Bolod.mn сайт өнгөрсөн долоо хоногт болж өрнөсөн онцлох үйл явдлыг тоймлон хүргэж байна. Эдгээр өдрүүдэд Монгол эрдэмтдийн бүтээсэн шүлснээс коронавирусийн халдвар илрүүлэх оношлуурыг хэрэглээнд нэвтрүүллээ. Энэ нь Монгол Улсын хувьд дотоодын оношлуур бүртгэн авсан анхны тохиолдол болж байгаагаас гадна ДЭЛХИЙД АНХДАГЧ оношлуурын цомог болж байгаагаараа онцлог гэж бүтээгчид нь онцолж байна. Түүнчлэн засгийн газрын хуралдаанаар дөрөвдүгээр сарын 3-наас 18-н өдрийг хүртэл Нийслэл Улаанбаатар хотод хатуу хөл хорио тогтоохгүй байх шийдвэрийг гаргалаа. Харин зарим байгууллага, ААН-үүдийн үйл ажиллагааг хязгаарлахаар болов.

Ерөнхийлөгч Х.Баттулга ял эдэлж байсан 21 эмэгтэй, 10 Казак иргэнг уучлав

Монгол Улсын Үндсэн хуулийн гучин гуравдугаар зүйлийн 1 дэх хэсгийн 8 дахь заалт, Монгол Улсын Ерөнхийлөгчийн тухай хуулийн 15 дугаар зүйлийн 15.2, Эрүүгийн хуулийн 6.14 дүгээр зүйлийн 1 дэх хэсгийг тус тус үндэслэн Монгол Улсын Ерөнхийлөгч Халтмаагийн Баттулга зарлиг гаргаж, гуравдугаар сарын наймны Олон улсын эмэгтэйчүүдийн эрхийг хамгаалах өдрийг тохиолдуулан ял эдэлж байсан нярай болон олон хүүхэдтэй анх удаа хөнгөн гэмт хэрэг үйлдсэн 21 ээжид, мөн гуравдугаар сарын 22-ны Наурызын баярыг тохиолдуулан зурагт, зуух, гар утас хулгайлсан гэх мэт анх удаа хөнгөн гэмт хэрэг үйлдсэн нэр бүхий казах иргэдэд уучлал үзүүллээ.

Тодруулбал, Шүүхийн шийдвэр гүйцэтгэх газрын харьяа 407, 461, 419, 445, 429, 425 дугаар хорих ангиудад ял эдэлж байсан нийт 31 иргэнд уучлал үзүүлж, эдлээгүй үлдсэн хорих ялаас бүрэн чөлөөлөв.

Шүлснээс "КОВИД-19" тодорхойлох шинжилгээг өнөөдрөөс авч эхэлнэ

Монгол эрдэмтдийн бүтээсэн шүлснээс коронавирус илрүүлэх оношлуурыг хэрэглээнд нэвтрүүлж эхэллээ. Энэ нь Монгол Улсын хувьд дотоодын оношлуур бүртгэн авсан анхны тохиолдол болж байгаагаас гадна ДЭЛХИЙД АНХДАГЧ оношлуурын цомог болж байгаагаараа онцлог гэж бүтээгчид нь онцолж байна.

Нээлтийн үеэр АШУҮИС-ийн захирал Н.Хүрэлбаатар, “Манай хамт олон “COVID-19”-ийн чиглэлээр 6 судалгаа хийж байна. Эмнэлзүйн молекул оношилгооны чиглэлд анхаарч 288 сая төгрөгийн санхүүжилтээр лаборатори байгуулсан. Энэ нь био аюулгүй байдлын хоёрдугаар зэргийн лаборатори бөгөөд вирусний гаралтай бүхий л өвчнийг молекулын түвшинд оношлох юм. Стандарт шаардлагын хувьд Монголд анхны лаборатори” хэмээн онцлов.

Мөн тэрбээр, БШУЯ-наас 47 сая төгрөгийн санхүүжилт гаргаж эрдэмтдийн судалгаагаар мэдрэг болон өвөрмөц чанар нь 100 хувьтай оношлуурыг бэлэн болгосноор шүлснээс коронавирус тодорхойлдог аргачлалыг Монгол Улсад ийнхүү нэвтрүүлж байна. Үүнийг үйлдвэрлэлд нэвтрүүлэхэд УОК-оос 109 сая төгрөгийн санхүүжилт өгсөн. ЭМЯ-наас өчигдөр албан ёсоор зөвшөөрөл олгож, таван удаагийн шалгуур дамжсаны эцэст өнөөдөр үйл ажиллагаагаа эхэлж байна” гэв.

Олон улсын эмч нарын өдөр тохиолоо

Маргааш Олон улсын эмч нарын өдөр. Энэ өдрийг анх АНУ-д 1990 оны гуравдугаар сарын 30-нд “Үндэсний эмч нарын өдөр" болгон тэмдэглэж байжээ.Үүнээс хойш Дэлхийн эмч нарын холбооноос жил бүрийн гуравдугаар сарын 30-ны өдрийг олон улсын эмч нарын өдөр болгон албан ёсоор тэмдэглэн өнгөрүүлдэг болсон билээ.

Манай улсын эрүүл мэндийн байгууллагад 50519 ажилтан ажилладаг. Үүний 20 хувь нь буюу 10576 нь их эмч буюу эрүүл мэндийн 5 ажилтан тутмын 1 нь их эмчээр ажиллаж байна. Дэлхийн эмч нарын баярын өдрийг угтаж Эрүүл мэндийн ажилтнуудын үйлдвэрчний эвлэлийн холбооноос өнөөдөр /2021.03.30/ "Цар тахал ба цалин хөлс" сэдвээр хэвлэлийн хурал хийлээ.

Covid-19-ийн тархалтыг хумих, ард олны эрүүл мэндийг сахин хамгаалахаар ажиллаж байгаа эмнэлгийн ажилтнуудад илүү цагийн хөлс ялгавартай олгож байна гэж Эрүүл мэндийн ажилтнуудын үйлдвэрчний эвлэлийн холбооныхон хэллээ.

Цар тахалтай тэмцэж буй эмч, эмнэлгийн ажилтнуудад 2.8 тэрбум төгрөгийн дэмжлэг үзүүлнэ

Дэлхийн эмч нарын баярын өдрөөр Монгол Улсын Ерөнхий сайд Л.Оюун-Эрдэнэ Хавдар судлалын үндэсний төв, Халдварт өвчин судлалын үндэсний төвд ажиллав. Тэрбээр цар тахалтай тэргүүн эгнээнд нүүр тулан, эрсдэлтэй нөхцөлд ажиллаж байгаа эмч нартаа баярын мэнд хүргэн, Засгийн газраас нийт 2.8 тэрбум төгрөгийн дэмжлэгийг эмч, эмнэлгийн ажилтнуудад олгохоор болсноо энэ үеэр дуулгалаа.

Тодруулбал, КОВИД19-ийн эсрэг ажиллаж байгаа 2,230 эмч, эмнэлгийн ажилчдад нэг сая төгрөгийн, 1,100 резидент эмч тус бүрт 500 мянган төгрөгийн нийт 2.8 тэрбум төгрөгийн урамшуулал олгох асуудлыг маргаашийн Засгийн газрын ээлжит хуралдаанаар шийдвэрлэх юм байна.

Мөн Ерөнхий сайд Л.Оюун-Эрдэнэ ХӨСҮТ-д тулгамдаж байгаа зарим асуудлыг ойрын хугацаанд шийдвэрлэхийг Эрүүл мэндийн сайд С.Энхболд, Сангийн сайд Б.Жавхлан нарт чиглэл болголоо. Амаргүй цаг үед хамтын хүчээр цар тахлыг даван туулж, Засгийн газраас эрүүл мэндийн салбарынхаа алба хаагчдын нийгмийн асуудал, ажиллах орчин нөхцөл, цалин хөлсний асуудалд үе шаттайгаар анхаарч, хамтран ажиллах болно гэдгийг хэлсэн юм.

Xaтуу хөл хорио тогтоохгүй, зарим салбарын үйл ажиллагааг хязгаарлана

Засгийн газрын ээлжит хуралдаан боллоо. УОК-оос бүх нийтийн бэлэн байдлын зэрэгт шилжүүлэхгүй байх саналаа УОК-оос Засгийн газрын хуралд танилцуулсан байна. Ингэснээр дөрөвдүгээр сарын 3-18-ны хооронд хатуу хөл хорио тогтоохгүй байхаар шийдвэрлэжээ. Энэ талаар тодруулбал Засгийн газрын хуралдаанаар 4.3-18-ны хооронд одоогийн гамшгаас хамгаалах бэлэн байдлын зэрэглэлийг ахиулахгүй буюу хатуу хөл хорио тавихгүй байх шийдвэр гаргалаа. Гэхдээ зарим салбар, ААН-н үйл ажиллагааг хязгаарлахаар болов.

Энэ нь цар тахлын үед эрүүл мэндээ хамгаалахын зэрэгцээ эдийн засгаа сэргээх зорилгоор халдвар хамгааллын дэглэмийг мөрдөж, иргэд, аж ахуйн нэгжүүдийн үйл ажиллагааг хэвийн үргэлжлүүлэх бодлоготой холбоотой юм.

Дээрх хугацаанд:

· Ресторан, лоунж, саун, бассейн, алжаал тайлах төв, кино театр, үзвэр үйлчилгээ, бялдаржуулах төв, амралт сувилал, сургалтын төв ажиллахгүй

· Хоол үйлдвэрлэл, зоогийн газрууд хүргэлтээр үйлчлэх

· Үсчин, гоо сайхны газрууд амралтын өдрүүдэд ажиллахгүй, бусад өдөр халдвар хамгааллын дэглэм сахиж ажиллах

· Худалдаа, үйлчилгээний газрууд хүн хоорондын зай бариулах, ариутгал, халдваргүйжүүлэлтээ дээд зэргээр хийх, нийт талбайнхаа 30 хувиас хэтрэхгүй байхаар тооцон үйлчлэх /Супермаркетууд түрдэг тэрэгний тоогоор зохицуулалт хийх/

· Нарантуул, Хархорин, Барс, Хүчит шонхор, Нарантуул-2 зэрэг томоохон зах 30 хувиар ажиллах /амралтын өдрүүдэд ажиллахгүй/

· Дэлгүүр, худалдааны төвүүд 20:00 цагт хаах

· Аймаг, орон нутаг руу зорчих иргэдийн хөдөлгөөнийг хүндэтгэх шалтгаанаас бусад тохиолдолд хориглох

· Орон нутаг руу хүнс, ачаа тээвэр, малын өвс тэжээл, шатахуун тээврээс бусад тохиолдолд автомашины хөдөлгөөнийг хязгаарлахаар боллоо.

ОХУ-аас нэг сая тун вакцин авах Засгийн газрын гэрээ албажжээ

Монгол Улсын Засгийн газар Улсын онцгой комиссоос ОХУ-аас нэг сая тун "Спутник-V" вакцин авах гэрээнд өчигдөр гарын үсэг зурлаа. Хоёр орны Засгийн газар шаардлагатай бичиг баримтуудыг бүрдүүлсэн учраас нэг сая тун вакциныг ирэх долоо хоногоос нийлүүлэхээр болжээ. ОХУ-аас "Спутник-V" вакцины нэг сая тунг манай улс худалдан авахаар болсон тухай Гадаад харилцааны сайд Б.Батцэцэг өнгөрсөн сарын 26-нд өөрийн албан ёсны цахим хуудсаараа дамжуулан олон нийтэд мэдээлсэн юм.

Түүний хэлснээр Монгол Улсын Засгийн газар болон Улсын онцгой комиссын зүгээс ОХУ-ын талд “Спутник-V” вакциныг ойрын хугацаанд худалдан авах албан хүсэлт хүргүүлсний дагуу нэг сая тун вакцин нийлүүлэхээр болсон тухайгаа ОХУ-ын Аж үйлдвэр, худалдааны нэгдүгээр орлогч сайд С.А.Цыб Шадар сайд С.Амарсайхантай цахимаар уулзах үеэр мэдэгдсэн байдаг.

Энэ тухайд Гадаад харилцааны сайд Б.Батцэцэг "Хэлэлцээний түвшинд яригдаж байсан нэг сая тун "Спутник-V" вакциныг манай улс авахаар боллоо. ОХУ маш их захиалгатай байгаа бөгөөд Монгол Улсын Ерөнхий сайд, Шадар сайдын албан захидал, Монгол Улсын Засгийн газрын уйгагүй хэлэлцээний үр дүн ийнхүү гарч байна. Асуудлыг нааштай шийдвэрлэж буй ОХУ-д талархал илэрхийлье. Нийт хүн амаа дархлаажуулсан дэлхийн эхний орнуудын нэг болох Засгийн газрын зорилт алхам алхмаар биеллээ олж байна" хэмээн тэмдэглэж байв.

Дээд шүүх Б.Хурцад 1 жил 6 сар, Г.Эрдэнэбатад 1 жил хорих ял оноолоо

ТЕГ-ын дарга асан генерал Б.Хурц нарын 9 хүнд холбогдох хэргийн шүүх хурал Улсын дээд шүүхэд өнөөдөр 09:00 цагт эхэлж, дөнгөж сая шийдвэрээ танилцуулжээ. Улсын дээд шүүхээс Б.Хурцад 1,6 жил, Г.Эрдэнэбатад нэг жилийн хорих ял, бусад холбогдогчид хоёр жилийн хорих ял оноох шийдвэр гаргажээ. Тодруулбал, Төв аймаг дахь Сум дундын Эрүүгийн хэргийн анхан шатны шүүхээс Тагнуулын Ерөнхий газрын /ТЕГ/ дарга асан Б.Хурц, Улсын ерөнхий прокурорын орлогч асан Г.Эрдэнэбат тэргүүтэй есөн хүнд С.Зоригийн амийг хөнөөсөн хэргээр ял авсан Т.Чимгээ Б.Содномдаржаа нарыг эрүүдэн шүүлт тулгасан, гүйцэтгэх ажлын тухай хууль тогтоомж зөрчсөн гэх үндэслэлээр ял оноосон байдаг.

Тэгвэл Улсын дээд шүүх өнөөдөр /2021.03.31/ Төв аймгийн Эрүү, Иргэний хэргийн давж заалдах шатны шүүхийн 2020 оны аравдугаар сарын 29-ний өдрийн 158 дугаар магадлалтай, ТЕГ-ын дарга асан Б.Хурц, Улсын Ерөнхий прокурорын орлогч асан Г.Эрдэнэбат нарын есөн хүнд холбогдох 40 хавтас маш нууцын хэргийг шүүгдэгчдийн өмгөөлөгчид хамтран гаргасан гомдол болон прокурорын бичсэн эсэргүүцлийг үндэслэн хэлэлцсэн байна.

С.Зориг агсны амь насыг хөнөөсөн хэргийн материалыг бүхэлд нь нууцаас гаргахаар шийдвэрлэжээ

Засгийн газрын 3-р сарын 30-ны өдрийн ээлжит хуралдаанаар С.Зориг агсны амь насыг хөнөөсөн хэргийн материал, холбогдох бичлэгүүдийг бүхэлд нь нууцаас гаргахаар шийдвэрлэжээ.

Энэ мэдээллийг Хууль зүй, дотоод хэргийн сайд Х.Нямбаатар твиттер хуудастаа жиргэсэн байна. Тэрбээр:

"Өнөөдрийн ЗГ-ын хуралдаанаар С.Зориг агсны амь насыг хөнөөсөн хэргийн материал холбогдох бичлэгүүдийг бүхэлд нь нууцаас гаргахаар шийдвэрлэсэн."гэсэн юм.

Монгол цэргүүд Афганистан цэргүүдийн амь насыг аварчээ

Исламын бүгд найрамдах Афганистан улс (ИБНАУ)-д явагдаж буй НАТО-гийн “Шийдвэртэй дэмжлэг” ажиллагаанд АНУ-ын Зэвсэгт хүчинтэй хамтран үүрэг гүйцэтгэж байгаа

Монгол Улсын Зэвсэгт хүчний XII ээлжийн цэргийн баг үүргээ амжилттай гүйцэтгэсээр байна. 2021 оны гуравдугаар сарын 30-ны өдөр ИБНАУ-ын нийслэл Кабул хотод алан хядагч террорист бүлэглэлүүдийн зүгээс Афганистаны олон нийтийг хамгаалах хүчний эсрэг чиглэгдсэн 3 удаагийн халдлага хийж, үүний улмаас 10 хүн амь нас үрэгдэж, 6 хүн шархаджээ.

“Кабулын аюулгүй байдлыг хангах хүчин”-ээс Афганистаны үндэсний олон нийтийг хамгаалах хүчний шархадсан 6 цэргийн алба хаагчийг халдлага үйлдэгдсэн газраас татан гаргаж, хоёрдугаар шатны эмнэлэг рүү тээвэрлэх ажиллагааг зохион байгуулж явуулсан юм. Тодруулбал, Монгол Улсын Зэвсэгт хүчний цэргийн багийн бүрэлдэхүүн цагийн байдлыг үнэлж, шархтан тээвэрлэсэн техникийг шалган нэвтрүүлж, нисдэг тэргэнд шилжүүлэн тээвэрлэх үүргийг богино хугацаанд шуурхай гүйцэтгэснээр шархадсан цэргийн алба хаагчид цаг алдалгүй эмнэлгийн тусламж авч чаджээ.

Мөн Афганистаны үндэсний олон нийтийн хамгаалах хүчний холбогч офицер шархадсан цэргийн алба хаагчдыг тээвэрлэх, шилжүүлэх ажиллагааны үед шуурхай ажиллаж, дэмжлэг үзүүлсэн Монгол Улсын Зэвсэгт хүчний цэргийн багийн бүрэлдэхүүнд талархал илэрхийлсэн юм.

Өнөөдрөөс хэрэгжиж эхлэх Засгийн газрын шийдвэрүүд

Өнөөдрөөс /2021.04.03/ эхлэн дөрөвдүгээр сарын 18-ны өдрийг дуустал нийслэл Улаанбаатарт Засгийн газрын шийдвэр хэрэгжиж эхэлнэ. Ингэснээр зарим салбарын үйл ажиллагаа хязгаарлагдах юм.

Үүнд:

Бямба, Ням гарагт амрах салбар:

Даваа-Баасан гарагт ажиллана:

Үсчин, гоо сайхны газрууд
Нарантуул, Хархорин, Барс, Хүчит шонхор, Нарантуул-2 зэрэг томоохон захын 30% нь ажиллана.

Өдөр бүр ажиллах салбар:

Хоол үйлдвэрлэл, зоогийн газрууд хүргэлтээр үйлчилнэ.
Худалдаа, үйлчилгээний газрууд хүн хоорондын зай бариулах, ариутгал, халдваргүйжүүлэлтээ дээд зэргээр хийх, нийт талбайнхаа 30 хувиас хэтрэхгүй байхаар тооцон үйлчилнэ. Супермаркетууд түрдэг тэрэгний тоогоор зохицуулалт хийнэ.

Дээрх зах худалдааны төв болон хүнсний дэлгүүр бусад үйлчилгээний газрууд 20:00 цаг хүртэл ажиллана.

Улаанбаатараас орох, гарах хөдөлгөөний зохицуулалт:

Аймаг, орон нутаг руу зорчих иргэдийн хөдөлгөөнийг хүндэтгэх шалтгаанаас бусад тохиолдолд хориглоно.
Орон нутаг руу хүнс, ачаа тээвэр, малын өвс тэжээл, шатахуун тээврээс бусад тохиолдолд автомашины хөдөлгөөнийг хязгаарлана.

Үйл ажиллагааг нь бүрэн зогсоох салбар:

Ресторан
Лоунж
Саун
Бассейн
Алжаал тайлах төв
Кино театр
Үзвэр үйлчилгээ
Бялдаржуулах төв
Амралт сувилал

10. Сургалтын төв ажиллахгүй.

14 хоногийн хугацаанд зөвхөн шаардлагатай газартаа хэсэгчилсэн хөл хорио тогтоогоод коронавирусийн эсрэг вакцинжуулалтыг эрчимжүүлэхээ Засгийн газраас мэдэгдсэн билээ.

BOLOD ДОЛОО ХОНОГИЙН ТОЙМ: Монгол эрдэмтдийн бүтээсэн шүлснээс ковид-19 илрүүлэх оношлуурыг хэрэглээнд нэвтрүүлсэн ДОЛОО ХОНОГ
Tweet
Bolod.mn