Б.Болор: Засгийн газрын саналыг 100 хувь дэмжинэ гэж байхгүй

2015-01-07

УИХ-ын Төсвийн байнгын хорооны дарга Б.Болороос 2015 оны төсвийн тодотголын талаар тодрууллаа.

-Энэ оны төсвийг яаралтай шийдвэрлэх шаардлагатай байгаа. Гэтэл МАН энэ асуудлыг дахин харах хэрэгтэй гэлээ. Ийм хугацаа бий юу?

-Хэлэлцүүлгийн хувьд хэлэлцэх эсэхээ шийдээд явах нь зөв. Тиймээс ядаж байнгын хороогоор хэлэлцэх эсэхээр шийдвэр гаргах ёстой. Хэлэлцүүлгийн явцад мэдээж тодорхой өөрчлөлтүүд хийх зайлшгүй шаардлага гарна. 2015 оны төсвийн тодотголыг хальт харахад учир дутагдалтай, засахаар маш олон зүйл байгаа. Үүнийг хэлэцүүлгийн явцад хийх нь зүйтэй. Төсвийн байнгын хороо хуралдах үеэр тодорхой саналууд гаргах байх. Уг асуудлаар бүлгүүд өнгөрсөн даваа гаригт хуралдсан. Хурлаар төсвийн тодотголоо яаралтай хэлэлцэх нь зүйтэй гэсэн шийдвэр гаргасан гэж ойлгож байгаа. Тиймээс байр сууриа нэгтгээгүй байж болно. Харин хэлэлцэх эсэх асуудлаа шийдээд явсан нь дээр.

-Гэхдээ УИХ дахь бүлгүүдийн санал эцэслэж байж байнгын хороогоор хэлэлцэх үү?

-Асуудлыг долоо хоногоор хойшлуулахдаа 2015 оны төсөв хэлэлцэх эсэхийг хойшлуулаагүй байх. Төсвийн байнгын хорооны хуралдаан дээр С.Бямбацогт дарга ирээд тодорхой санал хэлж болно шүү дээ. Өөрийнх нь эрхийн асуудал. Мөн бүлэг завсарлага авч болно. Гэхдээ ингэснээр хугацаа л алдана.

-Та өмнө нь төсөвтэй холбоотой ажлын хэсэг дээр нэлээд ажилласан. Тэгэхээр Засгийн газраас оруулж ирсэн төсвийн тодотгол бодитой болж чадаж уу?

-Ер нь төсвийн тодотгол хийхдээ хасах тухай л их ярьж байна. Ийм байдлаар эдийн засгийн хүндрэлээс гарах нь ямар ч эдийн засгийн онолоор буруу. Өөрөөр хэлбэл, эдийн засгаа хумиж байгаа хэлбэр. Гэхдээ тодорхой хэмжээнд тэвчих шаардлагатай зардлууд гэж бий. Түүнийгээ бодит болгох ёстой. Мөн орлогоо бодитой болгох нь зөв. Тодруулбал, орлогоо бодитой болгож 900 гаруй тэрбум төгрөгөөр хассан. Энэ нь үнэхээр зөв байна уу гэдгээ эргээд харах хэрэгтэй. Яг юунаасаа таналт хийснээ нятлах ёстой. Цомхотгол хийнэ гэж яриад байна. Эдийн засгийн хүндрэлээс цомхотгол хийж гардаг зарчим хаана ч байхгүй. Засгийн газрын оруулж ирсэн төсвийн төслийг 100 хувь дэмжээд явна гэж байхгүй. Хувь гишүүнийхээ хувьд үүнд нэлээд өөрчлөлт орох байх гэж бодож байна. УИХ-ын гишүүд ч нухацтай сайн ажиллана байх. Энэ бол маш хариуцлагатай үе. Тиймээс ийм үед асуудлыг хойшлуулах гэхээс илүүтэй бүтээлчээр хандах шаардлагатай.

-Тэтгэвэр, тэтгэмжтэй холбоотой гаргасан саналууд иргэдийн эсэргүүцэлтэй нэлээд тулгарах нь. Энэ талаар?

-Халамжийн мөнгөө хасаад татвараа нэмэгдүүлээд байхаар ард түмний нуруун дээр илүү ачаа ирнэ. Гишүүд асуудал анхааралтай хандаж, сайн ажиллахаас өөр аргагүй. Хувь гишүүнийхээ хувьд нийгмийн халамжийн мөнгөнөөс хасахыг дэмжихгүй байна. Тухайлбал, малчдын урамшууллыг бууруулах, багасгах, эхчүүдийн мөнгийг хасах дээр санал нэгдэхгүй. Буруу шийдвэрүүд байна. Энэ хүндэрлээс гарах арга биш. Харин хүүхдийн мөнгийг зорилтот бүлэгт өгнө. Оюутны 70 мянгыг шалгуур хангасан оюутнуудад өгнө гэж хязгаарлаж байгаа нь зөв. Өөрөөр хэлбэл, орлого бууруулсан асуудлаа эргэж харах зүйл байгаа. Халамжийн хувьд халамжийг хавтгайрууллаа гэж яриад байгаа. Бид ард түмнээ халамжлахгүй бол өөр хэн халамжлах юм. Гэхдээ тэр нь зөв байх ёстой. Сая яамдуудын бүтэц орж ирсэн. Ингэхдээ бүх бүтцээ өөрчилсөн байсан. Үүнийг нь сайн харах юм бол дахиад л газар, хэлтсийн дарга нараа оруулаад ирсэн байх жишээтэй. Ийм үед дэд сайдгүй ажиллах боломж бас байгаа. Үндсэн чиг үүргийн яамдууд нь дэд сайдтай байна биз. Бусад яам нь дэд сайдгүй ажиллах бүрэн боломжтой. Ер нь өөрсдөөсөө эхлэх ёстой. Цомхотгож байна гээд ар гэрээ авч явдаг доогуур албан тушаалын хүмүүс рүү орж байгаа нь яав ч оновчтой шийдэл биш.

Д.ГЭРЭЛЦЭЦЭГ

Эх сурвалж: "Зууны мэдээ" сонин