Өнгөрсөн долоо хоногт болж өрнөсөн онцлох үйл явдлыг Bolod.mn сайт тоймлон хүргэж байна. Эдгээр өдрүүдэд Засгийн газар болон УОК-ийн шийдвэр бүхий “Нэг өрх-Нэг шинжилгээ”-ний хүрээнд Нийслэл хотын өрх айлуудын 80 гаруй хувийг шинжилгээнд хамруулсан. Түүнчлэн ирэх долоо хоногт халдварын эсрэг вакциныг хүлээн авах бэлтгэл ажил хангагдаж, вакцины хамгийн анхны тунг МУ-ын Ерөнхий сайд тариулж нийт ард иргэдийг уриалах болно гэх мэдээлэл олон нийтийн дунд байв.

- Автомашины “азын” дугаар дуудлага худалдаанд 375 сая төгрөгт хүрч зарагдав

Автомашины азын дугаарыг дуудлага худалдаанд оруулж, олсон орлогыг сайн үйлсэд зарцуулах саналыг ШӨХТГ-аас холбогдох газруудад тавьснаар хэрэгжихээр болсон. Энэ дагуу дуудлага худалдаа 2021 оны 02 дугаар сарын 15-ны өдрөөс эхлэн 3 дугаар сарын 26-ны өдрийг хүртэл үргэлжлэх юм. Тодруулбал, 0001 УАР, 0011 УАР, 0041 УАР, 0071 УАР, 0101 УАР, 4141 УАР гэх мэт тээврийн хэрэгслийн улсын бүртгэлийн азын дугааруудыг хоёрдугаар сар 15-аас эхлэх нээлттэй цахим дуудлага худалдаанд оруулж байна.

Эхний өдрийн байдлаар цахим дуудлага худалдаагаар нийт 409 хүн оролцож, азын дугаарын үнэ 375 сая төгрөгт хүржээ. Дуудлага худалдааг 0 төгрөгөөс эхлүүлсэн бөгөөд иргэд 50, 100, 300, 500 мянга болон 1.000.000 төгрөг гэсэн сонголтоор дуудлага худалдаагаар үргэлжүүлсэн.

Харин тус дуудлага худалдаанд үеэр автомашины

0001 УАР дугаар -375 сая төгрөг
0101 УАР дугаар -64 сая төгрөг
0011 УАР дугаар 70 сая төгрөгт хүрч зарагдсан байна. Эдгээр азын дугаарын дуудлага худалдаанд 69-175 хүн оролцож,үнэ хаялцжээ.

- Эхний ээлжийн вакциныг энэ сарын 22-нд авчирна

Бүх нийтийн бэлэн байдлын зэрэг буюу хатуу хөл хорио тавигдахтай зэрэгцэн энэ сарын 23-наас иргэдээ вакцинжуулж эхлэхээр төлөвлөж байгааг Эрүүл мэндийн сайд С.Энхболд мэдээллээ. ДЭМБ-аас файзерын вакциныг яаралтай горимоор хэрэглэх зөвшөөрөл олгосон. Харин энэ долоо хоногт "Астра зеника" вакциныг бүх шатны туршилт, шинжилгээний хүрээнд зөвшөөрөл олгох юм байна. Монгол Улс 4 төрлийн вакцин оруулж ирэхээр гэрээ хэлэлцээр хийж, тээвэрлэлтээ төлөвлөсөн бөгөөд эхний ээлжинд астра зеника, файзерын вакцин оруулж ирэх аж. Файзерын вакциныг -70 хэмд хадгалдаг учир ХӨСҮТ-д байдаг үндэсний агуулах, хүйтэн хэлхээний тоног төхөөрөмжийг бэлджээ.

Түүнчлэн Монгол Улс 2020 оны 7 дугаар сараас "Ковакс" хөтөлбөрт хамрагдах хүсэлтээ тавин, хамрагдсан. Ковакс хөтөлбөрөөр хүн амын 20 хувийг вакцинжуулах бөгөөд үлдсэн 40 хувийг манай улс өөрсдийн санхүү төсөв, худалдан авалтын зарчмаар зохицуулна. Бүх зардал төсөв Сангийн яаманд батлагдаж шийдэгдсэн, нийт хүн амын 60 хувийг хамруулах ажээ. Дийлэнх вакцин 18-аас дээш насны хүнд хийх зөвлөмжтэй байгаа учир хоёр сая хүнийг вакцинжуулах юм байна. Одоогоор худалдан авалт, тээвэрлэлтийн асуудал шийдвэрлэгдэж байгаа хэмээн салбарын сайд онцоллоо.

БНЭУ-аас эхний ээлжийн 150 мянган тун вакцин авчрах “МИАТ” компанийн шууд нислэгийн зардалд шаардагдах хөрөнгийг Засгийн газрын нөөц сангаас гаргахаар болов.

Вакциныг тогтоосон хугацаанд авчрах, зориулалтын автомашинаар тээвэрлэн хадгалах байранд хүргэх, үе шаттай вакцинжуулж эхлэхийг салбарын сайд нарт даалгалаа. Мөн гудамж, талбай, тусгаарлах байр, хяналтын цэгүүдэд үүрэг гүйцэтгэж байгаа ажилтан, алба хаагчдад шаардагдах хөрөнгийг шийдвэрлэж, Улсын нөөцөөс нэг удаагийн хамгаалах хэрэгсэл, бээлий, амны хаалт, ариутгал, халдваргүйтгэлийн бодис зэргийг хэрэгцээт газруудад өгөхөөр болов.

Түүнчлэн Ерөнхий сайд Л.Оюун-Эрдэнэ ХӨСҮТ-ийн мэргэжилтнүүдтэй уулзалт хийх үеэрээ вакцины хамгийн анхны тунг тариулж нийт иргэдээ уриалах хэмээсэн юм.

- Зах худалдааны төвүүд хэвийн ажиллаж эхэллээ

Засгийн газрын тогтоолын дагуу Улаанбаатар хотын дарга захирамж гаргаж 2021 оны 2-р сарын 16-аас өдрөөс эхлэн хүнсний бөөний төвүүд болон хүнсний үйлдвэрлэл, түгээлтийн салбарын үйл ажиллагааг тусгай горимын дагуу, хуваариар шат дараатай нээлээ. Ингэхдээ тус салбарын нийт ажиллагсдын 15 хувийг ПСР шинжилгээнд хамруулснаар үйл ажиллагааг нь нээх юм.

Дүүрэг бүрд байгаа шинжилгээний цэгүүд тухайн иргэдийн гэрээс хол бол ажлын үнэмлэх, иргэний үнэмлэхээ үзүүлээд хувийн унаагаар шинжилгээний цэгт очиж өгч болно гэдгийг албаныхны зүгээс мэдээлсэн.

Үйл ажиллагаа нь нээгдсэн хүнсний захуудаар жижиглэнгийн хүнсний дэлгүүр, супермаркетын худалдаа эрхлэгчид үйлчлүүлж, бараа татан авалтаа хийнэ. Харин иргэд гэрийн ойролцоох дэлгүүр, хүнсний бөөний төвөөр үйлчлүүлэхдээ халдвар хамгааллын дэглэмээ дагаж мөрдөхийг уриаллаа.

- Гуравдугаар сарын 1-ээс танхимаар хичээллэхийг түр хойшлууллаа

Монгол Улсын Шадар сайд С.Амарсайхан өөрийн цахим хуудсаараа дамжуулан гуравдугаар сарын 1-ээс танхимын сургалтыг хойшлуулах болсон талаар мэдээлэв. Тэрээр “Цахимаар хичээллэх нь сургалтын чанарт сөргөөр нөлөөлж байгаа хэдий ч цар тахлын голомттой үед олон хүн нэг дор цуглах нь халдвар тархах эрсдэлийг хэд дахин нэмэгдүүлнэ.

Халдварын голомтыг бүрэн хумьж, иргэдээ вакцинжуулалтад хамруулахын тулд төр, засгийн зүгээс хатуу хөл хорио тогтоож, айл өрх бүрээс шинжилгээ авч байна. Энэ бүх бодлого шийдвэрийн үр дүнд дотооддоо цар тахлын халдварыг бууруулж, аюул эрсдэлгүй болсон цагт хичээл сургуулийг танхимаар оруулахаар ажиллаж байгаа учир 3-р сарын 1 нээс танхимаар хичээллэхийг түр хойшлуулсан.

Сайхан цагийг хамтдаа авчирч хүүхэд шуугьсан их өргөөний хаалгыг нээцгээе” хэмээн бичжээ.

Түүнчлэн сургуулийн насны хүүхэдтэй эцэг эхчүүдээс судалгаа авахад 60 хувь танхимаар хичээллэхийг зөвшөөрсөн бол 40 хувь нь зөвшөөрөөгүй ажээ.

- Сард 10-14 удаагын тусгай үүргийн нислэг үйлдэхээр боллоо

Улсын онцгой комиссын өргөтгөсөн хурал 2021 оны 02 дугаар сарын 16-ны өдөр боллоо. Хурлаар “Нэг хаалга-Нэг шинжилгээ”-ний явц, тулгамдаж байгаа асуудал, замын хөдөлгөөний нөхцөл байдал, эмнэлгийн хог хаягдал, суурин болон явуулын шинжилгээний цэгүүдэд тавьж байгаа хяналт зэргийн талаар хэлэлцэв. Эх орондоо ирэх хүсэлтэй иргэдийг ирэх гурав, дөрөвдүгээр сард багтаан татах, ингэхдээ сард 10-14 удаа тусгай үүргийн нислэг үйлдэх бэлтгэлээ хангахыг Монгол Улсын Шадар сайд, Улсын онцгой комиссын дарга С.Амарсайхан холбогдох албан тушаалтнуудад үүрэг болголоо. Мөн нислэгийн тасалбарын үнийг хөнгөлөх зохицуулалт хийх, тусгаарлах байрны нөхцөл, үйлчилгээг харгалзан гурван ангилалд хувааж, иргэд өөрсдөө байраа сонгодог байх боломж бүрдүүлнэ.

Цаашид тусгаарлалтын хоногийг багасгаж, гэрт нь тусгаарлаж цахимаар хянах тогтолцоонд шилжих нь зүйтэй гэж үзлээ. Хүнсний зах, бөөний төвүүдийг шат дараатай нээж байгаа учир зохиомол үнийн хөөрөгдөл үүсэхээс сэргийлэхийг Шударга өрсөлдөөн, хэрэглэгчийн төлөө газарт даалгав. Хаваржилт хүндэрч байгаа аймгууд болон отроор яваа малчдад өвс, тэжээлийн тусламж, төрийн үйлчилгээг тухай бүр нь хүргэж байхыг аймгуудын Онцгой комиссын дарга нарт үүрэг болголоо. Онцгой комиссын зарим шийдвэрийг Засгийн газрын хуралдаанаар эцэслэнэ гэж Шадар сайдын Ажлын албанаас мэдээллээ.

- НДШ-ийг эсэргүүцсэн МҮЭ-ийн холбооны цахим тэмцэл эрчимжиж эхэллээ

УИХ-аас баталсан 2030 он хүртэл Тэтгэврийн сангийн талаар баримтлах бодлогын хүрээнд нийгмийн даатгалын шимтгэл (НДШ)-ийг 2018 оноос 2.0 хувь, 2019 оноос 1.0 хувь, 2020 онд мөн 2.0 хувь буюу нийт 5 хувиар нэмэгдүүлэх шийдвэр гаргасан байдаг. Харин 2020 онд нэмэгдэх байсан хувь хэмжээг цар тахлын улмаас хойшлуулаад байсан нь энэ оноос нэмэгдсэн юм. МҮЭ-ийн холбооноос УИХ-д хандан Ковид 19 цар тахлын улмаас иргэд хөдөлмөрчдийн дунд ажилгүйдэл, ядуурал эрс нэмэгдэж эдгээрээс үүдэлтэй орлогын хомсдол гүнзгийрч байгаатай холбогдуулан НДШ-ийг энэ оны эхнээс хоёр хувиар нэмэгдүүлсэн хуулийн \2017 оны\ үйлчлэлийг Нийгмийн даатгалын багц хуулийн шинэчлэлийг хийх хүртэлх хугацаанд бүх салбар, аж ахуйн нэгж, байгууллага, ажилтнуудыг ямар нэгэн ялгаварлалгүйгээр хамруулан хойшлуулах шаардлагыг тавиад байгаа юм. Тэгвэл энэ сарын 16-наас энэхүү шаардлагын хариуг нэхсэн тэмцлийн үйл ажиллагаа улс орон даяар бүх салбарыг хамран үргэлжилж, хөл хорионы онцгой нөхцөл байдлын улмаас энэ сарын 23-ныг хүртэл цахим акц хэлбэрт шилжжээ.

Үйлдвэрчний эвлэлүүдийн дээрх шаардлага, саналыг ажил олгогчид, ажилтнуудын аль аль тал нь дэмжиж бүх нийтийн шинжтэй байгаа тул уг асуудлыг УИХ-аас цаг үеийн нөхцөл байдалтай уялдуулан хууль эрх зүйн хүрээнд цогцоор нь яаралтай авч үзэхийг МҮЭХ-ноос шаардаж байгаа юм.

- Оюутолгойн асуудлыг хариуцсан 20 гишүүнтэй ажлын хэсэг байгууллаа

УИХ-ын дарга Г.Занданшатар энэ сарын 18-ны өдөр захирамж гаргаж Оюутолгой ордын ашиглалтад Монгол Улсын эрх ашгийг хангуулах тухай УИХ-ын 2019 оны 92 дугаар тогтоолын хэрэгжилтэд хяналт тавих ажлын хэсэг байгуулжээ.

Ажлын хэсэг 20 хүний бүрэлдэхүүнтэй бөгөөд Оюутолгойн хөрөнгө оруулалтын гэрээг сайжруулах Засгийн газрын ажлын хэсэг хөрөнгө оруулагчидтай хэлэлцээ хийж байгаа талаар хэсгийн гишүүд мэдээлэв. Түүнчлэн УИХ-ын ажлын хэсэг нь Засгийн газрын ажлын хэсэгтэй хамтран ажиллаж, шаардлагатай бол зарим асуудлаар УИХ-аас шийдвэр гаргах тогтоолын төслийг боловсруулах нь зүйтэй гэж үзжээ.

- Японд 7.3 баллын хүчтэй газарт хөдлөлт боллоо

Өнгөрсөн бямба гарагийн орой Япон улсын зүүн хойд хэсэгт Фүкүшима мужийн эргийн ойролцоо, далайн мандлаас доош 55 км гүнд 7.3 магнитуудын хүчтэй газар хөдөллөө.

Үүний улмаас 50 гаруй хүн бэртэж, 950.000 орчим айл өрхийн цахилгаан хангамж тасалдсан байна. Газар хөдлөлтийн улмаас далайд цунами үүсээгүйгээс гадна цахилгаан станцуудад ямар нэгэн гэмтэл гараагүй байна.

Япон улсын ерөнхий сайд засгийн газрын танхимаа яаралтай хуралдуулж, тусгай ажлын хэсгийг байгуулж ажиллахаар болсон байна. Япон улсын стандартаар газар хөдлөлтийн хүчийг долоон төвшинд ангилдаг. Энэ удаагийн газар хөдлөлтийн хүчийг зургадугаар төвшинд багтах газар хөдлөлт болсон хэмээлээ.

- 39 давхар “Трамп Плаза”-г нураалаа

Нью-Жерси мужийн Атлантик хотод АНУ-ын 45 дахь ерөнхийлөгч Доналд Трампын барьж байгуулсан зочид буудал, казино бүхий 39 давхар "Трамп Плаза" дампуурсан тул нураажээ. Мөн хотын удирдлагууд нураан буулгалтаас бодит гүйцэтгэл хийсэн аж. Хотын захиргаа эхний ээлжинд дуудлага худалдаа зохион байгуулахын тулд нэг сая ам.доллар барьцаалан зээлүүлэхээр төлөвлөж байсан ч барилгын эзэн Карл Ичан эсэргүүцжээ. "Трамп Плаза" нь 2014 онд дампуурсан бөгөөд Атлантик хотын дарга Марти Смолл "Энэ барилгыг Доналд Трамп ерөнхийлөгчийн сонгуульд ялагдсантай давхцуулж буулгасан" гэж мэдэгдэв.

- Ховд аймгийн амаржих газарт гурван ихэр хүүхэд мэндэлжээ

Үхэр жилийн хаврын тэргүүн сарын шинийн 6-ны Дашнямтай билэгт энэ сайн өдөр Цэцэг сумын харьяат Жаргалант сумын Бугат багт оршин суух иргэн Б.Отгонпүрэвийн гэр бүл 3 ихрээр бүл нэмжээ. Тодруулбал, Ховд аймгийн Алтай сумын харьяат, Жаргалант сумын Бугат багийн оршин суугч Б.Оюунгэрэл хоёрдугаар сарын 17-нд 2 хүү 1 охин төрүүлжээ. Тэрбээр одоо 30 настай бөгөөд 2012 онд ихэр охин, 2017 онд хүү төрүүлж байсан бол 3 дахь төрөлтөөрөө 3 ихэр төрүүлж ийнхүү 6 хүүхдийн ээж болж байна.

BOLOD ДОЛОО ХОНОГИЙН ТОЙМ: Автомашины азын дугаарт үнэ хаялцаж, халдварын эсрэг вакцин хүлээн авах бэлтгэл ажил хангагдсан ДОЛОО ХОНОГ
Tweet
Bolod.mn