2013-12-03Сүүлийн үед олны анхаарлд байгаа нэгэн үйл явдал бол Э.Эрдэнэсүрэнгийн гэр бүл. Тиймээс энэхүү мэдээллийн
мөрөөр сурвалжилж түүний бодит амьдралыг уншигч танд хүргэж байна.
Удахгүй ес эхэлнэ. Хүйтний улирал эхэлсэн энэ үед гэртээ түлэх түлшгүй, идэх хоолоор хомсхон өрх толгойлсон эмэгтэй Чингэлтэй дүүргийн Хайлаастын 17-гийн ойролцоо айлын хашаа түрээслэн дөрвөн хүүхэдтэйгээ амьдарч байна. Том охин нь гурван настай, хамгийн бага нь ихэр, тэд гурван сартай.
Эднийд ор гэх зүйл ч үгүй болохоор газраар зулаад л байгаа бүхнээрээ хучаад унтана. Шөнө дөлөөр гал түлнэ гэж байхгүй. Өдөрт 50 төгрөгийн шар торноос ч бага багтаамжтай ногоон шуудайгаар нүүрс авч түүнийгээ гамнана. Өдөрт гэрээ дөнгөж л бүлээн байлгах төдийд галлана.
Хоёр том нь хоол нэхэж уйлагнана, бага нь хөхөө нэхэж уйлна. Энэ айлын сарын орлого нь 120 мянган төгрөг. Ганц бие энэ бүсгүй өдөрт дөрвөн мянган төгрөг зарцуулж амьдралаа залгуулдаг гэсэн үг. Үр хүүхдээ дундуур ч гэсэн хоолтой байлгахын тулд өөрөө бараг л хоол идэхгүй.
Хоол унд муутай болохоор хөхөнд нь сүү орохгүй зовооно. Хүүхдүүдийн эцэг бор дарс эргүүлээд орхиод явчихсан. Гэр нь дулаалга, давхаргагүй шахам хөндий хүйтэн. Өвлийн нүүрсний угаар, зуны бороонд идэгдэж хуучирч илчээ алдсан дан шахуу хуучны нимгэн эсгий бүрээстэй.
Энэ айлын амьдрал хэний ч нүдэнд хөөрхийлөлтэй харагдана. Хүн хорвоод мэндлэхдээ аз жаргалыг тосч ирдэг. Тиймээс ч “Хүн нэмэгдвэл хүнс нэмэгдэнэ” гэсэн үг гарсан байх. Өнөөгийн нийгэмд ядуу, эмзэг давхаргад хамаарах ийм айлд шинээр мэндэлж буй хүүхэд буруутан.
Илүү хүн мэт нүд үзүүрлэгдэх хачин тогтолцоо ч байгаад гайхах зүйл үгүй мэт. Хүүхдэд ямар буруу байх билээ. Өнөөгийн ороо бусгаа нийгэмд тэд л буруутай юм шиг өлсч, даарч ээжээсээ ч чихэр нэхэх эрхгүй өсч байгааг харахад зүрх шимширнэ. Бид чинь нэгнээ хайрлах гэж, бие биедээ аз жаргал бэлэглэх гэж л энэ хорвоод ирсэн.
Хайрыг хайрлаж сурах шиг хамгийн эрхэм зүйл байхгүй. Хүн туслаад байхад авах л ёстой юм шиг байдаг хүн бий. Тийм шунаг сэтгэл, хомс сэтгэхүй энэ дөрвөн хүүхдийн ээжид байхгүй нь ярьж буй ярианаас нь ажиглагдаж байлаа. Амьдралдаа нэмэр болго гэж хэн нэгний өгсөн хэдэн төгрөгийг зөв зарцуулна гэдэг тэр хүнийхээ ачийг хариулж байгаатай адил юм.
Э.Эрдэнэсүрэн “Чихэр, жимс худалдан авч хүүхдүүдээ бурууд уруу татаж байхаар ганц литр сүү аваад сайхан сүүтэй цай чанаж хүүхдүүдээ тойруулж суулгаад хамтдаа уувал биед нь илүү тэжээлтэй юм уу гэж бодох юм” гэж ярьж байлаа. Ийм нэгэн амьдралыг Монголын ард түмэн өөрчилж чадаж байна. Энэ бол зон олныхоо хайр энэрлийг хүлээн авч аз жаргал сайн сайхныг тоссон Э.Эрдэнэсүрэнгийн ирээдүй билээ.
Дахин даарахгүй санагдах шинэ амьдрал
Одоогоор Э.Эрдэнэсүрэнд дутагдах зүйл байхгүй боллоо. Дөрвөн хөөрхөн хүүхэд нь идэх хоол, өмсөх хувцастай болсны зэрэгцээ нүүрс түлээ ч элбэг. Хүүхдүүдийнх нь хацраас улаа бутран тоглож гүйнэ. Харин ээж нь гэр орныхоо зарим зүйлийг угааж арчих гээд ажил ихтэй.
Зүүдэнд ч оромгүй явдал гэдэг шиг энэ халуун ам бүл нэг л жаргалтай санагдана. Л.Бат-Эрдэнэ гэж сайхан сэтгэлтэй залуу энэ айлын зутруухан амьдралыг ийнхүү өөрчлөх үүдийг нээснээр хүн бүхэн чадлаараа халүун гараа сунгаж байна.
Асаргаа сувилгаа, эмчийн үзлэгт хүүхдүүд нь хамрагдаж, айлын дайтай айл, амьдралын энгийн хийгээд нэг л сэтгэлийн жаргал цалгисан Э.Эрдэнэсүрэнгийн тулганд түлсэн галын дөл дээшээ өөдлөхийн бэлэгдэл улаан дөл цоролзон ассаар л. Ингээд Э.Эрдэнэсүрэнтэй яриа өрнүүллээ.
-Сайхан сэтгэлтэй хүмүүсийн ачаар даарч, хөрөхгүй нэг л дулаан уур амьсгал мэдрэгдээд сайхан байна уу?
-Ёстой аз жаргалтай байна. Л.Бат-Эрдэнэд болон түүний гэр бүлийнхэнд маш их баярлаж сууна. Мөн хэд, хэд компанийн хамт олон бидэнд тус дэм болж хувцас хунар, түлээ түлш гээд бидний дутаж байсан бүхнийг өгсөн.
-Яг одоо өөрөө юу бодож байна?
-Сайхан сэтгэлтэй Монголын ард түмнийхээ ачийг яаж хариулахаа л мэдэхгүй байна. Гэхдээ би дөрвөн хүүхдээ сайн хүн болгож хүмүүжүүлнэ. Мөн хүүхдүүд минь ч ирээдүйд амьдрал нь ядуу олон хүнд туслах тийм сайхан сэтгэлтэй хүмүүс болоосой л гэж хүсч байна.
-Түлээ нүүрс, хоол ундгүй зутруухан байхдаа өглөө сэрээд л өнөөдөр яах вэ гэж боддог байв уу?
-Тэгэлгүй яах вэ. Би өөрөө даарч, өлсөх хамаагүй шүү дээ. Хүүхдүүдээ өлсгөх эрх надад байхгүй. Тэгээд олон нялх хүүхэдтэй болохоор ажил хийх боломж байхгүй. Үнэндээ их зутруухан л байсан.
-Хэвлэлийнхэн өөрөөс чинь ярилцлага авах гэж их ярьж байна уу?
-Тийм ээ. Гэхдээ маш хэцүү юм билээ. Би ярилцлага өгөхгүй байгаа. Нэг талаасаа миний амьдралаар хэвлэлийнхэн шоу хийж байна.
-Сайтад танай гэр бүлийнхний зурагтай бичлэг гарсныг харсан уу?
-Харин тийм ээ. Миний амьдралыг тэгж хүмүүст харуулж яах нь вэ дээ. Би чинь хүн шүү дээ. Тиймээс ичнэ, санаа зовно.
-Хэвлэлээр цацагдах тусам олон хүн та нарт тусална шүү дээ.
-Тийм л дээ. Гэхдээ би ямар нэгэн зүйлд шунамааргүй байна. Хүүхдүүдээ жаахан том болчихвол өөрөө ажил хийнэ. Би ямар ч ажлыг голохгүй. Миний ээж, аав “Өөрийн хүч хөдөлмөр, хөлс шингэсэн мөнгөөр авсан хоол илүү амттай″ гэж ярьдаг байсан.
-Удахгүй байранд нүүж орох сураг гарсан, үнэн үү?
-Үнэн. Л.Бат-Эрдэнийн байр шүү дээ. Үнэхээр биднийг хараад өрөвдсөн байх. Энэ сайхан сэтгэлтэй залууд би насаараа л өртэй болсон юм шиг санагдаж байна. Миний хүүхдүүд даанч жаахан болохоор одоохондоо юу ч мэдэхгүй тоглоод л гүйж явна. Гэхдээ олны дунд сайхан сэтгэлтэй, хүнд тус хүргэх хүмүүс маш их байдаг юм гэдгийг л би мэдэрлээ. Э.Эрдэнэсүрэн хэмээх энэ бүсгүй их азтай юм.
Түүний дөрвөн хүүхэд ээжийгээ 40 хүрэхэд аль хэдийнэ амьдралд хөл тавьчихсан хорин хэдэн настай гялалзаж явна. Ингээд бодохоор дөрвөн талаасаа түшүүлж, амьдралд хэзээ ч хазайхгүй сайхан амьдрах зөн, совин татах шиг болно. Туслах гэж гараа сунгаж буй монгол зон олноо хайрлах эх хүний энэрэнгүй сайхан сэтгэл түүнээс мэдрэгдэж байсан.
Тиймээс ч би өөрийгөө биш ард түмнээ хүндлээд сонин хэвлэлд ярилцлага өгмөөргүй байна гэж хэлсэн байх. Ямартаа ч Монголын минь нэгэн өрх эд хөрөнгөөс илүүтэйгээр сэтгэлийн аз жаргалтай байгаад баярлахгүй хүн цөөн биз ээ.
Л.Бат-Эрдэнэ: Гучин сая төгрөгөөр дөрвөн хүүхдийг нь авлаа гэх мэдээлэл цацагдсанд харамсаж байна
Ингээд Э.Эрдэнэсүрэнгийн гэр бүлд тусалж буй Л.Бат-Эрдэнэтэй ярилцлаа.
-Өөрийгөө манай уншигчдад танилцуулна уу?
-Би өөрийгөө танилцуулах боломжгүй байна. Уучлаарай.
-Яагаад өөрийгөө нууцалж байгаа юм бэ, ийм сайхан ажил өрнүүлчихээд?
-Би нэр алдар хөөцөлддөггүй. Зүгээр л нэг өрх толгойлсон эмэгтэй, дөрвөн хүүхдэд ч чадлынхаа хэрээр л тус болъё гэж бодож яваа болохоос биш тэднээр шоу хийх гээгүй.
-Та нийгмийн эмзэг бүлгийнхэнд хэр их тус дэм болдог вэ?
-Би зөвхөн Э.Эрдэнэсүрэнд туслах үйл ажиллагаа л өрнүүлсэн. Тусламж хүсч байгаа ер нь хүмүүстэй холбогдож байгаагүй. Гэтэл зарим хүн буруугаар ойлгоод тусламж хүссэн мессэж бичиж, утсаар ярьж байна. Би хүн бүхэнд гараа сунгах хөрөнгөтэй хүн биш. Иймд намайг зөвөөр ойлгоосой гэж хүсч байна.
-Э.Эрдэнэсүрэнг нэг өрөө байрандаа таван жилийн хугацаанд үнэ төлбөргүй суулгана гэсэн байсан. Энэ үнэн үү?
-Үнэн. СӨХ-ны төлбөрөөс мөн чөлөөлж байгаа. Гэхдээ би ганцаараа энэ бүсгүйд туслаад байгаа юм биш. Манай гэр бүлийнхэн бүгд тусалж байгаа.
-Э.Эрдэнэсүрэнгийнд та өөрөө очив уу. Ямаршуухан байна?
-Хэд хэдэн удаа очсон. Одоо утсаар ярих гэх мэтээр байнга холбоотой байгаа. Би ажил ихтэй болохоор намайг төлөөлж манай дүү очиж тус дэм болж байгаа. Өнгөрсөн баасан гаригт хүүхдүүдийг Нярайн сувилалд аваачиж үзүүлсэн.
Тус сувилал гурван сартай хүүхэд авах боломжгүй, зургаагаас дээш сартай хүүхэд авдаг юм билээ. Уг нь хоёр ихэрт нь жаахан сувилгаа хэрэгтэй санагдсан юм. Тэднийг эмч үзээд шинжилгээ, оношлогоонд хамруулж, эмнэлгээр явах шаардлагатай гэсэн л дээ.
-Тантай чинь уулзахыг хүссэн хүн хэр их байна?
-Байрны талаарх мэдээлэл их хурдан тархсан байна лээ. Хүмүүс утасдаж талархлын үг их хэлсэн. Сайны хажуугаар заналхийлэл, тохуурхлын өнгө аястай үг ч их ирж байгаа. Мөн утсаар ярьсан зүйлсийг маань ярилцлага мэтээр сонин хэвлэл, сайтаар тавьж худал гүтгэх хандлага ч гарч байна.
Ингэж олон нийтэд буруу ташаа мэдээлэл өгч, гүтгэж байгаад хувь хүнийхээ зүгээс гомдолтой байгаа. Сайхан сэтгэл гаргаад тусалж байгаа минь үнэн боловч надаар яг яах гээд байгаа нь мэдэгдэхгүй, ойлгомжгүй зүйлс их гарч ирж байна. Сүүлдээ энэ үйл ажиллагааг зогсоодог ч юм уу гэсэн бодол төрөх боллоо.
Гэхдээ нэгэнт амласан, олон хүмүүст хүрчихсэн болохоор орхиж болохгүйгээ мэдэж байна. Хүмүүст хандаж хэлэхэд энэ асуудлыг бодитоор тусган авч, , бодолтой хандахыг хүсч байна.
-Фэйсбүүкээр Э.Эрдэнэсүрэнд туслах нэрийдлээр олон данс нээгдэж хандив цуглуулж мөнгө завших гэсэн хүмүүс мэр сэр гарсан гэж сонссон. Үүнд хариулт өгөхгүй юү?
-Хандивын дансанд хийж байгаа мөнгийг түр зогсоосон нь дээр байх гэж бодож байна. Зүгээр нэг хүн данс нээгээд үнэнч шударгаар эзэнд нь өгнө гэдэг бол эргэлзээтэй асуудал. Хүн бүрийг нарийн шалгах, хянах боломжгүй. Хувь хүний дансанд мөнгөн тусламж орсоор байх болно. Энэ нь эргээд хяналтаа алдана.
Би ганц нэг данс нээж хандив цуглуулж байгаа хүмүүст нэгдсэн дансанд хандиваа цуглуулах санал тавьсан. Гэвч татгалзсан хариу надад ирсэн. Миний хувьд нягтлангийнхаа нэр дээр данс нээгээд хяналттайгаар тэр дансандаа ажилчдынхаа цалингаас хандив цуглуулсан. 800 мянган төгрөг цугласан байна лээ.
Өчигдөр нэгэн хандивлагч 200 мянган төгрөг хийсэн байсан. Одоогоор авч байгаа хандиваа түр зогсоогоод байгаа. Байрандаа ортол дансанд хийж байгаа мөнгөн тусламжаа зогсооцгооё гэж уриалмаар байна.
Дансны асуудлыг цэгцлэх хэрэгтэй. Нийт хандивлагч хүмүүстээ , sweet kitchen, mommy central-ийн гишүүдэд Э.Эрдэнэсүрэнгийн өмнөөс баярлалаа гэдгийг нь дамжуулах нь зүйтэй болов уу.
-Э.Эрдэнэсүрэн болоод түүний хүүхдүүд одоогоор ямархуу байгаа вэ?
-Тэдний гэр бүлд одоогоор яаралтай, шаардлагатай гэх зүйл байхгүй. Олон хүн тусалж байна. Нэг зүйлийг онцлон хэлэхэд Э.Эрдэнэсүрэн олны хөлд дарагдаад их ядарч, утсаар их ярьснаас чих нь шуугиад байгаа гэж байсан.
-Хүмүүст хандаж хэлэх зүйл бий юү?
-Э.Эрдэнэсүрэнд туслахыг чин сэтгэлээсээ хүссэн хүмүүс надтай холбоо барьж болно. Ингэж, ингэж тусалмаар байна, Ийм ийм санал байна гээд коммент юм уу , мессэж бичээрэй. Миний утсанд ирсэн сүрдүүлгийн шинжтэй яриа, мэссэжүүдийг цагдаагийн газарт шалгуулахаар өгч байгаа.
Намайг 30 сая төгрөгөөр хүүхдүүдийг нь авах гэж байгаа мэтээр мэдээлэл тавьсан сайтад хариуцлага тооцно. Ийм зүйл яаж байж болох юм бэ? Монгол хүн монгол хүндээ тусаллаа гээд буруутан болж болохгүй биз дээ.
-Ер нь өөрийн чинь талаар болон Э.Эрдэнэсүрэнгийн амьдралын тухай ташаа мэдээлэл хэр цацагдаж байна вэ?
-Маш их. Заримдаа бүр намайг Э.Эрдэнэсүрэнтэй амьдрах гэж байгаа ч гэх шиг санаанд оромгүй олон асуудал зохиож тавих юм. Энэ бүхэнд нь миний урам хугарч байгаа. Монголынхоо ирээдүйн дөрвөн сайхан иргэний төлөө л би тус болъё гэж бодсон юм. Тэгээд ч бид хээр явган таарсан хүнээ хаяад явдаггүй, хөл залгуулах унаатай болгодог биз дээ. Үүнтэй ялгаа юу байна.
-Өөрөө хэвлэлийнхэнд хээээ нээлттэй болох вэ?
-Ирэх мягмар гаригт бид хэвлэлийн хурал хийнэ. Гэхдээ би өөрөө очихгүй байх. Бид хурал зохион байгуулах болсон гол зорилго маань энэ бүсгүйн амьдралыг өөрчилж дөрвөн сайхан хүүхдийг нь зөв хүн болж хүмүүжих, сайн сайхан аз жаргал дунд өсөөсэй гэж өрнүүлж байгаа аяныг үнэн бодитой мэдээлээч л гэж хүсэх гэж байгаа юм.
В.Нэргүй
Эх сурвалж:
.png "Томруулж харах")
.jpg "Томруулж харах")
.png "Томруулж харах")
