-Жилийн өмнө чамайг нэг бүсгүй гурван сартай хүүхдийнхээ эцэг гэж шуугиан тарихад ямар байсан бэ?
-Би тэр эмэгтэйг таних ч үгүй, уулзаж ч байгаагүй шүү дээ. Удалгүй асуудал намжсан. Хүмүүс үүнд итгэж байгаа даа гэж бодож байлаа. Гэтэл хэн ч түүний ярьсныг үнэн гэж бодоогүй байсанд нь их гайхсан.
-Хөөх цонхоор хар даа. Бурхан минь, гадаа фэнүүд чинь цугларчихаж...
-Тийм ээ .Тэд гар даллаад л байна.
-Найз бүсгүйгээ олны өмнө гаргаж ирэхэд ямар байсан бэ. Та хоёрыг олон хүн эсэргүүцэж байсан... Селенагийн юу нь чамд таалагдсан бэ?
-Надад үнэнч хүмүүс таалагддаг. Селена надтай уулзаж байсан хамгийн сайн хүн байсан. Тэр бол хүнийг чин сэтгэлээсээ хайрлаж чаддаг бүсгүй.
-Та хоёр олны дунд ч биеэ барьж чадалгүй тэврэлдээд л бие биедээ хүрч харагддаг байсан?
-Тийм ээ (инээв). Бид хоёр байнга хөтлөлцөж явдаг байсан.
-Селенатай өнгөрүүлсэн хамгийн романтик агшин юу байв?
-Бид хоёр нэг удаа тансаг ресторанд хооллоод дараа нь маш том дэлгэцээр “Титаник”-ийг үзэцгээсэн. Тэгэхэд үнэхээр гоё байсан.
-Ихэнхдээ нууцаар уулздаг байсан байх?
-Заримдаа олны нүднээс нуугдаж уулзах үе байсан. Хүмүүс хамт явж байхад минь маш эвгүй байдалд оруулдаг байсан л даа.
-Чи Майкл Жексон шиг байхыг хүсдэг гэж нэг ярилцлагадаа хэлсэн байна лээ?
-Надад Майкл их таалагддаг. Түүн шиг шаргуу ажилламаар байна. Бас хүмүүс намайг Майкл Жексоныг мэддэг байсан шигээ “Энэ чинь Жастин байна шүү дээ” гээд л таньдаг байвал гоё.
-Байнга авч явдаг, түүнгүйгээр амьдарч чаддаггүй зүйл чинь юу вэ?
-Гар утас, нөөтбүүк.
-Дуртай олон ангит кино чинь?
-“Найзууд”.
-Одоо дотроо юуг хамгийн их мөрөөдөж байна?
-“Гремми” авмаар байна. Олон шагнал авсан ч “Гремми” аваагүй байгаа.
-Бүсгүйгээ болгож чадаагүй од хэн бэ?
-Бейонсе. Тэр миний хувьд төгс эмэгтэй.
-Аль улсад очих дуртай вэ?
-Японд очих дуртай. Тэндхийн хүмүүсийн соёл, аж амьдрал нь их таалагддаг. Японд гудамжаар алхаад байшин барилга хараад явах гоё байдаг.
-Бидний яриа ингээд өндөрлөж байна. Чи миний төсөөлж байсан шиг маань хөөрхөн, жаахан хүүхэд шиг байлаа. Баярлалаа. Ингээд том хүний ёсоор гар барья.
-Баярлалаа. Танд аз жаргал хүсье.