хэмжээний од төрж, зөвхөн америкчууд л даналздаг Холливудын тогоог хөмрөх нь холгүй шуугиулж байна. Английн жижиг тосгоны Адель хэмээх охины нэр дэлхийн хөгжмийн ертөнцөд тодоор гэрэлтэж, хүн бүрийн хүслэнт дуучин болов. Оросын Дима Билан, Канадын Аврил Лавине, Испанийн Шакира, Украины “Kazaky”, Австралийн Gotye, Шинэ Зеландын Кимбра... Гэтэл Монголоос өнөө хэр дэлхийг шуугиулсан уран бүтээлч гарсангүй. “Камертон”-чууд “MTV Asia”-д ярилцлага өгч байснаас өөрөөр Монголын уран бүтээлчдийн тухай дэлхий нийт мэдэхгүй. Гэвч тогоо бол тогоо. Бид энэ удаа Монголын оддыг уран бүтээл, карьер, имижийн хувьд Холливудын ододтой ийн ижилсүүлэв.

Мадонна vs Ариунаа

Мадонна хэдийнэ 50 насны босгыг давсан ч саяхан гаргасан “MDNA” цомог нь “Биллбоард”-ын жагсаалтыг тэргүүлж байна. Түүний “Give me all your luving” дуу нь шөнийн клубуудыг шуугиулж байгаа гэвэл та итгэх үү. Тийм ээ, яагаад гэвэл тэр Мадонна учраас бид итгэнэ. Тайзнаа анх гарч ирэхдээ эрээ цээргүй хувцаслалт, хэл яриа, стиль, дуулалтаараа Холливудад ёстой л бөмбөг тэсэлж, 1980-1990 онд дэлхийн хүн бүр түүнийг харах гэж хошуурдаг байв. Харин түүний монгол “сүүдэр” нь МУГЖ, дуучин Ариунаа. Тэд хоёул эротик имижээр олны анхааралд өртөж, мөн л цаг үедээ баймгүй, хүний санаанд оромгүй бүхнийг сэдэж байсан. “Эрос №1, 2” цомгийн “Утасны дугаар”, “Баяртай гэж хэлж чадахгүй” зэрэг дуунууд хориотой нийгмийн хүлээсийг хуу татсан уран бүтээл байсан нь Мадоннагийн “Like a virgin” цомгийн амжилт, дуунуудтай төсөөтэй. Удалгүй Ариунаа “Хуучраагүй жийнс” зэрэг бүжиг, хэмнэл хослуулсан уран бүтээлүүд толилуулж эхэлсэн нь ч Мадонна мэт карьер. Өдгөө тэдний дэггүйтэх нас талийж, хэн хэн нь намба суусан ч залууст зайгаа тавьж өгөх болоогүй гэдгээ үе үе баталсаар л. Оройтож гэрлэгсэд “нас бол тоо биш” хэмээн өөрийгөө өмөөрдөг шиг урлагийн тайзан дээр энэ үгийг нэр төртэйгээр хэлж чадах хүмүүс бол Мадонна, Т.Ариунаа хоёр юм.

Kим Кардашиан vs Нара

Америкчууд бие биеэсээ ийн асуудаг. “Ким Кардашиан ямар ч уран бүтээл хийдэггүй хэрнээ яагаад түүнийг хүн бүр таньдаг, шар хэвлэлүүд үргэлж түүнтэй холбоотой мэдээлэл нийтэлдэг юм бэ” гэж. Харин энэ мэт сэтгэгдлээр ижилхэн нь дуучин Нара байх. Ким дуулах, бүжиглэх, жүжиглэхийн аль нэгийг хөөгөөгүй ч “Dancing with the stars”, “America’s next top model” шоунд оролцож, өөрийнхөө хэт задгай амьдралын хэрэгтэй, хэрэггүй мэдээллээр шар хэвлэлүүдийг тэтгэж байдаг. Хариуд нь түүний тухай хүн бүр мэддэг байхыг тэднээс хүсдэг. Тэгвэл дуучин Нарагийн Монголд хит болсон дуу гэвэл чухам юу байдгийг бид мэдэхгүй. Урын санд нь ердөө 10 хүрэхгүй дуу байдаг хэрнээ хэвлэлүүд түүний тухай мэдээллийг хангалттай нийтэлсээр ирсэн. “Монгол наадам” хэмээх дууг BX-тэй хамтран дуулж, олны бухимдлыг төрүүлснийг эс тооцвол сүүлийн жилүүдэд шинэ уран бүтээл нэгийг ч хийсэнгүй. Гэхдээ л түүний тухай элдэв хов жив тасардаггүй. Кимийг том өгзөг нь, Нара том хөх нь олны анхааралд байлгах хамгийн том “өгөөш” болдог.

“Destiny’s child” vs “Киви”

Бейонсе, Келли, Мишель нараас бүрдэх “Destiny’s child” хамтлаг дэлхий даяар нийт 40 сая дуу худалдаж, бүх цаг үеийн хамгийн алдартай хамтлагуудын жагсаалтад багтсан алдартай хамтлаг. Тэгвэл Ука, Намуунаа, Агий нарын гурвал Монголын охидын хамтлагуудаас хамгийн өндөр карьерт хүрсэн нь. Уг хамтлаг бүрэлдэхүүнээ есөн удаа шинэчилж байсан түүхийг “Киви” ч давтсан. Охидын гурвал болсон эдгээр хамтлагийг чадварлаг хоолойноос илүү хичээл зүтгэл, хөдөлмөр нь олны танил болгосон нь нууц биш. 16 жилийн турш хамтран дуулсан “Destiny’s child” өдгөө тус тусын карьерийг хөөн одсон эл үйл явц “Киви” хамтлагийн эргэн тойронд өрнөж буйг бид мэднэ. Бас нэг адилхан зүйл нь хоёр хамтлагийн ахлагчид болох Бейонсе, Ука нарын хувийн карьер хамтлагт байснаасаа ч илүү тодорсон билээ.

Хулан vs Адель

Мэдээж энэ харьцуулалт зарим хүнд хэт хөндлөн санагдаж болох ч тэдний хооронд төстэй зүйл цөөнгүй бий. Тэр бол хүчирхэг хоолой нь. Тэдний аль аль нь жил бүр болсон болоогүй цомог, дуу гаргаж ашгийн араас хөөдөггүй. Гэсэн ч цөөн бөгөөд чанартай дуу нь урт настай байдагтай санал нийлэх биз. Хулан одоогоор бие даасан цомог гаргаж амжаагүй ч Монголын жааз урсгалын чухал төлөөлөгчийн нэг болж чадсан. Жааз дуучид бага зэргийн илүүдэл жинтэй байдаг нь хоолойнх нь чадалд дэм болдог гэх. Тэдний дуунуудад хөгжим биш цэвэр хоолой нь голлодог учраас бүжиг, хэмнэл, техникээр “зодсон” бусдынхаас тэс өөр. Мөн тэдний хэн хэн нь хэзээ ч “ам барьж” дуулж үзээгүй.

“Extacy” – “Wonder girls”

Үнэндээ тэдний аль аль нь хоолойн чадлын хувьд хүчирхэг биш. Гэвч охидын эл хамтлаг Солонгосын “Wonder girls” хамтлагийн нэгэн адилаар хоолойгоо биш бусад хүчин зүйлсийг хангалттай ашигладаг учраас нэрд гарч чадсан. “Wonder girls” хамтлаг “JYP Entertainment”-д

харьяалагддаг бол “Extacy” “MN 25 дугаар суваг” телевизийн шоунаас төрсөн. “Extacy” одоогоор “Чам руу”, “You win” гэх хоёрхон дуутай ч хит болж чадсан. Харин “Wonder girls” хамтлагийнхан “Nobody”, “Be my baby” зэрэг таван ч хит дуутай. Тэд өдгөө дэлхийн хэмжээний том хамтлаг болох гараагаа эхлүүлсэн бөгөөд АНУ-д “Nobody” дуу нь шуугиан тарьж, “Биллбоард”-ын “Monday Mushup” шалгаруулалтад тэргүүлсэн юм. Харин өдгөө охидын дээрх хамтлагуудад “хүний нөөц”-ийн хүндрэл тулгараад байгаа билээ.