ОУХМ Ц.Мөнхзаяа: Дахин хэдэн жил барилдсаныхаа дараа л гэрлэх тухай ярилцана

2004 оны Афины зуны олимпод амжилттай /60 кг/ барилдаж, хүрэл медалийн эзэн болсон Х.Цагаанбаатарын гэрлэх гэж байсан бүсгүй бол 2012 оны Лондонгийн олимпийн эмэгтэйчүүдийн 63 кг-ийн жинд барилдаж, хүрэл медалийн төлөөх барилдаанд ялагдсанаар шагналт тавдугаар байрт шалгарсан ОУХМ Ц.Мөнхзаяа билээ. Тэд 2002 онд дотносож үерхээд олон жилийг ардаа орхисон ч тоонот гэрт толгой холбож чадаагүй юм.
Х.Цагаанбаатар буудлагын О.Гүндэгмаатай гэрлэж, гурван хүүхэдтэй болсон бол Ц.Мөнхзаяа МУГТ, дасгалжуулагч Х.Болдбаатартай дэр нэгтгэсэн юм.
Харин бид энэ удаа Х.Цагаанбаатарын “экс” найз охин Ц.Мөнхзаяагийн Афины Олимпоос медальтай ирсэн “хайртай” залуугийнхаа талаар хэрхэн ярьсаныг хүргэж байна.

 
-Юуны өмнө өөрийн тань найз залуу Х.Цагаанбаатар Афины Олимпод Монгол Улсынхаа тугийг мандуулж, хүрэл медаль авсанд баяр хүргэе. Мэдээж чиний хувьд бусдаас илүү баяртай байгаа байх. Баярт мөчөөсөө хуваалцаач?
-Баярлалаа. Тамирчин хүний хувьд тамирчдынхаа барилдааныг үзэхийг Олимпийн эхний өдрөөс л тэсэн ядан хүлээж байлаа. Найзын маань зооны аваргын төлөөх барилдааныг гаргачихаад хүрэл медалийн төлөөх барилдааныг гаргалгүй дундуур нь өөр барилдаан гаргахад нь “Цагаанаа маань хүрэл медаль авчихсан байх” гэж таамагласан. Тэгтэл ТВ-5 барилдааныг нь гаргахгүй таг чимээгүй болчихоор нь ялаагүй юм болов уугэж гайхаад, сүүлдээ тэвчээр минь алдагдаад найз руугаа утасдсан. Гэтэл Цагаанаагийн утсыг Насаа багш аваад “Хүрэл медаль авсан” гэж хэлэхэд нь яаж баярлаж, уйлж байсан гээч.
Цагаанаагийн барилдааныг харж суухдаа өөрөө барилдаж байгаа юм шиг л гар маань хөлөрсөн байсан шүү.
-Тэгээд Цагаанбаатартай хэзээ нь ярьсан бэ. Хамгийн түрүүнд баярыг нь хуваалцаж чадсан уу?
-Тэмцээн болдогийн шөнө нь би хоёр, гурван удаа утасдсан боловч допингийн шинжилгээнд орчихсон байсан болохоор ярьж чадаагүй юм. Харин намайг хүлээж ядаад унтаж байхад Цагаанаа яриад маш их баяртай байгаагаа хэлсэн. Уг нь би түрүүлж баяр хүргэсэн бол гоё байсан юм.
-Цагаанбаатар одоо ирэх тун дөхөж байна. Тэмцээнээс хойш хэдэн удаа чамтай ярив?
-31-нд ирэхээр болсон. Тэмцээнээс хойш өдөр бүр ярьж байгаа.
-Чи бас бөх хүн. Спортод бага балчираасаа зүтгэж, хичээж байж амжилтад хүрдэг шүү дээ. Чиний хувьд хэдэн наснаасаа жудо бөхөөр хичээллэж эхлэв. Энэ спортод хөл тавихад нь хэн нөлөөлсөн бэ?
-Би жудо бөхөөр 14-тэйгээсээ эхлэн хичээллээд дөрвөн жил болж байна. Уг нь би бөхөөр хичээллэх нь битгий хэл бөхийн талаар ямар ч ойлголт, мэдлэггүй байлаа. Тэр үед аав маань намайг “Миний охин ер нь бөх болвол яасан юм бэ” гэж тоглоом, шоглоомоор хэлдэг байсан. Харин би “Эмэгтэй хүн бөх болно гэж юу байх вэ дээ, муухай” гээд л өнгөрдөг байлаа. Тэгээд нэг л өдөр бөхөөр хичээллэмээр санагдаад аавдаа хэлж, спортын ордонд ирсэнээр Буядаа багштайгаа танилцан шавиар орсон.

-Спортынхон байнга л бэлтгэл, сургуулилт гээд завгүй байгаа харагддаг. Нэг ёсондоо ажил нь болохоор арга ч үгүй юм уу даа?
-Тамирчин хүн өдөр бүр бэлтгэл хийхгүй бол өөрөө ахихгүй шүү дээ. Хэдий чинээ бэлтгэл хийхгүй байна, төдий чинээ бие нь суларч, хүчгүй болдог. Үргэлж бэлтгэл хийн, хөлсөө дуслуулж, олон жил хөдөлмөрлөж байж амжилтад хүрдэг болохоор хичээхгүй гээд ч яах билээ. Эзэн хичээвэл заяа хичээнэ гэж Монголын маань сайхан үг байдаг даа.
-Харин чиний хувьд дөрвөн жил бэлтгэл хийсэн гэхээр овоо хөлс асгаруулсан биз?
-Миний хувьд болоогүй ээ. Дөнгөж дөрөвхөн жил. Дахиад цаана нь арваад жил бэлтгэл хийнэ гэхээр Цагаанаа боогоод үхчих байх даа /инээв/.
Манай Цагаанаа чинь 12-тойгоосоо эхэлж жудогоор хичээллэсэн. Одоо 20 настай гэхээр найман жил хөдөлмөрлөсний эцэст Афины Олимпоос хүрэл медаль хүртлээ. Угаасаа ч Цагаанаа маань төрөлхийн авьяастай бөх л дөө. 
-Тэгвэл Мөнхзаяагийн хувьд лав дахиад 10 жилийн барилдаан байгаа юм байна?
-Мэдээж би зорилгодоо хүрч байж миний цаашдын амьдрал төлөвлөгдөнө шүү дээ.
-Тийм дээ. Өөрийг тань улсын болоод олон улсын тэмцээнүүдэд байнга амжилттай барилддаг гэж сонссон юм байна?
-Улсын тэмцээнд байнга оролцдог. Мөн тив, дэлхийн хэмжээний тэмцээн, уралдаануудад байнга амжилттай барилддаг.
-Өөрөө ноднин жилийн оны жилдэг 10 сурагчийн нэг болж байсан байх аа?
-Тийм ээ. Оны шилдэг арван хүүхдийн нэгээр ноднин тодорч байсан.
-Одоо Х.Цагаанбаатар улсдаа төдийгүй дэлхийд данстай тамирчин боллоо. Өөрийн тань хувьд ч нас залуу болохоор дараа дараагийн олимпод оролцож, амжилт үзүүлэхийг үгүй гэх газаргүй шүү дээ?
-Тэгэлгүй яах вэ. Ямар ч байсан Цагаанаа маань дэлхийд Монгол Улсынхаа далбаа, өөрийн нэрээ дуурсгалаа. Энэ бол залуу хүний хувьд мэдээж том амжилт. Миний хувьд ч хэзээ нэгэн цагт Олимпод оролцох зорилготой, түүнийхээ төлөө ч хичээж, хөдөлмөрлөж байна. Хэдийгээр би энэ намраас оюутан болж, бэлтгэлийн цаг маань багасч байгаа ч бүгдийг зохицуулаад хичээнэ.
-Аль сургуулийн оюутан болох нь вэ?
-Би энэ жил 13 дугаар сургуулийг төгссөн. Одоо Цагдаагийн академид элсэн суралцахаар болоод байгаа л даа.
-Бат-Эрдэнэ, Балжинням аваргууд гээд л цагдаагийн мөрдөстэй бөхчүүд олон байдаг юм билээ?
-Би тэднийг дуурайгаагүй л дээ. “Хүч” нийгэмлэгт тамирчинаар орвол цагдаа болдог юм. Тэнд эмэгтэй хүн авдаггүй. Авдаг байсан бол бөөн эмэгтэй цагдаатай болох байсан биз /инээв/.
Би урдаа том зорилго тавьсан учраас Цагдаагийн академийг сонгосон.
-Тамирчдад эдийн засгийн дэмжлэг хэрэгтэй байдаг гэнэ лээ. Чамд ч иймэрхүү асуудал тохиолдох юм уу?
-Ер нь ихэнхи тамирчдад ивээн тэтгэх байгууллага ховорхон олддогоос энэ сэдэв их хүнд байдаг. Би л гэхэд арваад удаа гадагшаа уралдаан тэмцээнд явахдаа нэг ч удаа пүүс  компаниар ивээн тэтгүүлж үзээгүй. Дандаа ээж, ааваасаа л мөнгө авч байсан. Мэдээж хэрэг тухайн тэмцээндээ амжилттай барилдвал мөнгийг нь буцааж өгдөг л дөө. Ажилтгүй барилдвал ёстой хүмүүсийн ярьдагаар шатна гээч нь болдог юм. Бид цалин ч авдаггүй шүү дээ.
-Сонирхолтой л юм. Ганган машинтай байгааг тань харахад тэгж хэлэхээргүй л байна даа. /Тэрээр Nissan Bluebird маркийн мөнгөлөг цагаан өнгийн машин хөлөглөжээ.сурв/?
-Хаанаас даа. Энэ машин Цагаанаагийн юм шүү дээ. Гэхдээ дундын өмч гэж ойлгож болно.
-Ингэхэд өөрөө Цагаанаатай бөхөөр хичээллэсэн үеэсээ танилцсан уу. Анх танилцсан дурсамжаасаа хуваалцаач. Ямар сэтгэгдэл төрж байв?
-Намайг 2000 онд орохоос өмнө Цагаанаа манай клубт хичээллэдэг байсан юм. Харин бид 2002 онд дотно танилцаж үерхсэн. Цагаанаагийн нүдэнд дулаахан төрх, хөгжилтэй яриа, хөдөлгөөн ихтэй, сахилгагүй байдал нь надад таалагдсан гэх үү дээ.
-Найз залуугаа холын аянд үдэхдээ амжилт үзүүлнэ гэж бодож байв уу. Онгоцны буудал руу гаргаж өгсөн биз дээ. Цагаанаа юу гэж хэлээд холын аяндаа мордов доо?
-Би онгоцны буудал дээрээс үдэж өгсөн л дөө. Тэр үед Цагаанаа “Би ямар ч байсан медальтай ирнэ” гэж итгэл дүүрэн хэлж байсан. Тэгж хэлсэн нь талаар болоогүйг ард түмэн харлаа.
-Харлаа, харлаа. Цагаанбаатар удахгүй эх орондоо ирнэ. Дурлалт бүсгүйнх нь хувьд залуудаа ямар сюрприз бэлдэж байна вэ?
-Харин тийм ээ. Хүмүүс ямар бэлэг өгөх гэж байна гээд л асуугаад байх юм. Урьд нь хүнд бэлэг бэлдэж байгаагүй болохоор сайн мэдэхгүй л байна. Ямар ч байсан нэг сюрприз барина даа.
-Мэдээж Цагаанбаатарын гэрийнхэнтэй нь танилцсан байх?
-2003 онд Дарханд самбо бөхийн улсын аварга болох гэж байхад би клубийнхээ эгчтэй шөнө вагоноор очсон. Цагаанаа түрүүлээд машинаар явчихсан байсан юм. Очсон шөнөө Цагаанаагийнд орсон. Бусдын адил их тэвдсэн. Намайг ээж, аав хоёр нь их сайхан хүлээж авсан.
-Харин танайхантай Цагаанаа танилцсан биз. Аав ээж тань одоо бөөн баяр л байна уу?
-Танилцсан. Мэдээж бөөн баяр болсон хүмүүс л байна. Би айлын бага охин л доо. Манайх дандаа охидуудтай. Одоо ээж, аав, хоёр эгчтэйгээ хамт амьдардаг. Аав маань Цахилгаан шугам сүлжээнд, харин ээж маань сувилагчаар ажиллаж байсан.
-Танайх хүүгүй айл юм байна. Тэгэхээр одоо сайхан хүүтэй болох нь. Охинтой бол хүүтэй, хүүтэй бол охинтой гэдэг үг байдаг даа?
-Тийм ээ. Гэхдээ би бараг л хүүгийнх нь оронд хүү болж барилддаг болсон юм уу даа /инээв/.
-Гавьяат тамирчин Пүрэвбаатар Дэлхийн аваргаас медаль авчираад тун удалгүй гэрлэх ёслолоо хийсэн. Цагаанаа та хоёрыг ч нэг их удахгүй хуримаа хийнэ гэж яригдах боллоо?
-Пүрэвбаатар ах тухайн үед аль хэдийнэ эхнэр, хүүхэдтэй болсон байсан шүү дээ. Бид хоёрын хувьд гэрлэх болоогүй ээ. Цагаанаа дөнгөж 20-той, би 18-хан настай. Бид хоёр сайхан үерхээд, бие биенээ дэмжээд явна. Мөн ахиад олон жил барилдахаа бодно. Тэгж байж л цаашдаа гэрлэх асуудал ярина даа.
-Х.Цагаанбаатар Монгол Улсын гавьяат тамирчин болчихлоо. Засгийн газраас 20 сая төгрөг, самбо, жудо бөхийн холбооноос жийп машин, цаашилбал олон компаниуд бэлэг өгнө гэж амласан. Нууц биш бол энэ мөнгөө юунд зарцуулах вэ?
-Цагаанаагийн маань найман жил урсгасан хөлсний шан болохоор тэр мөнгөө хэрхэн зарцуулахыг би мэдэхгүй. Гол нь зөв, хэрэгтэй юмандаа зориулж байвал юунд зарцуулах нь сонин биш байлгүй дээ.   

Эх сурвалж: Mongolcomments.mn