2021-06-12BOLOD.MN сайт ням гараг бүр өнгөрөгч өдрүүдэд улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай билээ. Эдгээр өдрүүдэд манай улс найм дахь удаагын сонгуулиар зургаа дах ерөнхийлөгчөө сонгосон онцлох үйл явдалтай өдрүүд үргэлжиллээ. 2021 оны Ерөнхийлөгчийн ээлжит сонгууль нь 2017 оны сонгуультай харьцуулахад сонгогчдын идэвхи хангалтгүй байсан хэмээн СЕХ-оос мэдээлж байв. Түүнчлэн өнөөдрөөс буюу зургадугаар сарын 12-оос эхлэн шатахуун борлуулагч байгууллагууд АИ-92 шатахууны литр тутмын үнийг үе шаттайгаар 600 төгрөг хүртэл нэмэх болсноо мэдэгдлээ.
Монгол Улсын зургаа дахь Ерөнхийлөгчөөр У.Хүрэлсүх сонгогдлоо
Монгол Улсын Ерөнхийлөгчийн найм дахь удаагийн сонгуульд МАН-аас нэр дэвшигч У.Хүрэлсүх илт давуу байдлаар ялалт байгуулж Монгол Улсын зургаа дахь Ерөнхийлөгчөөр сонгогдлоо. Түүнчлэн зургаан жилийн хугацаанд бүрэн эрхтэй анхны ерөнхийлөгч болж байгаа юм. Энэ удаагийн сонгуулийн гол онцлог нь 2019 онд батлагдсан Үндсэн хуулийн нэмэлт өөрчлөлтийн дагуу явагдсан. Түүнчлэн сонгуульд нэр дэвшигч нь Монгол Улсын уугуул иргэн, сүүлийн 5 жилийн хугацаанд Монгол улсдаа оршин тогтносон, 50-аас дээш настай байх зэрэг шаардлагуудыг тусгасан. 2021 оны Монгол Улсын Ерөнхийлөгчийн сонгуулийн санал хураалт зургадугаар сарын 9-ны 07.00-22.00 цагийн хооронд зохион байгуулагдаж, өндөрлөлөө.
Энэ удаагийн сонгуульд 2087 хэсгийн хороонд нийтдээ 2.041.866 сонгогч санал өгөхөөр сонгогчийн нэрийн жагсаалтад бүртгэгдсэн. Сонгуулийн ирц 22.00 цагийн байдлаар 52.78 хувьтай байсан бөгөөд Сэлэнгэ аймгийн сонгогчид хамгийн бага буюу 39.61 хувийн ирцтэй байсан бол Сүхбаатар аймгийн сонгогчид хамгийн идэвхтэй буюу 58.31 хувьтай сонгуульд оролцов.
Улсын хэмжээнд нийт 1.206.858 сонгогч саналаа өгснөөс:
- МАН-аас нэр дэвшигч У.Хүрэлсүх-820.092 санал
- АН-аас нэр дэвшигч С.Эрдэнэ 72.394 санал
- Зөв хүн электорат эвслээс нэр дэвшигч Д.Энхбат 242.692 санал авсан байна.
Харин үүнээс 69,703 сонгогч нь саналын хуудсаа бөглөөгүй буюу аль ч нэр дэвшигчийг сонголгүй, цагаан хуудасыг өгчээ.
Монгол Улсын Ерөнхийлөгчийн сонгуульд гадаадад байгаа сонгогчдын саналаар Д.Энхбат хамгийн өндөр санал авсан байна.
Тодруулбал,
- МАН-аас нэр дэвшигч У.Хүрэлсүх 1175
- АН-аас нэр дэвшигч С.Эрдэнэ 160
- Зөв хүн электорат эвслээс нэр дэвшсэн Д.Энхбат 4084 санал авсан байна.
Хилийн чанадад суугаа иргэдээс сонгуульд нийт бүртгүүлсэн 7394 иргэний 76 хувь нь буюу 5618 иргэн саналаа өгсөн байна.
Саналын автомашины ирцийг баталгаажуулахын тулд СЕХ-оос 100 хувь гар тооллого хийсэн. Манай улсад сонгууль өгөх насны буюу 18-аас дээш насны 2,049,379 сонгогчийн нэрс байсан. Энэ нь нийт санал өгөх насны иргэдийн 59.35 хувийн ирцийг бүрдүүлсэн гэсэн үг юм.
2021 оны зургаадугаар сарын 10-ны 15:00 цагийн байдлын эцсийн дүнгээр
- У.Хүрэлсүх - 823,326 /66,76 хувь/
- С.Эрдэнэ - 78,832 /5.99 хувь/
- Д.Энхбат - 246,968 /20,33 хувь/ саналтай байна.
- Цагаан сонголт 71,937 /5.92 хувь/
Шинэ Ерөнхийлөгчийг Зургадугаар сарын 25-нд тангараг өргүүлэхээр тогтов
Төрийн байгуулалтын байнгын хорооны хуралдаанаар шинэ Ерөнхийлөгч У.Хүрэлсүхийн тангараг өргөх өдрийн товыг хэлэлцлээ. Улмаар 2021 оны зургадугаар сарын 25-ны 11.40 цагт товлох тухай асуудлаар Төрийн байгуулалтын байнгын хороо хуралдаж, Байнгын хорооны гишүүдийн олонх дэмжлээ. Ингэснээр Ерөнхийлөгчийн тангараг өргөх товыг энэ сарын 25-наар тогтоох ТББХ-ны тогтоолын төсөл батлагдлаа.
Нисэх онгоцны шинэ буудал долдугаар сарын 4-нд үйл ажиллагаагаа эхлүүлнэ
Ерөнхий сайд Л.Оюун-Эрдэнэ болон Нийслэлийн Засаг дарга бөгөөд Улаанбаатар хотын Захирагч Д.Сумъяабазар нар Хөшигийн хөндийн нисэх онгоцны шинэ буудлын ажилтай танилцлаа.
Улаанбаатар хотын олон улсын нисэх онгоцны шинэ буудал ашиглалтад орох хугацаа нь ковидоос хамааралтайгаар хэд хэдэн удаа хойшилсон. Одоогийн байдлаар ажил 85.1 хувьтай яваа бөгөөд нээлтийг долдугаар сарын 4-нд хийж, үйл ажиллагааг нь эхлүүлэхээр төлөвлөжээ. Шуурхай удирдлагын төвийг 34 хүний бүрэлдэхүүнтэй байгуулсан. Энэ төв нь Буян-Ухаагийн үйл ажиллагааг “Чингис хаан” олон улсын нисэх онгоцны буудал руу шилжүүлэх аж. Нүүлгэн шилжүүлэх ажлыг зургадугаар сарын 15-наас эхэлнэ. Буянт-Ухаа дээр байгаа онгоцнуудыг “Чингис хаан” олон улсын нисэх онгоцны буудалд байрлуулах ажээ. Эхний нислэгийг долдугаар сарын 4-ний 11:40 цагт Улаанбаатар-Токио чиглэлд хийхээр төлөвлөжээ.
Ерөнхий сайд Л.Оюун-Эрдэнэ хугацаандаа нээлтээ хийхийг сануулж, “Үндэсний их баяр наадмаар Монголыг зорих жуулчдын тоо нэмэгдэнэ. Жуулчдыг ирэх боломжийг нь хангаж өгнө. Вакцинд бүрэн хамрагдсан жуулчдыг хүлээж авна. Мөн долдугаар сарын 4-нд онгоцны буудлын нээлт хийнэ гэдгийг олон улсад зарлах хэрэгтэй. Нүүлгэн шилжүүлэлттэй холбоотой санхүүгийн ямар асуудал байна, үүнийг Засгийн газарт оруулаарай” хэмээж байв.
Н.Түвшинбаяр МҮОХ-ны тамгыг буцаан өглөө
МҮОХ-ны Ерөнхийлөгч Н.Түвшинбаяр тамгаа аваад зугтсан гэх мэдээлэл тархаад нэлээдгүй шуугиан тарьсан. Энэ талаар МҮОХ-ны Ерөнхийлөгчийн үүрэг гүйцэтгэгч Ч.Наранбаатар өнгөрсөн мягмар гарагт албан ёсны мэдээлэл өгөөд байсан билээ. Тэгвэл Н.Түвшинбаяр МҮОХ-ны тамгыг буцааж өгсөн байна. Мөн албан үүргээ албан ёсоор хүлээлгэж өгөхөөр болжээ.
А.И.Цэдэнбал-Филатоваг цагаатгалаа
Цагаатгах ажлыг удирдан зохион байгуулах улсын комиссын нэхэмжлэлтэй, А.И.Цэдэнбал-Филатоваг хэлмэгдсэнд тооцож, цагаатгуулах тухай иргэний хэргийг Сүхбаатар дүүргийн Иргэний хэргийн анхан шатны шүүх 2021 оны 06 дугаар сарын 07-ны өдөр хянан хэлэлцлээ.
Нэхэмжлэгч нэхэмжлэлдээ 4 үндэслэл зааж А.И.Цэдэнбал-Филатоваг хэлмэгдсэнд тооцож цагаатгуулахаар шаардсан. Үүнээс шүүх гурван үндэслэлийг баримтаар тогтоогдоогүй, хамаарахгүй гэж үзсэн.
Харин түүнд олгосон цол, одон медалийг хүчингүй болгохдоо үндэслэл болгосон үйл баримт нийцээгүй гэж үзэн шүүх энэ үндэслэлээр Улс төрийн хилс хэрэгт хэлмэгдэгчдийг цагаатгах, тэдэнд нөхөх олговор олгох тухай хуулийн 8 дугаар зүйлийн 8.4-т зааснаар БНМАУ-ын Ардын Их Хурлын Тэргүүлэгчдийн 1990 оны 4 дүгээр сарын 18-ны өдрийн 98 дугаар зарлигийг хүчингүй болгож, Анастасия Ивановна Цэдэнбал Филатоваг цагаатгаж шийдвэрлэжээ.
Дорнод аймгийн 327-р цэргийн ангид 19 настай байлдагч нас баржээ
Дорнод аймагт байрлах Зэвсэгт хүчний 327 дугаар ангид байлдагч амь насаа алдсан харамсалтай хэрэг энэ сарын 7-нд гарсан. Талийгаач 19 настай бөгөөд өнгөрсөн аравдугаар сард цэргийн албанд татагдан очоод байжээ. Энэ хэргийн талаар Зэвсэгт хүчний 327 дугаар ангийн захирагч Н.ЦЭЦЭНХҮҮГЭЭС тодруулахад “Байлдагч амиа алдсан хэрэг гарсан нь үнэн гэх мэдээллийг өгсөн. Түүнчлэн энэ хэргийг цагдаагийн байгууллагаас шалгаж байгаа бөгөөд байлдагч нас барсан талаар Жанжин штабын шуурхай утсанд мэдэгдсэн ажээ. Албан хаагч юунаас болж амь насаа алдсаныг шалгаж байгаа учир тодорхой мэдээлэл өгөх боломжгүй. Манай ангид дэглэлт, яргалалт байхгүй гэдгийг Дорнод аймагт байрлах Зэвсэгт хүчний 327 дугаар ангийн захирагч мэдээлэв.
Хаин хэргийн талаар ЗХЖШ-ын хурандаа Б.Отгонбаяр мэдээлэл өгөхдөө "Амиа алдсан байлдагчийн үхэл гаднын нөлөөгүй, эрүүл мэндийн шалтгаантай гэх дүгнэлт урьдчилсан байдлаар гарсан. Тодруулбал байлдагч хоолны хордлогын улмаас амиа алдсан байж болзошгүй байна. Одоогоор алба хаагчийн үхлийн шалтгааныг тодруулахаар цагдаагийн байгууллагаас хяналт шалгалт хийгдэж байна” гэв.
79 цагдаагийн алба хаагчид хариуцлага тооцжээ
Цагдаагийн ерөнхий газарт алба хаагчидтай холбоотой 172 өргөдөл, гомдол ирсэн байна. Үүнээс 160 гомдлыг хуулийн хугацаанд шийдвэрлэжээ.
Тодруулбал, 45 гомдолд холбогдон шалгагдсан 79 алба хаагчид Цагдаагийн албаны тухай хуульд заасны дагуу сахилгын шийтгэл оногдуулсан байна. Мөн гэмт хэргийн шинжтэй 10 өргөдлийг харъяаллын дагуу Авлигатай тэмцэх газар болон Мөрдөн байцаах албаны Тусгай субъектын үйлдсэн гэмт хэргийг мөрдөн шалгах хэлтэст шилжүүлжээ.
Цагдаагийн алба хаагчидтай холбоотой өргөдөл, гомдлын дийлэнх нь иргэдээс ирсэн байна. Нийт гомдлын 86 нь иргэдээс ирүүлсэн бол 126 тусгай дугаарын утсаар ирүүлсэн 16, Хууль зүй, дотоод хэргийн яамнаас 11, Төрийн албаны зөвлөлөөс 3, Хүний эрхийн үндэсний комиссоос 4, Прокурорын байгууллагаас 2, Авлигатай тэмцэх газраас 14, цагдаагийн байгууллагын удирдлагаас даалгасан 36 гомдол тус тус бүртгэгджээ.
Ододтой бүжиглье шоу нэвтрүүлгийн ялагчаар Б.Баттөр, Б.Халиун нар тодорлоо
Дэлхийн 60 гаруй оронд амжилттай зохиогдсон BBC телевизийн бүтээл “Dancing With The Stars”- “Ододтой бүжиглэе” шоуг “Монгол” телевиз албан ёсны эрхтэйгээр үзэгчдийн хүртээл болгосон.
Тэгвэл гурван сарын турш үргэлжилсэн “Ододтой бүжиглэе” шоуны ялагчийг тодруулах финалын шалгаруулалт энэ сарын 6-ны өдөр болж үзэгчдийн хамгийн өндөр саналаар Б.Баттөр, Б.Халиун нар шоуны ялагчаар тодорлоо.
Түүнчлэн “Ододтой бүжиглэе” шоуны ялагчаар тодорсон Б.Баттөр, Б.Халиун нар шагналын 50 сая төгрөгөө НҮБ-ын Хүүхдийн санд хандивлах болсноо зарлалаа.
Харин шоуг зохион байгуулагчдын зүгээс хамтрагч бүжигчин Б.Халиунг 10 сая төгрөгөөр шагнахаар болжээ.
Дархан-Уул аймагт айлын хот руу дайрсан байвгайг нойрсуулж, нутаг сэлгэхээр болжээ
Дархан-Уул аймгийн Хонгор сумын хоёрдугаар багийн нутаг, Мухарын гол гэх газар зусч буй малчдын хот, бэлчээрт байсан мал руу өнгөрсөн тавдугаар сарын 29-ний өдрөөс зургадугаар сарын 4-ний өдрүүдэд хүрэн баавгай дайрсан тохиолдлууд гарсан.
Энэ талаар Дархан-Уул аймгийн Байгаль Орчин аялал жуулчлалын газрын дарга Г.Батбаяраас тодруулахад бамбаруушаа дагуулсан хоёр баавгай удаа айлын хот руу дайрсан. Нэг нь Мухарын голын хавиар айлуудаар сэлгэн явсан бол нөгөө баавгайн айлын бэлчээрт байсан бярууг барьжээ.
Түүнчлэн эрэгчин баавгайн бэлчээрт явж байсан нэг хонь, нэг ямааг барьчихаад маргааш нь дахиад хот руу дайрсан гэх мэдээлэл ирсэн гэлээ.
Дархан-Уул аймгийн Мухарын гол, Хүйтний гол хавиар гурван жилийн өмнөөс баавгай үзэгдэж эхэлжээ. Энэ талаар холбогдох шатны мэргэжлийн байгууллага Аялал жуучлалын яаманд хүсэлт тавьсан бөгөөд баавгайг түр хугацаанд нойрсуулсны дараа нутаг сэлгэх арга хэмжээ авах болно гэлээ.
Ахлах ахлагч Э.Даваажав 10 дахь өдрөө гүйж, 450 км зам туулжээ
Ховд аймгийн Буянт сумын харьяат, Зэвсэгт хүчний 123 дугаар ангийн хөгжимчин, ахлах ахлагч Э.Даваажамц гараанаас гарснаас хойш 10 хоногт 450 км зам туулжээ.
Тэрээр хоногт 40-45 км гүйх зорилготойгоор Ховд аймгаас Улаанбаатар хот хүртэл 1500 км замыг гүйж туулахаар 2021 оны зургаадугаар сарын 2-ны өдөр гараанаас гарсан билээ.
Э.Даваажамц гурван сарын хугацаанд бэлтгэл хийсэн бөгөөд өдөрт 40-45 км гүйснээр долоодугаар сарын 10-ны өдөр буюу Монгол Улсын Төрийн далбааны өдөрт зориулсан цэргийн ёслолын жагсаалын үеэр Улаанбаатар хот, Сүхбаатарын талбайд барианд орохоор тооцоолсон байна.
Бусдын фейсбүүк хаягаар нэвтэрч, 66.8 сая төгрөг залилсан таван этгээдэд 1-8 жилийн ял оноожээ
Хан-Уул дүүргийн прокурорын газраас иргэн Д, Ц, Б нарын есөн хүнд холбогдох цахим залилангийн хэрэгт яллах дүгнэлт үйлдэн шүүхээр шийдвэрлүүлжээ. Дээрх нэр бүхий иргэд нь бүлэглэн 2019 оны арванхоёрдугаар сараас 2020 оны есдүгээр сар хүртэл хугацаанд бусдын фэйсбүүк хаягаар хууль бусаар нэвтэрч, найзын холбоотой хүмүүст нь мөнгө зээлэхийг хүссэн утгатай зурвас илгээн нийт 84 иргэнээс 66 сая 853.354 төгрөгийг залилж авсан байна.Хан-Уул дүүргийн эрүүгийн хэргийн анхан шатны шүүхээс 2021 оны зургадугаар сарын 02-ны өдөр дээрх хэргийг хянан хэлэлцээд шүүгдэгч нарыг Эрүүгийн хуулийн тусгай ангийн 17.3 дугаар зүйлд заасан Залилах гэмт хэргийг үйлдсэн гэм буруутайд тооцож, нэр бүхий таван иргэнд 1-8 жилийн хугацаагаар хорих ял оногдуулж, бусад 4 иргэнийг нийтэд тустай ажил хийлгэх ялаар шийтгэжээ.
Шатахууны үнэ үе шаттайгаар 600 төгрөгөөр нэмэгдэнэ
Өргөн хэрэглээний АИ92 шатахууныг литр тутамд 1990 төгрөгөөр худалдаж байгаа нь 600 орчим төгрөгийн алдагдал хүлээж байгааг шатахуун нийлүүлэгч аж ахуйн нэгжүүд Сангийн яам, Уул уурхайн яаманд мэдэгдсэн байна.
Тиймээс литр тутмын үнээ 06.12-оос шат дараатай нэмж, алдагдлаа нөхөх талаар дээрх газруудад мэдэгджээ. Аж ахуйн нэгжүүдийн бүтээгдэхүүний үнийг төрөөс зохицуулах боломжгүй учир шатахууны үнэ нэмэгдэж эхлэх нь тодорхой болоод байгаа аж. Гэхдээ шууд 600 төгрөгөөр нэмэгдэхгүй, харин бага багаар буюу үечилсэн байдлаар нэмж, алдагдлаа барих хэмжээнд буюу литр тутмын үнэ цаашид 600 хүртэл төгрөгөөр нэмэгдэх аж.
.png "Томруулж харах")
