Bolod.mn сайт өнгөрсөн долоо хоногт болж өрнөсөн онцлох үйл явдлыг тоймлон хүргэж байна. Эдгээр өдрүүдэд УОК болон ЗГ хуралдан Нийслэл хотод хатуу хөл хорионы дэглэмийг дахин тогтоох ёстой хэмээн үзлээ. Иймд дөрөвдүгээр сарын 10-ны өдрөөс 25-ны хооронд гамшгаас хамгаалах өндөржүүлсэн бэлэн байдлын зэрэгт шилжлээ. Түүнчлэн Говь-алтай аймгийн Хилийн цэргийн ангид хугацаат цэргийн хоёр алба хаагч 34 настай харуулын даргаа буудан хөнөөж, цэргийн байрнаасаа буутай оргон зугтсан ноцтой хэрэг гарлаа. Уг цэргүүдийн байршлыг тогтоосон бөгөөд галт зэвсэг ашиглаж магадгүй учир гарч болох эрсдлийг тооцон ажиллаж байгаа аж.

- Хөвсгөлд гурван ихэр хүү мэндэлжээ

Хөвсгөл аймгийн Нэгдсэн эмнэлгийн Төрөх тасагт энэ сарын 5-ны өдрийн 7 цаг 40 минутад 3 ихэр хүү мэндэлжээ. Мөрөн сумын иргэн М.Нямгэрэл 2 дахь төрөлтөөрөө 3 ихэр хүүтэй болсон байна.

Тэрбээр 2016 онд төрж хүүтэй болж байсан бол 5 жилийн дараа 3 ихэр хүү төрүүлж 4 хүүтэй боллоо. Ихрүүдийг Нэгдсэн эмнэлгийн Төрөх тасгийн Ерөнхий мэргэжилтэн П.Отгонбаяр. Их эмч Э.Инжир, Эх баригч М.Энхболд болон төрөх тасгийн хамт олон хагалгаа хийж амжилттай төрүүлсэн байна. Ихрүүд 2,600, 2,400, 2,800 кг жинтэй төрсөн бөгөөд биеийн байдал сайн байна. “Ихрүүдийг хяналтад авч зөвлөгөө мэдээлэл тогтмол өгч байсан "Далайн элбэрэлт" өрхийн эмнэлгийн хамт олон, эсэн мэнд төрүүлсэн Төрөх тасгийн хамт олондоо маш их баярлалаа” гэдгийг ихрүүдийн аав Б.Цэрэнтогтох хэлж байлаа.

- 409-р хаалттай хорих ангид коронавирусийн 70 тохиолдол илэрлээ

Энэ сарын 6-ны өдөр 409 дүгээр хаалттай хорих ангийн түр тусгаарлах байранд ирсэн хоригдогч, түүний өмгөөлөгчөөс эх үүсвэртэй халдвар илэрлээ.

Халдвар илэрсэн хоригдогч нараас биеийн эрүүл мэндийн байдал хүндэрсэн асуудал байхгүй, шинж тэмдэг илрээгүй байна. Гэхдээ шаардлагатай гэсэн хүмүүсийг Цагдан хорих 461 дүгээр ангийн эмнэлэгт шилжүүлэн эмчилгээнд хамруулжээ. Нийт хоригдогч нараас PCR шинжилгээ авсан бөгөөд вакцинд хамруулах ажлыг эхлүүлсэн байна.

Тус хорих ангид нийт 70 тохиолдол бүртгэгдсэнээс 18 нь цагдан хорих 461 дүгээр хаалттай ангийн эмнэлэгт, ойрын болон дам хавьтлын хамт тусгаарлагдсан аж. Үлдэх 52 тохиолдлыг зөөвөрлөх шаардлагагүй гэж үзэн 409 дүгээр хаалттай хорих ангид байрлах түр тусгаарлах байранд тусгаарлан эмчилж байгаа юм байна.

- Тавантолгойн нүүрс ачих логистикийн төвийг хоёрдугаар улирлаас барьж эхэлнэ

Засгийн газрын ээлжит хуралдаан 2021 оны 04 дүгээр сарын 07-ны өдөр боллоо.

Тавантолгойн нүүрс ачих логистикийн төвийг хоёрдугаар улирлаас барьж эхэлнэ. Тавантолгойн нүүрс ачих логистикийн төвийн Техник, эдийн засгийн үндэслэл, зураг төслийг нь боловсруулан баталгаажуулж, хоёрдугаар улиралд багтаан барьж эхэлнэ. Гашуунсухайт-Ганцмод боомтын хил нэвтрэх цэг, шилжүүлэн ачих байгууламж барих талаар хятадын талтай энэ сард харилцан тохиролцох, боомттой холбоотой асуудлыг “Монгол-Хятадын хилийн төмөр замын хэлэлцээр”-т энэ онд нэмэлтээр тусгахыг холбогдох сайд нарт даалгав.

- Бямба гарагаас эхлэн 14 хоног хөл хорио тогтоож, иргэн бүрт 300 мянган төгрөг олгоно

Улсын Онцгой комиссоос дөрөвдүгээр сарын 10-25-ны өдрүүднд хатуу хөл хорио тогтоох саналыг Засгийн газарт хүргүүлсэн талаар мэдээлсэн билээ. Уг саналыг Засгийн газрын ээлжит бус хуралдаанаар хэлэлцэж, Бямба гарагаас бүх нийтийн бэлэн байдлын зэрэгт шилжих шийдвэр гаргажээ. Энэ талаар Монгол Улсын Ерөнхий сайд Л.Оюун-Эрдэнэ мэдээлэхдээ "Зорилтот бүлгийн бүх иргэнээ дархлаажуулах хэмжээний вакциныг авах хэлэлцээрүүдийг хийсэн. Одоо татан авах ажил үлдээд байна. Вакцин үйлдвэрлэгч орнууд экспортоо зогсоож, эхний ээлжид дотоодын хэрэгцээгээ хангахад төвлөрч байгаа. Вакцины татан авалтын хугацаа тодорхой болсон, эрүүл мэндийн салбарт оргил ачаалал ирэх тул үүнийг бодолцон хөл хорио тогтоож байна" гэв.

Түүнчлэн өнгөрөгч Пүрэв гарагаас эхлэн Монгол Улсын иргэн бүрт 300 мянган төгрөг олгох болсныг мэдээлэв. Сангийн сайдын мэдээлснээр "Манай улсад иргэн бүртээ бэлэн мөнгө өгөх туршлага байхгүй учир 7-10 хоногт иргэн бүрийн данс руу шилжүүлнэ. Гэхдээ бид хамгийн хурдан хугацаанд иргэдэд олгох замыг судлах болно. Өндөр настнуудад тэтгэвэр олгодог данс, хүүхдүүдэд хүүхдийн мөнгө авдаг данс руу шилжүүлэх болно" хэмээлээ.

- “Их дэлгүүр”-т гарсан галын хохирлыг 24 тэрбум төгрөгөөр тогтоож, шүүхэд шилжүүлжээ

Өнгөрсөн оны зургаадугаар сард Улсын их дэлгүүрт гал гарч, их хэмжээний хохирол учирсан билээ. Тэгвэл уг хэргийг прокурорт шилжүүлжээ.

Тодруулбал, 2020 оны зургаадугаар сарын 07-ны өдөр Б нь газ, газан хошууг ашиглаж элэгдэлд орсон хуучирсан дээврийн хар цаасыг солихдоо ил галаар халааж наах ажлыг гүйцэтгэхдээ гал алдсан байна. Гал түймрийн улмаас тус барилгын 1-7 дугаар давхарт худалдаа үйлчилгээ эрхэлдэг нийт 125 хүн, хуулийн этгээдийн үйл ажиллагаа бүхэлдээ тасалдан эд хөрөнгө, барилга байгууламжийг болгоомжгүйгээр устгаж, гэмтээн нийт 24,023,847,554 төгрөгийн их хэмжээний болон ноцтой хохирол учирсан. Нийслэлийн прокурорын газраас яллагдагч Ц, Б нарт Эрүүгийн хуулийн тусгай ангийн 17.11 дүгээр зүйлийн 2 дахь хэсэгт зааснаар буюу бусдын эд хөрөнгийг болгоомжгүйгээр устгаж, гэмтээн ноцтой хохирол учруулсан гэсэн үндэслэлээр яллах дүгнэлт үйлдэн 2021 оны гуравдугаар сарын 26-ны өдөр Чингэлтэй дүүргийн Эрүүгийн хэргийн анхан шатны шүүхэд шилжүүлсэн байна.

- Залуус архидан согтуурч, нэгнийхээ амийг хөнөөжээ

"Мөнх Тэрэлж" амралтын газар хэсэг бүлэг залуус архидан согтуурч, нэгнийхээ амь насыг хөнөөсөн харамсалтай хэрэг энэ сарын 04-05-нд шилжих шөнө гарчээ. Хэргийн улмаас 23 настай, Орхон аймгийн харьяат эрэгтэй нас барсан байна.

Түүнийг цээжин тус газар нь хутгалж, амь насыг нь хөнөөсөн байна. Уг хэргийг БЗД-т оршин суух хаягтай 23 настай эрэгтэй “М” согтууруулах ундаа хэрэглэсэн үедээ үйлдсэн байж болзошгүй нөхцөл байдал тогтоогдож тус этгээдийг цагдан хорих таслан сэргийлэх арга хэмжээ авч, Налайх дүүрэг дэх цагдаагийн хэлтэс үргэлжлүүлэн шалгаж байна.

- “The Hu” алтан сертификатын эзэд боллоо

“The Hu” хамтлагийнхан Канад улсад цомог борлуулалтаараа алтан сертификатын эзэд болсныг зарлажээ. Энэ талаарх мэдээллийг хамтлагийн менежер цахим хуудастаа оруулж нийтэд зарлалаа. Английн алдарт “Metal Hammer” сэтгүүлийн 2021 оны тэргүүн нүүрэнд “The Hu” хамтлагийг нийтэлсэн билээ. 1986 онд анх хэвлэгдэн гарсан уг сэтгүүл 60 мянган хувь хэвлэгддэг юм. Өнгөрсөн арванхоёрдугаар сард “The Hu” хамтлаг Youtube-д нэг сая subscribers- тай болж, “Gold play button” шагналын эзэн болсон. Мөн “Чингис хаан” одонт “The Hu” хамтлагийн шинэ дууг “iTunes store”-оос хамгийн их татан авснаар шилдэг 100 рок дууны чартыг тэргүүлж буй талаар өмнө нь мэдээлсэн.

- В.Путин 2036 он хүртэл тушаалаа хаших боломж олгосон хуульд гарын үсэг зурав

ОХУ-ын Ерөнхийлөгч Владимир Путин төрийн тэргүүний албан тушаалд дахин хоёр удаа өрсөлдөх боломж олгосон хуульд гарын үсэг зуржээ.

Оросын ерөнхийлөгчийн сонгуулийн тухай хуульд төрийн тэргүүнд 35-аас дээш насны, тус улсад 25-оос доошгүй жил амьдарч буй, урьд нь өмнө хэзээ ч гаднын иргэншилтэй байгаагүй, ОХУ-ын иргэн дэвших эрхтэй гэсэн заалтыг тусгажээ. Ингэхдээ Холбооны Үндсэн хуулийн дагуу Оросын бүрэлдэхүүнд орсон улсын иргэний нэр дэвших эрхийг нь баталгаажуулсан байна. Өөрөөр хэлбэл, Крымийн оршин суугч нэр дэвших эрхтэй болж байна.

ОХУ-ын ерөнхийлөгчийн сонгуулийн тухай хуульд энэ албан тушаалыг хоёр у/даа хашиж байсан эсвэл сонгууль явуулах тухай шийдвэр албан ёсоор зарлагдсан өдөр ерөнхийлөгчийн албан тушаалыг хоёр дахиа хашиж буй иргэн ерөнхийлөгчийн сонгуульд дахин өрсөлдөх эрхгүй гэж заажээ. Гэхдээ энэ хуулийн заалт Путинд үйлчлэхгүй. Хуулийн дагуу Үндсэн хуульд оруулсан нэмэлт өөрчлөлт хүчин төгөлдөр болох үед төрийн тэргүүний албан тушаалыг хашиж буй хүний өмнөх бүрэн эрхийн хугацааг тэглэнэ гэж заасан байна.

Владимир Путин 2000, 2004, 2012, 2018 онуудад ОХУ-ын Ерөнхийлөгчөөр сонгогдож байв. Дээрх хуулийн дагуу тэрбээр 2024 болон 2030 онд ерөнхийлөгчид өрсөлдөх боломжтой болж байна. 2008-2012 оны хооронд ОХУ-ын Ерөнхийлөгчийн албан тушаалыг хашиж байсан Дмитрий Медведев ерөнхийлөгчийн бүрэн эрхийн хугацааг дөрвөөс зургаан жил болгон сунгах санал гаргаж, хожим нь Үндсэн хуулиар баталгаажсан байдаг.

Хоёр цэрэг харуулын даргаа буудаж хөнөөгөөд буутай зугтжээ

Говь-Алтай аймгийн Хилийн цэргийн 0214 дүгээр ангийн хугацаат цэргийн хоёр алба хаагч харуулын даргаа буудаж хөнөөгөөд буутайгаа зугтсан хэрэг гарсан. Уг хэрэг явдлын талаар Хил хамгаалах ерөнхий газраас мэдээлэл өглөө.

Албаныхны мэдээлж буйгаар "Хэрэг Говь-Алтай аймгийн Алтай суманд байрлах Хилийн цэргийн 0214-р ангийн дөрөвдүгээр заставын харуул дээр дөрөвдүгээр сарын 8-ны өдрийн 18:00 цагт Монгол улсын хилийн манаанд үүрэг гүйцэтгэж байсан байлдагч Х, М нарын 4 байлдагчийн бүрэлдэхүүнтэй манаа манаанд үүрэг гүйцэтгээд хилийн харуул дээр ирэх явцад гарсан. Харуулын дарга манаагаа тосож авч буу шалгаж байрлуулдаг журамтай.

Ингээд байрлуулах үед манааны бүрэлдэхүүн урдаас нь зэвсэг хэрэглэж харуулын даргын амь насыг хөнөөгөөд харуулын байрыг орхиод явсан мэдээллийг авсан байна.

Говь-Алтай аймгийн цагдаа болон тагнуулын байгууллага ангийн бүрэлдэхүүнтэй ажиллаж хоёр цэргийн араас мөрдөж байгаа аж. Нарийн шалгалтаар тус хоёр цэрэг нийт 45 сумтай автомат буутай явж байгаа нь тогтоогдсон албаныхан мэдээлэв.

Цэргүүд Алтай сумын нэгэн айлаас мотоциклыг нь аван ангиас 50 орчим км-т Хонхор заг гэдэг газарт мотоциклоо орхиод цааш явсан мөрийг илрүүлээд мөшгөж байгаа. Амиа алдсан хохирогч харуулын дарга нь тус ангийн хамгийн шилдэг эрсийн нэг, шүлэгч залуу байсан бөгөөд, эхнэр гурван хүүхэдтэй ахлагч залуу байсан ажээ.

BOLOD ДОЛОО ХОНОГИЙН ТОЙМ: Хатуу хөл хорио тогтоож, иргэн бүрт 300 мянган төгрөгийн дэмжлэг үзүүлсэн ДОЛОО ХОНОГ
Tweet
Bolod.mn