Пиджяк үүссэн түүх

Tweet

Пиджяк үүссэн түүх

2013-12-30

Эрчүүдийн цорын ганц гоёл бол яах аргагүй хослол.

Тэгвэл бидний ганц гоёл болох костиум пиджяк яагаад одоо байгаа энэ энгийн загвараараа бараг л мөнхрөх болов. Энэ дэлхий дээрх аливаа нэг эд юмс бүхэн цаг хугацаа, шинжлэх ухаан, нийгмийг дагаад хувьсан өөрчлөгдөж, сайжирч, доройтож, шинэчлэгдэж байхад яагаад гагцхүү эрчүүдийн цорын ганц гоёл энэ бүтцээ олоод төгс төгөлдөрт хүрсэн мэт үл өөрчлөгдөнө вэ? Учир нь энэ бол эрчүүдийнх болхоор тэр. Угаас эрэгтэй хүний зан чанар, амьдрах хэв маяг эмэгтэйчүүдээс өөр. Эмэгтэйчүүдийн хувцаслах соёл түм бум. Тансаг үдэшлэгт хайртай бүсгүйд чинь, гэргийд тань сонголт хийх түм буман хувилбар бий.

Гоёлын даашинз, богино банзал, урт богино плать, төрөл бүрийн загвар гээд энэ бүхэн тэс өөр. Харин эрчүүд бид нэгэн хэвийн хэдхэн сайн хослол олж өмсөөд түүнийгээ бүхий л арга хэмжээ, ажил төрөл, чөлөөт цагаараа ч өмсөх нь бий. Тэгвэл эрчүүдийн гоёл болох энэ төгс хувцас яаж үүссэн тухай цувралаар хүргэхээр бэлдлээ. Би элдэв түүх өгүүлж уйтгартай хүүрнэмж бичихгүй. Энэ нийтлэлээс та эрэгтэй хүн өөрийн цорын ганц гоёлоо сонгохдоо эхнэртэйгээ биш, найз бүсгүйтээгэй, найз охинтойгоо, тэр ч бүү хэл ээжтэйгээ ч биш зөвхөн эр хүн та өөрөө явж сонгох ёстойг хэлж байна. Өөрийн гэсэн сайн чанарын хослолтой болох бүх хэрэгтэй мэдээллийг цувралаар хүргэх болно. Эрэгтэй хослолын түүхийг мэдээж европын дээд язгууртнууд аристократууд бий болгосон нь ойлгомжтой. Тэгвэл яг бидний өнөөгийн мэдэх хослол үүсч хөгжсөн энэхүү түүхтэй яах аргагүй Англи үндэстэн тэр дундаа Английн Лондон хотын Saville Row гудамж салшгүй холбоотой.
Анх 1822 онд Saville Row гудамжинд Henry Pool оёдлын жижиг цех мэндэлснээр бидний өнөөгийн мэдэх хослолын эх үндсийг тавьжээ. Тухайн үед Henry Pool оёдлын газраар хаад ноёд, генерал жанжингууд тэр дундаа Чарльз Дикинсон, Наполеон хүртэл үйлчлүүж дэлхийд алдартай эрэгтэй хувцасны хамгийн шилдэг оёдлын газар гэх нэрийг зүүж дэлхийн өнцөг булан бүрээс Saville Row гудамжинд оёдлын олон олон цехүүд нээгдэх болж дор бүрнээ бидний мэдэх гоёлын хослол, энгийн пиджяк, товчтой энгэртэй срочкин цамц, зангиа гээд бүгд үүссэнээр өнөөг хүрчээ. Saville Row бол 20-р зууны эрчүүдийн хувцаслалтанд шинэ, шилдэг стандарт тогтоосон цорын ганц газар юм. Хожим нь мэдээж бидний мэдэх алдарт GIORGIO ARMANI, Versace, Brioni гэх Италь, Францийн загварын алтан үеүүд залгаж эрчүүдийн хувцаслалтанд томоохон өөрчлөлтүүдийг оруулсан.

Тэгвэл Saville Row-оос үүсэлтэй жинхэнэ эрчүүдийн хослол бусдаасаа юугаараа ялгаатай вэ?
Энэ бол мэдээж гар аргаар гүйцэтгэх явдал юм. Учир нь тэд бүгдийг гараар хийдэг. Хүрэмний загвар, зүсэлт, хайчлалт, оёдол энэ бүхэн сөөм сөөмөөр, маш нарийн гараар урлагддаг урлагийн бүтээл л гэсэн үг. Нэг хослол гараас гарахдаа бүтэн 52 ажлын цаг буюу нийтдээ 1 ээс 3 сар болж байж бэлэн болдог.

Ингэж нарийн үйлдсэн хослол маш олон гайхалтай чанаруудтай. Жишээ нь материал, тэд мэдээж дээд зэргийн египт даавуу, эсвэл хониний нэхийгээр нэхсэн цэвэр даавуунуудыг ашигладаг. Мөн дээд зэргийн биед эвтэйхэн байдал, дээд зэргийн оёдол, хамгийн чухал нь зөвхөн таньд өөр хэнд ч биш, цорын ганц таньд яг цав таарах хослол. Энэ бол жинхэнэ эр хүний гоёл юм. Өнөө үед ийм төрлийн хослол тэнгэрт тулсан үнэтэй нь мэдээж.

Яг одоо та Англи уруу нисч очоод Saville Row гудамжинд хослол хийлгэж өмсөнө гэвэл дор хаяж халаасандаа 2500 паундтай байх цаашлаад 15’000-аас 75’000 мянга хүртэл паундтай байж хамгийн шилдгийг нь хийлгэж өмсөх болно. Мэдээж энэ бол бүтэшгүй зүйл учир бид та бүхэндээ Saville Row-ын оёдолчдийн өгсөн шилдэг зөвлөгөөнүүдийг хүргэж байна. Та уг зөвлөгөөг дагасанаар хамгийн сайныг нь биш юмаа гэхэд ядаж л өөртөө ямар размерийн хослол таарах, ямар өнгө байвал зохих талаар мэдэж авах болно.