BOLOD.MN сайт өнгөрсөн долоо хоногт улс төр, нийгэм, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд Төрт нийгмийн нэрт зүтгэлтэн Г.Зориг агсны хэрэг холбогдож 20 жилийн хорих ял авсан Б.Содномдаржаа, Т.Чимгээ нарыг батлан даалтанд гаргалаа. Түүнчлэн төв талбайд өлсгөлөн зарлаад байсан АН-ын гишүүдийн хүсэлтээр УИХ-ын Ажлын хэсэг гарч Ардчилсан нар доторх асуудлыг хэлэлцэн шийдвэрлэх юм.

-       Тэтгэвэрийн зээлгүй байсан ахмадуудад 1 сая төгрөгийн үнэт цаасыг олгож эхэллээ

Засгийн газраас 2020 нэгдүгээр сард ахмад настны тэтгэвэрийн зээлийг нэг удаа тэглэх шийдвэр гаргаж, тэтгэвэрийн зээл авсан 228,5 мянган ахмадуудын зээлийг 763 тэрбум төгрөгөөр тэглэсэн. Харин тэтгэврийн зээл аваагүй ахмадуудад сая төгрөгийн үнэт цаас олгох болсон. Уг ажил тавдугаар сарын 10-ны өдрөөс эхлэн олгогдож эхэлсэн. Ахмадуудад олгох үнэт цаасыг "Эрдэнэс Монгол" ХХК  тавдугаар сарын 21-нээс мөнгөжүүлнэ. 

Тодруулбал, 194 мянган ахмад тэтгэврийн зээлгүй, 44 мянган ахмад нэг сая хүртэлх төгрөгийн зээлтэй учраас салхитын алт, мөнгөний ордыг эдийн засгийн эргэлтэд оруулж, 2020 онд  өндөр настнуудын тэтгэврийн зээлийг нэг удаа чөлөөлсөн бол энэ удаад ч мөн адил тэтгэврийн зээлгүй ахмадуудад 216 тэрбум төгрөгийг  олгох юм. Харин 2021 оны тавдугаар сарын 21-ний өдрөөс эхэлж мөнгөжүүлэх хуулийн дагуу 194 мянган ахмадад 184 тэрбум төгрөгийн үнэт цаас олгогдох буюу дансанд нь орно. Харин нэг сая төгрөгөөс доош зээлтэй байсан 44 орчим ахмадад нэг сая төгрөгийн зөрүү дээр нь 21.2 тэрбум төгрөгийн нөхөн олговор олгогдох аж. 

Мөн 2019 оны арванхоёрдугаар сарын 31-ний өдрөөс хойш нас барсан хүмүүсийн ар гэрт нь  энэ үнэт цаас өвлөгдөх зохицуулалттай.  Өөрөөр хэлбэл, Нийгмийн даатгалын байгууллагаар дамжуулан тухайн хүмүүст олгогдох ёстой байсан  үнэт цаасыг өвлөн авах  хүмүүсийн дансанд байршуулах зэрэг ажлын зохион байгуулалт хийнэ" гэдгийг Хөдөлмөр, нийгмийн хамгааллын сайд А.Ариунзаяа мэдээллээ.

-       Нэр дэвшигчээр бүртгэж, үнэмлэх олгох асуудлыг хэлэлцэн шийдвэрлэлээ

Монгол Улсын Ерөнхийлөгчийн сонгуулийн тухай хуулийн 28 дугаар зүйлийн 28.6-д “Сонгуулийн ерөнхий хороо нэр дэвшигчийн баримт бичгийг хүлээн авах хугацаа дууссанаас хойш гурав хоногийн дотор бүртгэх эсэх асуудлыг шийдвэрлэж тогтоол гаргана” гэж заасны дагуу Сонгуулийн ерөнхий хороо 2021 оны 5 дугаар сарын 07-ны өдөр хуралдаж нэр дэвшигчийг бүртгэж, үнэмлэх олгох асуудлыг хэлэлцэн шийдвэрлэжээ.

Нэр дэвшигчид үнэмлэх олгох, нийтэд мэдээлэх ажлыг Монгол Улсын Ерөнхийлөгчийн сонгуулийн тухай хуулийн 28 дугаар зүйлийн 28.7-т “Нэр дэвшигчийг бүртгэсэн тухай шийдвэр гарсан бол Сонгуулийн ерөнхий хороо нэр дэвшигчийн үнэмлэхийг санал авах өдрөөс 16 хоногийн өмнө нэг өдөр олгож, нийтэд мэдээлнэ” гэж заасны дагуу энэ сарын 24-ний өдөр зохион байгуулах юм байна.

-       Шилдэг иргэн 8.7 тэрбум төгрөгийн татвар төлжээ

Монголын татварын албанаас жил бүрийн тавдугаар сарын эхний хоёр дахь долоо хоногт “Татвар төлөгчдийн өдрүүд”-ийг зохион байгуулж шилдэг татвар төлөгчдийг тодруулдаг. Өнгөрсөн онд татварын алба 5.6 их наяд төгрөгийн төсвийн орлогыг бүрдүүлэх зорилготой ажилласан ч 5.4 их наяд төгрөгийн орлогыг бүрдүүлсэн байна. Татварын албаны мэдээлснээр “Энэ жил хамгийн их татвар төлсөн, хамгийн их ашигтай ажилласан болон хамгийн их ажлын байрыг хадгалсан гэсэн гурван номинацаар татвар төлөгчдийг шалгаруулсан. Татварын багц хууль шинээр хэрэгжсэнтэй холбоотойгоор татвар төлөгчдийг том, дунд, жижиг, бичил гэсэн дөрвөн үндсэн төрөлд хувааж тохирсон татварын үйлчилгээг үзүүлэх эрх зүйн боломж бүрдсэн юм. Үүний хүрээнд төрөл тус бүрээс шилдэг таван татвар төлөгчдийг шалгаруулсан. Мөн шилдэг татвар төлөгч арван иргэнийг шалгаруулсан байгаа. “Татвар төлөгчдийн өдрүүд”-ийн хүрээнд бага, дунд ангийн сурагчдад зориулан татварын сургалтыг зохион байгуулахаар бэлтгэсэн” гэв.

Шилдгүүдийг дурдвал, Хан-Уул дүүргийн иргэн Ж.Оджаргал 8.738.9 сая төгрөгийн татвар төлснөөр 2020 оны шилдэг татвар төлөгч иргэнээр шалгарсан байна. Мөн үндсэн дөрвөн төрөл тус бүрд том татвар төлөгч төрөлд “Skynetworks”шалгарсан бол дунд сегментэд “Барилга Архитектур ХХК” шалгарсан байна. Харин жижиг сегментэд “Хаан групп”, бичил сегментэд “Лимон фарм” тус тус шалгарчээ. 

-       МАН, АН-ын бүлгийн гишүүдийн хамтарсан Ажлын хэсэг байгуулжээ

УИХ дахь МАН болон АН-ын бүлгүүдийн санал, улс төрийн зөвшилцөлд үндэслэн УИХ-ын дарга Г.Занданшатар захирамж гаргаж, Ажлын хэсэг байгууллаа. Ажлын хэсгийн ахлагчаар Ц.Мөнх-Оргил, Дэд ахлагчаар Н.Ганибал нар ажиллах бөгөөд УИХ-ын гишүүн Ж.Батсуурь, Ц.Мөнхцэцэг, Ц.Сандаг-Очир, Ц.Туваан нар бүрэлдэхүүнд нь орсон байна. Тус ажлын хэсэг УИХ дахь АН-ын бүлгийн гишүүд өлсгөлөн зарласнаас үүдсэн улс төрийн нөхцөл байдалтай холбогдуулан зарим хууль тогтоомжийн биелэлтийг хянан шалгах, санал дүгнэлт боловсруулах үүрэгтэй ажиллах юм.

Ажлын хэсгийн анхны хуралдаан өнөөдөр болж, зохион байгуулалт, үйл ажиллагааны чиглэл, хамрах хүрээ, анхаарах асуудлын талаар саналаа солилцож, ажлын төлөвлөгөө гаргах, холбогдох байгууллагаас мэргэжлийн хүмүүсийг оролцуулж, мэргэжил, арга зүйн туслалцаа авах нь зүйтэй гэж үзэв.

-       УИХ-ын гишүүн Ц.Анандбазарыг МАН-ын гишүүнчлэлээс түтгэлзүүллээ

Охид эмэгтэйчүүдийг бэлгийн дарамтанд оруулсан хэрэгт холбогдоод буй УИХ-ын гишүүн Ц.Анандбазарыг МАН-ын гишүүнчлэлээс түтгэлзүүлэх асуудал яригдсан талаар МАН-ын дарга У.Хүрэлсүх хэлсэн. Тэгвэл өнөөдөр 12:00 цагт МАН-ын Хяналтын хороо хуралдаж Ц.Анандбазарыг МАН-аас нь түдгэлзүүлэх эсвэл хөөх асуудлыг хэлэлцжээ. Хуралдаанаар Ц.Анандбазарыг намын гишүүнчлэлээс чөлөөлөхөөр шийдвэрлэсэн байна. Харин одоогоор Ц.Анандбазарыг хохирогч гэгдээд буй хүмүүсийн гаргасан гомдлын дагуу цагдаагийн байгууллага шалгаж байгаа аж.

-       Хүүхдийн баярыг тэмдэглэхгүй, арга хэмжээ зохион байгуулахгүй

Нийслэлийн удирдах ажилтнуудын шуурхай зөвлөгөөн өнөөдөр боллоо. Энэ үеэр Нийслэлийн Засаг дарга бөгөөд Улаанбаатар хотын Захирагч Д.Сумъяабазар үүрэг, даалгавар өглөө. Тухайлбал, Улсын онцгой комиссын дэргэдэх эрдэмтдийн зөвлөлийн санал, зөвлөмжийг үндэслэн “Олон улсын хүүхдийн эрхийг хамгаалах өдөр”-ийг улсын хэмжээнд нийтээр тэмдэглэхгүй, тухайн өдөр үзэсгэлэн, худалдаа, олон нийтийг хамруулсан арга хэмжээ зохион байгуулахгүй байхад анхаарч ажиллахыг үүрэг болголоо.

-       Монголд анх удаа Минж тав ихэрлэсэн тохиолдол гарлаа

Туул голын сав газрын экологийн нөхцөлийг сэргээх зорилгоор 2012 оноос манай улс минж нутагшуулж эхэлсэн. Өнөөдрийн байдлаар 57 минжийг Туул голын эх болон түүний цутгал Заан, Тэрэлж голуудад нутагшуулаад байгаа юм.

Дөнгөж төрсөн дүдрийн биеийн жин дунджаар 540-670 грамм байдаг бол тав ихэрлэсэн дүдрүүд 540-570 грамм гарчээ. Минж амьдрах орчноо өөрөө бүрдүүлдэг, маш цэвэрч амьтан тул идэш, тэжээлийн тал дээр чухал анхаарал хандуулж, Биологийн хүрээлэнгийн судалгаанд тулгуурлан, алим, лууван болон чихрийн манжин, улаан буудай зэрэг тэжээлээр өдөрт зургаан удаа хооллодог байна. Минж нутагшуулах үржүүлгийн байрны температурыг өвлийн цагт +8 хэмээс буулгахгүй байх, зуны цагт салхи авахуулахгүй, нарны хэт туяа оруулахгүй зэрэг нарийн арчилгаа хэрэгтэй байдаг аж. Минж нь голын усны түвшнийг нэмэгдүүлэх замаар амьдарч буй орчныхоо байгалийн тэнцвэрт байдлыг хангадаг, биологийн олон янз байдлыг нэмэгдүүлэхэд онцгой ач холбогдолтой амьтан юм.

-       Багахангайн хоёрдугаар хорооноос тус хороог бүрэн устгах хэмжээний тэсрэх бөмбөг олжээ

Багахангай дүүрэгт айлын хашаанаас олдсон байлдааны зориулалттай тэсрэх бөмбөгийг устгаж, аюулгүй болгожээ. Тодруулбал, энэ сарын 2-ны өдөр Багахангай дүүргийн хоёрдугаар хороонд айлын хашаанд байлдааны зориулалтай бөмбөг байна гэх мэдээлэл Цагдаагийн байгууллагад иржээ. Уг мэдээллийн дагуу тус дүүргийн цагдаагийн хэлтэс бөмбөгийг хамгаалалтад авч, аюулгүй байдлыг хангасан бөгөөд өнөөдөр буюу тавдугаар сарын 11-нд Зэвсэгт хүчний 084 дүгээр ангийн зургаан хүний бүрэлдэхүүнтэй устгалын бүлэг айлын хашаанаас бөмбөгийг тээвэрлэн суурин газраас 5 километр орчим зайд аваачин аюулгүй болгосон байна.

Тус бөмбөг нь ПАБ-150 загварын байлдааны зориулалтай нисэх онгоцных бөгөөд хөнөөлийн радиус нь нэг километр буюу 2 дугаар хорооны хэсгийг бүрэн устгах чадвартай байсан гэж Багахангай дүүрэг дэх Цагдаагийн хэлтэсээс мэдээлэв.

-       Даваа гарагаас эхлэн Нийслэлийн, төр захиргааны ажил 08.00 цагт эхэлж, 17.00 цагт тарна

Нийслэлийн төр, захиргааны байгууллагуудын ажлын цагийн хуваарьт зохицуулалт хийх тухай Нийслэлийн Засаг даргын захирамж гарлаа.

Захирамжаар авто замын ачааллыг бууруулах зорилгоор нийслэлийн төр, захиргааны байгууллагын ажил эхлэх, тарах цагийн хуваарьт өөрчлөлт оруулсан юм.  Тодруулбал, ирэх даваа гараг буюу тавдугаар сарын 17-ноос наймдугаар сарын 31-н хүртэл нийслэлийн төр, захиргааны байгууллагын ажил 08:00 цагт эхэлж, 17:00 цагт тарна.

Энэ цагийн хуваарийг нийслэл, дүүргийн ИТХ-ын ажлын алба, нийслэл, дүүрэг (хороо)-ийн ЗДТГ, Улаанбаатар хотын Захирагчийн ажлын алба, харьяа газар, Нийслэлийн Засаг даргын хэрэгжүүлэгч агентлаг, орон нутгийн өмчит үйлдвэрийн газрууд мөрдөх юм.

-       Б.Содномдаржаа, Т.Чимгээ нарыг батлан даалтаар гаргалаа

Төр нийгмийн зүтгэлтэн С.Зоригийн амь насыг хөнөөсөн хэргээр яллагдсан Ц.Амгаланбаатар, Т.Чимгээ, Б.Содномдаржаа нарыг эрүүдэн шүүсэн байж болзошгүй нөхцөл байдал шинээр үүссэн. Учир нь ТЕГ-ын дарга асан Б.Хурц нарыг бусдын эрүүдэн шүүсэн хэрэгт буруутган ялласан юм. Улсын дээд шүүхээс тогтоол, магадлалыг хүчингүй болгож, хэргийг нэмэлт хэрэг бүртгэлт, мөрдөн байцаалт хийлгэхээр прокурорт буюу шүүхийн шинэчилсэн хэлэлцүүлэгт буцаасан байна. Хяналтын шатны шүүхээс Б.Содномдаржаа, Т.Чимгээ нарыг батлан даалтад гаргахаар шийдвэрлэсэн бол Ц.Амгаланбаатарын өмнө нь үйлдсэн гэмт хэргийн шийтгэлийн хугацаа үргэлжилж байгаа юм. Өмнөх шатны шүүхээс 2017 оны наймдугаар сарын 4-ний өдрийн 185 дугаар тогтоолоор Ц.Амгаланбаатарт 20, Б.Содномдаржаад 20, Т.Чимгээд 20 жилийн хорих ял оноож, ялыг хаалттай дэглэмтэй хорих ангид эдлүүлэх шийдвэр гаргаад байсан юм.

Үүнтэй холбогдуулан прокурорын байгууллагаас нууцын зэрэглэлтэй дүгнэлт дээд шүүхэд хүргүүлж, уг дүгнэлтийг өнөөдөр энэ сарын 14-ны өдөр Улсын дээд шүүхэд хэлэлцжээ. Улмаар Т.Чимгээ, Б.Содномдаржаа нарыг батлан даалтад гаргах шийдвэр гаргасан юм.

-       Э.Ананд хүү эмчилгээний зардлаа бүрдүүлж, БНСУ-ыг зорьлоо

Найман настай Э.Ананд хүү элэг нэгт Монголчуудынхаа цуглуулсан хандиваар эмчилгээгээ хийлгэхээр болж өнөөдөр БНСУ-ыг зорьлоо.  Хүү багана нурууны түрж ургасан хүнд хэлбэрийн хавдартай болох нь тогтоогдсон бөгөөд бүсэлхийнээс доош мэдээгүй болсон нь Монголд бүрэн эмчлэх боломжгүй байсан юм. Түүний ээж гадны хэд хэдэн томоохон эмнэлэг рүү хүсэлт өгсний хүчинд БНСУ-ын Soon chun hyang seoul university hospital эмнэлэгт эмчлүүлэхээр болсон. 

Э.Ананд хүүгийн хагалгааны зардлыг цуглуулахын тулд Монгол Улс даяар хандивын аян зохион байгуулснаар хүүгийн эмчилгээний зардал болох 389 сая төгрөгийг маш хурдтайгаар бүрдүүлж чадсан билээ. Одоогийн байдлаар хүүгийн эмчилгээний зардал цугласан хэдий ч БНСУ-д ар гэрийнхэнтэй удаан хугацааны туршид сууршин эмчилгээ хийлгэх учраас эмчилгээний төлбөрөөс гадна тооцоолоогүй зардлууд их гарахаар байгаа аж. Тиймээс Монголчуудаасаа тусламжийн гараа сунгаж, Монголын ирээдүй болсон бяцхан хүүд амьдрал бэлэглэж, хандивын гараа сунгаарай хэмээн уриалж байна.

-       Итали эмэгтэйд санамсаргүй байдлаар зургаан тун вакцин тарьжээ

Италид “Pfizer-BioNTech”-ийн “COVID-19”-ийн вакциныг санамсаргүйгээр зургаан тунг хийлгэсэн залуу эмэгтэйн биеийн байдлыг хянаж байна. Тус улсын олон нийтийн хэвлэл мэдээллийн хэрэгслүүдийн мэдээлснээр, 23 настай эмэгтэйг төв нутгийн Тоскана мужид эмнэлгийн хяналтад оруулжээ.

“Эмэгтэйд дусал залгаж, парацетамол уулгасан бөгөөд биеийн байдал нь сайн байна” гэж “AGI” агентлаг мэдээлсэн байна. Сувилагч түүнд нэг тун вакцин тарих гэж байсан боловч алдаа гаргаж, зургаан тунтай тэнцэх нэг шил вакциныг бүхлээр нь тарьчихжээ. “Pfizer”-ийн вакцины тунтай холбоотой өмнөх судалгаануудаар дээд тал нь ердөө дөрвөн тунг тарьж байсныг “AGI” мөн мэдээлжээ. Иймээс зургаан тун хийлгэсэн хүний тухай мэдээлэл байхгүй тул эмэгтэйн биеийн байдлыг сайтар ажиглаж байгаа гэнэ. “Pfizer-BioNTech”-ийн вакцины тунг хэтрүүлэн тарьсан тохиолдол өмнө нь Герман, Австрали, АНУ-д бүртгэгдэж байжээ.