2021-01-09BOLOD.MN сайт өмнөх долоо хоногт болж өрнөсөн ОНЦЛОХ үйл явдлыг ТОЙМЛОН хүргэдэг билээ. Эдгээр өдрүүдэд дэлхийн нийтийг хамарсан цар тахалтай 2020 оныг үдэн шинэ оноо хөл хорион дунд угтан авлаа. Монгол Улсын хэмжээнд коронавирусийн халдварын тоо 1300 давсан ба шинээр хоёр халдварын голомт илэрч Улаанбаатар хотын иргэдээс авах тандалтын шинжилгээ илүү эрчимтэй үргэлжилсээр байна. Түүнчлэн ЗГ-аас нэгдүгээр сарын 6-нд дуусгавар болох ёстой байсан хөл хорионы дэглэмийг ирэх даваа гараг хүртэл дахин 4 хоног сунгасан.
- ЗГ: Хөл хориог нэгдүгээр сарын 11 хүртэл дахин дөрөв хоног сунгалаа
Засгийн газар нэгдүгээр сарын 4-ны өдөр хуралдан хэд хэдэн шийдвэрийг гаргасан. Хуралдаанаар Улаанбаатар хотын хэмжээнд бүх нийтийн бэлэн байдлын зэргийг нэгдүгээр сарын сарын 6-наас дөрөв хоног сунгаж, нэгдүгээр сарын 11 хүртэл сунгалаа. Цар тахал хатуу хөл хорио тавьж, сунгахаас аргагүй байдалд оруулж байна. Иргэдийнхээ амь амьжиргааг залгуулахын тулд хатуу хөл хориог урт хугацаагаар тогтоох боломжгүй байгаа бөгөөд иймд энэхүү шийдвэрийг гаргалаа хэмээн Шадар сайд Я.Содбаатар хэлсэн юм.
Түүнчлэн Засгийн газар болон УОК-ын зүгээс иргэд олон нийтээс судалгаа авахад 70 хувь хөл хориог сулруулах саналтай байсан бол үлдсэн 30 хувь нь хатуу хөл хорионы дэглэм мөрдүүлэх хэрэгтэй хэмээн үзжээ. Түүнчлэн голлох 10 яамнаас санал авахад хөл хорионы дэглэмийг 3-10 хоногоор сунгах санал гаргасан байна.
Засгийн газрын хуралдаанаар энэ бүхнийг тал, талаас нь хэлэлцэж үзсэний эцэст арваннэгдүгээр сарын 11-ээс худалдаа үйлчилгээний салбарыг нээн, өндөржүүлсэн бэлэн байдлын зэрэгт шүилжиж ажиллахаар боллоо.
Хэрэв эдгээр өдрүүдэд халдварын шинэ голомт дахин үүсч, дэлгэрвэл илүү хатуу арга хэмжээ аван ажиллах болно. Бүх нийтийн хатуу хөл хориогоо дахин сунгахыг ч үгүйсгэхгүй гэдгийг онцолсон юм.
Хөл хориог сулруулсны дараа нөхцөл байдал хүндрэх, шинэ голомт үүсэх, эрүүл мэндийн салбарт хүндрэл үүсэхийг үгүйсгэх аргагүй. Энэ тохиолдолд хатуу хөл хорионы дэглэмд шилжиж орно гэдгийг ч УОК-оос анхааруулсан билээ.
- Цагаан сарын баярыг тэмдэглэхгүй байх шийдвэрийг Засгийн газраас гаргалаа
Засгийн газрын ээлжит бус хуралдаанаар Сар шинийн баярыг тэмдэглэхгүй байхаар шийдвэрлэлээ. Учир нь коронавирусийн халдварын тархалт өндөр байгаа тул ийнхүү нийтээрээ Сар шинийн баярыг тэмдэглэхгүй байхаар шийдвэрлэсэн байна. Түүнчлэн халдварын тоо өдөр ирэх тусам нэмэгдэж байгаа бөгөөд хэрэв коронавирусийн халдвар иргэдийн дунд алаг цоог хэлбэрээр илэрвэл хөл хорионы дэглэмийг чангатгах хүртэл арга хэмжээ авч болзошгүйг Засгийн газар болон УОК-аас сануулсан юм.
Сануулахад, "ХОТОЛ ТӨГС” хэмээх "ТӨМӨР ХУЛГАНА" жилийн өвлийн адаг сарын битүүн 2021 оны хоёрдугаар сарын 11-ний Пүрэв гарагт болно. 17-р жарны 35 он буюу Зургаан цагаан мэнгэтэй Цагаагчин үхэр жилийн Цагаан сарын ШИНИЙН НЭГЭН 2021 оны хоёрдугаар сарын 12-ны Баасан гарагт тохиож байгаа аж.
- PVR шинжилгээний сорьж авах багц хилээр орж ирэхдээ хөлдсөн байжээ
БНХАУ-аас Замын-Үүд боомтоор энэ сарын 03-ны өдөр “А” компанийн импортолсон “Коронавируст халдварын сорьц авах, PCR шинжилгээний багц” 243 мянган ширхэг бүтээгдэхүүнийг хилээр нэвтрүүлэх үед хилийн мэргэжлийн хяналтын албанаас хяналт шалгалт хийжээ. Улмаар энэхүү бүтээгдэхүүнийг импортлохдоо зориулалтын бус тээврийн хэрэгслээр тээвэрлэсэн, бүтээгдэхүүн хөлдсөн зөрчлийг илрүүлсэн байна.
Иймд мэргэжлийн хяналтын байгууллагаас бүтээгдэхүүнийг түр саатуулан Зөрчлийн тухай хуулийн дагуу шалгаж байгаа аж.
- Ерөнхийлөгч Х.Баттулга өрх бүрт нэг сая төгрөгийн дэмжлэг үзүүлэх УИХ-ын тогтоолын төсөл өргөн барилаа
Коронавируст цар тахлаас урьдчилан сэргийлэх, тэмцэхтэй холбогдуулан иргэн, аж ахуйн нэгжийн үйл ажиллагааг 9 сарын турш хязгаарласан, нийт 38 хоног бүрэн зогсоосон зэргээс үүдэн айл өрхүүдийн амьжиргаагаа залгуулдаг орлого нь тасалдах, огт орлогогүй болох, үндэсний үйлдвэр, аж ахуйн нэгжүүд дампуурах эрсдэл үүсэж, улс орны эдийн засаг туйлдан, сэргээн босгоход туйлын хүнд нөхцөл байдал үүсээд байна.
Иймд Монгол Улсын Ерөнхийлөгч Халтмаагийн Баттулга “өрх бүрд нэг сая төгрөг”-ийн тэтгэлэг олгох бодлого, арга хэмжээг хэрэгжүүлэх “Коронавируст халдварын цар тахлаас үүдэлтэй амьдралын доройтол, нийгэм, эдийн засгийн бэрхшээлийг даван туулах онцгой арга хэмжээний тухай” УИХ-ын тогтоолын төслийг боловсруулж, өнгөрсөн баасан гарагт УИХ-ын дарга Г.Занданшатарт өргөн барьсан юм.
Монгол Улсын Ерөнхийлөгчийн өргөн барьсан тогтоолын төсөлд өрх бүрд нэг сая төгрөгийг, үүнээс 200 мянган төгрөгийг бэлнээр, 800 мянган төгрөгийг зөвхөн үндэсний үйлдвэрлэгчээс архи, согтууруулах ундаа, тамхины төрлөөс бусад бараа, бүтээгдэхүүн худалдан авах тусгай болзол бүхий эрхийн бичиг хэлбэрээр олгож, санхүүжилтийг оффшор бүсээс татагдан орж ирсэн хөрөнгийн эх үүсвэрээр шийдвэрлэх зохицуулалтыг тусгажээ. Ингэхдээ оффшор бүсээс орж ирсэн мөнгөн хөрөнгийг Монголбанканд төрийн сангийн тусгай данс нээн байршуулахаар заасан байна.
Цар тахлын аюул гамшгийг даван туулахын тулд ард иргэддээ мөнгөн тусламж үзүүлэх, худалдан авалтаар нь дамжуулан үйлдвэр, аж ахуйгаа санхүүжүүлэх зэрэг нэн оновчтой, тодорхой арга хэмжээг шуурхай авч хэрэгжүүлж буй дэлхийн улс орнуудаас манай улс туршлага судалж, цаг алдалгүй авч, хэрэгжүүлэх шаардлагатай гэж Монгол Улсын Ерөнхийлөгч үзэж байна.
- Ховд аймагт согтууруулах ундаа худалдаалахыг 4-р сар хүртэл хориглолоо
Ховд аймгийн Засаг даргын шийдвэрээр хатуулаг ихтэй согтууруулах ундаа худалдаалах түүгээр үйлчлэхийг хориглосон шийдвэрийг 3-р сарын 31-ний өдрийг хүртэл сунгалаа.
Аймгийн хэмжээнд үйл ажиллагаа явуулж буй аж ахуй нэгж, үйлчилгээний төв, дэлгүүр, баар, караоке, ресторан, кафе, зоогийн газруудыг хатуулаг ихтэй согтууруулах ундаа худалдаалах түүгээр үйлчлэхийг хориглосон ба хатуулаг багатай согтууруулах ундаа худалдахад хуваарь тогтоохоор болжээ.
- Дархан Уул аймаг нэгдүгээр сарын 7-ний өдрөөс эхлэн ресторан, биллиард, фитнессийн үйлчилгээг нээлээ
Дархан-Уул аймгийн хэмжээнд сүүлийн тохиолдол илэрснээс хойш 33 дахь өдөртөө халдвар нэмж бүртгэгдээгүй.
Хяналтын шатны PCR шинжилгээнд 12000 иргэнийг хамруулж хариу "СӨРӨГ" гарсан учраас Дархан-Уул аймаг "Ногоон Бүс" болж албан ёсоор зарлагдах боломж бүрдсэн байна. Энэ талаар тус аймгийн Засаг дарга Б.Азжаргал өөрийн цахим хуудсандаа "Аймгийн хэмжээнд өвчлөлийг хязгаарлаж тогтоон барьсны үр дүнд аймгийн ОК-оос дараах шийдвэрүүдийг гаргаж байна.Үүнд: 1.7 ны Пүрэв гаригаас эхлэн дараах чиглэлийн үйл ажиллагаанууд тусгай горимын дагуу хэвийн үйл ажиллагаагаа эрхлэн явуулна.
Үүнд;
-ОУ-ын байгууллагууд
-Худалдаа үйлчилгээний байгууллага, зах,
ХТ-үүд лангуу алгасахгүй хэвийн ажиллана.
-Зочид буудлууд,
-Спорт зал танхимууд, /ЕБС спорт зал/
-Фитнесс, иог, spiniing
-Теннис, билльяард төвүүд,
-Бүх төрлийн хүргэлтийн үйлчилгээнүүд
-Нийтийн хоолны үйлчилгээ, /гуанз, ресторан/
-Нэг цэгийн үйлчилгээ
-Саун бассейн
-Нийтийн халуун ус
-Гоо сайхан
-Мэргэжлийн түр сургалтууд
-Сүлжээний бизнес
-Сул агууламжтай /18° хүртэлх/ бүтээгдэхүүн худалдаалах зэрэг үйлчилгээний байгууллагуудыг нээсэн. Харин эдгээр бүх үйлчилгээний байгууллагууд 18 хүртэлх насны хүүхдэд үйлчлэхгүй. Өнгөрсөн цар тахалын хүнд үед биднийг удирдан чиглүүлж, дэмжин тусласан Я.Содбаатар даргатай УОК, ЕС-ын ахлах зөвлөх Ж.Энхбаяр, УИХ гишүүн Б.Жавхлан, Г.Дамдинням, Б.Баттөмөр болон ЭМЯ, ХӨСҮТ, НЭМҮТ болон нийт эмч, сувилагч, Цагдаа, Онцгой, МХГ, нийт төрийн албан хаагчиддаа чин сэтгэлээсээ талархаснаа илэрхийлье" хэмээн бичжээ.
- Япон улс гурван муж нутгуудад онц байдал зарлалаа
Японы Ерөнхий сайд энэ сарын 7-ны өдөр нийслэл Токио болон ойролцоох гурван муж болох Канагава, Чиба, Сайтамад онц байдал зарлах шийдвэр гаргаснаа танилцууллаа. Тус улсад цар тахлын дэгдэлт сүүлийн өдрүүдэд эрчимжих болсон тул ийм шийдвэрт хүрсэн бөгөөд онц байдлын зэрэг хоёрдугаар сарын 7-ны өдөр хүртэл үргэлжлэх аж.
Токио хотод сүүлийн 24 цагийн хугацаанд covid-19-ийн 2447 шинэ тохиолдол бүртгэгдсэн нь өмнөх өдрийнхөөс даруй 800-гаар нэмэгдсэн үзүүлэлт болсон юм. Тус улсад цар тахал эхэлснээс хойш нийт 252 мянган хүн covid-19 авч, 3700 орчим хүн нас баржээ.
Энэ хугацаанд ард иргэдийг шаардлагагүй тохиолдолд гэрээсээ гарахгүй байхыг уриалж байгаа ба ресторан, шөнийн цэнгээний газрууд 19.00 цагаас хойш архи согтууруулах ундаагаар үйлчлэхгүй байх, 20.00 цагаас хаалгаа барих, албан байгууллагууд ажилчдынхаа 70 хүртэл хувийг гэрээс нь ажиллуулах, спорт заалууд, их дэлгүүрүүд ажиллах цагаа богиносгох зэрэг арга хэмжээ авахаар болсон байна. Түүнчлэн олон нийтийг хамарсан арга хэмжээг 5000-аас ихгүй хүнтэйгээр зохион байгуулахыг зөвшөөрч байгаа аж.
Эрх баригчдын шийдвэрийг дагаж, ажиллах цагаа богиносгосон бизнес эрхлэгчдэд өдөрт 40-60 мянган иений дэмжлэг үзүүлэхээр болжээ.
Япон улс нь өнгөрсөн хавар мөн онц байдал зарласан бөгөөд тухайн үед бүх сургуулийг хааж, олон нийтийн үйл ажиллагааг хориглож байв. Харин энэ удаагийн онц байдал харьцангуй уян хатан байгаа бөгөөд элсэлтийн шалгалт энэ сарын сүүлээр төлөвлөгдсөн бөгөөд энэ хугацаандаа зохион байгуулагдах юм байна.
- Баянгол дүүргийн 5,6-р хороонд хэсэгчлэн хөл хорио тогтоолоо
Баянгол дүүргийн 5, 6 дугаар хорооны нутаг дэвсгэрт "Ачтан" эмнэлэг болон хэд хэдэн байршилд COVID-19 халдвар голомтлон гарсан тул өнөөдөр 03.00 цагаас нэгдүгээр сарын 11-ний 06.00 цаг хүртэл хэсэгчлэн хөдөлгөөний хязгаарлалт тогтоожээ.
Энэ талаар ЭМЯ-ны өнөөдрийн ээлжит хэвлэлийн хурлын үеэр НЭМГ-ын дарга Л.Төмөрбаатар мэдээлсэн юм. Тэрбээр," ХӨСҮТ-ийн зөвлөмжийн дагуу хэсэгчилсэн хөдөлгөөн хязгаарлалт тогтоосон. Энэ хугацаанд COVID-19 халдварыг тандах, илрүүлэх ажлыг тухайн байршилд зохион байгуулна. Энэ хүрээнд ЭМЯ болон нийслэлийн эрүүл мэндийн байгууллагын 50 гаруй явуулын багийн 300 орчим эмч, ажилтан иргэдээс шинжилгээ авна. Мөн цагдаа, онцгой байдал, мэргэжлийн хяналт, тагнуулын байгууллагын нийт 300 гаруй алба хаагч үүрэг гүйцэтгэж байна" хэмээв.
Энэ хугацаанд дээрх байршилд иргэдийн хөдөлгөөнийг хязгаарлаж байгаа ч эмнэлгийн зайлшгүй шаардлагатай бол орж гарах хөдөлгөөнд оролцуулна. Мөн хүнсний дэлгүүр, эмийн сангууд хэвийн ажиллана гэдгийг тодотголоо.
Хөдөлгөөн хязгаарласан хугацаанд тандан судлах ажлыг эрчимжүүлэх зорилгоор Баянгол дүүргийн шинжилгээ авах цэгийн тоог нэмсэн байна. Харин бусад дүүрэгт шинжилгээний цэгийг тус бүр нэг болгож цөөлжээ. Иймд тус дүүрэгт оршин суудаг иргэдийг шинжилгээнд идэвхтэй хамрагдахыг уриаллаа.
- Харааны бэрхшээлтэй хүүхэд төрүүлснээсээ болж хямарч, цонхоороо үсэрч амиа алджээ
Энэ сарын 3-ны өдөр Хан-Уул дүүрэгт орон сууцны дөрвөн давхраас хүн унаж нас барсан харамсалтай хэрэг гарчээ. Тодруулбал, тус байрны оршин суугчид дуудлага өгснөөр цагдаагийн албан хаагчид хэргийн газар очиж ажилласан байна.
Улмаар хэргийн газар үзлэг явуулахад 35 настай эмэгтэй А нь дөрвөн давхрын цонхоороо унаж амиа алдсан байжээ. Хэргийг тус дүүргийн цагдаагийн хэлтэст шалгаж байгаа аж.
Эх сурвалжийн мэдээлж буйгаар талийгаач эмэгтэй гурван сарын өмнө амаржсан байна. Ингэхдээ харааны бэрхшээлтэй хүүхэд төрүүлсэн бөгөөд үүнээсээ болж сэтгэл санаагаар унаж, унтаж амарч чадахгүй өдөр бүр нойрны эм уудаг байжээ. Улмаар сэтгэл санааны хямралд орж ийнхүү өндрөөс унаж амиа алдсан байна.
- Хулгайн замаар Өмнөговь руу 300 мянган төгрөгөөр явуулдаг этгээдүүдийг олж илрүүлжээ
Хэсэгчилсэн болон бүх нийтийн хөл хорионы үед Өмнөговь аймгийн Цагаан хад хилийн боомт орчимд ажиллаж, амьдардаг иргэдийн ашигладаг фейсбүүк групп дээр “Улаанбаатар-Өмнөговь-Цогтцэций маршрутаар 1 хүнийг 250,000-300,000 төгрөгийн хооронд авч явна” гэх утгатай зарыг маш ихээр оруулж Коронавирусын шинжилгээ өгөөгүй иргэдийг зөвшөөрөгдөөгүй, хулгайн гэх тодотголтой замаар авч явж байгаа талаарх мэдээлэл цагдаагийн байгууллагад иржээ. Улмаар холбогдох байгууллагаас шалгалтын ажиллагаа явуулахад Өмнөговь аймгийн иргэдийн нэгдсэн цахим хуудсуудад энэ төрлийн зар буюу энэ чиглэлд нэг зорчигчийг 200-300 мянган төгрөг, ачаа тээшийг овор хэмжээнээс хамаарч 50.000-100.000 төгрөгөөр тооцон авч зөвшөөрөлгүй буюу хулгайн зам гэх тодотголтой автозамаар явдаг болох нь шалгалтаар тогтоогджээ.
Одоогийн байдлаар дээрх зөвшөөрөгдөөгүй автозамаар хүн тээвэр хийсэн 17 тээврийн хэрэгсэл, 18 жолооч, 31 зорчигч гээд нийт 49 иргэнийг илрүүлэн харъяа дүүрэг, орон нутгийн цагдаагийн газарт зөрчлийн хэрэг нээн материалжуулан шалгаж байна.
Цагдаагийн байгууллагаас 2020 оны 12 дугаар 28-ны өдрөөс “Хулгайн зам” нэртэй хэсэгчилсэн арга хэмжээг зохион байгуулан Улаанбаатар хотоос Өмнөговь аймгийн Даланзадгад, Цогтцэций, Ханбогд сумын Цагаанхад, Гурвантэс сумын Шивээ хүрэн хилийн боомт хүртэлх хулгайн тээвэр явдаг зам маршрутыг тогтоон, дээрх газруудад гэнэтийн хяналт шалгалтыг Өмнөговь аймгийн Онцгой байдлын газар, Авто тээврийн төвтэй хамтран зохион байгуулан ажиллаж байгаа хэмээн УОК-оос мэдээллээ.
.jpg "Томруулж харах")
