Bolod.mn сайт өнгөрсөн долоо хоног болж өрнөсөн ОНЦЛОХ үйл явдлыг ТОЙМЛОН хүргэж байна. Эдгээр өдрүүдэд улсад их хэмжээний хохирол учруулсан УИХ-ын гишүүн асан Б.Ундармаад холбогдох шүүх хурал болж түүний биеийн байдлыг харгалзан үзэж ялыг хэвээр үлдээлээ. Түүнчлэн МХЕГ-ын Н.Баярсайханд холбогдох хэргийг шүүн оноосон 2.8 жилийг хэвээр үлдээлээ. Иргэн Б.Сүндэръяа өөрийг нь дарамталж сүрдүүлсэн УИХ-ын гишүүнийг Ц.Анандбазар хэмээн мэдээлж, түүнтэй холбоотой хохирогч гэгдэх 1000 гаруй эмэгтэйчүүд өөртэй нь холбогдсон талаарх ноцтой мэдээллийг хүргэсэн. Энэ талаарх дэлгэрэнгүй мэдээллийг тоймлон хүргэе.  

Цахимаар мөрийтэй тоглоом зохион байгуулвал 6 сараас 3 жил хүртэл хорих ялаар шийтгэнэ

2021.04.12-ны оройн 21.00 цагийн үед БГД-ийн 1-р хорооны нутаг дэвсгэрт 1988-1977 онд төрсөн 5 этгээд цахим орчинд хууль бусаар мөрийтэй тоглоом зохион байгуулж байсныг ЭЦА-ны алба хаагчид илрүүлэн БГД-ийн цагдаагийн 1-р хэлтэс шалгалтын ажиллагааг явуулж байна. 

Эрүүгийн хуульд зааснаар олон нийтийн газар, эсхүл мэдээллийн технологи ашиглан ашиг олох зорилгоор шоо, хөзөр, бусад эд зүйл ашиглан үр дүнг нь урьдчилан төсөөлөх боломжгүй, аз туршиж тоглодог мөрийтэй тоглоом зохион байгуулсан бол дөрвөн зуун тавин нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хүртэл хугацаагаар хорих ял шийтгэнэ.

Мөн түүнчлэн үр дүнг нь урьдчилан төсөөлөх боломжгүй, аз туршиж тоглодог хуулиар хориглосон мөрийтэй тоглоомын газар байгуулсан, эсхүл ажиллуулсан бол таван мянга дөрвөн зуун нэгжээс хорин долоон мянган нэгжтэй тэнцэх хэмжээний төгрөгөөр торгох, эсхүл нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

Самар түүхээр явсан иргэд автомашины тэвшин дээр унтаж байхдаа угаартаж нас барсан харамсалтай хэрэг гарчээ. 

Тодруулбал, Сэлэнгэ аймгийн Мандал сумын Түнхэл-5-р багийн нутаг дэвсгэрт энэ сарын 12-ны 14.30 минутын орчимд 6 хүн угаартаж, нас барсан тухай дуудлага мэдээлэл цагдаагийн байгууллагад ирсэн байна. Дуудлага мэдээллийн дагуу цагдаагийн алба хаагчид очиход, тус багт оршин суух 22-46 насны 6 иргэн бүхээгтэй /битүү/ машины тэвшин дээр унтаж байгаад угаартаж нас барсан байжээ. Эх сурвалжийн мэдээлснээр, тухайн үед гадаа унтаж байсан автомашины жолооч нар угаартаагүй байна. Хэргийг тус сумын цагдаагийн хэлтэс үргэлжлүүлэн шалгаж байгаа аж.

Иргэн Б.Сүндэръяа нэр бүхий УИХ-ын гишүүний талаарх ноцтой баримтыг дэлгэсэн. Уг баримтад нэр бүхий УИХ-ын гишүүн түүнийг олон жилийн турш дарамталж, заналхийлж байгаа талаар дурдаж, хууль шүүхийн байгууллагад удаа дараа хандаж байсан талаараа ч хэлсэн байдаг. Хэдийгээр иргэн Б.Сүндэръяа дээрх УИХ-ын гишүүнийг нэрийг хэлээгүй ч, цахим орчинд сүрдүүлэгч, бэлгийн гаж донтой этгээдийг одоогийн УИХ-ын гишүүн Ц.Анандбазар гэдгийг нэрлэсэн хүн цөөнгүй байлаа.

Уг асуудлын дагуу иргэн Б.Сүндэръяа өнгөрөгч Лхагва гарагт Цагдаагын газрын хамгаалалтад орж, өөрийн өмгөөлөгчийн хамт холбогдох байгууллагад албан ёсоор гомдол гаргасан. Мөн тэрээр энэ үеэрээ өөрийг нь айлган сүрдүүлж, заналхийлж байсан хүнийг одоогийн УИХ-ын гишүүн Ц.Анандбазар гэдгийг хэллээ. Түүнчлэн УИХ-ын гишүүн Ц.Анандбазартай холбоотой  хохирогч болсон гэх 1000 гаруй охид, эмэгтэйчүүд иргэн Б.Сүндэръяад хандсан талаар дурдсан юм. Дээрх охид эмэгтэйчүүд Ц.Анандбазарын бэлгийн хүчирхийллийн хохирогчид болсон гэх ба үүн дотор 20 жилийн өмнөх хохирогч ч байсан ажээ.

Улмаар Ц.Анандбазартай холбоотой мэдээлэл цахим орчинд гарсантай холбогдуулан ХЭҮК-оос мэдэгдэл гаргалаа.

Мэдэгдэлд тухайн хэргийн талаар дурдаж уг асуудлыг нарийвчлан судлан, Хүний эрхийн үндэсний комисс хуульд заасан бүрэн эрхийнхээ хүрээнд идэвхтэй хяналт тавьж ажиллах болно хэмээж УИХ-ын гишүүн Ц.Анандбазарыг уг гомдол мэдээллийн талаар байр сууриа илэрхийлэх, тайлбар хийхийг зөвлөсөн юм.

УИХ-ын гишүүн асан Б.Ундармаад анхан шатны шүүхээс 2 жил 6 сарын хорих ял оногдуулж шийдвэрлэснийг давж заалдах шатны шүүхээс ялыг хөнгөрүүлэн нийтийн албанд томилогдох эрхийг 6 жилийн хугацаагаар хасаж, 40 сая төгрөгөөр торгох ял оногдуулсан билээ.

Хэргийг нийслэлийн Эрүүгийн хэргийн давж заалдах шатны шүүх  гуравдугаар сарын 31-нд дахин хэлэлцээд 40 сая төгрөгийг торгуулийг хэвээр үлдээжээ. Түүний эрүүл мэндийн байдалтай холбоотой, гурван ч удаа хүнд мэс засалд орсон зэрэг баримтыг өмнө нь дутуу, нотариатаар баталгаажуулж бүрдүүлээгүй байснаа засаж ирсэн бөгөөд улсад учруулсан хохирлоо төлсөн, зээлийн хүүг нь ч барагдуулсан, гэм буруугаа мөрдөн байцаалтын шатанд ч, анхан шатны шүүх хурлын үеэр ч хүлээн зөвшөөрсөн гэж дүгнэн торгох ял оноосон байна. 

Шүүгдэгч Б.Ундармааг улс төрд нөлөө бүхий этгээд албан үүрэг, бүрэн эрх, албан тушаалын байдлаа урвуулан ашиглаж, өөртөө буюу бусдад давуу байдал бий болгож Жижиг дунд үйлдвэрлэлийг дэмжих сангаас өөрийн хамаарал бүхий аж ахуй нэгжид зээл олгуулсан гэмт хэрэгт хатгагчаар хамтран оролцсон гэм буруутайд тооцсон юм. 

Улсын Дээд шүүхийн хяналтын шатны эрүүгийн хэргийн шүүх хуралдаанаар Н.Баярсайхан нарын 6 хүнд холбогдох хэргийг шүүгдэгч нар, тэдний өмгөөлөгчдийн гаргасан гомдлын дагуу 2021 оны 4 дүгээр сарын 14-ний өдөр хянан хэлэлцэв.

Чингэлтэй дүүргийн Эрүүгийн хэргийн анхан шатны шүүх дээрх хэргийг 2020 оны 9 дүгээр сарын 21-ний өдөр хянан хэлэлцээд Н.Баярсайхан, Э. Аззаяа нарыг  хахууль авсан гэмт хэргийг бүлэглэж үйлдсэн гэм буруутайд тооцож, Эрүүгийн хуулийн 22.4 дүгээр зүйлийн 5 дахь хэсэгт зааснаар Н.Баярсайханд нийтийн албанд томилогдох эрхийг 5 жилийн хугацаагаар хасаж, 2 жил 8 сар хорих, Э.Аззаяад нийтийн албанд томилогдох эрхийг 5 жилийн хугацаагаар хасаж, 40 сая төгрөгөөр торгох ял оногдуулжээ.

Соёлын тэргүүний ажилтан, дуучин Т.Дэлгэрмөрөнд холбогдох зөрчлийн хэргийн шүүх хуралдаан дөрөвдүгээр сарын 15-ны өдөр болж, долоон зуун тавин мянган төгрөгөөр торгох шийтгэл ногдуулжээ.

Зөрчлийн тухай хуулийн тусгай ангийн 5.4 дүгээр зүйлийн 4 дэх хэсгийн 4.1, мөн хуулийн 6.20 дугаар зүйлийн 7 дахь хэсэгт зааснаар зөрчилд холбогдогч Т.Дэлгэрмөрөнд зан үйлд нөлөөлөх 20 цагийн хугацаагаар албадан сургалтад хамруулж, 25 хоног баривчлах, мөн хуулийн 5.1 дүгээр зүйлийн 3 дахь хэсэгт зааснаар зан үйлд нөлөөлөх  20 цагийн хугацаагаар албадан сургалтад хамруулж, 25 хоног баривчлах шийтгэл тус тус оногдуулж, нийт баривчлах шийтгэлийг 50 хоногоор, зан үйлд нөлөөлөх нийт 40 цагийн хугацаагаар албадан сургалтад хамруулахаар тогтоосон. 

Хэрэгт авагдсан нотлох баримтанд тулгуурлан Зөрчлийн тухай хуулийн Ерөнхий ангийн 3.5 дугаар зүйлийн 4-т зааснаар баривчлах шийтгэлийг ...14 хүртэлх насны хүүхэдтэй ганц бие эцэгт баривчлах шийтгэл оногдуулахгүй гэснийг үндэслэн шийдвэр гаргажээ.

Ингээд Зөрчлийн тухай хуулийн тусгай ангийн 5.4 дүгээр зүйлийн 4 дэх хэсгийн 4.1, 6.20 дугаар зүйлийн 7 дахь хэсэг, 5.1 дүгээр зүйлийн 3 дахь хэсэгт зааснаар нийт 50 хоногийн баривчлах шийтгэлийг оногдуулахгүйгээр нэг хоногийг 15 /арван тав/ нэгжтэй тэнцэх хэмжээний төгрөгөөр тооцож, Т.Дэлгэрмөрөнд 750 нэгжтэй тэнцэх хэмжээний буюу 750,000 /долоон зуун тавин мянга/ төгрөгөөр торгох шийтгэл оногдуулж шийдвэрлэсэн байна.

Монгол Улс анх "Энхсаран" сувиллаас коронавирусний халдварыг дотооддоо алдаж байсан билээ. Харин халдвар хамгаалалтын дэглэм алдагдаж, коронавирусний халдварыг дотооддоо алдсан "Энхсаран" сувиллыг шалгаж, нэр бүхий нарын 13 хүнийг яллагдагчаар татан шалгаж байгаа талаар албаныхан өмнө мэдээлсэн.  Яллагдагчаар татагдсан нэр бүхий 13 хүний дунд халдвартай нь батлагдаж тусгаарлалтад байсан иргэн Д.Мөнхбат багтсан бөгөөд сошиал орчинд  "Энхсаран" сувиллын асуудлыг ил болгосон иргэнийг яллагдагчаар татсан тухай мэдээлэл сошиалд цацагдаад буй. 

Тэгвэл иргэн Д.Мөнхбатыг яллагдагчаар татсан нь шалтгаан нь "Энхсаран" сувилалд тусгаарлагдаж байхдаа хөл хорионы халдвар хамгааллын дэглэм санаатайгаар зөрчиж, үймээн үүсгэж, бусдыг өдөөн турхирч эмх замбараагүй байдал үүсгэн  тусгаарлах байрны дэглэм зөрчсөн асуудлаар шалгагдсан байна.

Хөвсгөл аймгийн Ханх суманд урд шөнө 00:42 цаг болон 03:46 цагуудад хоёр удаа хүчтэй газар хөдлөлт болжээ. Тодруулбал, хороо багийн “Хачим” гэдэг газар 04.16-ны өдрийн 00:42 цагт 5.1 магнитуд, 03:46 цагт 4.2 магнитудын хүчтэй газар хөдлөлт болсон тухай мэдээллийг ШУА-ын ООГХ-ээс цахим шуудангаар ирүүлсэн.

Тус аймгийн Онцгой байдлын газраар дамжуулан тус сумын Засаг даргаас тодруулахад тус сумын иргэдэд чичирхийлэл мэдрэгдсэн бөгөөд учирсан хохиролгүй гэж мэдээлсэн.

БШУЯ-наас өмчийн хэлбэр харгалзахгүй бүх шатны боловсролын сургалтын байгууллага нь суралцагчийн сургалтын төлбөрт хөнгөлөлт үзүүлэх, дараагийн төлбөрт шилжүүлэх түр журам баталлаа.

Дээд боловсролын байгууллагууд хичээл сонголт баталгаажуулахад урьдчилан төлбөр шаардахгүй, цуцлахгүй байх

Анги дэвших, төгсөлтийн шалгалт, диплом хамгаалалтад оруулах

Төлбөрийн уян хатан нөхцөл сар улирлаар төлөх боломжтой байх

Дотуур байрны төлбөрийг буцаан олгох дараагийн төлбөрт шилжүүлэх зэрэг журамуудыг баталлаа. 

 “Токио-2020” зуны олимпын XXXII наадам хөшгөө нээхэд 99 хоног үлдээд байгаа энэ мөчид Монгол Улсын тамирчдын хувьд спортын 7 төрөлд нийт 21 тамирчин /3Ч3 сагсан бөмбөгийн эмэгтэй баг 4 тамирчин/ Токиог зорихоор эрхээ аваад байна.

Монголчуудын хувьд “Токио-2020” олимпын наадам урд өмнөх олимпын наадмуудаас онцлогтой бөгөөд Монгол Улсын спортын түүхэнд анх удаа багийн төрөлд өрсөлдөнө. Мөн ширээний теннисчид анх удаагаа олимпын наадамд оролцох эрхээ аваад байгаа. Монголын тамирчид үргэлжлүүлээд олимпын эрхийн оноо авах олон улсын хуваарьт тэмцээндүүдэд оролцож “Токио-2020” зуны олимпын наадамд оролцох тамирчдын тоо нэмэгдэнэ.