-Ерөнхий сайд Н.Алтанхуягийг огцруулах санал УИХ-д хоёр дахиа орж ирлээ. Та 28 гишүүний гаргаж тавьсан үндэслэлүүдтэй танилцсан л байх. Бодитой үндэслэл харагдана уу?
-Тэр үндэслэлүүдээс өмнө энэ асуудлыг тавьсан улс төрийн орчныг нь анзаарах ёстой. Ерөнхий сайд Засгийн газрынхаа бүтцийн өөрчлөлтийг хийж, энэ дагуу бүрэлдэхүүний тухай хуулиа батлуулсан. Ингээд сайд нарынхаа нэрийг УИХ-д оруулж ирлээ. Гэтэл энэ асуудлыг хэлэлцэх гэтэл МАН-ын бүлэг тав хоногийн хугацаатай завсарлага авсан. Үүн дээр л жаахан анализ хийгээд үзэх хэрэгтэй юм. Ерөнхийдөө л МАН энэ засгийг тогтворгүй байлгахын төлөө бүтцийн өөрчлөлтийг ашиглаад зүтгэе гэж байна. Энэ оролдлогын нэг нь ч тэр тав хоногийн завсарлага байсан. Яагаад гэвэл, нэгэнт л тогтвортой байдал цаашид үргэлжлэх нь тодорхой байсан тул энэ агшинд амжиж Ерөнхий сайдыг огцруулах асуудлыг тавьсан. Хэрэв үнэхээр л Ерөнхий сайдыг энэ ярьж байгаа үндэслэлүүдээрээ огцруулъя гэж байгаа бол үүнээс өмнө, бүтцийн өөрчлөлтөөс ч өмнө тавьж болох л байсан шүү дээ. Яриад байгаа үндэслэлүүд гэгч нь үнэндээ шинэчлэгдсэн зүйл алга. Энэ бол тогтворгүй байдал үүсгэх гэсэн оролдлого. Ерөнхий сайдыг огцруулъя гэхээр АН-ынхан, "Шударга ёс" эвсэл дотроо бас зөрчилдөж эгзэг гарах уу гэсэн л таамаг МАН-ынханд байгаа. Ийм таамаглалтай л явж байгаа улс төр. Тэгэхээр тэр үндэслэл гээд байгаа зүйл нь ч зүгээр л Ерөнхий сайдыг огцруулах гэсэн шалтаг. Түүнээс шалтгаан биш. Өөрөөр хэлбэл, цаг хугацаанаас нь аваад үзэхэд энэ нь улс төрийн зорилготой болохоос биш, улс орны сайн сайхны төлөө гэсэн агуулгагүй.

-Сайд нартаа хариуцлага тооцох болов уу гэж хүлээж байтал Ерөнхий сайд тийм алхам хийсэнгүй. Тиймээс л бид өөрт нь хариуцлага тооцох асуудал оруулж ирлээ гэж тэр түүнд хэлээд байгаа шүү дээ?
-Тэр бас л өөр асуудал. Цаг хугацааг нь аваад үзээрэй. Тэд Эдийн засгийн хөгжлийн сайд Н.Батбаярыг огцруулъя гэж л асуудал тавьсан байсан. Өөр сайдын асуудал байгаагүй. Тиймээс Н.Батбаяртай уялдуулах гэж оролдож байгаа юм. Тэгээд ч Засгийн газрын бүтцийн өөрчлөлтөөр Эдийн засгийн хөгжлийн яамны чиг үүрэг бусад яам руу хуваарилагдсан. Ингээд бүтцийн өөрчлөлтөөр Н.Батбаяр сайд чөлөөлөгдсөн. Тэгэхээр хариуцлага хүлээлгэнэ гэдгийг юу гэж ойлгохоос олон юм хамаарах нь. Байдал ийм л байна,

-Та үндэслэлүүд дээр тайлбар хийсэнгүй. Эдийн засаг уначихаад байгаа энэ үед Засгийн газрын тэргүүн ямар нэгэн хариуцлага хүлээх ёстой юм
-Үндэслэлүүдийг нь харвал ерөөсөө л АН-аас хийж байгаа, бүтээж байгаа асуудлын үнэ цэнийг алдагдуулах л гэсэн зорилготой. Монголын эдийн засагт өнөөдөр байгаа бэрхшээлүүдийн бодит үндэс суурь шалтгааныг нь мэдэж байгаа ч өөрөөр тайлбарлаж асуудал тавьж байна. Үүн дээр нь эмзэглэж байгаа зүйл гэвэл Ерөнхий сайдын ах дүү, төрөл садан, хүүхдүүдийг нь гүтгэн доромжилсон. Өргөн барьсан энэ бичгээрээ бараг л яллачихсан. Энэ бол Монголын төрд хэзээ ч байж болохгүй зүйл.

-Ёс зүйн хариуцлага хүлээх ёстой гээд байгаа шүү дээ?
-Ёс зүйн асуудал гэчихээд маш том ёс зүйн алдаа гаргалаа. Хүмүүсийг шууд л гэм буруутай гэж үзэж, тэрүүгээр Ерөнхий сайдыг огцруулна гэдэг байж болох уу. Ер нь бид нэг зүйл бодох хэрэгтэй. Үндсэн хуульд ч бий. Хэн нэгний гэм бурууг бусдад халдаан хэрэглэхгүй байх тухай ойлголт. Дээшээ гарч ирсэн нэгэндээ аливаа бүх юмыг халдаан хэрэглэж болохгүй. Ийм л Үндсэн хуультай. Улс төр бол улс төрөөрөө, гэм буруугийн асуудал бас шийдэгддэг шугамаараа л байх ёстой.
-Нэгэнт асуудал орж ирсэн, галт тэрэг хөдөлчихлөө. Ерөнхий сайдыг огцруулах асуудлыг УИХ олонхиороо шийдэх л болно. АН дотроо энэ асуудал дээр нэгдмэл байр суурьтай байгаа юу. Танай гишүүд бол ил цагаан Н.Алтанхуягт хариуцлага тооцох ёстой гэж мэдэгдэж байгаа шүү дээ. Энд МАХН-ын даргатай байгуулсан хамтран ажиллах гэрээ ч нөлөөлчих шиг боллоо?
-Ерөнхий сайдын үйлдлийг анзаарах хэрэгтэй л дээ. Өөрийг нь огцруулах асуудал тавьчихаад байхад өөртөө эрсдэлтэй байж болзошгүй алхмыг хийлээ.
Жишээ нь, МАХН-тай хамтран ажиллах гэрээг үзэглэсэн. Энэ бол Н.Алтанхуяг өөрийгөө ямар нэгэн байдлаар хамгаалах тухай асуудал биш, төлөвлөж бодсон зүйлсээ ямар ч асуудал тавигдлаа ч хийгээд явах ёстой гэж хийснийг илтгэнэ. Үүнийг би хувьдаа эерэг чанар гэж харж байгаа. Энд хоёр зүйлийг ялгаж, салгаж ойлгох хэрэгтэй. Нэгд, Ерөнхий сайд, хоёрт, намын дарга. МАН-ынхан болохоор Ерөнхий сайдын хувьд асуудал тавьсан. Манай бүлгийн гишүүд, намын гишүүдийн тавиад байгаа асуудал бол намын даргынх нь хувьд тавьсан зүйл. Намын даргынх нь хувьд тавьж байгаа асуудлыг шаардлагатай гэвэл хэлэлцдэг намын өөрийнх нь бүтцийн байгууллагаар хэлэлцэх ёстой. Тэр рүүгээ л асуудал тавихаас биш УИХ руу Ерөнхий сайдыг огцруулах талаар асуудал тавих шаардлагагүй. Намын даргын хувьд бусад намтай харилцах харилцаандаа алдаа гаргалаа гэж үзэж байгаа бол, үзэглэсэн гэрээ нь хийгдэж болохгүй гэрээ байсан бол, гэрээний зарим заалт нь болохгүй байгаа бол энэ гэрээ эцэслэгдэн намын байгууллагуудаар батлагдах явцад ярих хэрэгтэй. Буруутай үйлдэл хийлээ гэж үзэж байгаа бол намын даргынх нь хувьд асуудал ярих ёстой. Ингэж юмаа хоёр салгаж ойлгох хэрэгтэй л дээ. Тиймээс ч би АН болон эвслийн бүлгийн гишүүд, бидэнтэй хамтардаг ИЗНН, бие даагч гишүүдийг Ерөнхий сайдыг МАН-ын тавьж буй шалтгаанаар огцруулах шаардлага байхгүй гэдэг дээр нэгдэнэ гэж итгэж байгаа.

-Тэгэхдээ Ерөнхий сайдыг огцруулах асуудлыг зөвхөн МАН-ын бүлэг биш, АН-ын болон "Шударга ёс" эвслийн бүлгийн гээд 28 гишүүн тавьсан шүү дээ?
-Тэнд хоёр л хүн бий. Гишүүн Л.Цог, Ж.Батзандан хоёр. Энэ бол өөр асуудал. Бас л явуургүй байдалд татагдчихсан зүйл. Явуургүй гэдэг нь МАН өөрсдийнхөө бүлгийнхээ зүгээс, албан ёсны бүтцээрээ Ерөнхий сайдыг огцруулах асуудал тавих ёстой байсан юм. Гэвч тэд бүлгээс энэ асуудлыг тавиагуй ээ гээд зүгээр л гишүүдийн цуглуулга асуудал тавьж байгаа юм шиг явсан, Энэ бол манайхнаас зарим хүнийг татах гэсэн оролдлого. Энд нь ч манай Л.Цог, Ж.Батзандан хоёр ороод гарын үсэг зурсан байх. Энэ бол бас л зөв улс төрийн харилцаа биш. Гэхдээ би эцсийн мөчид гарын үсэг зурсан ч гэсэн Л.Цог, Ж.Батзандан хоёр яг Ерөнхий сайдыг огцруулах дээр байр сууриа өөрчлөх байх гэж бодож байна. Манай бусад гишүүний хувьд намтай л холбоотой. Нам, төр хоөрыг бид салгасан шүү дээ. Тэгж ч ярьдаг. Ардчилсан хувьсгалын нэг ололт нь нам төвтэй төрөөс төр төвтэй ардчилсан засаглал руу шилжсэн. Ингэсэн бол энэ хоёрыг хооронд нь хольж хутгаж ярих хэрэггүй. Намын асуудал нь нам дээрээ, төрийнх нь төрийнхөөрөө л явна.

-Урд хөл нь бүдрэхээр ард хөлийг нь ташуурддаг гэдэг шиг үү?
-Тэрэнтэй төстэй л юм. Энийг бол МАН-ын тавьсан үндэслэлтэй холбож ярих хэрэгтэй. Бидний урд хөлийг бүдрүүлж байгаа юм бол өрөөсөө л дэлхий нийтэд байгаа эдийн засгийн хямралтай байдал. Манай гол экспортын бүтээгдэхүүний үнэ унаж байгаа байдал. Өөрөөр хэлбэл, бид бодит зүйлээ олж харахгүй байна. Мэдээж бүгдийг цайруулж байгаа юм биш. Зарим ажил шуурхай хийгдээгүй байж болно. Гэхдээ л урд хөл нь бүдрэхэд хөдөлгөх гэж оррлдож байгаа хойд хөлөө л ташуурдаж байна. Ер нь бол улс төрд өрнөөд байгаа зүйлийг би нэг юмтай зүйрлэж хараад байгаа. "Морьтой ч болоосой" кинон дээр нэг шуурга болдог доо. Шуурганд нь мал уруудаж, тэрийг тогтоох гэж бөөнөөрөө зүтгэдэг. Ингэж байж малаа тогтоож чаддаг. Энэ үед зарим зальжин нөхөд хүний дулаахан дахыг нүдний шилээр сольж авч амиа хоохойлж үлддэг. Гэхдээ залуу тэрийг ч тоохгүй малаа тогтоодог. Өөрөөр хэлбэл, шуурга намдаж л таараа, уруудсан малаа тогтоож ч таараа, залилж алдсан дахаа ч буцааж авч л таарна шүү дээ.

Ч.ГАНГЭРЭЛ /ҮНДЭСНИЙ шуудан/

Р.Гончигдорж: Төрийн ажил төрөөрөө, намынх намаараа яваг
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
МАХН-ын бүлгийн дэд дарга Ардчилсан намын дарга Гончигдорж оо гэж. Ёстой л НАХЯ-ны мэдээлэгч, Алтангадасын гол хор найруулагч даа. Энхбаяр, Алтанхуяг нарын гэрээ батлахад бас л байж байгаа нь түүний л хийлгэсэн гэрээ гэдгийг харуулж байгаа юм. Одоо энэ хорчин зайлаасай л гэе

2014-10-24 | 12:26:48 | 112.72.9.66 |

Мэдээ
Гадаад мэдээ
Видео