М.Энхсайхан: Тавантолгойн хэлэлцээрт харилцан ашигтай стратегийг баримтална

2014-12-25

Тавантолгойн нүүрсний ордын хөрөнгө оруулагчдыг нэлээд удаан сонгон шалгаруулсны эцэст Хятадын “Чайна Шэнхуа Энержи”, Японы “Сумитомо”, Монголын “Энержи Ресурс” ХХК-ийн хамтарсан түншлэл Тавантолгойн ордод хөрөнгө оруулагчаар ажиллахаар болсон.

Тавантолгойн орд төрийн мэдэлд байх бөгөөд гагцхүү хөрөнгө оруулалт хийж, ажлыг урагшлуулах ажлыг дээрх гурван компанийн хамтарсан түншлэлийн хүрээнд явуулах юм.Засгийн газраас компаниудтай хийх хэлэлцээрийн ажлын хэсэг гарсан. Ажлын хэсгийгМонгол Улсын сайд М.Энхсайхан ахалж, Уул уурхайн сайд Р.Жигжид, Сангийн сайд Ж.Эрдэнэбат, Зам тээврийн сайд Н.Төмөрхүү нар багтаж байгаа юм.Тавантолгойн хэлэлцээг дээрх гурван хөрөнгө оруулагч компанитай ирэх сарын 5-ны өдөр эхлүүлэхээр болсон. Энэ талаарх мэдээллийг Ажлын хэсгийн ахлагч Монгол Улсын сайд М.Энхсайхан, Уул уурхайн сайд Р.Жигжид, “Эрдэнэс Тавантолгой” компанийн гүйцэтгэх захирал Я.Батсуурь нар өглөө.

Ажлын хэсгийн ахлагч Монгол Улсын сайд М.Энхсайхан мэдээлэлдээ “Хөрөнгө оруулагч компаниуд хэлэлцээрийг хурдан хийхэд бэлэн гэдгээ хэлж байгаа. Ажлын хэсгээс харилцан ашигтай байх стратегийг барих саналыг гаргасан. Үүнийг талууд хүлээн зөвшөөрсөн. Бүгд хэлэлцээр хийхдээ бие биедээ бүрэн итгэлтэйгээр ажлаа эхлүүлье. Хэрэв санаа зовж байгаа асуудал байгаа бол харилцан ярилцаж, шийдвэрлэх хэрэгтэй гэж үзсэн. Хэлэлцээ амаргүй байна байх. Энэ төслийн хэлэлцээг эхлүүллээ гэдэг мэдээлэл гадны хөрөнгө оруулагчдад хамгийн эерэг нөлөөлийг авчирч байгаа. Том төсөл байх тусмаа улстөржилт, хардлага сэрдэлтийг авчирдаг учир ажлын хэсэг мэдээллүүдийг цаг тухай бүрт нь ил тод мэдээлж байх болно. Монголчууд нүүрсийг ухаад ачаад борлуулаад сурчихсан, чадна. Гэхдээ Тавантолгой бол жижиг орд биш. Том нүүрс тээвэрлэлт, борлуулалт хийх асуудал учир монголчууд хийж чадахгүй. Ийм учраас хөрөнгө оруулагчдаас хөрөнгө босгох шаардлагатай байна” гэлээ.

Хэвлэлийн хурлын үеэр Монгол Улсын сайд М.Энхсайханаас сэтгүүлчид дараах асуултад хариулт авлаа.

-Хятадын “Чайна Шэнхуа Энержи” компанитай нүүрс нийлүүлэх гэрээ байгуулсан. Өмнө нь мөн хамтарч байсан гэрээгээ цуцлах уу, хэвээрээ байх уу?

-Монгол, Хятадын харилцаа сайн байгаа. Энэ үед хэлэлцээ хийж байна. Хятад улс их хэмжээний нүүрс авъя гэсэн, зах зээл бэлэн байгаагаа ч илэрхийлж байгаа. Одоо бол хэлэлцээ дөнгөжэхлэх гэж байна.

-“Эрдэнэс Тавантолгой” Чалкод төлөх өрнөөс гадна өөр өр зээл бий. Үүнийг хэрхэн төлөх вэ?

-Бид Тавантолгойн нүүрсний ордыг ашиглах тухай ярьж байгаа. Тэгэхээр “Эрдэнэс Тавантолгой” компанийн өрийн асуудлыг хөрөнгө оруулагчдад үүрүүлж болохгүй. Хэлэлцээний явцад шийдэгдэнэ.

-Иргэн бүрт Тавантолгойн ордоос 1072 ширхэг хувьцааг олгосон. Энэ хувьцааны асуудлыг хэрхэн шийдвэрлэх вэ?

-Хувьцааны асуудлыг шийдье гэдэг дээр компаниудтай тохиролцсон. Харин хэрхэн хийх вэ гэдгийг хэлэлцээний явцад ярилцана.

-4 тэрбум ам.долларын хөрөнгө оруулалт хийхээр байгаа. Ямар байдлаар санхүүжилт хийх вэ?

-4 тэрбум ам.долларын хөрөнгө оруулалтыг хийнэ. Эцсийн санхүүжилтийг хэрхэн ямар байдлаар шийдвэрлэхийг мөн хэлэлцээний явцад шийднэ. Тухайн үед нь энэ мэдээллийг өгье.

-“Эрдэнэс Тавантолгой” төрийн өмчит компанийн үүрэг ямар байдалтай болж байгаа юм бэ?

-Тавантолгойн орд төрийн өмч хэвээрээ үлдэж байгаа. Эрдэнэс Тавантолгой бол Тавантолгойн лицензийг эзэмшинэ. Төрийн нэрийн өмнөөс лиценз барьж байгаагийн хувьд хөрөнгө оруулагч компаниуд төлбөр төлнө. Ашиглалтын төлбөр гэсэн үг. Энэ талаар хэлэлцээний явцад ярина.

-Банк санхүүгийн байгууллагаар хийгдэх санхүүжилтийн нөхцөлийг ямар байдлаар харж байна вэ?

-Мега төслийг хэрэгжүүлэхийн тулд банкнаас мөнгө авна. Гэхдээ бидний барьж байгаа бодлого бол төрийн өмчийг барьцаалахгүй.

-Санхүүжилтийг ямар байдлаар оруулах вэ. Банкуудаар дамжиж таарах байх?

-Том бизнесийн байгууллага том төсөл хэрэгжүүлж байхдаа бизнесийн нэг хэлтэй байх ёстой гэж үздэг. Тэгэхгүй бол бие биеийгээ хардах тохиолдол бий. Олон улс том хөрөнгө оруулалтын ажил хийхдээ улсынхаа нягтлан бодох бүртгэл стандартыг олон улсын түвшинд шилжүүлдэг. Хэрэв олон улсын стандарттай байвал бизнес эрхлэгчдийн хооронд асуудал үүсэхгүй болов уу. Тэгэхээр Монголын нягтлан бодох бүртгэлийг олон улсын жишигт нийцүүлэх хэрэгтэй.

-Консорциумд нэгдэж байгаа гурван компани, хоорондын гэрээний тухай мэдээлэл юу байна?

-Та бүхэн хэлэлцээний явцад шийдэгдэх асуудлыг асуугаад байна. Тухай бүрт нь бид дэлгэрэнгүй мэдээлэл өгнө.

-“Пибоди энержи” компани ямар санал ирүүлсэн бэ. Өмнө нь хамтарч ажиллах саналыг тавьж байсан?

-Бид хөрөнгө оруулагчдад маш хатуу санал тавьсан. Дэлхийн томоохон зургаан компанийн дөрөв нь боломжгүйгээ илэрхийлсэн. Пибоди маш хатуу нөхцөлд орж ирсэн.Пибоди гол шаардлагаа биелүүлээгүй. Компаниудад үндэсний компанийг оруулж ирэх шаардлагыг тэд оруулж ирүүлээгүй.

zaluu.com