Арванхоёрдугаар сарын эхээр гэхэд л тэнгэрт хадаад байсан мах, гурилын үнэ шинэ жилийг далимдуулан багагүй хувиар нэмсэн байна. Нийслэлийн төвийн зургаан дүүрэгт байрладаг хүнсний томоохон зах, худалдааны төвд 20 нэрийн барааны үнэ тогтвортой байхад гурван нэрийн барааны үнэ буурч, есөн нэрийн барааных өсчээ.

Бараа бүтээгдэхүүний үнэ өнгөрсөн сарын дундаж үнэтэй харьцуулахад 6.2, өмнөх долоо хоногийнхоос 0.9 хувиар өссөн байна. Тухайлбал, өнгөрсөн сарын 18-ны байдлаар нэг кг хонины ястай мах дунджаар 6800 төгрөг байсан бол шинэ жилийн өдрүүдэд 7410 төгрөг болтлоо өсчээ. Мөн үхрийн ястай мах 7780 төгрөг байсан нь нэмэгдэж 8010 төгрөгийн үнэд хүрсэн байв. Үхрийн цул мах одоогийн байдлаар 9590, адууных 6560, ямааных 5600 төгрөгийн үнэтэй байна.

Энэ нь өнгөрсөн сарынхаас хонины ястай махны үнэ 10.7, үхрийн ястай мах 3.8, үхрийн цул мах 4.8, адууны мах 14.1, ямааны мах 12.2 хувиар өссөн үзүүлэлт юм. Харин өмнөх долоо хоногийнхоос хонь, үхрийн ястай махны үнэ 2.1, үхрийн цул мах 2.7, адууны мах 2.5, ямааны мах 4.2 хувиар тус тус өсчээ. Үхрийн мах “Хүчит шонхор” хүнсний захад хамгийн хямд буюу 7300, “Меркури” хүнсний захад хамгийн өндөр үнэтэй буюу 9800 төгрөг байв. Мөн хонины ястай махны үнэ өмнөх долоо хоногтой харьцуулахад 2.1 хувиар буюу 155, хонины цул махны үнэ 5.2 хувиар буюу 350 төгрөгөөр тус тус өссөн байна.

Хонины мах “Хүчит Шонхор” хүнсний захад хамгийн хямд буюу 6200, “Меркури” хүнсний захад хамгийн өндөр үнэтэй буюу 9800 төгрөгөөр худалдаалж байгаа аж. Түүнчлэн нийслэлийн хүнсний томоохон зах, дэлгүүрт “Алтан тариа” савласан гурилын үнэ дээд зэрэг нь 1050- 1300, нэгдүгээр зэргийнх 700-900, хоёрдугаар зэргийнх 500-800 төгрөг байна. Худалдан авагч олонтой “Хүчит шонхор”, “Таван эрдэнэ”, “Бөмбөгөр”, “Баянзүрх”, “Хархорин” хүнсний захад задгайгаар буюу шуудайгаар худалдаалж буй дээд зэргийн “Алтан тариа” гурил 1000- 1100 төгрөгийн үнэ ханштай байлаа. Мөн “Барс” хүнсний захад нэг кг дээд зэргийн “Алтан тариа” гурил 1100, нэгдүгээр зэргийн гурил 750 төгрөгөөр тус тус худалдаалж байв. “Атар” талх хүнсний зах, дэлгүүрт 800-900 төгрөгийн үнэтэй байсан бөгөөд “Бөмбөгөр”, “Барс”, “Хар Хорин” хүнсний захад хамгийн хямд буюу 800, “Меркури” хүнсний захад хамгийн өндөр үнээр буюу 900 төгрөгөөр худалдаалж байсан юм.

Харин баярын өдрүүдэд иргэдийн хүнсний гол хэрэглээ болдог төмс, хүнсний ногооны үнэ хэвийн байлаа. Өөрөөр хэлбэл, сүүлийн долоо хоногийн ханшийг нь өмнөх долоо хоногтой харьцуулахад монгол лууван 1.5 хувиар буюу 20 төгрөгөөр буурч, бусад хүнсний ногооны үнэ тогтвортой байгаа ажээ.

Түүнчлэн цагаан будааны үнэ өмнөх сарынхаас 0.2 хувиар өсч, өмнөх долоо хоногийнхоос өөрчлөлтгүй байна.

ШИНЭ ОНЫГ НЭГ ӨРХ ДУНДЖААР 150 МЯНГАН ТӨГРӨГӨӨР УГТСАН

Бараа, бүтээгдэхүүний үнэ өссөн ч баярын ширээгээ дүүргэхээс өөр аргагүй тул иргэд хамаг байдгаа шавхан байж шинэ оноо угтлаа. Наад зах нь бууз, баншны мах, гурил, будаа, тавгийн чихэр, хүүхдийн бэлэг, бялуу, оргилуун дарс, ундаа гээд заавал авах зүйлс. Эдгээр зүйлсийг хамгийн хямдаас нь худалдан авахад л 100 мянган төгрөгт хүрснийг иргэд хэлж буй. Дээрээс нь хүнсний ногоо, хиам, майонез, өргөст хэмх, жимс, архи, дарс зэрэг олон төрлийн бүтээгдэхүүн зайлшгүй авч таарна. Ингээд бодохоор нэг сарынх нь цалин яагаад ч хүрээгүй гэсэн үг. Тиймээс шинэ оноо нийслэлийн төв талбайд угтсан иргэдийн олонхи нь зардал мөнгөө бага гаргах гэснийх байсан гэдэг үнэний ортой аж. Өөрөөр хэлбэл, төв талбайд 1-2 оргилуун дарс, халуун сав цай, хэдэн буузтай ирээд л шинэ оноо угтсан тухай олон хүн хэлж байна. Харин гэр бүлээрээ гэртээ он гаргасан иргэд 31-1-нд шилжих хугацаанд дунджаар 150 мянган төгрөг зарцуулжээ. Энэ талаар зарим хүний сэтгэгдлийг сонссон юм.

АРД ИРГЭД ЯДУУРЧ, АМЬДРАЛ ТУЙЛДАА ХҮРЧ БАЙНА

Чингэлтэй дүүргийн иргэн Н.БАЯНЖАРГАЛ
-Шинэ жилийг сэтгэлдээ хүртэл сайхан тэмдэглэж чадаагүй. Амьдрал хэцүү байна. Хоосон хонохгүйн тулд өвлийн хүйтэнд гадаа чихэр, бохь ширхэглээд л суух юм. Өдөржин гадаа суугаад олсон мөнгөөрөө түлээ нүүрс, хүнсний бүтээгдэхүүнээ аваад л дуусна. Шинэ оноо бусдын адил сайхан угтахын тулд бялуу, дарс, мөн хүүхдэдээ бэлэг авсан. Өнгөрсөн жил 12 мянгаар авсан бялууг энэ жил 18 мянган төгрөгөөр худалдан авч байна. Энэ жил нийт 70 мянган төгрөгөөр л тэмдэглэлээ. Хоосон шахам сууж байхад айл, саахалт, хамаатан саднынхан орж ирэх хэцүү шүү дээ. Хүүхдүүдэд нь өгөх бэлэггүй, хоол унднаас авахуулаад хомс байгаадаа маш их санаа зовсон. Нүүрээ улалзуулаад л шинэ оныг угтлаа. Гэхдээ нийгмийн доод давхрагын амьдралтай иргэдийн амьдрал бүгд ижил болохоор зарим нь ойлгох л юм. Ер нь өдрөөс өдөрт өргөн хэрэглээний бараа бүтээгдэхүүний үнэ өсч байна. Ард иргэд ядуурч, амьдрал туйлдаа хүрч байна. Төрийн түшээд одоо анхаарах цаг болсон. Энэ засаг гарч ирээд бүр л иргэдийн амьдрал доошилж байна шүү дээ.

БАЯРААР 350 МЯНГАН ТӨГРӨГ ЗАРЦУУЛСАН

Баянгол дүүргийн иргэн У. ЭНЭБИШ
-Манайх шинэ оноо их өндөр өртгөөр угтлаа. Өнгөрсөн жил 18 мянган төгрөг байсан бялууг өнөө жил 25 мянгаар авсан. Чихэр, жимс, гурил, будаа, мах, ногоо гээд үнэ нь нэмэгдээгүй бүтээгдэхүүн алга. Энэ жил нийт 350 мянган төгрөгөөр баярласан. Ах дүү хамаатан садан ирээд хүүхдүүдэд нь бэлэг, хоол унд гээд л зарлага өндөртэй шинэ жил боллоо. Буузны мах гэхэд л 70 мянган төгрөг болж байсан. Энэ жил манайд 40 хүүхэд ирсэн. Тэдний бэлгэнд 120 орчим мянган төгрөг зарцуулсан байна лээ. Манайх бол дундаж амьдралтай айл. Ер нь УИХ- ын гишүүд, сайдууд хэт дээгүүр хараад сууж байна. Доод төвшиндөө ард түмний амьдрал ямар хэцүү байгааг мэдэхгүй нь харамсалтай. Тэдэнд бидний амьдрал дунд орж ирээд хөл нийлүүлээд алхаад үз гэж хэлмээр байна. Зүгээр сайхан амлалт өгөөд хэрэггүй. Хэлж байгаагаа хэрэгжүүлэх цаг хэдийнэ болсон. Өргөн хэрэглээний бараа бүтээгдэхүүний үнэ тэнгэрт хадаж, зарим айл хоосон хонож байгааг харах хэрэгтэй. Өөрсдөө гадаадаас хүнсний бүтээгдэхүүнээ захиалж авчирдаг хүмүүс бараа бүтээгдэхүүний үнэ хэрхэн нэмэгдэж байгааг мэдэхгүй л дээ. Энэ жил олон айл шинэ оноо арай гэж угтсан.

ЭНЭ ЯНЗААРАА ҮНЭ ӨСӨӨД БАЙВАЛ ЦАГААН САРЫГ ТЭМДЭГЛЭЖ ЧАДАХГҮЙ БАЙХ

Баянзүрх дүүргийн иргэн Г.НАРАН
-Баяр наадам болох үеэр бараа бүтээгдэхүүний үнэ гэрлийн хурдаар өсдөг болж. Хоёр хоногийн өмнө 15 мянган төгрөг байсан бэлэг нэг өдрийн дараа гэхэд 20 мянган төгрөг болсон байх жишээтэй. Шинэ жил болж байхад бараа бүтээгдэхүүний үнэ яагаад нэмэгдэж буйг худалдагчаас нь асуухад авбал ав, байвал бай та нар үйлчлүүлж чадахгүй бол явж үз гэж байсан. Хаанаас, хэн нэмээд байгааг үйлчлүүлэгч бид асууж мэдэх эрхтэй биз дээ. Энэ жил манайх хүнсний бүтээгдэхүүнээ хамгийн хямдаас нь түүн байж 150 орчим мянган төгрөгөөр шинэ оноо угтлаа. Ер нь үнэ нь нэмэгдээгүй зүйл гэж нэг ч алга. Удахгүй цагаан сар болно. Тэгэхээр үнэ нь буурах биш улам л нэмэгдэх байх. Ард түмэн туйлдаж гүйцлээ шүү дээ. Үүнийг яагаад зохицуулахгүй байгаа юм бэ. Энэ янзаараа үнэ өсөөд байвал олон айл цагаан сарыг тэмдэглэж чадахгүй байх.

М.НАРАНБОЛД