Энэ нь хэвлэлээр гарч байгаа мэдээллээс андашгүй харагдаж буй. Эдийн засгийн хөгжлийн яам шинээр байгуулагдаж, үйл ажиллагаагаа явуулаад хоёр жилийн нүүрийг үзэж байна. Гэвч энэ хугацаанд Монголын эдийн засаг ямар байдалд хүрсэн бэ? Үүнийг эх оронч сэтгэлтэй, ард түмэндээ хайртай хүмүүс яагаад олж харахгүй байна вэ!?

УИХ дахь МАН-ын бүлэг Эдийн засгийн хөгжлийн сайдыг огцруулах асуудлыг УИХ-ын даргад өргөн барьснаас хойш түүн шиг сайн хүн Засгийн газарт байхгүй гэдгийг ойлгох шиг боллоо. Хэвлэлийнхнийг өмгөөлж, хамгаалж байсан хүн түүнээс өөр байгаагүй л гэнэ. Сайдыг огцруулах асуудлыг ярьж байхын оронд эдийн засгийг сайжруулах боломжийн талаар ярьж байх цаг. Түүнийг огцорч, ажлаа өг гэхийн оронд, уртасгасан цагаар ажиллаж, шүүмжлэлийг бодитоор хүлээн авч, ажилдаа шамдан ор гэж шаардмаар байна гэх мэтээр өмгөөлөн хамгаалах оролдлого хийсээр байгаа юм. Монголын эдийн засагт хүндрэл үүсч, өргөн хэрэглээний бараа бүтээгдэхүүний болон ам.долларын ханш өсөөд байна. Ард түмний амьдрал улам бүр хэцүүдээд байна гэдгийг эдийн засагчид болон улс төр ажиглагчид, ард түмэн олон удаа хэлсэн. Гэвч салбарын сайдын чихэнд ус хийсэн ч, алт хийсэн ч сэгсэрч, эдийн засаг хүндрээгүй, өөдрөг сайн зүйл бод, өргөн хэрэглээний бараа бүтээгдэхүүн өсөөгүй, валютын ханш удахгүй бууна, 2014 онд доллар 1348 төгрөг болно гэх мэт өөдрөг, хийсвэр төсөөллөө ярьж, ард түмнээ доромжилсоор өдий хүрсэн юм.

Харин ард түмэн бүсээ чангалсаар эцэст нь тасарч унахын алдад Монголын эдийн засагт хямрал үүсээд байна гэдгийг хүлээн зөвшөөрнө билээ. Гэхдээ эдийн засгийг тартагт нь тулгасан буруутан нь Н.Батбаяр сайд өөрөө гэдгээ ойлгохгүй байгаа бололтой. Түүнчлэн эрх баригч намынхан ажлын хариуцлага алдаж, ажлаа хийж чадахгүй байгаа нэгэндээ хариуцлага тооцох чадваргүй гэдгээ ч энэ хугацаанд харуулж байна. Тодруулбал УИХ-ын гишүүн Д.Эрдэнэбат бүлгийн хурлынхаа дараа мэдээлэл хийхдээ “АН-ын зүгээс улс орны эдийн засагт үүссэн нөхцөл байдал, хүндрэлээс маш шуурхай гарч, эдийн засгийг эрчимжүүлэх үүднээс Засгийн газартаа 100 хоног идэвхтэй ажиллах даалгавар өгсөн. Эдийн засгийг эрчимжүүлэх энэ үед Эдийн засгийн хөгжлийн сайдыг огцруулна гэдэг МАН хариуцлагагүй үйлдэл гэдгийг ойлгож байна" хэмээв. Ямартай ч энэ үгээрээ АН-ын бүлгийн дарга эдийн засгийг эрчимжүүлэх 100 хоногоор далимдуулан авч үлдэхийг санаархаж буй нь илт.

Хэдийгээр түүнийг хэвлэлээр сүүлийн үед өмөөрөх хандлага ихэсч, УИХ дахь намын бүлэг нь авч үлдэхийг санаархаж буй ч гэлээ журмын нөхөд нь ажилд нь муу үнэлгээ өгсөн байдаг.

Тухайлбал

Монгол Улсын Ерөнхийлөгч Ц.Элбэгдорж: Ер нь эдийн засгийн хөгжлийн яам байгууллаа гээд энэ эдийн засаг хөгжихгүй байна. Би маш тодорхой байр суурийг Ерөнхий сайдад бүр оны өмнөөс л "За, Ерөнхий сайд аа, эдийн засгийн хөгжлийг гартаа ав" гэж хэлж байсан. Монголын өнөөдрийн хамгийн том чухал асуудал юу юм гээд ярихад эдийн засгийн хөгжил шүү дээ. Монгол үндэстний эрх ашиг бол хөгжил. Монгол Улс хөгжих хэрэгтэй, монгол иргэн, монгол айл гэр чөмөгжиж хөгжих, бэхжих хэрэгтэй. Эдийн засаг нь өсөж, орлого нь нэмэгдэх ёстой. /2014.04.16/

Ардчилсан намын ерөнхий нарийн бичгийн дарга Ц.Оюундарь: Шинээр байгуулагдсан Эдийн засгийн хөгжлийн яам яаж ажиллах арга хэлбэрээ одоо хүртэл сонгоогүй. Энэ нь хөрөнгө оруулагчдын сэтгэлд таагүй санагдаж байгаа нь үнэн...Н.Батбаяр сайд багаар ажиллаж чадахгүй, харилцаа холбоо муутай, шинжлэх ухаанч бус байгаа нь таатай сайхан харагдахгүй байгаа нь үнэн... /2014.01.03/

УИХ-ын гишүүн М.Батчимэг: Эдийн засаг үнэхээр хүндэрсэн, зарим салбарын ажил ихээхэн унаж байгааг бид мэдэж байгаа. Ийм байдлаар 2016 он хүртэл цаг нөгцөөх эрх Засгийн газарт байхгүй. Улс төрийн хэт савлагаа, хямрал руу оруулчихалгүйгээр ажил нь явахгүй байгаа сайд нараа солиод явах саналаа заавал гаднаас шахахыг хүлээлгүйгээр Ерөнхий сайд өөрөө гаргах ёстой. Н.Алтанхуяг сайдын Засгийн газрыг АН-ын бүлэг хамгаалж үлдсэн. Одоо Ерөнхий сайдад алдах эрх байхгүй. Танхимаа удирдаж чадаж байгаа бол түүнийгээ харуулах ёстой. /2014.05.05/

УИХ-ын гишүүн Ж.Батзандан: “Хямрал гүн гүнзгий болж байна. Хямралаас гарах арга бидэнд байна. Улстөрчид, улс төрийн намууд үүнийг ойлгох хэрэгтэй. Ойлгуулахын тулд бид хичээн ажиллаж байна. Харам¬салтай нь өнөөдөртөө манай засагт байгаа нөхдүүд илжигний чихэнд алт хийсэн ч, ус хийсэн ч адилхан гэдэг шиг аашилж байна даа. Бодит үнэнтэй тулгарахаас айж байна, тэд. / 2014.04.09/

УИХ-ын дарга З.Энхболд: “Нэг ам.долларыг гурван ам.доллар болгож, 1.5 тэрбум ам.доллараар хийх ажлыг 4.5 тэрбум болгож өсгөх бодлого бүхий зөвлөмжийг 2012 оны арванхоёрдугаар сарын 3-ны өдөр ҮАБЗ-өөс гаргасан. Ингээд арванхоёрдугаар сарын 6-нд мөнгө орж ирсэн. Авах нь тодорхой байсан мөнгийг яаж зарцуулах талаар Засгийн газарт хоёр чиглэл өгсөн. Нэгдүгээрт, өгсөн мөнгө үржигдэж байх ёстой. Хоёрдугаарт, зөвлөмжийн дагуу энэ мөнгөний эхний хэсгийг 2017 онд төлөх графикаа гаргасан, өрийн менежментийн хуулиа батлуулчихсан байх ёстой л доо. Гэтэл энэ Өрийн удирдлагын тухай хуулийн төслийг өргөн барьчихаад байгаа. Тэгэхээр энэ өрийг яаж төлөх талаар Засгийн газар одоогоор бодоогүй явж байна. Ийм аюултай юм болчихоод байна. Одоо муу юмаа бодож эхлэх хэрэгтэй болчихлоо. 2017 оны арванхоёрдугаар сарын 6-нд бондын мөнгийг хүүгийн хамт палхийтэл төлөх ёстой. Үүний тулд 2014 оны төсвийн тодотголоос эхлээд өрөнд өгөх мөнгөө нөөцлөх ёстой. Бид хэмнэлтийн горимд шилжихээс өөр аргагүй болно. Гэтэл үүгээр боссон юм гэвэл "Боинг" онгоцноос өөр үзүүлэх юмгүй болчихоод байна. Бондын мөнгөөр боссон бодитой үйлдвэр алга. Бусад нь бүтээн босголтын шатанд явна. /2014.05.02/

Мөн хотын дарга Э.Бат-Үүл хэвлэлд өгсөн ярилцлагадаа “Би Н.Батбаярыг зодоогүй. Харин муудалцсан нь үнэн. "Чингис" бонд Н.Батбаярын мөнгө биш, ард түмний хөрөнгө. Тодорхой төслүүдийн санхүүжилтийг зогсоох эрх түүнд байхгүй. "Гудамж" төслийг аймагт хэрэгжүүлэх нь ямар ч ашиггүй. Анхнаасаа л хотод хийхээр төлөвлөсөн төсөл” хэмээн ярьсан нь хэвлэлийн хуудаснаа түүх болон үлджээ. /2014.04.09/

Түүнчлэн Засгийн газраас нэн яаралтай хэлэлцүүлэхээр өргөн барьсан Эдийн засгийг эрчимжүүлэх зарим арга хэмжээний тухай УИХ-ын тогтоолын төслийг Эдийн засгийн байнгын хороогоор 5 дугаар сарын 1-ны өдөр хэлэлцэх үеэр Эдийн засгийн хөгжлийн сайд Н.Батбаяр "Төмөр зам барихад зориулж “Чингис” бондоос 450 сая ам.доллар гаргасан. Газар шорооны ажил нь хийгдэж байгаа гэдэг. Өнөөдөр эдийн засаг хүнд байгаа нь экспортод гаргах уул уурхайн бүтээгдэхүүнээ тээвэрлэх төмөр замаа барьж чадаагүйтэй холбоотой хэмээсэн байдаг. Түүний энэхүү хариуцлагагүй мэдээлийг Зам тээврийн яамныхан “...ЭЗХЯ, Хөгжлийн банк мөнгөгүй болсон гэдэг шалтгаанаар санхүүжилт хийхгүй байгаа атлаа Эдийн засгийн хөгжлийн сайд нь УИХ дахь Эдийн засгийн байнгын хорооны хуралдаан дээр төмөр зам барихад зориулж 450 сая ам.доллар өгсөн мэтээр худал мэдээлэл хийснийг эрс няцааж байна” гэсэн байдаг. Ямартай ч Н.Батбаяр сайд ичихгүй худлаа ярьдаг гэдгээ энэ үеэр дахин баталсан юм. Ийм л хүн өнөөдөр Монголын эдийн засгийн хөгжлийн түлхүүийг атгаад явж байгаа. Ийм хариуцлагагүй худал мэдээлэл хийдэг, алдаагаа ухамсарладаггүй, өөрийнхөөрөө зүтгэсэн сайд нарыг явуулж, мэдлэгтэй, улс орны эдийн засгийн хөгжлийн түлхүүрийг атгах хүн хэрэгтэй байна.

Н.Чинзориг