Манай улс НҮБ-ын БНАСАУ-д зэвсэг нийлүүлэх хоригийг зөрчөөгүй, тус улсад байлдааны онгоц худалдаагүй талаар мэдэгдэлд дурдсан байна...

Батлан хамгаалах яамны Бодлогын хэрэгжилтийг зохицуулах газрын дарга, хурандаа Х.Батсайхан, Хяналт шинжилгээ үнэлгээ, дотоод аудитын газрын дарга, хурандаа Д.Жаргалсайхан, “Монгол базальт” ХХК-ийн захирал, Батлан хамгаалах аж үйлдвэрийн нэгдлийн дарга, хурандаа Л.Ариунболд, БХЯны Төрийн захиргаа, удирдлагын газрын даргаар хурандаа цолтой ажиллаж байсан, ГХЯны Консулын газрын захирал Ш.Сүхбаатар, УИХ-ын гишүүн асан Батж.Батбаярын хүү “ХөМоТэ” ХХК-ийн захирал Б.Баттулга нарыг 2014 оны нэгдүгээр сарын 15-ны орой АТГ-ынхан баривчилж хорьсон юм.

Өнгөрсөн бямба гаригт буюу нэгдүгээр сарын 18-нд “Монгол базальт”-ийн Л.Ариунболдыг батлан даалтад гаргаж, бусдыг нь үргэлжлүүлэн хорьсон мэдээлэл байна.

Дээрх эрхмүүдийг баривчлагдсаны маргаашаас л ГХЯны мэдэгдэлд дурдсан байлдааны онгоц наймаалсан хэргийн талаарх мэдээллүүд хэвлэл мэдээллийн хэрэгслүүдээр цувран гарсан.

Учир нь Зэвсэгт хүчний жанжин штабын Агаарын довтолгооноос хамгаалах цэргийн командлагч асан, баригадын генерал Т.Дашдэлэгийг 2011 онд цэргийн ангид ашиглаж байсан байлдааны сөнөөгч бөмбөгдөгч МИГ- 21 онгоцны моторыг БНАСАУ-д худалдсан гэх хэрэгт буруутгагдаж, шүүхээс ял авснаас хойш арав ч хоноогүй байхад дээрх таван эрхмийг баривчилсан юм.

Гэхдээ энэ эрхмүүдийг баривчилсан нь Т.Дашдэлэгийн хэрэгтэй холбоогүй болохыг албаны эх сурвалж хэлжээ.

Стратегийн ач холбогдол бүхий төмөр замыг хятадуудад худалдсан, үүнтэй холбогдуулан баривчилсан гэх мэдээлэл бас гарч ирэв.

Налайх дүүрэг дэх Зэвсэгт хүчний 337 дугаар ангийн мэдэлд байдаг 6.5 км цэргийн зориулалттай төмөр зам байжээ. Хамгийн сүүлийн баримт ноттой мэдээллээр Лу.Болд сайдын үед эхлүүлсэн цэргийн албан хаагчдын орон сууцны барилгын ажилтай холбоотой гэв.

Батж. Батбаярын хүү Баттулгын мэдэлд байдаг “Спейшл” корпораци 2012 оны хоёрдугаар улиралд багтаан Монгол цэргийн музейн хашаанд 230 албан хаагчийн орон сууц барих тендерт “ялсан” байгаа юм. Гэтэл Сангийн яамныхан “Наад компани чинь олон тэрбумын асуудалтай.

Найдваргүй...” гэснээр нэрээ өөрчилж "ХөМоТэ" буюу Хөх Монголын Тэнгэр нэртэй болгоод төсөв хөрөнгөө шийдүүлж авчээ. Ингэхдээ нэмж 70 айлын нэг барилга барихаар болж, нийтдээ 300 албан хаагчийг орон сууцтай болгох төслийг эхлүүлжээ.

2011 оны есдүгээр сарын 9-нд 230 айлын барилгын 7.9 тэрбум, 70 айлын барилгын 2.4 тэрбум, нийт 10.3 тэрбум төгрөгийг “ХөМоТэ” гэх Б.Баттулгын компанийн данс руу шилжүүлжээ. Ажил эхлэх байтугай суурийнхаа нүхийг ч ухаагүй байхад нь ийн шилжүүлсэн хэрэг.

Гэрээ ёсоор дараа жилийнх нь дундуур ашиглалтад орох ёстой байсан дээрх 300 албан хаагчийн орон сууцны барилга өнгөрсөн онд НЗДТГаас дулаан, цахилгаанаар хангах боломжгүй 80 барилгын нэгээр “өргөмжлөгдсөн” байгаа юм.

Юутай ч Лу.Болд Батлан хамгаалахын сайд байхдаа эрхийн бичгийг нь армийнхныг сөгдүүлэх шахам байж тараасан ч орон сууц нь өнөөдөр иймэрхүү байдалтай... Д.Бат-Эрдэнийг сайд болсны дараа ажилд орсон “Монгол базальт”-ын Л.Ариунболдыг суллаад бусдыг нь үлдээснээс харвал энэ үндэслэл үнэн байх магадлалтай.

Гэхдээ Л.Ариунболдыг сайд болсон найз нь харж үзэн бяраа гаргаж, яамны харъяа хэд хэдэн газрыг нэгтгэн Батлан хамгаалах аж үйлдвэрийн нэгдлийг байгуулж даргаар нь томилсон гэж байгаа. Уг нь улсын үйлдвэрийн газрыг Засгийн газрын тогтоолоор байгуулж, даргыг нь Төрийн өмчийн хорооноос томилдог хуультай ажээ. Л.Ариунболд хурандаа цолтой, дарга болсноосоо хойш Тендерийн хууль зөрчин “Монгол өргөө”, “Хасу цамхаг”, “Эрчим хүчний барилга трест”, “Каркас” зэрэг компанид сонгон шалгаруулалтгүйгээр ажил өгсөн ... зэрэг мэдээлэл хэвлэлүүдээр харагдаж л байдаг.

Ер нь батлан хамгаалах, зэвсэгт хүчний салбар дахь мөнгө төгрөг, ашиг сонирхлын зөрчлийн талаарх мэдээлэл хэдийнэ эл дол болсон зүйл. Улсын нууц, нууцын зэрэглэл гэдэг юмаар хамаг булхай но-гоо халхлаад сурчихсан газар гэвэл зохино.

Эх орны нэр хүнд, нүүр царай гэдгээр бамбай хийн их мөнгө төсөвлүүлэн авч, тэр нь хараа хяналт муутай зарагддаг тухай энд тэнд ярьж бичиж л байдаг. Батлан хамгаалахын хэдэн генерал Улиастайн Хадат орчимд бүхэл бүтэн уулын амыг хашаад хаус хотхон барилаа. АНУ-ын БХЯ-ны тусламжаар өгсөн цэргийн зориулалттай 21 дизель станцын нэгийг тэндээ аваачиж ашиглаж байна...

Батлан хамгаалахын дэд сайд Б.Эрдэнэбат, Ар тал хангалтын газрын дарга М.Жаргал нар ууланд гулгаж яваад дэд сайд нь газрын даргынхаа хөл рүү цанын таягаар хатгаж гэмтээсэн “хэрэг” гарч дуулиан тарьж байлаа.

Гэтэл тэд татан буулгасан барилгын объект, эд хөрөнгөөс их, бага идсэн ууснаасаа болж маргалдсан гэх. Ямартаа л манайд айлчилж ирсэн АНУын генерал “Оросын генералууд өндөр албан тушаал, цол авах тусмаа гэдэс нь томордог.

Харин манайд эсрэгээрээ. Албан тушаал, цол ахих тусмаа туранхай байдаг...” гэж хэлээд явах вэ дээ. Хэрэг дээрээ хойд хөршийн генералуудыг бус манайхныг дүгнэж хэлчихээд явжээ. Үүнийг нь ойлгоогүй манай “бүдүүн” генералууд энэ үгийг хошин яриа болгон бусдад сонирхуулаад сууж байсан гэж байгаа. Энэ мэтчилэн яривал нэлээд урт жагсаалт болно.

Үүнээс гадна сайд Д.Бат-Эрдэнэ, дэд сайд А.Баттөр, мөн БХ-ын сайд асан Лу.Болд, дэд сайд А.Баттөр, сайд Д.Бат-Эрдэнэ, өмнөх сайд Лу.Болд гэсэн улс төр, бизнесийн эсрэгцлүүд тулсан гэх яриа элбэг байгаа. Улс төрийн хүрээнийхэн ч ийн ярьж буй.

Тэгэхээр “бүдүүн” хурандаа нарын баривчилгаагаар эхэлсэн АТГ-ын ажиллагаа Батлан хамгаалахын салбарын маапаанаас үүдэлтэй юу, сайд нарынх нь маргалдаанаас эхтэй юу гэдэг удахгүй тодорхой болох биз ээ.

Б.Дамдин-Очир