BOLOD.MN вэбсайт өнгөрсөн долоо хоногт нийгэм, эдийн засаг, спорт, улс төрийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Улсын Нэгдүгээр төв эмнэлгийн халдварын бүсэд ажиллаж байсан сувилагч эмэгтэй өндрөөс унасан байдалтайгаар нас барсан харамсалтай хэрэг гарлаа. Мөн МАН МАХН-тай нэгдэн ээлжит Ерөнхийлөгчиййн сонгуульд хамтран оролцохоо мэдэгдлээ. Түүнчлэн УИХ-ын гишүүн С.Ганбаатар МАХН-аас татгалзан, АН-д элсэн орж Ерөнхийлөгчийн сонгуульд өрсөлдөх хүсэлтээ АН-ын сонгуулийн хороонд өгсөн талаарх улс төрийн хачирхалтай мэдээ мэдээллийг BOLOD.MN сайт онцлон хүргэж байна. 

МАХН МАН нэгдлээ 

Энэ сарын 28-ны өдөр МАН-ын Удирдах зөвлөл хуралдаж, МАХН-тай нэгдэх тухай гэрээний төслийг хэлэлцсэн юм. Ийнхүү МАН МАХН-тай нэгдсэн талаар намын удирдлагууд нь мэдэгдлээ. Монгол Ардын Хувьсгалт Намын дарга Н.Энхбаяр “Монгол Улсад хүчин төгөлдөр хэрэгжиж буй хуулийн дагуу УИХ-д суудалтай нам, эвсэл  Монгол Улсын Ерөнхийлөгчийн сонгуульд оролцох эрхтэй.  Бид УИХ-д байгаа 62 суудалтай байгаа нөхөдтэйгээ буюу МАН-тай  угсаа гарал, үүх түүх, үзэл баримтлал нэгтэй. Тиймээс энэ удаагийн Монгол Улсын Ерөнхийлөгчийн сонгуульд МАХН өрсөлдөхийн төлөө биш эвлэлдэх ба2р суурь баримталж оролцоно. Нэг нам болохоор зорьж байж, нөгөө намтайгаа Монгол Улсын Ерөнхийлөгчийн сонгуульд өрсөлдөнө гэдэг утгагүй зүйл. Бидэнд нэр дэвшүүлэх бололцоо байгаа хэдий  ч гэсэн эх орныхоо эрх ашгийг бодож МАН-аас нэр дэвшиж байгаа хүнийг дэмжиж, Монгол Улсын Ерөнхийлөгчийн 2021 оны сонгуульд оролцоно." гэлээ.

МАН-ын Ерөнхий нарийн бичгийн дарга Д.Амарбаясгалан "Нам нэгдэх процесс амжилттай үргэлжилж байгаа. Энэ цаг үед хоёр намын нэгдэх асуудал хэн нэг хүний эрх ашгаас дээгүүр тавигдаж байгаа. Үүнийг ажил хэрэг болгох ажлыг ойрын өдрүүдэд эхлүүлнэ. Хоёр намын зүгээс хамтын ажиллагааны гэрээ байгуулж, намын их, бага хурлуудаа хийж, нэгдэх үйл явцыг ажил хэрэг болгоно." гэлээ.

УИХ-ын гишүүн С.Ганбаатар АН-д элслээ

УИХ-ын гишүүн С.Ганбаатар МАХН болон МАН нэгдэхтэй зэрэгцэн МАХН-аас гарахаа энэ сарын 29-ны өдөр мэдэгдлээ. Гэсэн хэдий ч тэрээр АН-ын гишүүнээр элсэн орсноо мэдээлэв.

Энэ талаар УИХ-ын гишүүн АН-ын даргын сунгаанд ялалт байгуулаад байгаа О.Цогтгэрэл танилцуулан АН-ын гишүүний үнэмлэхээ гардан авлаа.

ИХ-ын гишүүн С.Ганбаатар МАХН-аас татгалзах өргөдлөө өгөхдөө, "Эрх баригчидтай шударга тэмцэж, бие биедээ хань болж, дэм болж явсан МАХН-ын журмын нөхөд, удирдлага, хамт олондоо сайн сайхныг хүсэж байна. УИХ-д Эрдэнэт хотынхоо иргэдийн дуу хоолойг хүргэнэ. МАН-ын 62 суудлыг 63 болго гэж намайг УИХ-ын гишүүнээр сонгож санал өгөөгүй. Эрдэнэт хотынхоо иргэдийн эрх ашгийн төлөө тууштай ажиллах болно" хэмээж байсан юм.

Өчигдрөөс эхлэн улс төрийн нам эвслүүд Монгол Улсын Ерөнхийлөгчид нэр дэвшүүлэх ажил эхэлж байгаа. Улмаар УИХ-ын гишүүн С.Ганбаатар Монгол Улсын Ерөнхийлөгчийн сонгуульд нэр дэвших материалаа АН-ын дотоод сонгуулийн хороонд өглөө.

УИХ-ын гишүүн Ц.Анандбазар Булган аймгийн залуучуудын өгсөн шаардлагад “сүрдүүлсэн” хариу өглөө

Улаанбаатар хот дахь Булган аймгийн Залуучуудын Холбоо нь Булган аймгаас УИХ-д сонгогдсон гишүүн Ц. Анандбазарт шаардлага хүргүүлсэн. Тус ШААРДЛАГАД “Ц.Анандбазар гишүүний холбогдоод буй хэрэг нь Булган аймгийн нийт ард иргэдийн нэр хүндийг унагаагаад зогсохгүй “Анхны 1000 хүн хүчирхийлэгчтэй аймаг гэсэн шившигтэй тодотголыг нийгэмд тарааж, улс даяар шуугьж байгаа нь Булган аймгийн залуучуудын хувьд ёс зүйгүй доромжлол болж байна" гэж үзжээ. Тиймээс энэ асуудлыг хуулийн байгууллагаар нэн яаралтай шалгуулж, үнэн болох нь тогтоогдвол гишүүний бүрэн эрхийг эгүүлэн татах гарын үсэг цуглуулах, бизнесийн үйл ажиллагааг нь түдгэлзүүлэх ажлыг санаачлан зохион байгуулахаар болсныг мэдэгдсэн талаар дурдсан байв.

Харин уг шаардлагын хариуд УИХ-ын гишүүн Ц.Анандбазар Булган аймгийн Залуучуудын холбоог үл хүндэтгэсэн, тамга тэмдэггүй албан бичгийн стандартад хангахгүй албан бланк ашиглаагүй байгаа нь асуудалд хэр зэрэг ач холбогдол өгч байгаа нь харагдаж байна. Түүнчлэн энэхүү хариу нь бүхэлдээ Булган аймгийн залуучууд, ард иргэдийг үл хүндэтгэсэн, доромжилсон хандлага, айлган сүрдүүлсэн утга агуулгатай байгаа бөгөөд бидний тавьсан шаардлагыг үл хүлээн авахаа илэрхийлж байна гэж бид ойлголоо. Иймээс бид цаашид дараа дараагийн арга хэмжээнүүдийг авч ажиллахаа мэдэгдэж байна хэмээсэн шаардлагад онцолсон байгаа юм.

М.Анхцэцэг Азийн Аваргаас хүрэл медаль хүртлээ

"Ташкент-2021" хүндийг өргөлтийн Азийн аварга шалгаруулах тэмцээний эмэгтэйчүүдийн 87 кг-ын жингийн тэмцээн өнгөрсөн баасан гарагт болж өндөрлөлөө.

Энэ жинд манай улсаас ДАШТ-ий хошой хүрэл медальт ОУХМ Мөнхжанцангийн Анхцэцэг хүрэл медаль хүртлээ. Тэрбээр огцом өргөлтөөр 111 кг, түлхэлттэй өргөлтөөр 136 кг өргөж, нийлбэр дүнгээр 273 кг-ын амжилтаар мөн хүрэл медаль хүртсэн байна.

Анх удаа Ази эмэгтэй Оскараас шилдг эмэгтэй шагналыг хүртлээ

Оскарын 93 дахь удаагийн кино наадам энэ сарын 26-ны өдөр Лос Анжелес дахь "Долби" театрт болон онлайн хосолсон хэлбэрээр зохиогдлоо.  Оскарын шагнал гардуулах ёслол цар тахлын улмаас гурав дахь жилдээ дараалан хөтлөгчгүйгээр зохион байгуулагдлаа.

Энэ жил шагналд нэр дэвшигчийн тоогоор арван төрлөөр өрсөлдөж буй Америкийн найруулагч Дэвид Финчерийн “Mank” кино тэргүүлжээ. Үүнээс гадна “Netflix” компанийн төслүүд хоёр дахь жилдээ дараалан хамгийн олон төрөлд нэр дэвшлээ. Тус компаниас гаргасан кинонуудаас Оскарын шагналд 35 удаа нэр дэвшсэн бол удаах байранд “Disney”, гуравдугаарт “Amazon” жагсаж байлаа.

Оскар нь 24 төрөлд шагнал олгодог ёслол юм. Шагнал гардуулах ёслол Covid-19 цар тахлын улмаас шинэчилсэн хэлбэрээр хэд хэдэн газар нэгэн зэрэг явагдаж байгаагаараа онцлог боллоо.

Хүчит шонхор захыг 29 сая төгрөгөөр торгох шийдвэр гаргалаа

“Хүчит шонхор” ХХК бүх нийтийн бэлэн байдлын зэрэгт шилжүүлсэн хугацаанд тодорхой шалтгаангүйгээр махыг худалдаалахгүй, төөрөгдүүлэх, үгсэн хуйвалдаж үнэ тохирч худалдаалан НОЁЛОХ үйл ажиллагаа явуулж, махны үнийг зохиомлоор хөөрөгдүүлсэн.

Мөн дамлан худалдаалж буй нь нотлох баримтаар тогтоогдсон тул жилийн борлуулалтын орлогын 4 хувиар буюу 29 140 676 (хорин есөн сая нэг зуун дөчин мянга зургаан зуун далан зургаан) төгрөгөөр торголоо гэж Шударга өрсөлдөөн, хэрэглэгчийн төлөө газраас мэдээлэв.

Халдварын бүсэд ажиллаж байсан 42  настай сувилагч эмэгтэй өндрөөс унаж амиа алдлаа

Энэ сарын 29-ны шөнө Улсын нэгдүгээр төв эмнэлгийн халдварын голомтод ажиллаж байсан сувилагч эмэгтэй өндрөөс унасан байдалтайгаар нас барсан харамсалтай хэрэг гарлаа. Хэргийн талаар тодруулбал, Тус эмнэлгийн зүүн жигүүрт коронавирусийн халдвартай иргэдийг хүлээн авч, эмчилж  байгаа аж. Энэ хэсэгт буюу халдварын улаан бүсэд ажиллаж байсан тус эмнэлгийн 42 настай сувилагч эмэгтэй өндрөөс унаж нас барлаа. Талийгаач эмэгтэй 14 хоногийн хугацаанд өвчтөнүүдтэй хамт тусгаарлагдаж, эмчилгээ үйлчилгээ үзүүлэх багт ажиллаж байжээ.

Энэ талаар Цагдаагийн ерөнхий газрын Хэвлэл мэдээллийн төвийн дарга, хурандаа Б.Баатархүүгээс тодруулахад “Халдварын бүсэд ажиллаж байсан 42 настай сувилагч Э гэх эмэгтэй өндрөөс унаж амиа алдсан нь урьдчилсан байдлаар тогтоогдсон. Сүхбаатар дүүргийн нэгдүгээр хороо “УНТЭ-ийн зүүн жигүүрийн зургаан  давхраас хүн унаж нас барлаа” гэсэн мэдээлэл дөрөвдүгээр сарын 29-ний 00:23-д цагдаагийн байгууллагад ирсэн. Энэ хэргийн Сүхбаатар дүүргийн Цагдаагийн нэгдүгээр хэлтэс шалгаж байна. Амиа алдсан хохирогч тус эмнэлгийн сувилагч ажилтай хүн байсан бөгөөд хэргийн шалтгаан нөхцөлийг тодруулахаар цагдаагийн байгууллага ажиллаж байна. Халдварын бүс учраас шууд ороод мэдүүлэг, тайлбар авах боломжгүй байна. Урьдчилсан байдлаар талийгаач зургаан давхраас унасан байж болзошгүй байгаа" гэх мэдээллийг өглөө.

Хүүхдийг зодож шийтгэхийн эсрэг олон улсын өдөр тохиолоо

Өчигдөр буюу дөрөвдүгээр сарын 30-ны өдөр Хүүхдийг зодож шийтгэхийн эсрэг Олон улсын өдөр тохиож байна.  Хүүхдийн бие махбод, сэтгэл санааны шийтгэлийг таслан зогсоохын чухлыг олон нийтэд сануулах энэ өдрийг 2001 оноос хойш дэлхий дахинд, харин 2006 оноос хойш Монгол Улсад Хүүхдийг ивээх сангийн санаачилгаар тэмдэглэж байна. Энэ өдөр хүүхдийг зодож шийтгэхийг таслан зогсооход чиглэсэн нөлөөллийн ажлууд зохион байгуулж, хүүхэд хүмүүжүүлэх эерэг аргуудыг эрэлхийлэхийг эцэг эх, асран хамгаалагч нарт уриалж сануулж ирсэн билээ.

2021 оны хөл хорионы энэ цаг үед Хүүхдийг зодож шийтгэхийн эсрэг Олон улсын өдрийг Хөдөлмөр, нийгмийн хамгааллын яам, Гэр бүл, хүүхэд, залуучуудын хөгжлийн газар, Хүүхдийг ивээх сан хамтран “Хүүхдээ эерэг аргаар хүмүүжүүлье” уриан дор цахим аяныг зохион байгууллаа. Цахим аяны хүрээнд хүүхдээ эерэг аргаар хүмүүжүүлэх аргыг заан сурталчилсан постерууд боловсруулан цацаж байгаа бөгөөд эцэг, эхчүүдэд түгээмэл тохиолддог бэрхшээлтэй асуудлыг шийдвэрлэх теле зөвлөгөөг хүргэлээ.

Энэ хүрээнд тухайн өдөр зохион байгуулагч байгууллагуудын нийгмийн сүлжээний хуудсаар дамжуулан үлгэр жишээ гэр бүлүүдийн хүүхдээ хүмүүжүүлж буй арга туршлагаа хуваалцсан юм. Аяныг 2021 оны дөрөв, тавдугаар сард зохион байгуулах бөгөөд нийт 300,000 орчим эцэг эх, асран хамгаалагчдад хүмүүжлийн эерэг аргын мэдээ, мэдээллийг хүргэхээр зорьж байгаа аж.

Монгол Улс нь 2016 онд Хүүхдийн эрхийн тухай болон Хүүхэд хамгааллын тухай хуулийг батлан гаргаснаараа нийгмийн бүх орчинд хүүхдийг зодож шийтгэхийг хуулиар хориглосон дэлхийн 49 дэх улс болсон юм.

Хүүхэд хамгааллын тухай хуулийн дагуу “Эцэг, эх, хууль ёсны асран хамгаалагч, хамаатан садан, багш сурган хүмүүжүүлэгч нь хүүхдийг өсгөн хүмүүжүүлэх, боловсрол олгох, асран хамгаалахдаа хүчирхийллээс ангид хүмүүжлийн арга хэрэглэнэ” хэмээн заасныг сануулан, хүүхдээ эерэг аргаар хүмүүжүүлэхийг уриалж байна.