Монгол Улсын инфляци 1.5 хувьтай гарснаас 60 гаруй хувийг нь хүнсний бараа, 9.3 хувийг хувцас, бөс бараа, гутал, 8.2 хувийг тээвэр, 7.1 хувийг нийтийн хоолны үйлчилгээний үнийн өсөлт бүрдүүлсэн байна. Үлдсэн хэсгийг согтууруулах ундаа, тамхи, эмнэлгийн үйлчилгээний өсөлт эзэлжээ. Өнгөрсөн оны мөн үед сарын инфляци 0.4 хувиар буурч байсан байна. Энэхүү бууралтад хүнсний бараа, ундаа, усны үнэ 12.5 хувийг, хувцас, бөс бараа, гутал 9.4 хувийг, эм тариа, эмнэлгийн үйлчилгээний үнэ 7.1 хувийг бүрдүүлж голлох нөлөөг үзүүлж байжээ. Тухайн үед орон сууц, ус, цахилгаан түлш болон амралт, чөлөөт цаг, соёлын бараа үйлчилгээний үнэ өсч байсан талаар Монголбанкнаас мэдээллээ. Монгол Улсын жилийн инфляци 13.7 хувьтай байгаагаас дийлэнхийг нь хүнсний бараа, ундаа, усны үнийн өсөлт бий болгожээ. Өнгөрсөн тавдугаар сард хэрэглээний сагсыг бүрдүүлж байгаа 329 бараа үйлчилгээнээс 125-ынх нь үнэ өсч, 88 бараа үйлчилгээнийх буурсан байна.

Дэлхийн банк: Монгол Улсын эдийн засгийн өсөлтийн төлвийг буурууллаа

Дэлхийн банк Монгол Улсын 2014 оны эдийн засгийн өсөлтийн төлвийг бууруулж, нэг оронтой тоонд орууллаа. Өнгөрсөн оны 11 дүгээр сард гаргасан тайландаа Монгол Улсын дотоодын нийт

бүтээгдэхүүн 2014 онд 11.7 хувиар өснө гэж таамаглаж байсан Дэлхийн банк макро эдийн засгийн орчинд гарсан өөрчлөлтүүдийг харгалзан үзэж, энэ хэмжээгээ 9.5 хувь болгосон байна. Гэхдээ энэ нь олон улсын дундажтай харьцуулахад маш өндөр хүлээлттэй байгаагийн илрэл гэж Дэлхийн банкны суурин төлөөлөгчийн үүрэг гүйцэтгэгч хэлсэн юм. Мөн төлбөрийн тэнцлийн дарамт нэмэгдсэний улмаас үүсч болох эрсдэлийг арилгахын тулд Монгол Улс мөнгөний бодлогоо чангаруулах шаардлагатай гэж дүгнэлээ. Уул уурхайн салбарын удаашралтай холбоотойгоор уул уурхайн бус салбарын өсөлт мөн удааширч эхэлсэн. Үүнээс шалтгаалан иргэдийн худалдан авалт буурч байгаа нь эдийн засаг өөрөө өөртөө тохиргоо хийж байгаа явдал гэж тайлбарлалаа

Монголд үйл ажиллагаа явуулдаг уул уурхайн компаниудын хувьцааны ханш өсчээ

УИХ-ын хаврын чуулганаар Ашигт малтмалын тухай хуульд нэмэлт өөрчлөлт оруулах тухай хуулийн төслийг баталсан. Үүний дараа гадаадын хөрөнгийн биржид бүртгэлтэй Монголд үйл ажиллагаа явуулж байгаа уул уурхайн томоохон компаниудын хувьцааны ханш өссөн байна. Нүүрсний салбарын тухайд Хонконгийн хөрөнгийн биржид бүртгэлтэй “Mongolian Mining Corporation”-ий хувьцааны ханш 1.01 хувиар өсч, 0.5 хонконг доллар болжээ. Овооттолгойг эзэмшиж байгаа “Southgobi Resources”-ийн хувьцааны ханш 1.19 хувиар өссөн бол Хөшөөтийн нүүрсийг удахгүй олборлохоор төлөвлөж байгаа “Mongolia Energy Corporation”-ий хувьцааны ханш 8.49 хувиар чангарлаа. Мөн Австралийн хөрөнгийн биржид бүртгэлтэй Овоотын коксжих нүүрсийг зах зээлд гаргахаар бэлтгэж байгаа “Aspire Mining”-ийн хувьцааны ханш 2.78 хувиар, “Turquoise hill Resources”-оос Хармагтай ордын гол хувьцааг худалдаж аваад удаагүй байгаа “Xanadu Mines”-ийн ханш 12.5 хувиар өсчээ. Үүнтэй зэрэгцээд “Манай компани Монгол дахь хөрөнгө оруулалтаа нэмэгдүүлж байгаа нь цаашдын төлвийг өөдрөгөөр харж байгаагийн илрэл” гэж “Xanadu Mines”-ийн гүйцэтгэх захирал Жорж Ллойд онцолсон байгаа. “Оюу Толгой-н хөрөнгө оруулагч “Rio Tinto”-ийн хувьцааны ханш Австралид 0.73 хувиар өсч, 62.45 австрали доллар болсон бол Торонтод “Turquoise Hill Resources”-ийн хувьцаа 2.24 хувиар чангарчээ.

Хөрөнгө оруулалтын санд 100 сая ам.доллар олгохыг зөвшөөрлөө

Засгийн газрын ээлжит бус хуралдаанаар Хөрөнгө оруулалтын сан байгуулах ажлын хүрээнд Хөгжлийн банкаар дамжуулан тус санд хөрөнгө оруулах шаардлагатай гэж үзлээ. Үүнтэй холбоотойгоор олон улсын санхүүгийн байгууллагатай хэлэлцээр хийж, 100 сая ам.долларыг Хөрөнгө оруулалтын санд олгохыг Хөгжлийн банкинд зөвшөөрлөө. Мөн ээлжит бус хуралдаанаар Хөрөнгө оруулалтын санг байгуулснаар засгийн газраас анхлан хөрөнгө оруулсан хөрөнгийг хөшүүрэг болгож, үүнээс тав дахин илүү хөрөнгө босгох боломжтой талаар хэлэлцсэн юм. Түүнчлэн энэхүү шийдвэрийн хүрээнд анхдагч хөрөнгө оруулагчаар оролцож болох олон улсын хөгжлийн банкуудтай яриа хэлэлцээр эхлүүлэхээр болсон. Үүнээс гадна Хөрөнгө оруулалтын санд хөрөнгө оруулах үйл явц гурван сар орчим үргэлжилнэ гэж тооцож байгаа талаар хуралдааны үеэр онцолж байсан.

Замын-Үүдийн ЭЗЧБ-ийн дэд бүтцийн ажил 10 дугаар сард дуусна

Замын Үүдийн Эдийн Засгийн чөлөөт бүсийн дэд бүтцийн ажил энэ оны 10-р сард дуусахаар байгааг Эдийн Засгийн Хөгжлийн яамнаас мэдээллээ. Одоогоор эдийн засгийн чөлөөт бүсийн 278.6 га талбайд дулаан хангамж, ус, цахилгаан болон авто замын бүтээн байгуулалтын ажил хийгдэж байна. Энэ сард ус цэвэршүүлэх байгууламж бүрэн ашиглалтад орох бол 8-р сард авто замын ажил дуусахаар байгаа юм. Улсын төсвийн хөрөнгөөр Замын-Үүдийн чөлөөт бүсэд 6.6 тэрбум төгрөгийн хөрөнгө оруулалт хийгээд байгаа. Харин зээл, тусламжаар 58.8 сая ам.долларын санхүүжилт хийгдэж байна. Үүнээс гадна Замын-Үүдийн Эдийн засгийн чөлөөт бүсийн хөрөнгө оруулалтын зөвлөлд 65 аж ахуйн нэгж бүртгүүлжээ. Үүний хүрээнд бизнес эрхлэгчдийг дэмжих Made in Mongolia хөтөлбөрийг хэрэгжүүлж эхлээд байгаа юм байна

ХААБ-ийн өнгөрсөн долоо хоногийн хэлцлийн дүн 20.5 тэрбум төгрөг давжээ

Хөдөө аж ахуйн бирж өнгөрсөн долоо хоногийн баасан гаригийн арилжаагаар 5.4 тэрбумын хэлцэл хийсэн талаар биржээс мэдээллээ. Энэ өдөр 5896 богц боловсруулаагүй гурван өнгийн ноолуур, 240 богц тэмээний хоёр төрлийн ноос арилжсан байна. Долоо хоногийн эхэнд нэг богц нь 761 мянган төгрөгийн ханштай байсан боловсруулаагүй бараа ноолуурын үнэ өнөөдрийн арилжааны дараа буурч 759 мянган төгрөг болжээ. Өнгөрсөн долоо хоногийн хамгийн өндөр үнэ 781 мянган төгрөгт хүрсэн талаар ХААБ-ээс мэдээллээ. Харин боловсруулаагүй цайвар ноолуурын ханш долоо хоногийн турш тогтвортой байж 781 мянган төгрөгөөр хаагджээ.

Цагаан суваргын ордыг ашигласнаар төсөвт 3.4 их наяд төгрөг төвлөрүүлнэ

УИХ-ын чуулганаар “МАК” компанийн тусгай зөвшөөрлийг нь эзэмшиж байгаа Цагаан суваргын ордод төрийн оролцоо 0 хувь байхаар батлалсан. Цагаан суваргын орд нь стратегийн ач холбогдолтой ордын жагсаалтад багтсан учир төр 34 хүртэлх хувийг эзэмшихийн тулд хөрөнгө оруулахаар тогтоолын төсөлд анх тусгасан байжээ. Харин эцсийн хувилбараар “МАК” компани Цагаан суваргын ордын төслийг дангаараа хэрэгжүүлэх болж байна. Ордын ашиглалттай холбоотойгоор 1997 оны ашигт малтмалын тухай хуулийн дагуу төсвийн хөрөнгөөр хийсэн хайгуулын 15 сая төгрөгийн зардлыг “МАК” компани улсад төлсөн гэдгээ мэдээлсэн юм. Цагаан суваргын ордыг ашиглахад нэг тэрбум 31 сая ам.долларын хөрөнгө оруулалт шаардлагатайгаас 30 хувийг нь “МАК” компани гаргаад байгаа юм. Мөн Европын сэргээн босголт хөгжлийн банктай 450 сая ам.долларын санхүүжилтийн гэрээ байгуулаад байгаа ажээ. Харин 1980-аад онд улсын төсвийн хөрөнгөөр хайгуул хийж байсан боловч нөөц нь батлагдаагүй байсан байна. Тэгвэл тус компани Цагаан суваргын ордын нөөцийг дахин баталгаажуулж, 18 жилийн ашиглалтын настай болохыг Эрдэс баялгийн мэргэжлийн зөвлөлөөр батлуулжээ. Төсөл цаашид хэрэгжих хугацаанд улсын төсөвт нийт 3.4 их наяд төгрөгийг татвар, хураамж хэлбэрээр төвлөрүүлэх тооцоо гарсан байна

Хөх тарианы гурилыг дотооддоо үйлдвэрлэж эхэллээ

Нүүдэлчин” группын хөрөнгө оруулалтаар баригдсан хөх тарианы гурилын “Эрдэнэт гурил” үйлдвэр ашиглалтад ороод байна. “Эрдэнэт гурил”үйлдвэр нь хоногт 30 тонн хөх тарианы гурил үйлдвэрлэх хүчин чадалтай ажээ. Тус үйлдвэр ашиглалтанд орсноор хөх тарианы гурилыг дотооддоо үйлдвэрлэн, хэрэглэгч харилцагчдаа хөх тарианы гурилаар хангах анхдагч гурилын үйлдвэр болж байна. Үйлдвэр, Хөдөө Аж Ахуйн дэд сайд Ц.Туваан энэ талаар "Жилд таван мянган тонн хөх тарианы гурил импортолдог Монгол Улсын хувьд импортын бүтээгдэхүүнийг дотооддоо үйлдвэрлэх боломжтой болж байна" гэж онцоллоо. Эхний ээлжинд “Эрдэнэт гурил” үйлдвэр 2500-3000 тонн хөх тариа тариалуулахаар тариаланчдад захиалга өгөөд байгаа гэж тус компанийн Гүйцэтгэх захирал Ч.Энхбаяр мэдэгдсэн юм. Тус үйлдвэр хөх тарианаас гадна өдөрт 150 тонн улаан буудай боловсруулж, 117 тонн улаан буудайн гурил, 33 тонн малын хорголжин болон нунтаг тэжээл зэрэг гурван төрлийн бүтээгдэхүүн зах зээлд нийлүүлэх юм байна