Дулааны III цахилгаан станцын II шатны шинэчлэлийг хэрэгжүүлэхэд авах арга хэмжээний тухай асуудлыг хэлэлцээд Засгийн газрын тогтоол гаргахаар тогтлоо.

Улаанбаатар хотын дулааны эрчим хүчний өсөн нэмэгдэж буй хэрэглээний тасралтгүй найдвартай ажиллагааг хангах зорилгоор “Дулааны III цахилгаан станц” ТӨХК-ийг үе шаттайгаар шинэчлэн, өрсөлдөх чадвартай, өндөр хүчин чадалтай станц болгохоор ажиллаж буй. Эхний ээлжинд тус станцад турбин суурилуулах төслийг амжилттай хэрэгжүүлсэн. Хоёрдугаар шатанд дунд даралтын станцын тоног төхөөрөмжийг бүрэн шинэчилнэ. Ингэснээр хүчин чадал нь 2 дахин нэмэгдэж, ус болон түлшний зарцуулалт өмнөх хэмжээнд, агаарт ялгаруулж буй утааны хэмжээ 98 хувиар буурна.

Олон улсын болон улсын чанартай автозамаар зорчих тээврийн хэрэгслийн жин,

овор хэмжээнд тавих хяналтын талаар танилцууллаа

Энэ талаар Зам, тээврийн сайд А.Гансүх Засгийн газрын гишүүдэд танилцуулж, үүнтэй холбогдуулан автотээврийн хэрэгслийн жин, овор хэмжээнд хяналт тавьж ажиллахыг түүнд даалгалаа.

Сүүлийн хоёр жилд 2680 км автозам баригдаж, улсын чанартай автозамын сүлжээн дэх хатуу хучилттай замын урт 5300 км-т хүрээд байна. Замын сүлжээ өргөжихийн хэрээр үлэмж хэмжээний хөрөнгө оруулалтаар баригдсан автозам, замын байгууламжийн хадгалалт, хамгаалалтын асуудлыг цогцоор нь шийдэх, ялангуяа автозамын зөвшөөрөгдөх жин, овор хэмжээний үзүүлэлтээс хэтэрсэн тээврийн хэрэгслээр зорчин, автозам, замын байгууламжийг нормативт хугацаанаас нь өмнө эвдрэлд оруулж байгааг цэгцлэх шаардлагатай байна гэж сайд хэллээ. Зам тээврийн яамнаас бүрэн жин, тэнхлэгийн ачаалал хэтрүүлэн тээвэрлэлт хийж байгаа зөрчлийг хянах зорилгоор “Авто пүү ажиллуулах журам"-ыг энэ оноос хэрэгжүүлж байгаа юм.

Засгийн газрын мөрийн хөтөлбөрт аймгийн төвүүдийг нийслэл хоттой хатуу хучилттай автозамаар холбох зорилт тавьж хэрэгжүүлэн ажиллаж байна. Иймд барьсан замаа арчилж хамгаалахад иргэдийн оролцоог нэмэгдүүлэх, хяналтын систем бий болгох хэрэгтэй гэсэн санал хурлын үеэр гарч байлаа.

Франц улстай дипломат харилцаа тогтоосны 50 жилийн ойг тэмдэглэнэ

Монгол Улс, Бүгд Найрамдах Франц улсын хооронд дипломат харилцаа тогтоосны 50 жилийн ойг 2015 онд тэмдэглэнэ. Ой тэмдэглэх ажлыг Зохион байгуулах хорооны бүрэлдэхүүнийг баталж, ажлын төлөвлөгөө батлан хэрэгжүүлэхийг тус хорооны дарга, Гадаад харилцааны сайд Л.Болдод даалгалаа.

Ойн хүрээнд өндөр, дээд хэмжээний айлчлалын давтамжийг хадгалах, хоёр орны харилцааны түүхийг олон нийтийн хүртээл болгох зорилгоор Монгол Францын харилцааны товхимол хэвлүүлэн гаргах, хоёр талын хамтарсан археологийн судалгааны үр дүнд илэрч олдсон олдвороор хоёр оронд үзэсгэлэн гаргах, Монголын урлаг соёлын өв уламжлалыг Францад таниулах “Монголын соёлын өдрүүд” арга хэмжээг зохион байгуулах зэрэг ажлыг хийхээр бэлтгэж байна.

Монголын судлаач, инженерүүдэд Европын цөмийн судалгааны байгууллагын

судалгааны төслүүдэд оролцох боломж бүрдэнэ

Европын цөмийн судалгааны байгууллага болон Монгол Улсын Засгийн газрын хооронд “Их энергийн физикийн чиглэлд шинжлэх ухаан, техникийн хамтын ажиллагааг хөгжүүлэх тухай хэлэлцээр”-ийг хэлэлцэн дэмжээд, уг хэлэлцээрт гарын үсэг зурах бүрэн эрхийг Боловсрол, шинжлэх ухааны сайд Л.Гантөмөрт олгох тухай захирамж гаргахаар тогтлоо.

Энэхүү хэлэлцээрийг байгуулснаар их энергийн физикийн суурь судалгаа болон манай орны шинжлэх ухаан, технологийн дэвшлийн цаашдын хөгжилд чухал ач холбогдолтой бөгөөд Монголын судлаач, инженер, техникийн ажилтнууд тус байгууллагын судалгааны төслүүдэд урт хугацаанд оролцох боломж бүрдэх юм.

1954 онд байгуулагдсан, их энергийн физикийн судалгаагаараа дэлхийд тэргүүлж, шинжлэх ухааны танин мэдэхүй, технологийн ололт амжилтад ихээхэн хувь нэмэр оруулдаг Европын цөмийн судалгааны байгууллагад 4000 орчим ажилтан өдөр тутмын судалгаа, шинжилгээний ажил гүйцэтгэдэг байна.

Техникийн хамтын ажиллагааны хөтөлбөрт гарын үсэг зурна

Монгол Улсын Засгийн газар, Олон улсын Атомын энергийн агентлагийн (ОУАЭА) хооронд дунд хугацаанд хэрэгжүүлэх Техникийн хамтын ажиллагааны хөтөлбөрт гарын үсэг зурах бүрэн эрхийг Цөмийн энергийн газрын дарга Н.Тэгшбаярт олголоо.

Энэхүү баримт бичиг нь Монгол Улс, ОУАЭА хооронд богино болон дунд хугацаанд нийгэм-эдийн засгийн хөгжлийн тэргүүлэх салбар, чиглэлийг тодорхойлох, техникийн хамтын ажиллагааны үзэл баримтлалаа боловсруулах үндэс болдог эрх зүйн чухал баримт юм.

2015-2019 онд хэрэгжүүлэх техникийн хамтын ажиллагааны хөтөлбөрийг эрүүл мэнд, цөмийн болон цацрагийн хяналт, хүнс, хөдөө аж ахуй, байгаль орчин, геоэкологи, цөмийн физик, геологи, уул уурхай, аж үйлдвэрийн салбарт үйл ажиллагаа явуулж буй төрийн болоод эрдэм шинжилгээ, судалгааны байгууллагуудын техник, тоног төхөөрөмжийг сайжруулах, хүний нөөц бэлтгэхэд хэрэгжүүлэхээр төлөвлөжээ. Төслүүд нь Олон улсын атомын энергийн агентлагийн санхүүжилтээр хэрэгжинэ.

Манай улс 1973 онд Олон улсын Атомын энергийн агентлагт гишүүнээр элсчээ. Энэ хугацаанд 13,2 сая ам.долларын санхүүжилт бүхий 63 төслийг дээрх салбаруудад хэрэгжүүлжээ.

“Инчеон-2014” паралимпийн Ази тивийн XI наадамд оролцох тамирчдад дэмжлэг үзүүлнэ

Пара спортын тамирчдыг “Инчеон-2014” паралимпийн Ази тивийн XI наадамд оролцуулахад дэмжлэг үзүүлэх зардлыг Соёл, спорт, аялал жуулчлалын сайдын 2014 оны төсвийн багцад зохицуулалт хийж санхүүжүүлэхийг Сангийн сайд Ч.Улаан, Соёл, спорт, аялал жуулчлалын сайд Ц.Оюунгэрэл нарт даалгалаа.

14 хоногийн дараа эхлэх энэ наадамд манай улс спортын 9 төрлөөр 66 тамирчин, 22 дасгалжуулагч, хэвлэл мэдээлэл, штабын ажилтан нийт 118 хүний бүрэлдэхүүнтэй явахаар бэлтгэж байна.

Манай улс анх удаагаа суугаа волейбол, хонхот бөмбөгийн эрэгтэй баг, ширээний теннис, усанд сэлэлтийн төрөлд оролцох гэж байна.

Товч мэдээ

- Засгийн газрын 2013 оны 9 дүгээр сарын 6-ны өдрийн 317 дугаар тогтоолоор батлагдсан “Төрийн өмчийн концессийн зүйлийн жагсаалт”-д “Рашаант улсын нөөц агуулах”, “Монгол угсаатны музейн цогцолбор”, “Овоотын уурхай-Эрдэнэт хот чиглэлийн төмөр зам” гэсэн гурван төслийг нэмлээ. Батлагдсан төслүүдийн концесс олгох уралдаант шалгаруулалт, шууд гэрээ байгуулах асуудлыг зохих журмын дагуу зохион байгуулахыг Эдийн засгийн хөгжлийн сайд Н.Батбаярт даалгалаа.
- Ойн тухай хуульд нэмэлт, өөрчлөлт оруулах тухай хуулийн төслийг хэлэлцэн дэмжээд Засгийн газрын гишүүдээс гаргасан саналыг тусган УИХ-д өргөн мэдүүлэхээр тогтов.
- Монгол Улсын Засгийн газар, ХБНГУ-ын Засгийн газар хоорондын Хөгжлийн бодлогын хамтын ажиллагааны 2014-2015 оны хэлэлцээний дүнг хэлэлцлээ.
- Шадар сайд Д.Тэрбишдагва БНХАУ-ын Тяньжин хотод болсон дэлхийн эдийн засгийн “Зуны Давос” чуулга уулзалтад оролцсон дүнгийнхээ талаар Засгийн газрын гишүүдэд танилцууллаа. Уулзалтын мөрөөр холбогдох арга хэмжээ авч ажиллахыг Шадар сайдад даалгалаа.
- Халхын голын ялалтын 75 жилийн ойг тэмдэглэн өнгөрүүлсэн дүнг Шадар сайд, Ойд бэлтгэх, тэмдэглэн өнгөрүүлэх ажлыг зохион байгуулах Ажлын хэсгийн дарга Д.Тэрбишдагва танилцууллаа гэж Засгийн газрын Хэвлэл мэдээлэл, олон нийттэй харилцах албанаас мэдээллээ.