ОХУ-ын Ерөнхийлөгч Владимир Путин лхагва гаригт Ерөнхий сайд асан Дмитрий Медведевийн Засгийн газраа бүрэн бүрэлдэхүүнээр нь огцруулах "гэнэтийн" хүсэлтэд гарын үсэг зурж баталгаажуулсан билээ.

Дмитрий Медведев нь 2012 оны тавдугаар сарын 8-аас 2020 оны нэгдүгээр сарын 15 хүртэл долоон жил найман сар буюу 2809 өдөр ОХУ-ын Засгийн газрын тэргүүнээр ажилласан гэдгээрээ орчин үеийн Оросын түүхэнд Ерөнхий сайдаар хамгийн удаан ажилласан хүн юм.

Энэ хугацаанд тус улсын нийгэм, эдийн засагт гарсан онцлох өөрчлөлтүүдийг танилцуулбал:

Эдийн засаг

-ОХУ-ын Засгийн газрын тэргүүн асан Дмитрий Медведев 2012 онд анх Ерөнхий сайдаар ажиллаж эхлэх үед тус улсын ДНБ өнөөгийн ханшаар 68 их наяд 164 тэрбум рубль байснаас 2018 онд 104 их наяд 335 тэрбум рубль болж 53 хувиар нэмэгджээ. Оросын Үндэсний статистикийн хорооноос 2019 оны статистик тоо баримтыг хараахан ил болгоогүй байна.

-Харин Дэлхийн банкны тооцоолсноор ОХУ-ын нэг хүнд ногдох ДНБ-ий хэмжээ 2012 онд одоогийн үнээр 25000 ам.доллар байснаас 2018 онд 27000 ам.доллар болж 5.2 хувиар өсжээ. Гэвч ОХУ энэхүү үзүүлэлтээр Дэлхийн улсуудын жагсаалтад 47-оос 55 дугаар байр болж ухарсан.

-ОХУ-ын төсөв 2012 онд ДНБ-ий 0.06 хувьтай тэнцэхүйц хэмжээний маш бага алдагдалтай байсан. Тухайлбал, 2012 оны ОХУ-ын төсөв 12 их наяд 854 тэрбум рублийн орлого, 12 их наяд 895 тэрбум рублийн зардалтай байв. Харин 2018 оны эцэст ОХУ-ын төсөв ДНБ-ий 2.7 хувьтай тэнцэх хэмжээний ашигтай гарсан. ОХУ-ын 2018 оны төсвийн орлогын хэмжээ 19 их наяд 454 тэрбум рубль байсан бол зардал 16 их наяд 713 тэрбум рубль болжээ. Хамгийн сүүлийн үеийн статистик тоо баримтуудыг авч үзвэл 2019 онд ОХУ-ын төсөв ДНБ-ий 1.7 хувьтай дүйх хэмжээний ашигтай гарахаар байна.

-Мөн энэ хугацаанд үндсэн хөрөнгө оруулалт 12 их наяд 586 тэрбум рубль байснаас 39.8 хувь өсөж 17 их наяд 595 тэрбум рубль болжээ.

Нийгэмд

-Дмитрий Медведев Ерөнхий сайдаар ажилласан энэ хугацаанд ОХУ-ын хүн ам 2.6 хувиар нэмэгджээ. ОХУ-ын хүн ам 2012 оны нэгдүгээр сарын 1-ний байдлаар 143 сая байсан бол 2019 оны нэгдүгээр сарын 1-ний байдлаар 146.8 сая байсан юм.

-Эсрэгээр нь 1000 хүнд ногдох нас баралт 2012 онд 13.3 байснаас 2018 онд 12.5 болж буурчээ.

-Харин ОХУ дахь нийт ажилгүйдлийн төвшин 2012 онд 5.5 хувь байсан бол 2019 оны арваннэгдүгээр сарын байдлаар 4.6 хувь болж буурсан байна.

-Иргэдийн сарын дундаж цалингийн хэмжээ 2012 онд 26629 рубль байсан бол 2019 оны гуравдугаар улиралд 45726 рубль болж 72 хувиар нэмэгдсэн нь хамгийн онцлох үзүүлэлт аж. Үүнээс гадна өөр нэг онцлох үзүүлэлт бол 2012 онд 9405 рубль байсан дундаж тэтгэврийн хэмжээ 2019 онд 15500 рубль болж 71 хувиар нэмэгдсэн байна.

-Гэмт хэргийн гаралтын хувьд 2012 онд 100 мянган хүн тутамд ногдох гэмт хэргийн гаралтын тоо 1609 байснаас 2018 онд 1360 болж 15 хувиар буурсан нь хангалттай сайн үзүүлэлт юм.

-Эцэст нь НҮБ-ийн зүгээс гаргадаг Хүний хөгжлийн индексээр 2012 онд ОХУ дэлхийн 189 орноос 55 дугаар байрт бичигдэж байсан бол 2018 оны тайланд 49 дүгээр байр болж ахисан байна. Энэ үзүүлэлтээрээ тэд Хүний хөгжлийн “өндөр” индекстэй улс орнуудын бүлгээс “маш өндөр” индекстэй орнуудад шилжжээ.

О.Мөнхбат

Эх сурвалж: TASS

Дмитрий Медведев долоон жил Ерөнхий сайдаар ажиллахдаа Оросын нийгэм, эдийн засгийг ингэж өөрчилжээ
Tweet
Bolod.mn