Энэхүү Шинчонжи гэдэг нь "Шинэ ертөнц" гэх утгыг илэрхийлэх ба Библийн Илчлэл 21.1, 15.5-д заасныг үндэслэсэн "Шинэ тэнгэр, шинэ газар"-т ирсэн шинэ эзэн гэж өөрийгөө тодорхойлсон И Ман Хи гэдэг хүн 1984.3.14-нд байгуулсан христийн шашны нэгэн урсгал бөгөөд христийн шашныхан өөрсдөө хүлээн зөвшөөрдөггүй "гаж буруу урсгал" хэмээн эрс үгүйсгэж эсэргүүцдэг.

Энэхүү шашныг үндэслэгч И Ман Хи нь өөрийгөө шинээр төрсөн Бурхан гэж үзэн, итгэгчиддээ өөрийнхөө номлолыг заах зорилгоор сургалтын төвийг байгуулсан ба энэ газарт Шинчонжи номлолын бага, дунд, дээд шатны үе шатлалыг заах 6 сарын сургалтад суусны дараа шалгалт өгч төгсдөг байна.

Одоогоор төгсөгчдийн тоо 100,000 гаруй болсон гэж зарласан.

Энэхүү шашинд нэгэнт орж тархи нь эргэсэн хүн нь эцэг, эх, үр хүүхдээ бүгдийг орхих бөгөөд хамаг ажил үйлс, сэтгэл зүрх, хөрөнгөө шинээр төрсөн Бурхан болох шашны үндэслэгчдээ зориулдаг гэж "Шинчонжи шашинд итгэгчдийн хохирогч гэр бүлүүдийн холбоо"-ыхон хэлсэн байна. Тэд мөн цааш нь хэлэхдээ энэ шашныхан шинээр элсэн орж байгаа хүнд гэр бүлийнхэн нь дургүй байгааг мэдэх юм бол шууд арга хэмжээ авч эхлэх ба "гэр бүлийнхэн чинь хэчнээн сайн хүмүүс ч гэсэн чөтгөрийн гар хөл ч болж болно" гээд "бид чамайг хамгаалах учраас манай байранд хүрээд ир" гэцгээдэг байна.

Тэд энгийн Христийн шашныхныг бодвол суух байдал нь хүртэл өөр, сандал гэж байхгүй ба том зааланд бөөнөөрөө зэрэгцэн өвдгөө нугалан гараа урдаа аван сууцгаадаг.

Шинчонжи шашинд хохирогчдын нэгдэл үүсэж олон удаа шүүхэд хандаж байсан боловч БНСУ өнөөг хүртэл энэ шашны үйл ажиллагааг хориглоогүй. Мөн Солонгосын телевизүүдээр хүртэл энэхүү тархи угаалтын талаар анхааруулсан хэд хэдэн удаагийн баримтат нэвтрүүлгүүд гарч байсан байна.

Энэ шашны урсгалынхан Япон, Хятад, Филиппин, Камбож гэх мэт Азийн 16 улс, Англи, Герман, Франц гэх мэт Европын 9 улс, Австрали, Шинэ Зеланд гэх мэт номхон далайн 2 улс, Өмнөд Африк зэрэг Африк тивийн 5 улс зэрэг дэлхийн 40 улсад салбараа байгуулж 33 сүм, 109 цуглаанд нь 100,000 гаруй итгэгчид нь цуглардаг.

Гэвч 2019 онд энэхүү шашныг Хятад улс албан ёсоор хориглож хууль бус гэж үзэж үйл ажиллагааг нь зогсоосон байдаг. Гэхдээ тэд нууцаар Хятадын Ухань хотод үйл ажиллагаа явуулж байсан гэж South China Morning Post мэдээлсэн байна.

Тус сонин мөн Ухань хот дахь Шинчонжи сүмд 200 орчим итгэгч байсан ба тэд 12 сарын сүүлээр корона өвчний сургаар үйл ажиллагаагаа зогсоцгоож ихэнх нь Ухань хотоос өөр бүсэд үйл ажиллагаагаа явуулж байгаа гэж нэмж бичжээ. Хятадад Шинчонжи итгэгч нар нийт 20,000 орчим байгаа ба тэд Бээжин, Шанхай, Дарэнь, Сонян зэрэг том хотуудад амьдарцгааж байна.

Харин нэрээ нууцалсан Шинчонжи сүмийн итгэгч нэгэн эмэгтэй Ухань хотод вирусийн тухай мэдээлэл 11 сарын үеэс эхэлж гарсан боловч нэг их тоохгүй байж байгаад 12 сард бүх үйл ажиллагаа хаагдахад нутагтаа буцаж ирсэн хэмээсэн байна.

БНСУ-ыг түгшүүрт автуулж байгаа гол асуудал нь Тэгү хотод 1000 хүн нэг танхимд цугларсан тус шашны сүмийн уулзалтад Корона вирусийн халдвартай хүн 2 ч удаа очиж оролцсон нь тус улсын нийгмийг айдастай болгох гол үндэс болсон юм.

Иймээс Засгийн газраас корона вирусийн халдварын шинжилгээг Тэгү хот дахь Шинчонжи сүмийн итгэгч нар, тэдгээрийн гэр бүл, хамт ажиллагсад, ямар нэг байдлаар харилцсан, уулзсан хүмүүс дээр тулгуурлан хийх чиглэл барин ажиллаж байна. Мөн энэхүү шашны итгэгч нар өөр хоорондоо маш дотноос гадна аль ч хот, улс байсан өөрийн мөргөлийг харьяалах сүмүүддээ цугларч байнга хийдэг, ойр ойрхон уулзалддаг зэргээс үндэслэн орон даяар бүх Шинчонжи итгэгч нарын овог нэр болон холбоо барих утас зэрэг мэдээллийг тус шашны удирдагч нараас шаардан авч хүн нэг бүрээр судалгаа хийх ажлыг эхлүүлээд байна. Ингэснээр нийт итгэгчдийн оршин суудаг газрын Эрүүл мэндийн төвүүдэд тэдгээрийг албан ёсоор шинжилгээнд оруулах үүргийг өгүүлэх юм. Албан ёсны тоогоор 240,000 итгэгч байдаг гэх боловч өнөөдрийн байдлаар Засгийн газарт шилжүүлж өгсөн итгэгчдийн мэдээлэл нь 212,000 хүн буюу 30,000 хүний зөрүүтэй байгаа нь албаныхны санааг зовоосоор байна.

Зарим хэвлэл мэдээллийн хэрэгслүүдээр Тэгү хотын Шинчонжи цугларалтад оролцсон хүмүүс өөрсдийнх нь цуглааныг түр хаасан энэ үед христийн өөр сүмийн цуглаанд оролцож, тэр тухайгаа хоорондоо харилцан ярилцсан тухай мэссэнжирийн группээрээ харилцсаныг нь цагдаагийн байгууллага илрүүлэн шалгаж байгаа тухай гарч байна.

Үүнтэй холбоотойгоор Ням гариг бүр цуглардаг зарим Христийн сүмийхэн тодорхой хугацаагаар цуглаанаа хийхгүй байх, шинэ итгэгчийг хүлээн авахгүй байх зэрэг арга хэмжээг авч байна.

Тус улсад корона вирусийн тархалттай зэрэгцээд шинчонжи сүмийхний үйл ажиллагааны талаар олон талт мэдээллүүд гарч байх үед Шинчонжи шашны хохирогчид болох 5 иргэн тус шашны удирдагчийг залилан луйврын хэргээр иргэний шүүхэд өгч өнгөрсөн хугацааны хохирлоо нөхөн төлүүлэх тухай нэхэмжлэл гаргасан асуудал юм. Тэдгээрийн зарим нэг нь 7 жилийн турш үнэ төлбөргүй ажилласан хөдөлмөрийн хөлсөө нэхсэн бол зарим нь энэ шашны ухуулга луйвраас болж гэр бүлээсээ салж, эд хөрөнгөөр хохирсон, өөр ажил төрөл хийх боломжгүй болгосон зэрэг сэтгэл санааны хор хохирлын гэм буруугийн төлбөр 20-30 сая вон зэргийг нэхэмжилж шүүх заримыг нь хэрэгсэхгүй болгож заримыг нь хүлээн зөвшөөрч нөхөн төлбөр гаргуулахаар болсон байна.

Үүнтэй зэрэгцээд Шинчонжи сүмийн итгэгч нарын зургийг нийтэд ил тавих, хараах, ажлаас нь халах, гадуурхах зэрэг хандлага ихээр гарч байгаа ба сүмийн удирдлагуудаас нийтэд ил болгосон асуудлуудыг цуглуулан Хүний хувийн нууцыг хамгаалах тухай хууль болон бусад хүний эрхийг хамгаалах тухай хуулийн дагуу хатуу арга хэмжээ авахаа мэдэгдлээ.

Шинчонжи сүмийн тэргүүн болох И Ман Хигаас өөрийн итгэгч нартаа "Засгийн газраас явуулж байгаа энэхүү арга хэмжээнд идэвхтэй оролцож, бүх итгэгч нарын нэрсийг түргэн шуурхай гарган өгч, бүгд шинжилгээнд хамрагдах"-ыг хүссэн ил захидлыг гаргаад байгаа юм.

Одоогоор тодорхойгүй хугацаагаар Шинчонжи сүмийн үйл ажиллагааг зогсоосон байгаа ба түүний БНСУ дахь 1,100 орчим цуглааны салбаруудад ариутгал, хорио цээрийн арга хэмжээ аваад байна.

Нэмж хэлэхэд өөрийгөө дахин төрсөн Бурхан гэж үздэг БНСУ-ын 40 гаруй иргэн байдаг ба тэд өөр өөрсдийн сүм, номлолыг шашин, соёл, улс төр, боловсролын янз бүрийн хэлбэрээр хэрэгжүүлдэг ба үүнийг нь сонсож дагадаг итгэгчид нэлээдгүй байдаг.