Bolod.mn сайт долоо хоног бүр нийгэм, улс төрийн амьдралд өрнөсөн онцлох үйл явдлыг тоймлон хүргэдэг билээ. Эдгээр өдрүүдэд Ерөнхийлөгч Х.Баттулга МАН-ыг тараах тухай захирамж гаргаж Улсын дээд шүүхэд хандлаа. Түүнчлэн УИХ-ын гишүүн согтууруулах ундаа хэрэглэсэн үедээ зам тээврийн ноцтой осол гаргаж, Хатуу хөл хорионы дэглэмийн хугацааг тавдугаар сарын 8-ныг хүртэл сунгасан зэрэг явдлуудыг BOLOD.MN сайт онцоллоо.

-УИХ-ын гишүүн Б.Пүрэвдорж 1.31 хувийн согтолттой автомашин жолоодож зам тээврийн ноцтой осол гаргалаа

Энэ сарын 18-аас 19 шилжих шөнийн 00.40 цагийн орчимд ХУД-ийн хоёрдугаар хороонд байх АПУ ХК-ийн хойд уулзварт УНЦ улсын дугаартай, хар өнгийн ниссан теана автомашин зам тээврийн ноцтой осол гаргажээ.

Уг автомашиныг УИХ-ын гишүүн Б.Пүрэвдорж жолоодож, ганцаараа зорчиж явсан бөгөөд өндөр хэмжээний согтолттой байсан гэх мэдээлэл байна. Түүний хамар, завжнаас цус гарснаас өөрөөр ноцтой гэмтэл байгаагүйг эх сурвалж мэдээлэв.

Тэгвэл энэ талаар ЦЕГ-ын хэвлэл мэдээллийн төвийн дарга, хурандаа Б.Баатархүү мэдээлэл өгсөн. Тэрбээр хэргийн газарт бүрэлдэхүүн очиход "Nissan-Teana" маркийн автомашин замын хайс, хашлага мөргөсөн хагас шатсан байдалтай байсныг 105 унтраасан ба уг автомашины жолооч ГССҮТ-д 103-р хүргэгдсэн байсан. Улмаар тухай автомашины жолооч гэх “П” ГССҮТөв дотор драйгер багажаар шалгахад 1.31 хувийн согтолттой гарсан хэмээсэн юм.

-Ерөнхийлөгч Х.Баттулга МАН-ыг тараах тухай захирамж гаргалаа

Монгол Улсын Ерөнхийлөгч Х.Баттулга МАН-ыг тараах тухай мэдэгдэл хийлээ. Тэрбээр "Төрийн эрхийг баригч МАН нь улс төрийн намын үйл ажиллагаанд чанад мөрдөгдөх ёстой төрийн аюулгүй байдлыг сахиж, хуулийг дээдлэн биелүүлэх Үндсэн хуулийн шаардлагыг зөрчиж Үндсэн хуулиар тогтоосон засаг төрийн тогтолцоо нам төрийн тогтолцоонд зүй бусаар шилжүүлж, Монгол Улсын Үндсэний язгуур ашиг сонирхлоо хангах үүргийн өмнө гагцхүү төрийн хуульд захирагдаж, хараат бусаар үйл ажиллагаа явуулах төрийн байгууллагын үүрэг зорилгыг гажуудуулж байна гэлээ.

Тиймээс Үндсэн хуулийн 3 дугаар зүйлийн 1.2 дахь хэсэг, 16 дугаар зүйлийн 10 дахь заалт, 19 дүгээр зүйлийн 1 дэх хэсэг, 30 дугаар зүйлийн 1 дэхь хэсэг, 32 дугаар зүйлийн 2, 33.1 7.1, Улс төрийн намын тухай хуулийн 4.4.2 Үндэсний аюулгүй байдлын тухай хуулийн 3,4,6, 8.2 дугаар заалт зэргийг үндэслэн МАН-ыг тараах нөхцөл бүрдсэнийг тогтоон захирамжилсугай" гэлээ. Улс төрийн намын тухай хуулинд зааснаар бол улс төрийн намыг тараах, татан буулгах эцсийн шийдийг Улсын Дээд Шүүх гаргадаг юм байна.

-“COVID-19 ERSDEL" систем нь ПСР шинжилгээний хариуг үндэслэн таны хажууд халдвартай хүн ойрхон байгааг сануулна

Дэлхийн 60 гаруй улс орны 130 сая гаруй хүн ашиглаж байгаа коронавируст халдвараас урьдчилан сэргийлэх COVID-19 ERSDEL системийг “E-Mongolia”-ийн дэмжлэгтэйгээр Монгол Улсад нэвтрүүлж эхэллээ. COVID-19 ERSDEL систем нь иргэдэд коронавируст халдварт өртсөн байж болзошгүй тухай мэдэгдлийг цаг алдалгүй мэдээлж анхааруулна. Мөн коронавируст халдвартай өвчтөн болон хавьтлыг илрүүлэх, тандах судалгааны ажлыг нь хялбарчлах зориулалттай.

Ухаалаг утастай хүн бүр ашиглах боломжтой. Bluetooth-ээ л асаасан байхад болно.

Bluetooth-ээ асааж, тохиргоо хийсэн бүх хүмүүс бие биендээ хоёр метр ойртоход нэгнийгээ бүртгэж нууцлал бүхий код солилцдог.
Иргэн “Эерэг” гарсан тохиолдолд Google-с мессежээр ирсэн кодыг ашиглан тухайн программд өөрийгөө бүртгэнэ. Зөвхөн иргэдийн утас өөр хоорондоо нууцлал бүхий код солилцож дараа нь ойрын хавьтал болсон тохиолдолд тэдгээр хүмүүст энэ тухай мэдэгдэл очдог. Тухайлбал, ПСР шинжилгээний хариуны код дээр үндэслэн таны хажууд халдвартай хүн ойрхон байгааг сануулж чадна.
Мэдэгдэл авсан тухайн хүн гар утсан дээрээ товч асуумж бөглөж өөрийгөө тусгаарлах эсвэл эмнэлгийн байгууллагад хандах эсэхээ өөрөө шийддэг.
Өөрөөр хэлбэл иргэд цар тахлаас өөрийгөө болон бусдыг хамгаалах боломжийг бүрдүүлж байгаа хамгийн шилдэг шийдэл юм гэж УОК-ын Шуурхай штабаас мэдээллээ.

-Монгол эмч нар цээжний хонхойх гажгийг дурангийн аргаар засах хагалгаа хийдэг боллоо

Улсын гуравдугаар төв эмнэлгийн эмч нар насанд хүрэгчдийн цээжний хонхойх гажгийг дурангийн мэс заслаар “ХОС титанан СУУЛГАЦ” тавих эмчилгээний орчин үеийн дэвшилтэт технологийг эх орондоо энэ сард нэвтрүүллээ.

Уг хагалгааг мэс заслын ерөнхий зөвлөх, МУ-ын Хөдөлмөрийн баатар, Ардын эмч, академич, доктор, профессор Н.Баасанжав, Ерөнхий мэс заслын тасгийн их эмч, МУ-ын хүний гавьяат эмч, клиникийн профессор М.Ганбаатар, Ерөнхий мэс заслын тасгийн их эмч Д.Эрдэнэболд нар болон Цээжний хөндийн мэс заслын багийн хамт олон амжилттай хийсэн байна. Одоогоор хоёр хүнд энэхүү мэс заслыг амжилттай хийж, эмчлүүлэгчдийн биеийн байдал сайн, эмнэлгээс гарч амьдралын хэвийн горимд шилжжээ.

Цээжний хонхойх гажиг засах хос титанан суулгац тавих дурангийн мэс засал нь өвчүүний араар болон өмнө талаар махир металл суулгац байрлуулах замаар цээжний хэлбэрийг засдаг маш жижиг хүрцийн мэс заслын орчин үеийн арга юм.

Энэ төрлийн гажиг болон цээжний хэлбэрийн өөрчлөлтөөс болж өвчтөнд зүрх, уушгины үйл ажиллагааны өөрчлөлт, уушги, зүрхний үйл ажиллагаа хэвийн боловч амьдралын чанарт сөргөөр нөлөөлж буй тохиолдол болон сэтгэл зүйн байдал, нийгмийн харилцаанд сөргөөр нөлөөлж буй үед эмчилгээ хийлгэхийг зөвлөдөг.

Цээжний хонхойх гажгийг засах хамгийн сүүлийн үеийн дэвшилтэт эмчилгээг иргэд эрүүл мэндийн даатгалаар санхүүгийн ямар нэгэн бэрхшээлгүйгээр эх орондоо хийлгэх боломж бүрдлээ.

-ЗГ: Бүх нийтийн өндөржүүлсэн бэлэн байдлын зэргийг тавдугаар сарын 8-ныг хүртэл дахин сунгалаа

Засгийн газрын ээлжит бус хуралдаан болж бүх нийтийн бэлэн байдлын зэргийг 2021 оны 05 дугаар сарын 08-ны өдрийн 06.00 цаг хүртэл сунгах Улсын онцгой комиссын шийдвэрийг дэмжлээ.

Засгийн газраас дөрөвдүгээр сарын 10-25-ныг хүртэл хатуу хөл хориог тогтоох шийдвэр гаргасан.

Хөл хорионы үед халдварын тоо өндөр хэвээр, нас баралт ихсэж байгаа учир хатуу хөл хориог 7-14 хоног сунгах саналаа Эрүүл мэндийн яамнаас гаргажээ. Хөл хорионы хугацаа дуусах дөхөж буй тул хөл хориог сунгах тухай тус яамны саналыг хэлэлцсэн бөгөөд саналыг дэмжиж тавдугаар сарын 8-ныг хүртэл сунгалаа. ЭМЯ-наас хатуу хөл хориог анхнаасаа 14-28 хоног сунгах санал хүргүүлсэн боловч эдийн засагт сөрөг нөлөөтэй хэмээн үзэж 15 хоногоор тогтоосон байдаг.

-АН-ын Ц.Туваан 150 мянган долларын “лобби” гэрээ байгуулсан уу?

УИХ-ын чуулганы өчигдрийн хуралдаанаар Монгол Улсын Үндсэн хуулийн цэцийн 2021 оны 02 дугаар дүгнэлтийг хэлэлцсэн. Үндсэн хуулийн цэцийн Дунд суудлын хуралдаанаас өмнөх болон одоогийн Ерөнхийлөгч нарыг Ерөнхийлөгчийн сонгуульд нэр дэвших нь Үндсэн хуультай зөрчилдөх учир дахин нэр дэвших боломжгүй дүгнэлт гаргасан билээ. Холбогдох байнгын хороодоор уг дүгнэлтийг хэлэлцээд хүлээн авах нь зүйтэй гэж үзээд байгаа юм. УИХ-ын чуулганы хуралдааны үеэр Ц.Мөнх-Оргил АН-ын Ц.Тувааныг АНУ-ын лобби нөлөөллийн бүлэгтэй 50 мянган ам.долларын гэрээ байгуулсан талаар онцолсон.

Түүнчлэн гэрээн дээрх хүчинтэй хугацаа нь 4-р сарын 19-нөөс 6-р сарын 15-ныг дуустал буюу Ерөнхийлөгчийн ээлжит сонгууль дуусгавар болох өдөртэй давхцаж байгаа нь цахим орчинд тарж ихээхэн шүүмжлэл дагуулаад байна.

Тухайн гэрээний талаар УИХ-ын гишүүн Ц.Мөнх-Оргил гишүүн чуулганы үеэр Ц.Туваанаас асуусан ч “АН-д 50 мянган доллар байтугай 50 ам.доллар ч байхгүй” гэдгийг хэлж байсан.

Тухайн гэрээнд гэрээ байгуулсан АНУ-ын компани Ц.Туваан, О.Цогтгэрэл нарын АН-ын зөвлөх үйлчилгээ үзүүлсний төлбөр 50 мянган доллар, хэвлэл мэдээллийн хэрэгслүүдийг худалдаж авахаар 100 мянган долларыг төлбөрийн гэрээнд тусгаж, талууд гэрээнд гарын үсэг зурсан баримт байгаа юм.

-Дөрөвдүгээр сарын 23-наас дархлаажуулалтын ажил хэвийн үргэлжилнэ

Улаанбаатар хотод дархлаажуулалтыг үргэлжлүүлэхээр боллоо. Коронавирусээс урьдчилан сэргийлэх дархлаажуулалтыг 2021 оны 4 дүгээр сарын 23 өдрөөс үргэлжлүүлэхээр болжээ.

Улаанбаатар хотод 120 цэгээр 281 баг гаргаж вакцинжуулалтын ажлыг зохион байгуулахаар бэлтгэл ажлыг хангасан. 2 дахь тунгийн хугацаа нь болсон иргэд болон нэгдүгээр тунд хамрагдаагүй иргэдийг вакцинжуулах бөгөөд таныг хэдний өдөр хаана, аль цэгт вакцинд хамрагдахыг хороо, дүүргээс танд утсаар мэдэгдэж мэдээллийг хүргэнэ.

Хатуу хөл хорионы үед дархлаажуулалтыг зохион байгуулахдаа хүний бөөгнөрөл үүсгэхгүй байх, иргэдийг чирэгдүүлэхгүй ажиллах тал дээр холбогдох байгууллагууд ажиллана.

-Израил иргэдээсээ заавал амны хаалт зүүхийг шаардахаа больжээ

Хүн амынхаа тал гаруй хувийг вакцинжуулалтад бүрэн хамруулаад байгаа Израил улс ням гаргаас эхлэн гадуур явахдаа амны хаалт заавал зүүхийг иргэдээсээ шаардахаа больжээ.

Мэдээж дэлгүүр, худалдааны төвүүд, мөргөлийн газрууд зэрэг олон нийтийн газарт амны хаалтаа заавал зүүх журам хэрэгжсэн хэвээр байгаа ч вакцинаа хамгийн хурдан хэрэглээнд нэвтрүүлж чадсан Израил улсын хувьд ийм зэргийн өөрчлөлт нь коронавирусний цар тахалтай тэмцэх чиглэлд ахиц дэвшил гаргаж буйн тод жишээ болж байна.

Гадуур амны хаалтаа зүүх дүрэм журам Израилд нэг жилийн хугацаанд тасралтгүй хэрэгжсэн. Даваа гарагт тус улс хэвийн гольдрилдоо эргэн орох өөр нэгэн том алхмыг хийсэн нь есдүгээр сараас хойш анх удаа дунд сургуулиудыг нээхээр болсон юм.

“The New York Times” сонины мэдээлснээр, Израилын хүн амын 60 орчим хувь нь вакцины эхний тунгаа хийлгээд байгаа бол 56 хувь хоёр тунг хоёуланг нь хийлгэжээ. Израил нь 9 сая хүн амтай. Үүнээс 16-аас дээш насны иргэдийн 81 хувь нь дархлаажуулалтад бүрэн хамрагдаад байгаа аж.

Тийнхүү богино хугацаанд вакцинжуулалт үр дүнгээ үзүүлснийг Израилын сэтгүүлч Сэм Сокол тайлбарлахдаа, Израил урьдчилан ихээхэн хэмжээний вакцин хүлээн авснаар ийм нөхцөл байдал бүрдсэн юм гэжээ.

-APPLE цоо шинэ бүтээгдэхүүнүүдээ танилцууллаа

APPLE компани цоо шинэ бүтээгдэхүүнүүдээ танилцууллаа

Apple компаний удаан хүлээгдсэн Apple Spring Loaded арга хэмжээ 2021 оны 04-р сарын 20-ноос 21-нд шилжих шөнийн 01 цагт виртуал хэлбэрээр болж өнгөрлөө. Тус арга хэмжээг Apple брэндийн Монгол дахь албан ёсны борлуулагч Sain Electronics Монгол синхрон орчуулгатайгаар шууд дамжуулан хүргэлээ.

Арга хэмжээний үеэр технологийн хорхойтнуудын сонирхлыг татаж, гэнэтийн бэлэг болж задарсан хэд хэдэн бүтээгдэхүүн үйлчилгээг тэд танилцуулсан юм.

Apple Card

Арга хэмжээний эхэнд тэд Apple Card Family-ийг танилцууллаа. Apple Card Family нь 2 хүнд Apple Card-ийг хамтран эзэмших, зээлээ хуваалцах, нэгтгэх боломжийг олгох бөгөөд мөн эцэг эхчүүдэд Apple Card-аа хүүхдүүдтэйгээ хуваалцаж зардлын хязгаарлалт, хяналт хийж, ухаалаг, аюулгүй санхүүгийн зуршилд сургахад туслана гэж тэд онцолжээ.

iPhone 12 болон iPhone Mini

Арга хэмжээний үеэрх бас нэг гайхалтай гэнэтийн бэлэг нь iPhone 12 болон iPhone 12 mini-н хаврын цоо шинэ өнгийг танилцуулсан явдал байлаа. Энэхүү шинэ өнгө нь iPhone 12-ийн хөнгөн цагаан ирмэгийг нарийвчилсан арын шилтэй төгс зохицсон өнгөөр тодотгож өгсөн байна. Хоёр загвар нь хүчирхэг тооцоолох чадвартай гэрэл зургийн функцууд болон хамгийн өндөр чанартай видео бичлэгийг гаргах чадалтай дэвшилтэт хос камерын системтэй, OLED өргөн дэлгэцээр илүү хурц, илүү тод үзэх боломжтой юм. Мөн Apple-ийн бүтээсэн A14 Bionic буюу ухаалаг гар утасны хамгийн хурдан чипийг ашиглан бүтээгдсэн билээ.

BOLOD ДОЛОО ХОНОГИЙН ТОЙМ: Бүх нийтийн өндөржүүлсэн бэлэн байдлын хугацааг дахин сунгаж, Ерөнхийлөгч МАН-ыг тараах захирамж гаргасан ДОЛОО ХОНОГ
Tweet
Bolod.mn