Олон улсын сонирхогчдын боксын холбоо (AIBA)-ны гурван одтой дасгалжуулагч Лхамрагчаагийн Энхбаатартай ярилцлаа. Тэрбээр эмэгтэйчүүдийн шигшээ багаас хөөгдөөд буй ОУХМ М.Нандинцэцэг, О.Сувд-Эрдэнэ, Э.Ундрам нарын анхны багш юм.

Саяхан МБХ-ны хурал болж, хэд хэдэн асуудал хэлэлцэж, шийдвэрлэлээ. Насаа дарж, тэмцээнд оролцсон Х.Энхдэлгэрийг сонирхогчдын бокс тоглох эрхийг бүх насаар нь хасч, эмэгтэйчүүдийн шигшээ багийн найдвар болсон гурван тамирчныг хөөх шийдвэр гаргасан. Та О.Сувд-Эрдэнэ, М.Нандинцэцэг, Э.Ундрам гурвын анхны дасгалжуулагчийн хувьд ямар байр суурьтай байна вэ?

Сэтгэл эмзэглүүлсэн зүйл болж байна. Эмэгтэй боксчдыг гаргаж ирэх гэж олон жилийн хүч хөдөлмөрөө зарцуулсан. Гэтэл өдий зэрэгт хүргэсэн тэднийг нэг дасгалжуулагчийн хүсэлтээр шигшээ багаас хөөхөд гомдолтой байлгүй яах вэ. Энэ бол зөвхөн тэр хэдэн тамирчин, дасгалжуулагчийн бус Монголын боксын спортын хамт олон, МБХ-ны өмнөх удирдлага, шигшээ багийнхан, одоо ажиллаж байгаа багш, дасгалжуулагч нарын хүч хөдөлмөрийг үгүйсгэсэн явдал. Тиймээс МБХ гаргасан шийдвэртээ дүгнэлт хийж, эргэж харах ёстой.

Манайд эмэгтэй боксчидыг бэлтгэж, нэгдсэн зохион байгуулалтад оруулсан бодлого байна уу. Эсвэл бор зүрхээрээ, сонирхлоороо энэ хүртэл зүтгэж ирсэн охид адлагдаж, элдвээр хэлэгдэж байна уу?

Манайд боксын клүбүүдэд 2000 оноос ганц нэг эмэгтэй хүүхэд хичээллэж эхэлсэн. Тэмцээн болохоор тэднийг нэг багш нь аваад явдаг байлаа. Тэр үед нэгдсэн зохион байгуулалт байгаагүй. 2006 онд чамгүй хэдэн охин боксоор хичээллэж эхэлсэн. Манай нэг гавьяат дасгалжуулагч багш тэднийг цуглуулсан юм. Тэгээд тэмцээнд авч явж, ялагдангуут нь рингэн дээр элдвээр хэлж доромжилж, бөгс рүү нь өшиглөх зэргээр авирлаж, хөөгөөд явуулчихсан. Ингэж эмэгтэйчүүдийн боксыг үндсээр нь байхгүй болгосон. Харин 2008 онд МБХ-ны ерөнхийлөгч Д.Цогбаатар, нарийн бичгийн дарга Т.Үйтүмэн нар надад “Чиний удирдлага дор хэдэн охин боксоор хичээллэдэг юм байна. Эмэгтэй тамирчдыг нэгтгэж баг болгож зангидаач” гэж санал тавьснаар энд тэндхийн клүбүүдэд ганц нэгээр хичээллэж байсан охидыг нэгтгэж, бэлтгэл хийлгэх болсон. Охид маань ч жаахан байж. Бид 2008 оны эхнээс бэлтгэл хийсэн ч Ц.Цэрэнчимэд тэр жилээ Энэтхэгт болсон ААШТ-ээс хүрэл медал

ь хүртэж, БНХАУ-д болсон ДАШТ-д шагналт тавдугаар байрт орсон. Түүнээс хойш манай эмэгтэй боксчдын амжилт тасралтгүй өссөн. 2010 оны ААШТ-ээс М.Нандинцэцэг мөнгө, Б.Одмаа хүрэл медаль хүртсэн. Тэр жил БНХАУ-ын Гуанжоуд болсон Азийн наадмаас Э.Ундрам анхны мөнгөн медалийг авчирсан. Улаанбаатарт 2012 онд болсон ААШТ-ээс хоёр алт, хоёр хүрэл медаль хүртэж, багаараа гуравдугаар байр эзэлсэн. Эрчүүд ААШТ-д бүтэн жингийн ангилалд оролцож чадахгүй байхад манай охид багаараа оролцож, амжилт үзүүлсэн юм даа. Гэхдээ өнөөдөр бол харамсалтай байна. Эмэгтэй хүнийг ойлгодоггүй, мэдэрдэггүй хүмүүс эмэгтэйчүүдийн шигшээ багийг дасгалжуулж, тэгээд хөөж туугаад явж байгаа нь гутамшиг. Би хоёр ч удаагийн хурал дээр “Эмэгтэй боксчдыг элдвээр харааж, доромжилж, хөөж байсан хүмүүс нэг нь дагсалжуулагчаар, нөгөө нь зөвлөхөөр ажиллаж байна. Ийм хүмүүс эмэгтэйчүүдийн багийг удирдахаар амжилт гарах уу” гэж хэлсэн. Манайд авьяаслаг, ур чадвартай дасгалжуулагч олон бий. “Алдар” спорт хорооны А.Гантулга, “Хангарьд”-ын С.Баттулга, залуучуудын шигшээ багийн Н.Мөнхсайхан, “Бурхан Халдун”-ы Г.Төгсбаяр, “Улаан арслан”-гийн Н.Наранмандах, өсвөр үе, залуучуудыг сайн бэлтгэж гаргаж буй Н.Галтбаатар гэх мэт дасгалжуулагчийг дурдаж болно.

Эмэгтэй боксчид амжилт гаргана гэсэн ойлголт 2007-2008 оны үед бараг байгаагүй. Гэтэл та яагаад голлож ажиллах болсон юм бэ. Тэр үед таны удирдлагад шилдэг эрэгтэй

боксчид байсан. Тэдэндээ суурилаад хүчтэй баг бүрдүүлж болоогүй юм уу?

Миний шавь нар Монгол Улсын хөдөлмөрийн баатар, гавьяат тамирчин Э.Бадар-Ууган, П.Сэрдамба хоёрыг хурцалж, дэм болж байсан. Боксын эмэгтэй тамирчдыг боксчидыг нэгтгэж зангидахыг МБХ, Т.Үйтүмэн, Ц.Нандигжав нар надад санал болгосны дагуу би ажилласан. Сүүлд “Эмэгтэйчүүдийн боксын шигшээ баг байгуулахгүй” гэж байхад нь би “Олимпийн төрөлд орчихсон байхад тэгж болохгүй шүү дээ” гэж хөөцөлдөж байж гурван тамирчнаа оруулсан нь М.Нандинцэцэг, О.Сувд-Эрдэнэ, Э.Уянга. Өдгөө шигшээ багаас гуравхан эмэгтэй боксчин цалин авч байгаа нь тэд. Тухайн үед “Тамирчдыг шигшээ багт авъя, харин дасгалжуулагчийг авахгүй шүү” гэхээр нь би охидоо бодоод гадна үлдэж байлаа. Миний хувьд 2013 он хүртэл эмэгтэйчүүдийн шигшээ багийн бэлтгэлийг хийлгэж, тэмцээн уралдаанд оролцуулж ирсэн. Би шавь нараа олимпийн эрх авахуулахын төлөө л ажилласан. Гэтэл ажлаас халсан. Ер нь манай спортод ийм нэг өрөөсгөл ужиг зуршил байгаад байдаг. Тэгээд яах вэ, Б.Энхтайваныг эмэгтэйчүүдийн шигшээ багийн дасгалжуулагчаар ирэхэд “Миний найз сайн ажиллаарай” гээд гар бариад гарсан. Үүний дараа би Тайваньд очиж боксын дасгалжуулагчаар зургаан сар ажиллаад ирсэн. Монголдоо ирсний дараа манай эмэгтэй боксчид олон улсын тэмцээнд хэрхэн оролцож байгааг харж л байсан. Охидын маань ур чадвар тэмцээнээс тэмцээнд муудсан. Элдвээр харааж, доромжилж, хөөж тууж ирсэн хүмүүс нь удирдлагыг гартаа авахаар хэцүү шүү дээ. Гэхдээ манай охид тэдний хэлээд байгаа шиг амжилт гаргаагүй биш гаргасан. Хэн нь ч хаана ч очсон, олимп, дэлхийн аваргуудтай бүгдтэй нь гар зөрүүлээд үзчихсэн, медаль хүртвэл хүртэх тамирчид шүү, манай охид.

Тэд өнгөрсөн арваннэгдүгээр сард болсон ДАШТ-ий үеэр нэлээд асуудал гаргасан бололтой. Тэнд яг юу болсон юм бэ?

ДАШТ-ий үеэр юу ч болоогүй. Тэмцээний 48 кг-ын жинд Т.Болортуул, 51 кг-д М.Нандинцэцэг, 60 кг-д О.Сувд-Эрдэнэ, 64 кг-д Э.Уянга, 75 кг-д Э.Ундрам гээд миний хар багаас нь бэлтгэж, өдий зэрэгт хүргэсэн шавь нар ДАШТ-д оролцох учраас би хувийн зардлаар тийшээ очсон юм. Очихдоо ямар ч маргаан, хэл ам гаргаагүй. Гэтэл дасгалжуулагч нь ялагдсан шалтгаанаа над дээр тохож, хүүхдүүдийг хагалан бутаргасан тухай тайлбарлаж байгаа нь ойлгомжгүй. Хүүхдүүд тусдаа байрласан, тэгээд ч би тэмцээнээс нэлээд хоцорч, сүүлд очсон шүү дээ. Би 2013 онд ССАЖ-ын сайд Ц.Оюунгэрэлтэй уулзаж, эмэгтэй боксчдыг бодлогоор дэмжиж өгөхийг хүссэн. Ямар нэгэн өргөх бичиг бариагүй, МБХ-г муулж ороогүй. Салбарын сайд уриалгахан хүлээж авч, “Ер нь эмэгтэй тамирчдаа дэмжинэ” гэсэн. Гэтэл шигшээ баг дээр охидыг маань “Та нар сайд дээр ордог гэнэ, матаас өгч явдаг гэнэ” гээд дарамталсан байсан. Үндэсний шигшээ багийн албаны дарга Ч.Эрдэнэтуяа өөрөө эмэгтэй хүн, тамирчин байсан атлаа бусдыг ерөөсөө ойлгодоггүй. Хэн хүн зориглодоггүй спортыг авч яваа эмэгтэйчүүдээ яагаад хүндэлдэггүй юм бол. Өөрөө тамирчин хүн байж, муухан эр тоглодоггүй боксын спортыг авч яваа эмэгтэй тамирчдыг ойлгохгүй юм бол яаж тэднийг удирдах вэ. Тэгээд юм л бол “Та нар даварч байна, шигшээ багаас хөөнө, та нарыг энд байлгах ёсгүй байсан” гэж загнадаг. Тэр хүн ямар хувиасаа цалинжуулж байгаа юм уу. Өнөөдөр Монголын боксыг ямар ч сэтгэлгүй хүмүүс удирдаж байна. Тиймээс эрэгтэйчүүдийн бокс ч ялгаагүй унаж эхэллээ. Н.Төгсцогт АНУ руу гараад явчихлаа. Х.Энхдэлгэрийгээ хөөчихлөө.

Х.Энхдэлгэр хөөгдсөнд хэн буруутай вэ?

Насаа дарсан юм бол яагаад Э.Бадар-Ууган баталгаа гаргаж өгч, хилээр нэвтрүүлээд байсан юм бэ. Тэр хүүг зориуд чадаж амьдралаар нь тоглочихлоо. Асуудал үүсэнгүүт сонирхогчийн бокст тоглох эрхийг насан туршид нь хасч, өөрөөсөө холдуулсан хэрэг. Үнэхээр шударга юм бол анх Күб рүү тэмцээнд явахдаа хил дээр баригдахад нь яах гэж баталгаа гаргаж өгсөн юм бэ. Хууль зөрчөөд явуулсан нь Э.Бадар-Ууган тэр хүүг зориуд чадаж байгаа хэрэг. Тэр үед Х.Энхдэлгэр Күбээс мөнгөн медальтай ирсэн. Дараа нь дэлхийн оюутны “Универисад” наадамд түрүүлсэн. УАШТ-д дүүгийнхээ нэрээр оролцсон. Өнгөрсөн намар Баян-Өлгийд болсон олон улсын тэмцээнд бас л тэр нэрээрээ оролцсон. Мэдсээр байж оруулаад байдаг нь зориуд тийм юм хийж байна гэсэн үг.

Удахгүй 2015 он гарна. Олимпийн эрхийн төлөө өрсөлдөх чухал жил. Гэтэл манайхан эмэгтэй боксчдоо шигшээ багаас хөөж, Х.Энхдэлгэр тоглох эрхийг бүх насаараа хасч, Н.Төгсцогт Америк руу явчихсан. Манай боксын спорт хаашаа яваад байна вэ. Х.Энхдэлгэрийн асуудлыг ОУСБХ мэдчихвэл яах бол?

ОУСБХ МБХ-ныхны толгойг илэхгүй байх. Тамирчид бол яах ч үгүй. Хамгийн гол асуудал хэн мэдсээр байж насыг нь дарж тэмцээн, уралдаанд оруулаад байсан бэ гэдэг дээр яригдана.

Та эмэгтэй боксчдын асуудлаар боксын холбооны удирдлагуудтай уулзаж ярилцав уу?

Э.Бадар-Ууган, П.Сэрдамба хоёр­той уулзахад “Мэргэжлийн зөвлөл хуралдаад ийм шийдвэр гаргасан” гэсэн. Гэтэл эмэгтэйчүүдийн шигшээ багийн дасгалжуулагч Б.Энхтайван гэдэг ганц хүний саналаар шийдсэн юм билээ. Үзэл бодлоо чөлөөтэй илэрхийлсний, өөрийнх нь арга барил таалагдахгүй байгааг хэлсний төлөө гурван охины амьдрал, ирээдүйг золиослох гэж байна. Гэтэл үүнийг ойлгодог хүн МБХ, Спортын бэлтгэлийн төвд алга. Ардчилсан улсад бүх зүйл нээлттэй, ил тод байх ёстой. Гэтэл манайд боксын хэдэн охиныг дарамталдаг. Энд ярихаас ч зовмоор үгээр, хэлэх хэлэхгүйгээр доромжилдог. Аваад явж байгаа багш, дасгалжуулагч нь тамирчдаа хүн сонсохоос яс хавтаймаар үгээр хэлж хүний нутагт хэрүүл хийж байсан. Өвөрмонголын багш нар над руу утсаар яриад “Тэр хоёр ингэж хэрэлдэж байлаа. Үнэхээр ичмээр юм. Бид танайхыг дахин урьж хамтарсан бэлтгэл хийхгүй” гэж байсан. Сүүлийн үед манайх гадаад харилцаагүй болсон. Гадаадын хамтарсан бэлтгэлд мөнгө төлж байж оролцдог. Д.Цогбаатар даргын үед манай эмэгтэй тамирчид Казахстаны зардлаар, эрчүүд Пакистаны зардлаар хамтарсан бэлтгэл хийж, тэмцээнд оролцоод ирж байсан. Одоо гадаад харилцаа тэглэсэн. Энэ нь МБХ-ны өнөөгийн удирдлагуудын үйл ажиллагаатай холбоотой. Д.Цогбаатарын үед зөв бодлогоор ажиллаж, Ц.Нандигжав, Т.Үйтүмэн нар менежерийн үүргийг сайн гүйцэтгэсэн. Монголын бокс хурдан хөгжиж, Э.Бадар-Ууган П.Сэрдамба, З.Энхзориг, Н.Төгсцогт нар гарч ирсэн. Түүнээс биш Э.Бадар-Ууган П.Сэрдамба хоёр тэнгэрээс буугаад ирчихээгүй. Гэтэл өнөөдөр тэгж авирлаж болохгүй шүү дээ. Тэр хоёрыг гаргаж ирэхэд миний ч хувь нэмэр, үе үеийн дасгалжуулагч, тамирчдын хувь нэмэх их бий. Яагаад гэвэл тэднийг ялж явсан тамирчид дотор миний шавь нар байсан шүү дээ. Өөрсдийнхөө яаж олимп, дэлхийн аварга болсныг мэддэг байх хэрэгтэй. Ядруухан боксчдыг хүмүүс тэгсхийгээд мартчихдаг. Харин сайн боксчдыг ялагдсан ч түүх мартдаггүй, боксын ертөнц үеийн үед ярьдаг, дурсдаг. Нэргүйн Энхбатыг одоо хүртэл ард түмэн мартаагүй, Монголын Түмэнцэцэгийн Үйтүмэнгийн амжилтыг луйвардсан япон, америкчууд өнөөдөр ч ичиж, тааралдах болгондоо уучлал гуйж явахыг би өөрийн биеэр харж байлаа. Уранчимэгийн Мөнх-Эрдэнийг ясны тамирчин гэдгийг олон улс, тив, дэлхийн тулаанчид хүлээн зөвшөөрдөг. Тэр дэлхийн том тулаануудаас бүх медалийг Монголдоо авчирсан ясны боксчин, даруухан тамирчин. Тэгвэл Э.Бадар-Ууган, П.Сэрдамба хоёр шиг нэг л сүрхий нэр цуу хүртсэн ч яс юман дээр ядмагхан аваргуудыг түүх мартдаг. Хүн чадваргүй, боловсролгүй байж болох ч ухаантай, хүний мөстэй байх ёстой. Хэн нэгэн өөрсдөөс нь илүү амжилт гаргах гээд ирэхээр дотор нь юм буцлаад, дарж дарамтлах гээд байж таарахгүй. Ц.Бат-Энх гэгч нөхөр хэдэн жилийн өмнө МБХ-г удирдахдаа баахан самарчихаад явсан. МБХ өнөөдөр алдаанаасаа суралцаж, ахиж дэвших хэрэгтэй болохоос биш арагшаа ухардаг байж таарахгүй.

Та шавь нарынхаа талаар эмэгтэйчүүдийн шигшээ багийн ахлах дасгалжуулагч Б.Энхтайвантай уулзсан уу?

Уулзаагүй. Түүнтэй уулзах шаард­лага ч байхгүй. Бидний хооронд маргалдсан зүйл үгүй. Дандаа хов жив ярьж явдаг тэр хүнтэй би харилцдаггүй.

Тамирчдын биеийн байдал, эрүүл мэнд ямар байв?

Б.Энхтайван “Шинжлэх ухааны үндэстэй бэлтгэл хийлгэж байна” гээд байсан. Тэгвэл диспансерийнх нь зарим эмч “Ямар сонин юм бэ, энэ тамирчид ядаргаанд орж байж формдоо ордог юм байх даа” гэж байсан. Бэлтгэл дээр харж байхад манай охид хэзээ ч ядарч байгаагүйгээрээ сульдсан. Гэтэл манай эмэгтэй тамирчид бэлтгэл дээр ядрах байтугай УАШТ-ий рингэнд гарахад нь үзэгчид “Эрчүүдийг ичээмээр тоглолтууд хийж байна даа, манай охид” гэж хэлж байлаа. Тийм сайхан байсан тамирчдыг ядаргаанд оруулчихсан. Тэгээд яах юм бэ, ДАШТ-д очоод бүгд байгаа жаахан арангаараа тоглосон. Ч.Болортуул тактикийн алдаагаар л ялагдсан. М.Нандинцэцэг олимп, ДАШТ-ий хүрэл медальт АНУ-ын тамирчинтай таарч сайн тоглосон ч ялагдсан. Рингнээс бууж ирснийх нь дараа тэнд байсан олон орны дасгалжуулагч, тамирчид ирж баяр хүргэж, хамгийн сайн тоглосныг нь хэлж байсан. Би тамирчиддаа нэг л үг хэлдэг. “Ялагдсан бол тэрийгээ хүлээж сур, битгий олон юм ярь” гэдэг. М.Нандинцэцэгийн хувьд үнэхээр сайн тоглоод ялагдсан учраас харамссан.

Та гурван охинтойгоо уулзав уу. Сэтгэл санаа нь хэр байна?

Уулзалгүй яах вэ. Шавь нар маань хүнд цохилтод орсон байна. Зарим нь “Боксын спортоо орхиё” гэж байна. Намайг “Өчнөөн жил зүтгэчихээд тэгж болохгүй” гэхэд “Биднийг хэлэх, хэлэхгүй үгээр доромжилж, дарамталдаг” гээд уйлж байна билээ. Би шавь нараа өмөөрч зарим хүнтэй гар зөрүүлж явсан удаа бий. Надад бол айх юм, алдах зүйл алга. Харин шавь нарынхаа ирээдүйд харамсч байна.

Эмэгтэй боксчдыг ДАШТ-д ёс зүйгүй зан гаргасан тухай яриа байна. Бэлтгэлээ хийхгүй, тэнэж алга болсон юм уу?

Би тэнд байсан, мэдэлгүй яах вэ. О.Сувд-Эрдэнэ бэлтгэл дээр хөлсөө дуслуулаад “Багшаа, би уначих гээд байна” гэж байсан. Уг нь хэзээ ч тэгж хэлдэггүй тамирчин юм шүү дээ. Тэднийг бэлтгэл дээр тэгж ядарч байхыг би л лав хараагүй. Гэтэл ядаргаанд орчихсон. Д.Банди багш “Тэмцээнд явахын өмнө хоёр хоног алга болчихлоо” гэж хэлж байсан. Утасдаад асуутал эгч нь “Хатиг гараад хөдөлж чадахгүй, тэрийгээ хэлэхээс зовоод байна” гэсэн. Тамирчдынхаа бэлтгэл нь болж байна уу, бие нь яаж байна гэдгийг ойлгохгүй дасгалжуулагч байж таарахгүй шүү дээ.

Б.Энхтайван эмэгтэйчүүдийн шигшээ багийг авч явах хэмжээний дасгалжуулагч мөн үү?

Шавь нартаа гологдож байгаа багш ямар байх вэ, та өөрөө бодоод үз. Гэтэл ийм муу дасгалжуулагчыг байлгах сонирхол цаад хүмүүст нь байгаа байхгүй юу.

Анхны багш, дасгалжуулагчийн үнэ цэнэ чухал байх. Харин манайд үүнийг төдийлөн тоодоггүй юм шиг ээ?

Ийм асуудал манай бокст байна. Шавь нараа тив, дэлхий, олимпийн медальд хүргэсэн А.Гантулга гэж “Алдар” спорт хорооны дасгалжуулагч бий. Тэр хүнийг өнөөдөр олон улсын томоохон тэмцээнд нэг ч удаа явуулсангүй. Шавь нарыг нь аваад явдаг. Гэтэл тэдгээр тэмцээн уралдаан дасгалжуулагч бидний хувьд том баяр, бахархал шүү дээ. Тиймээс энэ зарчмыг өөрчилмөөр байна. OХУ, БНХАУ, Казахстан болон бокс өндөр хөгжсөн улсууд яагаад амжилт гаргаад байна гэвэл тамирчдынхаа анхны багшийг хамт авч явдаг.

Спорт хариуцдаг яам өөрчлөгдөж, сайд нь шинээр томилогдсон. Төр, засагт хандаж та юу хэлмээр байна?

Төр, засаг хөрөнгө хэмнэж, цомхон, чадварлаг бүтцээр ажиллах гэж байна. Тэгвэл Спортын бэлтгэлийн төв гэх нүсэр бүтцээ өөрчлөх хэрэгтэй. Ч.Эрдэнэтуяа гэдэг даргатай мэргэжилтнүүд гэх ачааг спортынхны нуруунаас авч хаямаар байна. Үүнийг ганц би биш спортын олон төрлийн дасгалжуулагч, тамирчид хэлдэг. Хэдэн төгрөгийн төсвөө яамаар дамжуулаад холбооных нь дансанд хийчих хэрэгтэй. Заавал Спортын бэлтгэлийн төв, мэргэжилтнүүд гэхчилэн нүсэр бүтцээр дамжуулах шаардлага байгаа юм уу. Тэд нь мөнгө хэрхэн идэж уух талаар ажиллаад сурчихсан. Тамирчид тэмцээн уралдааны зардал гээд сандарч байхад мэргэжилтэн нэртэй гадаадад зугаалсан хэдэн хүн байдаг. Сүүлдээ онгоцны тасалбарын захиалга дээр ажилладаг болж. Аль хямдыг нь авмаар байтал “Заавал тэндээс ав” гээд явуулдаг. Тэд тэндээс хувь авдаг уу. Спортынхны хэн нь хэн бэ гэдгийг ч ялгадаггүй. “Алдар” спорт хорооны дасгалжуулагч А.Гантулгад гавьяат дасгалжуулагч гэдэг цолыг нь аваад өгчих газар байдаггүй юм байх даа.

МБХ өнгөрсөн жил Сэлэнгийн боксын клүбийн дасгалжуулагч Г.Ганхуягаас эхлээд олон хүний эрхийг хаслаа. Таныг ярилцлага өгсөн болохоор хасах юм биш биз?

Үнэн үг хүмүүст хатуу сонсогдох нь ойлгомжтой. Тэглээ гээд намайг хөөх, хасах эрх хэнд ч байхгүй. Би дүрмэнд харш зүйл хийгээгүй.

Та одоо хаана, ямар ажил эрхэлж байна вэ?

Клүб байхгүй, хувиараа ажиллаж байгаа. Голдуу өсвөр үе, залуучуудыг бокст бэлтгэж, дасгалжуулж байна.

Agshin.mn