BOLOD.MN сайт ням гараг бүр өнгөрөгч өдрүүдэд улс төр, нийгэм, эдийн засгийн хүрээнд өрнөсөн үйл явдлуудыг тоймлон хүргэдэг уламжлалтай. Эдгээр өдрүүдэд Монгол Улсын Ерөнхийлөгчийн ээлжит сонгуулийн сурталчилгаа албан ёсоор эхэлж, нэр дэвшигчид СЕХ-оос үнэмлэхээ гардан авлаа. Түүнчлэн Засгийн газрын хуралдаанаар хэд хэдэн онцлох сэдвийн асуудлыг хэлэлцэн шийдвэрлэв. Мөн манай улсын арилжааны банкуудаас хамгаалалт хамгийн сайн хэмээн иргэдийн итгэлийг олсон Худалдаа хөгжлийн банкнаас хоёр сая гаруй ам.доллар луйвардсан ноцтой хэрэг энэ сарын 25-ны өдөр гарлаа. Эдгээр болон бусад үйл явдлын тойм мэдээллийг уншигч та бүхэнд хүргэж байна. 

• Найм дахь удаагийн ЕРӨНХИЙЛӨГЧИЙН СОНГУУЛИЙН СУРТАЛЧИЛГАА албан ёсоор эхэллээ

Монгол Улсын 2021 оны Ерөнхийлөгчийн ээлжит сонгууль ирэх зургаадугаар сарын 09-нд болно. Харин тавдугаар сарын 24-өөс буюу өнгөрсөн даваа гарагаас сонгуулийн сурталчилгаа албан ёсоор эхэлж байна. Энэ удаагийн Ерөнхийлөгчийн ээлжит сонгуульд МАН-аас Ерөнхий сайд асан, УИХ-ын гишүүн, МАН-ын дарга У.Хүрэлсүх, АН-аас УИХ-ын гишүүн асан С.Эрдэнэ, ХҮН-аас Д.Энхбат нар нэр дэвшиж байгаа юм. Тэгвэл тэд өнгөрсөн даваа гарагт Сонгуулийн ерөнхий хорооноос нэр дэвшигчийнхээ үнэмлэхийг гардан авч, сонгуулийн сурталчилгаа эхэлсэн юм. МАН-аас нэр дэвшиж буй У.Хүрэлсүх “Баялагтаа эзэн Монгол”, АН-аас нэр дэвшигч С.Эрдэнэ “Дарангуйлалгүй Монгол”, “Зөв хүн электорат” намаас нэр дэвшиж буй Д.Энхбат “Монгол чадна” уриатайгаар сонгуулийн сурталчилгаагаа эхлүүлсэн. Хуульд зааснаар найм дахь удаагийн Монгол Улсын Ерөнхийлөгчийн ээлжит сонгуулийн сурталчилгаа 15 хоног үргэлжлэн зургадугаар сарын 8-ны 12.00 цагт дуусах учиртай юм. Улмаар Ерөнхийлөгчийг сонгох санал хураалт зургаадугаар сарын 9-нд 07.00-22.00 цагийн хооронд болох юм. Харин гадаад улсад оршин суугаа иргэдийн саналыг тавдугаар сарын 30, 31-ны өдрүүдэд цахим хэлбэрээр авах бол зөөврийн битүүмжилсэн хайрцгаар санал өгөх иргэдийн саналыг зургаадугаар сарын 8-нд авах юм. 

• АН-ыг сонгогчдыг төөрөгдүүлсэн мэдээлэл олон нийтэд өгөхгүй байх хариуг СЕХ-оос өглөө

Сонгуулийн ерөнхий хороо Ардчилсан намаас 2021 оны 5 дугаар сарын 20, 21-нд ирүүлсэн шаардлага, албан хүсэлтийн хариуг хүргүүллээ. Тус намаас ирүүлсэн албан хүсэлтийг үндэслэн Сонгуулийн Ерөнхий Хороо энэ сарын 21-ний өдөр Нийслэлийн прокурорын газарт хандан “Монгол Улсын Их Хурлын болон Аймаг, нийслэл, сум, дүүргийн иргэдийн Төлөөлөгчдийн Хурлын 2020 оны ээлжит сонгуульд хэрэглэсэн санал тоолох төхөөрөмжийн ажиллагаанд хөндлөнгөөс нөлөөлсөн эсэх асуудлаар гомдол, мэдээлэл гаргасан эсэх, гаргасан бол хэрхэн шийдвэрлэсэн талаар Ардчилсан нам болон Сонгуулийн ерөнхий хороо, олон нийтэд мэдээлэл өгөх”-ийг хүссэн юм.Нийслэлийн Прокурорын газраас “Гомдлын дагуу холбогдох мөрдөн шалгах ажиллагааг явуулахад сонгуулийн санал тоолох төхөөрөмжийн программ хангамжийн үндсэн серверт гаднаас хандалт, халдлага хийх, мэдээлэл өөрчлөх, устгах техникийн боломжгүй болох нь тогтоогдсон”, уг асуудалд холбогдох этгээдүүд бусдыг төөрөгдүүлж, бусдын эд хөрөнгийг авахыг завдсан үйлдлийн талаар олон нийтэд мэдээлсэн тухай хариуг ирүүлсэн.

Сонгуулийн ерөнхий хороо нь Монгол Улсын Ерөнхийлөгчийн сонгуулийн тухай хууль, Сонгуулийн автоматжуулсан системийн тухай хууль, Монгол Улсын Их Хурлын тогтоолын дагуу сонгууль зохион байгуулах үйл ажиллагаанд санал тоолох төхөөрөмжийг хэрэглэх бэлтгэл ажлыг хийж, нээлттэй, ил тод байдлын зарчмыг баримталж, уг төхөөрөмжийн үйл ажиллагаа, эх код зэргийг шалгах, танилцах боломжийг хөндлөнгийн ажиглагч, төрийн бус байгууллагын төлөөлөл, сонгуульд оролцох нэр дэвшигчээ бүртгүүлсэн нам, эвслийн төлөөлөлд олгож, бүх талын оролцоог ханган ажиллаж байна. Санал тоолох төхөөрөмжийн үйл ажиллагааг буюу тоолсон саналын үнэн, зөвийг нягтлан шалгах талаар хуульд заасан олон төрлийн боломжит арга, хэлбэрээр ажиглах, шалгах бүрэн боломжтой. Сонгууль зохион байгуулалтын хэвийн үйл ажиллагааг алдагдуулахгүй байх, сонгогчдыг төөрөгдүүлсэн мэдээллийг олон нийтэд өгөхгүй байх, мэдээллийн эх сурвалжаа нягтлан шалгасны үндсэн дээр гомдол хүсэлтийг бодит баримтад тулгуурлан гаргах шаардлагатайг Ардчилсан намд хүргүүлсэн хариу бичигт дурдсан болно гэж Сонгуулийн ерөнхий хорооноос мэдээллээ.

• МАХН-ыг улсын бүртгэлээс албан ёсоор хаслаа 

Улсын Дээд шүүхийн нийт шүүгчийн хуралдаан 2021 оны 5 дугаар сарын 28-ны өдөр боллоо. Хуралдаанаар Монгол Ардын Хувьсгалт намаас Монгол Ардын намтай нэгдэж буй учир үйл ажиллагаагаа зогсоож, улсын бүртгэлээс хасуулах хүсэлт гаргасныг хэлэлцээд тус намын 2021 оны 5 дугаар сарын 16-ны өдөр хуралдсан Ээлжит бус Их чуулганаас гаргасан шийдвэрийн талаар ирүүлсэн баримтууд нь хуульд заасан шаардлагыг хангаж байна гэж үзэн хүсэлтийг хангаж, Улс төрийн намын тухай хуулийн 23 дугаар зүйлийн 23.1 дэх хэсэгт зааснаар Монгол Ардын хувьсгалт намын үйл ажиллагааг  зогсоосныг бүртгэж, улсын бүртгэлээс хасч шийдвэрлэв.

• Салхитын мөнгөний ордтой холбоотой авлигын хэрэгт хураагдсан 1.4 сая ам.долларыг улсын орлого болголоо 

Авлигатай тэмцэх газраас Салхитын мөнгөний орд газартай холбоотой авлигын хэргийг мөрдөн шалгах ажиллагааны явцад 1.445.200 ам.долларыг эд мөрийн баримтаар хураан авсан. Хан-Уул дүүргийн Эрүүгийн хэргийн анхан шатны шүүхийн 2020/ШЦТ/319 дүгээр тогтоолоор 1.445.200 ам.долларыг улсын орлого болгохоор шийдвэрлэсэн нь Улсын дээд шүүхээр хянагдаж, эцэслэн хүчин төгөлдөр болсны дагуу Авлигатай тэмцэх газраас 2021 оны 04 сарын 07-ны өдөр Сангийн яамны Төрийн сан дахь төсвийн орлогын дансанд дээрх хураагдсан мөнгийг шилжүүллээ.  Авлигатай тэмцэх газар нь 2020 онд мөрдөн шалгах ажиллагааны явцад 35.6 тэрбум төгрөгийн хохирлыг нөхөн төлүүлж, үл хөдлөх, хөдлөх, байр, орон сууц, автомашин, тоног төхөөрөмж зэрэг 10.112.736.4 сая төгрөгөөр үнэлэгдэх эд хөрөнгө болон бэлэн мөнгийг битүүмжлэн хамгаалаад байна.   

• Засгийн газраас Файзер вакциныг хөхүүл болон жирэмсэн эхчүүдэд хийх шийдвэр гаргалаа 

Манай улс тавдугаар сарын 26-27-нд шилжих шөнө 100 мянган тун Файзер вакциныг Ковакс хөтөлбөрийн хүрээнд татан авчээ. Тус вакциныг хөхүүл болон жирэмсэн эхчүүдэд хийх шийдвэрийг Засгийн газрын тавдугаар сарын 27-ны өдрийн хуралдаанаар гаргажээ. Улсын хэмжээнд нийт 53 мянга орчим жирэмсэн эх байгаа бөгөөд эдгээр иргэдийг Эрүүл мэндийн яамны зөвлөмжийн дагуу Файзер вакцинд хамрагдах боломжтой гэв. Түүнчлэн эрүүл мэндийн шалтгааны улмаас вакцинд хамрагдаж амжаагүй хүмүүс мөн адил Файзер вакцинд хамрагдаж боломжтой аж. ДЭМБ-аас жирэмсэн эхчүүд халдварт өртөх эсрдэл өндөр байгаа учир вакцин хийлгэх боломжтой гэж мэдэгдсэн. Иймээс жирэмсэн эхчүүд эмчийн заавар зөвлөмжин дор сайн дурын үндсэн дээр вакцинаа хийлгэх боломжтой гэв. Түүнчлэн Засгийн газрын хуралдаанаар гадаадаас ирэх Монгол Улсын иргэд заавал вакцинд хамрагдсан байх шаардлагагүй гэсэн шийдвэр гаргажээ.

• Токиогийн олимпод оролцох эрх авсан тамирчдад Засгийн газраас тус бүр 10 сая төгрөг олгоно 

Засгийн газрын тавдугаар сарын 27-ны өдрийн хуралдаанаар “Токио-2021” зуны олимп, паралимпийн наадамд оролцох эрх авсан тамирчин тус бүрт 10 сая төгрөгийн нэг удаагийн дэмжлэгэ үзүүлэхээр шийдвэрлэлээ. Мөн үндэсний шигшээ багийн бүрэлдэхүүний цалинг 2021 оны зургадугаар сарын 1-ээс есдүгээр сарын 30-ныг хүртэл сард олгох цалинг 1.5 сая болгож нэмлээ. Мөн цаашид тамирчдын цалинг 1.2 сая төгрөг, дасгалжуулагчил 1.5 сая төгрөг хүртэл нэмэхээр болсон байна. Үүнд шаардагдах хөрөнгийг Биеийн тамир спортын хороо 2021 оны батлагдсан төсвөөс гаргах ажээ. 

• Булган аймагт Ц.Анандбазарын эсрэг гарын үсэг цуглуулж эхэллээ 

Охид, эмэгтэйчүүдэд бэлгийн дарамт үзүүлсэн, хүчиндсэн байж болзошгүй асуудлаар УИХ-ын гишүүн Ц.Анандбазарыг шалгуулахаар "Ме Too" хөдөлгөөн болон иргэн Б.Сүндэръяа нар цагдаагийн байгууллагад өргөдөл гаргасан байдаг. Гэвч УИХ-ын гишүүн Ц.Анандбазараас Цагдаагын байгууллага мэдүүлэг аваагүй, шалгалтын ажиллагаа явцгүй байгаа талаарх мэдээлэл гараад буй юм. Мөн УИХ-ын Ёс зүйн байнгын хорооноос Ц.Анандбазарыг шалгах шаардлагагүй гэж мэдэгдээд байгаа. Тэгвэл "Ме too" хөдөлгөөнийхөн Улаанбаатар хотод хатуу хөл хорионы дэглэм буурсан өдрөөс эхлэн Булган аймагт ажиллаж Ц.Анандбазарыг УИХ-ын гишүүнээс нь эргүүлэн татах хүсэлтэд сонгогчдын гарын үсгийг цуглуулж эхэлжээ. Улмаар Ц.Анандбазарыг УИХ-д сонгосон Булган аймгийн иргэдийн эргүүлэн татах хүсэлтэд зурсан гарын үсгийг холбогдох байгууллагуудад дамжуулан өгч шийдүүлэх боломжтой аж.

• Өмгөөлөгч Б.Баасанцогт тэргүүтэй шүүгч нарт сахилгын шийтгэл оногдууллаа 

Нэр бүхий гурван шүүгчид сахилгын арга хэмжээ авах тухай гомдлыг “Нэхүүл” “Дархан Монгол ногоон нэгдэл” ТББ-уудаас Шүүхийн ёс зүйн хороонд гаргасан. Шүүхийн ёс зүйн хорооны нийт гишүүдийн хурал энэ сарын 25-нд буюу өнгөрсөн мягмар гарагт болж, Сүхбаатар дүүргийн эрүүгийн хэргийн анхан шатны шүүхийн шүүгч Х.Идэр, Булган аймгийн Эрүүгийн хэргийн анхан шатны шүүхийн шүүгч Д.Отгонбаатар нарт огцруулах, Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатарт цалинг нь зургаан сарын хугацаанд 30 хувиар торгох сахилгын шийтгэл оногдуулжээ. Түүнчлэн уг бичлэгийн асуудалд хамгийн их нэр холбогдсон өмгөөлөгч Б.Баасанцогтын асуудлыг авч хэлэлцэн түүний өмгөөлөгчөөр ажиллах эрхийг 2 жилээр түтгэлзүүлэх шийдвэр гаргасан байна. Шүүхийн ёс зүйн хорооны дүрмийн 5.16-д шүүгчид албан тушаалаас огцруулах сахилгын шийтгэл ногдуулсан бол Ёс зүйн хороо шийдвэрийг Шүүхийн ерөнхий зөвлөлд хүргүүлнэ. Уг шийдвэрийг Шүүхийн ерөнхий зөвлөл Монгол Улсын Ерөнхийлөгчид өргөн мэдүүлнэ хэмээн заасан байдаг.Өмгөөлөгч Б.Баасанцогт зүй бус үйлдэл гаргахад дээрх гурван шүүгч хамт байгаа бичлэг сошиалд цацагдсантай холбоотойгоор хуулийн байгууллагатай холбоотой баримтууд ч ил болсон байдаг. 

• МИАТ ХХК-ын хэлтсийн дарга С.Батсүхийг ажилтантайгаа зүй бус харьцсан учир ажлаас нь чөлөөлжээ

МИАТ-ын хэлтсийн дарга ажилтнаа зодож байгаа бичлэг нийгмийн сүлжээнд гарсантай холбоотойгоор цагдаагийн байгууллага шалгаж эхэлснээ мэдэгдсэн. Мөн уг асуудлаар МИАТ ТӨХК-аас мэдэгдэл гаргасан юм. Үүнд "Зорчигч үйлчилгээний хэлтсийн дарга  С.Батсүхийн ажилтантайгаа зүй бус харьцаж буй үйлдэлд хариуцлага тооцож ажлаас нь  чөлөөлж, хуулийн байгууллагаар шалгуулахаар шилжүүлж байгааг мэдэгдэж байна” хэмээсэн. Хэргийн тодруулбал, тус байгууллагын Зорчигч Үйлчилгээний хэлтсийн дарга С.Батсүх ажилтнаа бейсболын төмөр цохиураар цохиж буй бичлэг олон нийтийн сүлжээнд ил болсон. Цагдаагын байгууллагаас өгч буй мэдээллээр уг үйл явдал хоёр жилийн өмнө болсон бөгөөд үнэн эсэх нь шалгалтын дараа тодорхой болно гэлээ. 

• Ковидийн халдвартай иргэн эмнэлгийн цонхоор унаж амиа алджээ

Коронавирусийн халдвартай болон гадаадаас ирсэн иргэн тусгаарлагдах явцдаа амиа алдсан харамсалтай хэрэг тавдугаар сарын 27-нд гарлаа. Тодруулбал, Хан-Уул дүүргийн Нэгдсэн эмнэлэгт хэвтэн эмчлүүлж байсан иргэн цонхоор унаж, амиа алджээ. Энэ тухай дуудлага энэ сарын 27-ны 12:00 цагийн үед цагдаагийн байгууллагад ирсэн байна. Амиа алдсан иргэн коронавирусийн халдвартай байсан бөгөөд эмнэлгийн 3 давхраас унаж, нас баржээ. Эх сурвалжийн мэдээллээр талийгаач тус эмнэлэгт коронавирусийн халдвараар хэвтэн эмчлүүлээд 7-8 хонож байсан аж.

• Худалдаа хөгжлийн банкнаас хоёр сая ам.доллар залилсан этгүүдийг ЭРЭН СУРВАЛЖИЛЖ БАЙНА 

Энэ сарын 25-ны өдөр буюу өнгөрсөн мягмар гарагт 50 гаруй насны эмэгтэй ХХБ-ны Шангрилла дахь салбараас хуурамч бичиг баримт үйлдэж, хоёр сая гаруй ам.доллар залилсан хэрэг гарлаа. Тус эмэгтэй нь барилгын чиглэлээр үйл ажиллагаа явуулдаг, хятадын хөрөнгө оруулалттай компанийн бичиг баримтыг хуурамчаар үйлдэж залилан үйлдсэн аж. Тэрбээр уг хэргийг үйлдэхдээ 41 настай Э, 32 настай Б, 34 настай Б нартай хамтран үйлдсэн гэх мэдээлэл байсан боловч Цагдаагийн газраас уг хэргийн талаар мэдээлэл өгөхдөө уг хэрэгт холбогдсон гурав биш дөрвөн иргэн байгаа хэмээж байлаа. Зарим эх сурвалжын мэдээлснээр дээрх нэр бүхий иргэд зөвхөн банк луйвардаагүй бөгөөд нэг биш хувь хүн, байгууллагын итгэл төрүүлэх замаар луйварддаг. Мөн банкнаас залилсан 2 сая гаруй ам.доллар нь манай улсад барилгын бизнес эрхэлж байсан хятад иргэнийх байсан бөгөөд тухайн хятад иргэн нас барсан учир банкинд байршуулсан 2 сая ам.долларыг нь гаргуулан авах санаатай байсан байж болзошгүй хэмээн нэрээ нууцалсан эх сурвалж мэдээлж байв.