Та Монголд аялал жуулчлалын шугамаар ирэх гэж байгаа бол онгоцоор нисэж түргэн буухыг эрмэлзэх хэрэггүй.
Манайхны түрээсээр ашиглаж байгаа онгоцнууд саадгүй нисдэг боловч заримдаа гацаа маягийн сонин “сюрприз” бариад байдаг юм. Үнэндээ сансрын цирк гэж болохоор үзүүлбэр л дээ. Та даанч монголчууд шиг галаар наадаж чадахгүй байх л даа. Тийм учраас танд хамгийн найдвартай унаа хоёр шаахай чинь байж мзднэ. Гэхдээ үнэрээс нь айхгүй бол галт тэрэг зүгээр шүү.

“Чөтгөр”-ийг мартаж болохгүй

Монгол улс маш гавшгай “чөтгөртэй” орон гэдгийг мартаж болохгүй. Та жаахан хайнгадуу алхах юм бол үнэт эдлэл, мөнгө төгрөг, аппарат, камераасаа амархан салж мэднэ. Тийм учраас “чөтгөртэй газар” чөтгөр шиг явж сур гэсэн үгийг мартаж болохгүй. Та буудалд хонохдоо ч “чөтгөр” хонгилд бий гэдгийг бодож л байх нь чухал даа.

Маск зүүхээ мартавзай

Та явдал суудал таараад нийтийн тээврийн микро автобусанд суух болбол маск зүүхээ мартавзай. Хэрвээ та энэ зөвлөгөөг мартах юм бол хаа нэгэнтэй муужран унаж, хөөгөө чирнэ шүү. Тийм элдэв үнэр ханхалсан, хөдлөх чөлөөгүй унааг “билэг танхай” монголчууд л унахаас биш өөр хэн ч унаж чадахгүй. Мөнгө хураагч нь хүртэл таны мөрөн дээр тэгнэн хэвтэж, амаа хацарт чинь наачихаад яраглана гээч. Тун халуун нялуун унаа даа, хөөрхий.

Танд хөтөвч л хань болно

Та ил задгай бие засаж сураагүй бол Улаанбаатарт ёстой хөгөө чирнэ шүү. Хотын захирагч руу утасдаад ч та тусламж авч чадахгүй. Харин монголчууд шиг байж чадах юм бол гудамжинд хаана л бол хаана давсгаа суллачихаж болно л доо. Уг нь Монгол гудамжинд бие засах талаараа ёстой жинхэнэ ардчилсан орон болчихоод байгаа юм. Бие засахад хориотой бүс гэж Монголд байхгүй. Хэрэв чадахгүй бол танд хөтөвч л хань болно шүү.

Лоозонд ховсдуулж болохгүй

Та гэр болон захын хорооллоор явж хэрэггүй. Тэнд дандаа нийгэмд гадуурхагдсан хүмүүс, үеэ өнгөрөөсөн хөгшид, зөвхөн сонгуулийн үед л хэрэг болдог “амьгүй албат”-ууд суудаг гэж үзэж болно. Эрх баригчид тэр зүг рүү харах ч дургүй. Хэрвээ таны саваагүй зан чинь хөдөлж түүгээр явах болбол хорт утааны баг зүүж, усны гутал өмсөхөө мартавзай. “Хотын хөгжил хорооноос” гэсэн гоё лоозон байдаг. Үүнд ховсдуулбал та хорвоогийн хамгийн заваан орчинг Монголд үзэх болно.

Үлгэр сонсож таашаал ав

Та хэлмэрчээ чамлаж болохгүй. Манай аль нэг дээд сургуулийн шилдэг “бүтээгдэхүүн” л байж таарна. Аялал жуулчлалын менежмент заадаггүй дээд сургууль Монголд байхгүй гэж болно. Тэд Монголын түүхийн талаар танаас дутуу мэдэж болох ч үлгэрийг нь анхааралтай сонсож таашаал авах хэрэгтэй. Хэлмэрч нар голдуу охид байгаа. Монгол охидын хийсвэр сэтгэлгээ хэрхэн хөгжсөнийг та үзнэ.

Мартахын аргагүй боломж

Монгол улсын хилийг алхангуутаа та Хятад л хүн биш бол гаалийн Баатар даргыг биш Эрүүл мэндийн сайд Гүндалайгсураглах хэрэгтэй. Сайд танд их ажил удахгүй. Ердөө нэг боодол бэлгэвч бэлэглээд Монголд ая тухтай аялахыг захина. Энэ нь чухамдаа далд бизнесийн үүдийг чөлөөтэй алхах боломжийг танд нээж өгч байгаа хэрэг л дээ. Тантай цагдаагийн ажилтан таарлаа гэхэд сайдын өгсөн бэлгэвчийг үзүүлэхэд л тэд ёслоод үдэх болно. Ийм боломж олгодог орон Монголоос өөр байхгүй гэдгийг мартаж болохгүй.

Хүний эрхийн сюрприз”-үүд

Монгол бол хүний эрх гээчийг онцгой байдлаар эдлүүлдэг орон гэдгийг та мартаж болохгүй. Хүмүүсийн ихэнх нь бохир засмал дээр сүүжээ амрааж хэвтэхийг хараад та гайхаж магадгүй. Энэ 1бол монгол маягийн эрх чөлөө л дөө. Хэрвээ та боломж болгоныг ашиглаж амьдралын гүн рүү лав орох юм бол хог ухаж амьдрагсад, гэр оронгүй хүүхдүүд, согтуу хүчирхийлэгч нарын сонгодог сюрпризийг үзэж болно. Их Монгол улс үүсэж байгуулагдсаны 800 жилд үе дамжуулан өвлөж яваа нүүдэлчдийн соёл иргэншлийн нэн эртний ховор дадал хэвшил. Төр засаг минь энэ мэтийг хайрлан хамгаалсаар байгаа бөгөөд гадаадын хүмүүст сэтгэл харамгүй үзүүлэх болно.

Монголд жэн жаргалтай вэ?

Хүй долоон худаг гэдэг газарт болох “Тоосон дундах 21 дүгээр зуун” гэсэн нүүдэлчдийн шоуг та заавал үзээрэй. Энд жинхэнэ Монгол түйрэн гэж юу байдгийг хэн хүнгүй үзэж, гадаадын нэртэй хамтлагууд Чингисийн морьдын тоосонд дарагдаж “Хаан хуушуур” амтлах болно. Тэнд ядуу Монгол дэлхийн нүдэн дээр 2 тэрбум төгрөг шатаан хаяж хэн болохоо харуулах юм. Энэ мөнгө бол хүүхдүүдийн гараас, татвар төлөгчдийн халааснаас булаан авсан мөнгө учраас баярын талбайд хүмүүс инээж байвч амьдралын мухарт ядуу хүүхэд уйлж байх болно. Энэ нь амьдрал бол инээд, нулимс хоёроос бүтдэг гэдгийг Их баярын нэрээр үзүүлж байгаа сонин шийдэл л дээ. Баяр болоход баячууд жаргаж, ядуус уйлдаг гэсэн аксиом нэвт гэрэлтэх юм. Эндээс л та Монголд хэн жаргалтай вэ? гэдгийг мэдэх болно. Бүү март!

Буян үйлдэхэд буруугүй

Та Хүй долоон худгаас шууд Ганданд очиж ариун сан тавиулах хэрэгтэй. Гандан хүрэх замд чинь хорин хоёрын товчооны хавиас таныг ариутгах станцынхан хотынхоо бохирын үнэрээр ариулах болно. Энэ бол дэлхийд хүргэхийг зорьж байгаа монгол үнэр. Хотоос баруун зүг чиглэсэн, бас энэ зүгээс ирсэн бүхэн энэ үнэрээр ариулж Монголд байгаагаа мэдэрдэг юм. Та Ганданд ариун сан тавиулахын дээр хийморийн сан тавиулах хэрэгтэй. Учир нь гадаадын хүнд хорин хоёрын товчооны хавиас сэнгэнэж эхлэх Монгол үнэр хүнддэх тал бий. Нөгөө талаар баячууд баярлаж байхад цаана нь хүүхэд уйлж байгаа гэдгийг санаж буян үйлдэхэд буруудах явдал байхгүй.

Н.Даваадаш /Тоншуул/

Монголд зочилох гадаадынханд зориулсан супер зөвлөгөө / хошигнол/
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
"Үнэн үгэнд хүн дургүй" гэж. Мэдээж ********ь ч улсад дутагд******** бий нь үнэн. Гэхдээ сайн т******** нь илүү. Харин манайд? Уншиж ухаараад ******** бүхнээ засаж з********аруулахыг бодох хэрэгтэй. Санаа нь сайн болжээ.

2013-12-22 | 20:17:40 | 92.92.50.155 |

Зочин
ali ch ulsad ene zergiin yum baidag gedgiig meddeggui l yum baihdaa. yamar ulsad baij uzsendee ingej MGL-g buruu zuwgui bairtsgui shuumjilj, bidniig dormjilj bga yum bol. Ger horoolold amidardag humuus hun bishuu? Europe-n tsigaan gej sain hulgaichid baijil ba. yum uzeegui mal we gej heliye de. MGL uls yaduu gene. oor uls oron mongo zarj bayar temdegledeg biz dee bas ter ni tatwar tulogchidoos garna. ogt sanaa niilehgui ba. MGL-s zail ter saihan gazarluugaa yaw!!!

2013-12-22 | 16:50:46 | 103.26.193.4 |

Зочин
davaa dash sda zail teneg mal

2013-12-22 | 15:59:41 | 103.23.51.4 |

Мэдээ
Гадаад мэдээ
Видео