2021-01-16Bolod.mn сайт өнгөрсөн долоо хоногт болж өрнөсөн ОНЦЛОХ үйл явдлыг тоймлон хүргэж байна. Эдгээр өдрүүдэд Хөвсгөл аймгийн Ханх суманд болсон газар хөдлөлт Улаанбаатар хотод чичирхийлж мэдрэгдсэн нь олон нийтийн анхаарлыг хамгийн ихэд татсан юм. Энэ хэмжээний хүчтэй газар хөдлөлт 30 жилийн өмнө буюу 1991 оны 12-р сард бүртгэгдэж байсан хэмээн холбогдох албаныхан мэдээлсэн. Түүнчлэн Covid-19 халдвар гарсан орон нутгуудын нэг болох Дорноговь аймагт сүүлийн 30 хоног халдварын шинэ тохиолдол бүртгэгдээгүй тул эрүүл бүс буюу “Ногоон бүс” болсон сайхан мэдээг дуулгахад таатай байна.
- Улаанбаатар хот өндөржүүлсэн бэлэн байдалд шилжлээ
Улаанбаатар хот энэ сарын 11-ээс буюу өнгөрсөн даваа гарагаас эхлэн бүх нийтийн бэлэн байдлын зэргийг өндөржүүлсэн бэлэн байдлын зэрэгт шилжүүллээ. Ингэснээр 12 мянга гаруй аж ахуйн нэгж, байгууллага, 133 мянга гаруй ажилтан, албан хаагч ажлаа явуулах боломж бүрдэх юм. Гэхдээ ресторан, кафе, хайпермаркет, супермакет, минимаркет, хүнсний дэлгүүр болон зоогийн газар, сүлжээ хоолны газар, кофе шоп, хүнсний болон ахуйн барааны дэлгүүрүүд 07.00-оос 22.00 цагын хувиарын дагуу ажиллана. Мөн тээврийн хэрэгсэл дугаарын хязгаарлалтын дагуу хэвийн горимд шилжиж байгаа юм.
Өндөржүүлсэн бэлэн байдлын зэрэгт шилжсэнээр дараах чиглэлийн салбаруудын үйл ажиллагаа хэвийн явагдах юм.
Үүнд,
1.Хүнсний худалдааны төв дэх ахуйн хэрэглээний барааны тасаг
2.Барилгын материалын худалдаа, модны зах
3.Авто техникийн зах
4.Ресторан, кафе, цайны газар
5.Түргэн үйлчилгээтэй болон хүргэлтийн хоол, кофе шоп
6.Хувцас захиалга засвар үйлчилгээ
7.Гэр ахуйн тавилга, засвар үйлчилгээ
8.Ахуйн электроник, цахилгаан хэрэгслийн засвар
9.Алт мөнгө үнэт эдлэлийн захиалга засвар
10.Цүнх захиалга
11.Нүдний шил захиалга, засвар
12.Цоож түлхүүр, цаг засвар
13.Хими цэвэрлэгээ, угаалга
14.Гэрэл зураг
15.Айл нүүлгэх үйлчилгээ
16.Эд бараа түрээслэх үйлчилгээ
17.Нийтийн бие засах газар
18.Барьцаалан зээлдүүлэх үйлчилгээ
19.Авто засвар, дугуй засвар
- Эрчим хүчний хэрэглээний 98 хувийг дотоодоос хангаж эхэллээ
Монгол Улс, ОХУ-ын Засгийн газар хоорондын хэлэлцээрийн дагуу 93 сая ам.доллараар “ДЦС-IV” төрийн өмчит хувьцаат компанийн дөрвөн турбингенераторыг өргөтгөж Төвийн бүсийн эрчим хүчинд холболоо. Ингэснээр манай улс ОХУ-аас авдаг эрчим хүчний импортыг хоёр дахин бууруулж, хэрэглээнийхээ 98 хувийг дотоодоос хангах боломж бүрдэж байна.
Засгийн газрын тогтоолоор айл өрх, аж ахуй нэгжийн цахилгаан, дулааны төлбөрийг 2021 оны 7-р сарын 1-ныг хүртэл төр хариуцах болсон. Цахилгаан, дулааны хэрэглээний өсөлтийг найдвартай хангах, өвлийн оргил ачааллыг даван гарахад энэ өргөтгөл чухал хувь нэмэр оруулна хэмээн МУ-ын Ерөнхий сайд онцлон тэмдэглэж, гүйцэтгэгч компаниудад талархал илэрхийллээ.
- Дэлхийн банк Монгол Улсын нийт өрийг 3 дахин өссөнийг анхаарууллаа
Дэлхийн банкнаас Монгол Улсын эдийн засгийг 2020 онд 5.2 хувиар агшсан гэж таамагласан нь өнгөрсөн оны зургадугаар сард гаргасан таамгаас 4.7 нэгж хувиар доошлуулсан үзүүлэлт гарчээ. Энэ онд манай улсын эдийн засгийг 4.3 хувиар өснө гэж таамагласан нь өмнөх таамгаас 0.6 нэгж хувиар доошлуулсан дүн болов.
Covid-19 цар тахал Монгол Улсын эдийн засагт төлбөрийн тэнцлийн суваг, орлогын суваг, зээлийн сувгаар нөлөөлсөн гэх мэдээлэл бий.
Эдийн засгийн идэвхжил буурч, нийгмийн халамжийн зарцуулалт нэмэгдсэнээр бүс нутгийн Засгийн газруудын өрийн хэмжээ өсч буйг онцлон тэмдэглэсэн байна. Тухайлбал: Монгол, Малайз, Лаос зэрэг орнуудын Засгийн газрын өрийн дотоодын нийт бүтээгдэхүүнд эзлэх хэмжээ 60 хувь давжээ.
Дэлхийн банкнаас Монгол Улс, БНХАУ-д төр, хувийн хэвшлийг багтаасан нийт өрийн хэмжээ дотоодын нийт бүтээгдэхүүнээс гурав дахин өндөр болсныг анхааруулсан байна.
- Төсөвт 558 тэрбум төгрөгийг төвлөрүүлэхээр шийдвэрлэжээ
Прокурорын газраас төр, нийтийн эрх ашгийг хамгаалах нийт 504 иргэний хэрэгт оролцож, 558.7 тэрбум төгрөгийг төсөвд төвлөрүүлэхээр шийдвэрлэжээ. Цагаатгалын нөхөх олговор, түүнтэй холбоотой садан төрлийн холбоо тогтоолгох нэхэмжлэлтэй 932 иргэний хэрэгт төрийг төлөөлөн оролцжээ.
Мөрдөн шалгах ажиллагааны улмаас учирсан 40.2 тэрбум төгрөгийн хохирлыг нөхөн төлүүлэх нэхэмжлэлтэй 19 хэрэгт прокурор оролцож, шүүх 1.6 тэрбум төгрөгийг тус тус Засгийн газрын нөөц сангаас гаргуулж шийдвэрлэсэн байна.
Эрүүгийн хэргийн улмаас төр, нийтийн ашиг сонирхолд учирсан хохирлыг гаргуулах 21 хэрэгт 12 сая төгрөгийг, төр, нийтийн ашиг сонирхолд учирсан хохирлыг гаргуулах 60 хэрэгт 376.3 тэрбум төгрөгийн, бусад төрлийн иргэний 423 хэрэгт 182.4 тэрбум төгрөгийг, нийт 504 хэрэгт прокурор оролцож, 558.7 тэрбум төгрөгийг төсөвт төвлөрүүлэхээр шийдвэрлүүлсэн байна.
- Хөвсгөл аймгийн Ханх суманд 6.6 магнитиудын хүчтэй газар хөдлөлт болж, Улаанбаатар хот болон бусад аймгуудад чичирхийлэлт мэдрэгджээ
Олон улсын Газар хөдлөлтийн судалгааны байгууллагын мэдээлснээр энэ сарын 12-ны өдөр ОХУ-Монгол улсын хилийн орчим Хөвсгөл аймагт орон нутгийн цагаар 05:33 минутанд 6.6 магнитиудын хүчтэй газар хөдлөлт бүртгэгдлээ.
Газар хөдлөлтийн чичирхийлэл Улаанбаатар хотоос гадна Булган, Орхон, Дархан, Завхан аймагт мэдрэгдсэн байна. Улаанбаатарын цагаар 05:33 цагт Хөвсгөл аймагт газар хөдөлж, гэрлийн бүрхүүл хөдөлж, зарим орон сууцнууд савлажээ.
Энэ талаар Хөвсгөл аймгийн Засаг даргаас тодруулахад “Ханх суманд 30 орчим удаагийн чичирхийлэл нэг цагийн турш мэдрэгдсэн. Хүний амь нас эрсдээгүй, байшин барилгын шавар нурж, цуурсан. Мөн айлуудын хаалга цуурч, аяга таваг, цонх хагарсан” гэсэн мэдээллийг өгсөн юм.
Харин газар хөдлөлт болсон өдрөөс 3 хоногийн дараа буюу нэгдүгээр сарын 14-нд тус аймагт дахин газар хөдөлсөн байна. 14-ны үүрийн 04:57 цагт 3.9 магнитудын хүчтэй газар хөдлөлт болсон хэмээн ОБЕГ-аас мэдээлсэн.
Хоёр дахь газар хөдлөлт Ханх сумын Ходон багийн “Нуурт” хэмээх газар буюу нэгдүгээр сарын 13-ны 10:33 цагт 4.3 магнитудын хүчтэй газар хөдлөлт болсон тухай мэдээллийг Одон орон геофизикийн хүрээлэнгээс цахим шуудан хүлээн авсан байна.
- Өөрийн ажилдаг компаниа найзуудтайгаа нийлэн бүлэглэн дээрэмджээ
"Космо" трейд компанид энэ сарын 10-11-нд шилжих шөнө дээрмийн хэрэг гарсан талаар олон нийтэд мэдээлсэн. Хэргийг тодруулбал, Комсо трейд ХХК-д үл таних 3 залуу орж ирэн хоёр харуулынх нь нэгийг нь зодож, нөгөөг нь хүлэн компанийн 2 орчим сая орчим төгрөгийг дээрэмдэн зугтсан гэх гэмт хэрэг гарсан байдаг.
Хэрэгтнүүдийн компанийн хашааг даван орж, харуулуудыг зодож, хөл гарыг нь хүлж байгаад дээрэм үйлдсэн нь камерын бичлэгээр тогтоогдсон байдаг. Нийслэлийн цагдаагийн газрын Мөрдөн шалгах газрын хүнд гэмт хэрэгтэй тэмцэх хэлтэс, ХУД-ийн цагдаагийн нэгдүгээр хэлтсийн эрүүгийн тасгийн албан хаагчид хамтран гэмт хэргийн мөрөөр ажиллан, гэмт хэрэгтнүүдийг олж тогтоосон байна.
Мөрдөн байцаалтын явцад тус компанид ачигчаар ажиллаж байсан ажилтан өөрийн найзууддаа байгууллагынхаа талаар мэдээлэл өгч, компаниа дээрэмдсэн аж. Тэрээр дээрмийн ажиллагаанд оролцоогүй ч шаардлагатай мэдээлэл өгч, дээрмийг зохион байгуулсанаа хүлээсэн байна.
Харин дээрмийг үйлдсэн 3 этгээдийн хоёрыг нь олсон бөгөөд нэгийг нь олоогүй, эрэн хайх ажиллагаа үргэлжлэн явж байна. Эх сурвалжийн мэдээлж байгаагаар харуулууд нь 55-60 орчим насных бол дээрэм үйлдсэн этгээдүүд 20-30 орчим насны 170-175 см өндөртэй залуус байсан хэмээжээ.
- Дорноговь аймгийн Замын-Үүд сум эрүүл бүс боллоо
Дорноговь аймгийн Замын-Үүд сумыг коронавирусийн халдваргүй “Эрүүл бүс” болсныг Улсын онцгой комиссоос зарлалаа. УОК-ийн мэдэгдэлд “Дорноговь аймгийн Замын-Үүд суманд коронавируст халдварын сүүлийн тохиолдол бүртгэгдсэнээс хойш өнөөдрийн байдлаар 30 хоносон тул “Эрүүл бүс” болгон зарлаж тус сумаас зорчих иргэдийн асуумж, шаардлагатай тохиолдолд түргэвчилсэн оношлуураар шинжилгээ авч нийслэл болон бусад аймаг, орон нутагт нэвтрүүлнэ үү” хэмээжээ. Дорноговь аймгийн хэмжээнд нийт 32 тохиолдол бүртгэгдсэн бөгөөд үүний 27 нь Замын-Үүд сумаас илрээд байв.
- Цэргийн бүртгэл эхэлсэн бөгөөд биечлэн очих шаардлагагүй
Улаанбаатар хотын хэмжээнд 2021 оны цэргийн бүртгэл нэгдүгээр сарын 13-наас 27-ныг дуустал Засаг даргын ажлын байранд явагдана. Энэ хүрээнд “Ковид-19” цар тахал гарсантай холбогдуулан иргэдийг олноор цугларуулахгүй байх үүднээс цаасан суурьтай цэргийн бүртгэлийг явуулах тул иргэд оршин суугаа хороондоо очиж бүртгүүлэх шаардлагагүй, 2021 оны цэргийн бүртгэлийг автоматаар хийлгэсэнд тооцох аж.
Өнгөрсөн жилийн мэдээллийн санг ашиглан хороо дүүргүүд хоорондоо мэдээллээ дамжуулан цэргийн бүртгэлийг явуулах юм. Өнгөрсөн жил Нийслэлин хэмжээнд цэргийн насны нийт иргэдийн 95.3 хувийг бүртгэсэн. Эдгээр дээр 18 нас хүрч байгаа болон хаяг шилжсэн иргэдийн мэдээллийг нэмж утас болон цахимаар авах болно. Энэ нь тухайн иргэн хаяг дээр байна уу эсвэл шилжсэн үгүйг утсаар холбогдон тодруулчих юм. Өнгөрсөн жил бүртгүүлсэн, үндсэн хаяг дээрээ байгаа иргэд автоматаар бүртгэгдэх болно хэмээн НЗДТГ-ын цэргийн штабын тоо бүртгэлийн офицер, дэд хурандаа С.Баярмагнай хэллээ.
Түүнчлэн иргэний журамт үүрэгт, цэргийн насны бүх эрчүүд цэргийн алба хаана гэж тусгасан. Мөн цэргийн албаны тухай хуулийн 34-р зүйлд энэ тухай заасан байдаг. Нийслэлийн хороодод иргэдийг нэрийн жагсаалтыг илгээж, дүүрэгт нэгтгээд тоон үзүүлэлтийг гаргана. Энэхүү нь цэргийн насны хүмүүсийг дайчилгаа болон бусад онцгой байдалд шилжсэн үед хамгийн түрүүнд хэнийг нь дуудах вэ гэдгийг бүртгэлжүүлж буй юм. Мөн түүнчлэн чухал мэргэжилтэй болох тогооч эмч, орчуулагч, оёдолчин эмэгтэйчүүдийг мөн бүртгэдэг" гэлээ.
.jpeg "Томруулж харах")
.jpg "Томруулж харах")
