Энэ долоо хоногт болж өрнөсөн ОНЦЛОХ үйл явдлыг Bolod.mn сайт тоймлон хүргэж байна. Эдгээрээс НИТХ-ын орон нутгийн сонгуулийн нээлт, Улаанбаатар хот даяар 4 цагийн турш ТЭГ ЗОГСОЛТ хийсэн замын хөдөлгөөний түгжрэл зэрэг мэдээ мэдээллүүдийг онцолж байна. Иргэд орон нутгийн сонгуулийн нээлтийг, замын хөдөлгөөнийг 4 цагийн турш түгжрэлд оруулсан шалтгаан хэмээн бухимдлаа илэрхийлж байсан юм.

· Орон нутгийн сонгуулийн сурталчилгаа албан ёсоор эхэллээ

Орон нутгийн сонгуулийн санал хураалт аравдугаар сарын 15-нд болно. Энэ удаагийн орон нутгийн сонгууль УИХ-ын сонгуулийн дараа, шинэ хуулиар зохион байгуулагдаж буйгаараа онцлог юм. Мөн өнгөрсөн парламентын сонгуулийн дүнд иргэд, улс төрийн намууд, Төрийн тэргүүн хүртэл эргэлзэж буйгаа илэрхийлсэн байдаг. Тиймээс орон нутгийн сонгууль шударга болох эсэхэд улс орон даяар анхаарал хандуулж байгаа нь тодорхой.

Нутгийн өөрөө удирдах байгууллагад иргэдийн төлөөлөл болж ажиллах төлөөлөгчийн сонгуульд МАХН, АН-тай нэгдэж оролцож байна. МАН дангаараа оролцох бол 200 гаруй хүн бие даан нэр дэвшиж байгаа юм. МАХН-ын хуьд Нийслэл, дүүрэг, аймаг, суманд нийтдээ 555 гишүүнээ нэр дэвшүүлжээ. Тодруулбал, нийслэлд 8, дүүрэгт 31, аймаг суманд 516 хүн нэр дэвшиж байгаа юм. МАХН орон нутгийн сонгуулийн сурталчилгааны нээлтээ 10сарын 1-ны өдөр Монголын үндэсний үйлдвэрчний эвлэлийн соёлын төв ордонд зохион байгууллаа.

· Аз жаргалтай Улаанбаатар хотын ТЭГ ЗОГСОЛТ

Өнгөрсөн сарын 30-ны өдөр 16 цагаас эхлэн Улаанбаатар хотын замын хөдөлгөөн дөрөв орчим цаг ТЭГ ЗОГСОЛТ хийлээ. Түгжрэл оройн 22 цаг хүртэл үргэлжилсэн ба ажлаасаа харьж явсан хүмүүс машин дотроо хонох нь хэмээн бухимдаж байсан юм. Энэ мэт замын хөдөлгөөнд оролцсон хүн бүр бүхий л хэлбэрээр бухимдлаа илэрхийлж байсан.

· Хотын захиргааг яармаг руу нүүхтэй холбогдуулан 10 хоног зам хаана

Нийслэлийн төр захиргааны байгууллагуудыг Хан-Уул, Яармаг шинэ дэд төвд шилжүүлэн байршуулах болсонтой холбогдуулан ерөнхий төлөвлөгөөнд тусгагдсан 1,7 км авто замын барилгын ажлын хүрээнд Нүхтийн замаас Хан-Уул дүүргийн 4-р хорооны нэгдсэн эмнэлэг хүртэлх 712 у/м, Наадамчдын гудамжнаас Хан-Уул дүүргийн нэгдсэн эмнэлэг хүртэлх 280 у/м авто замыг өнөөдрөөс эхлэн хаалаа.

Дээрх хэсгийн замыг аравдугаар сарын 1-11-ний өдрийг хүртлэх хугацаанд хааж, цементээр бэхжүүлсэн суурь болон өнгө хучилтын ажлыг хийх тул тээврийн хэрэгсэл эзэмшигч та бүхэн тус хугацаанд зураглалын дагуу түр замыг сонгон хөдөлгөөнд оролцоно уу.

· Машиндаа мансуурч байсан болон гэртээ хар тамхины ургамал хадгалж байсан этгээдүүдийг илрүүллээ

2020 оны есдүгээр сарын 26-ны өдөр Хан-Уул дүүргийн 15-р хорооны нутаг “Төв цэнгэлдэх орчимд мансууруулах бодис хэрэглэсэн хүн байна” гэсэн мэдээлэл цагдаагийн байгууллагад иржээ.

Мэдээллийг авч шалгахад Ч /эм.30н/, Ч/эр.23н/, Б /эр.25/ нар автомашин дотор мансууруулах эм, сэтгэцэд нөлөөлөх эм бэлдмэл хэрэглэсэн байжээ. Хэргийн Хан-Уул дүүргийн цагдаагийн нэгдүгээр хэлтэст шалгаж байна.

Мөн Сонгино хайрхан дүүргийн 31-р хорооны нутаг дэвсгэр ...тоотод сэтгэцэд нөлөөлдөг ургамал хадгалаад байна” гэсэн мэдээллийг шалгахад Х /эр.42н/, Э /эр.37н/ нар автомашинд ховор төрлийн ургамал хадгалж байжээ.

Уг этгээдүүдийг Экологийн цагдаагийн албаны алба хаагчид илрүүлэн Сонгино хайрхан дүүрэг дэх цагдаагийн гуравдугаар хэлтэс шалгаж байна. Эд мөрийн баримтаар сэтгэцэд нөлөөлдөг ургамал 22 шуудайг хураан авсан байна.

· НИТХ-ын сонгуульд ХҮН-ыг сонгуульд оролцох эрхийг нь хасжээ

2020 оны орон нутгийн сонгуульд ХҮН намын нэр дэвших эрхийг нь шүүхийн шийдвэрээр нь хасуулжээ. ХҮН намын Нийслэлийн намын хорооны дарга П.Наранбаярыг хууль бусаар томилсон хэмээн Захиргааны хэргийн шүүхэд гомдол гаргаснаар үйл ажиллагааг түдгэлзүүлэх шийдвэр гаргажээ. ХҮН-ын хувьд энэ асуудал нь анхных биш ажээ. Өмнө нь 2016 оны УИХ-ын сонгуулиар хоёр дарга нь тамгаа булаацалдсанаар сонгуульд оролцох эрхээ хасуулж байжээ.

· С.Зоригийг хөнөөсөн хэргээр “хооллоод” 22 жил боллоо

УИХ-ын гишүүн, дэд бүтцийн сайд С.Зориг 1998 оны аравдугаар сарын 2-нд бусдын гарт хэрцгийгээр амь насаа алдсан байдаг. Үүнээс хойш хэргийн учиг тайлагдалгүй 22 жил өнгөрлөө. Анх С.Зориг агсны гэргий Б.Булганыг баривчилсан тухай 2015 оны арван нэгдүгээр сарын 17-нд ЦЕГ-аас мэдээлэв. Энэ мэдээтэй хамт уг хэргийг үйлдсэн эрэгтэй, эмэгтэй хоёрыг Орхон аймгаас баривчилсан тухай мэдээлэл бас цацагдсан. Үүнээс хойш удалгүй хүн амины хэргээр ял эдэлж байсан Ц.Амгаланбаатар, баривчлагдаж ирсэн Б.Содномдаржаа, Т.Чимгээ нар С.Зоригийн амь насыг хөнөөсөн болж таарсан. Үүнээс эхлээд л олон нийт энэ хэргийн учир зангилаа тайлагдаж, захиалагчийг зарлах болов уу гэж хүлээсэн. Гэвч зарим нам, улс төрчид хэргийг уриа лоозон мэт ашиглаж, сонгууль бүрийн өмнө иргэдээс оноо авах хэрэгсэл болж ирлээ.

· НМХГ: “Мэргэван” болон “Сод монгол” ШТС-ыг буулгана

Нийслэлийн мэргэжлийн хяналтын газраас буулгах шаардлагатай 26 барилга, байгууламжийг танилцуулсан байна. Тухайлбал,

Жагсаалтад багтсан 26 барилга дотор ШТС-ын дөрвөн барилга багтжээ. Эдгээр барилгын нэг нь СХД-ийн нэгдүгээр хороо, Орбит-Тахилтын уулзвар “Сод Монгол групп” ХХК, “Мэргэван” ХХК-ийн ШТС-ын барилга байгаа юм.

· Хар тамхины хэргээр баривчлагдсан Нигерийн иргэд цагдан хоригдсон хэвээр байгаа гэв

2020 оны 09 дүгээр сарын 25-ний өдөр www.livetv.mn, www.tv4 зэрэг олон нийтийн мэдээллийн хэрэгслээр “Нийслэлийн шүүхээс суллагдсан Нигерийн иргэд их хэмжээний хар тамхи тээвэрлэж яваад дахин баригджээ” гэх гарчигтай мэдээлэл гарсан нь огт үндэслэлгүй, ташаа мэдээлэл болохыг албан ёсоор мэдэгдэж байна. Нийслэлийн Эрүүгийн хэргийн давж заалдах шатны шүүх У.Ариунзул, Адекола Олавасен, Азеез, Анози Дарлингтон Дон нарт холбогдох эрүүгийн хэргийг 2020 оны гуравдугаар сарын 5-ны өдрийн шүүх хуралдаанаар хянан хэлэлцсэн. Улмаар Чингэлтэй дүүргийн Эрүүгийн хэргийн анхан шатны шүүхийн 2019 оны арван хоёрдугаар сарын 12-ны өдрийн 955 дугаар шийтгэх тогтоолыг хүчингүй болгож, хэрэгт нэмэлт мөрдөн шалгах ажиллагаа хийлгэхээр тухайн шүүхээр дамжуулан Нийслэлийн Прокурорын газарт буцаасан болно.

Иймд олон нийтийн мэдээллийн хэрэгслээр иргэд, олон нийтэд худал мэдээлэл түгээж, Нийслэлийн Эрүүгийн хэргийн давж заалдах шатны шүүхийн нэр хүндэд халдсан хэвлэл, мэдээллийн байгууллагууд ташаа мэдээллээ нэн даруй залруулахыг шаардаж байна. Хэрэв шаардлагыг хүлээн авч залруулга хийгээгүй тохиолдолд холбогдох хуулийн дагуу шийдвэрлүүлэхээ мэдэгдэж байна.

· УИХ-ын 2020 оны намрын чуулган эхэллээ

Улсын Их Хурлын 2020 оны намрын ээлжит чуулган 10-р сарын 1-ны өдөр эхэллээ. Чуулганы нээлтэд Монгол улсын Ерөнхийлөгч, Засгийн газрын гишүүд, Үндсэн хуулийн цэцийн дарга, зарим гишүүд болоод Улсын Их Хурлаас удирдлагыг нь томилдог болон ажлаа тайлагнадаг төрийн байгууллагуудын дарга нар, Монгол Улсад суугаа гадаад орнуудын Дипломат төлөөлөгчдийн газрын тэргүүн, олон улсын байгууллагын төлөөллүүд оролцсон.

Улсын Их Хурлын 2020 оны намрын ээлжит чуулганыг нээж Улсын Их Хурлын дарга Г.Занданшатар үг хэллээ. Улсын Их Хурлын 8 дахь удаагийн сонгуулийн үр дүнд байгуулагдсан Улсын Их Хурал анхны ээлжит чуулганаа эхлүүлж байгааг тэрбээр дурдаад “Үндсэн хуулийн нэмэлт өөрчлөлтийн дагуу Анхдугаар чуулган өнгөрсөн 30 жилд байгаагүй богино хугацаанд Засгийн газраа байгуулж ажилдаа шуурхай орсон. Ингээд ээлжит бус чуулганаараа Монгол Улсын Засгийн газрын 2020-2024 оны үйл ажиллагааны хөтөлбөр, Монгол Улсыг хөгжүүлэх 5 жилийн Үндсэн чиглэлийг баталсан. Эдгээр баримт бичигт багтсан зорилтууд нь улс орны нийгэм, эдийн засгийг сэргэн мандлын шинэ замд гаргах, ард түмнийхээ амьдралын нөхцөл, орлогыг дэлхийн тэргүүлэх жишигт хүргэхэд чиглэгдсэн. Ийм эрс өөрчлөлт шинэчлэлт хийж, иргэнээ дээдэлсэн төр, хөгжлийг тэтгэсэн эдийн засаг, хууль засагласан нийгмийг тохинуулах үйл хэрэгт Засгийн газар, шинэ парламентын гишүүд ханцуй шамлан орж ажлын хэсэг, бүлгэмүүд байгуулан ажиллаж байна” гэлээ.

BOLOD.MN ТОЙМ: Аз жаргалтай Улаанбаатарын "ТЭГ" зогсолттой, сонгуулийн нээлт эхэлсэн ДОЛОО ХОНОГ
Tweet
Bolod.mn