Өмнөговь аймгаас Улаанбаатар хот болон Орхон, Дархан-Уул, Дорноговь аймгийн их, дээд сургуулиудад суралцаж буй 800 оюутнаас гадна Өмнөговь аймгийн Засаг даргын тамгын газар, Хөдөлмөрийн хэлтэс, сумдын Засаг дарга нар, Өмнөговь аймагт үйл ажиллагаа явуулж буй төрийн болон хувийн хэвшлийн аж ахуйн нэгжүүд энэхүү чуулганд оролцсон юм.

Чуулганы нээлт дээр хэлсэн үгэндээ УИХ-ын гишүүн, Батлан хамгаалахын сайд Д.Бат-Эрдэнэ уул уурхайгаар тэргүүлэгч Өмнөговьд бүхий л салбарт хөгжиж дэвших боломж байгаа гэдгийг онцлоод, энэхүү хөгжил дэвшлийн түүчээ, гол эрч хүч нь нутгийн оюутан залуус болохыг онцгойлон дурдсан юм. Тус аймагт зөвхөн уул уурхай төдийгүй аялал жуулчлалын салбарыг хөгжүүлэх боломж нээлттэй байгаа. Тиймээс Өмнөговь аймгаас суралцаж буй оюутнуудыг энэ чиглэлд мэргэшин, чадварлаг боловсон хүчин болох шаардлагатай байгааг сануулсан юм. Түүнчлэн чуулганы үеэр боловсролыг дэмжих “Говийн Ирээдүй” сан байгуулж байгаагаа дуулгасан. Тус сан нь сурч боловсрох хүсэлтэй ч амьдралын боломж муутай оюутнуудад туслах, сурлагаараа тэргүүлэгч, идэвх зүтгэлтэй, төрөлх нутгийнхаа хөгжилд манлайлан оролцох оюутан залуусыг дэмжин ажиллах юм байна.

60 гаруй мянган хүн амтай Өмнөговь аймгийн хүн амын тэн хагас нь залуус байдаг. Тэдний төлөөлөл болж 2400 гаруй залуус өнөөдөр их дээд сургуульд суралцаж байна. Мөн энэ хавар 450 орчим сурагч дунд сургуулиа төгсөж, их дээд сургуулийн босгоор алхана.

Энэхүү чуулга уулзалтын үеэр Өмнөговь аймгийн Хөдөлмөрийн хэлтсээс хөдөлмөр эрхлэлтийн чиглэлээр хийж буй ажлууд, орон нутагт хэрэгцээтэй байгаа ажлын байрны талаар мэдээлэл хийж, Өмнөговь аймагт уул уурхай, барилга, боловсрол, эрүүл мэнд, аялал жуулчлал, банк санхүү болон бусад чиглэлээр үйл ажиллагаа явуулж байгаа төрийн болон хувийн хэвшлийн аж ахуйн нэгжүүд хүний нөөцийн бодлого, ажилд авах журам, тэтгэлэгт хөтөлбөрөө танилцуулж, нээлттэй ажлын байранд ажилд орохыг хүссэн залуучуудыг бүртгэж, ярилцлага хийж, шууд холбоо тогтоож байсан нь залуучуудын хүсэл сонирхолд нийцсэн алхам боллоо. Мөн зуныхаа амралтаар нутагтаа ажил хөдөлмөр эрхлэх хүсэл сонирхолтой залуучууд аймгийн Хөдөлмөрийн хэлтсийн бүртгэлийн ажилтанд шууд бүртгүүлж байлаа.

Нутгийн төгсөгчдөө ажлын байраар хангах, тэднийг дэмжин ажиллахаар төрийн байгууллагуудаас гадна “Оюутолгой”, “Энержи ресурс”, “Монголын алт”, “Эрдэнэс таван толгой”, “Таван толгой” ХК, Саусгоби сэндс, Терра энержи, Өсөх зоос, Тавантолгой Транс ХХК зэрэг уул уурхайн компаниуд, “Гайхамшигт говь” аялал жуулчлалын холбоо, “Хаан”, “Голомт” банкууд зэрэг хувийн хэвшлийн аж ахуйн нэгжүүд оролцож залуучуудад өөрсдийн хүний нөөцийн бодлого, нээлттэй ажлын байраа танилцууллаа.

Манай улс 180 орчим мянган оюутантай бөгөөд жил бүр 30 гаруй мянган залуус их дээд сургуулиа төгсч, дипломоо гарддаг. Харин тэдний дөнгөж 40-өөдхөн хувь нь мэргэжлээрээ ажилд орж, амьдралын гараагаа эхэлдэг. Үлдсэн нь ажлын байргүй, мэргэжлийн бус, цалин бага, ажиллах орчин нөхцөл алга гэх мэт аахар шаахар шалтаг тоочин ажилгүйчүүдийн эгнээнд шилждэг. Харин их дээд сургууль төгсөгчдөө орон нутагтаа урин дуудах, тэднийг аятай тухтай, сэтгэл дүүрэн ажиллаж амьдрах нөхцөл бололцоогоор хангах, ажил олгогч байгууллага-ажил хайгч төгсөгчдийг холбох, орон нутагт үйл ажиллагаа эрхэлж байгаа төр болон хувийн байгууллага, аж ахуйн нэгжүүдээ идэвхжүүлэх зорилготой энэхүү чуулган нь бусад аймаг, орон нутаг санаа авууштай маш шинэлэг арга хэмжээ боллоо.

“Эзэмшсэн мэргэжлээрээ Эх нутагтаа ажиллацгаая” хэмээх бадрангуй урианд нэгдсэн залуус төрөлх орон нутгаа зорьж, хөгжил дэвшилд хүрэх их хүч болох нь дамжиггүй юм