BOLOD ДОЛОО ХОНОГИЙН ТОЙМ: Жирэмсэн эх болон 16-17 насны 33 мянга гаруй хүүхдүүдийг дархлаажуулахаар болж, Улсын наадмыг ЦАХИМААР хийх шийдвэртэй ДОЛОО ХОНОГ

2021-06-19

BOLOD.MN сайт долоо хоног бүрийн ням гарагт өнгөрөгч өдрүүдэд нийгэм, улс төр, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Засгийн газраас хэд хэдэн асуудлуудыг хэлэлцэн шийдвэрлэв. Үүнд сар хүрэхгүй хугацааны дараа болох улсын баяр наамдыг цахимаар тэмдэглэн өнгөрүүлэхээр шийдвэрлэсэн ба улсын баярт төсөвлөсөн 10 тэрбум гаруй төгрөгийг эрүүл мэндийн салбарт цар тахлыг хумихад зориулан шийдвэрлэхээр болжээ. Түүнчлэн Монгол Улсын Ерөнхийлөгчийн тангараг өргөх ёслолын шинэчлэн баталсан юм. Эдгээр болон бусад мэдээллийн тоймыг хүлээн авч үзнэ үү.

Ирэх сараас ажил олгогч болон даатгуулагчид тэтгэврийн даатгалын шимтгэлийг 8.5 хувиар төлнө

Улсын Их Хурлын чуулганы энэ сарын 11-ны өдрийн нэгдсэн хуралдаанаар Нийгмийн даатгалын тухай хуульд өөрчлөлт оруулах тухай хуулийн төсөл болон Нийгмийн даатгалын тухай хуулиудыг хэрэглэх журмын тухай хуульд өөрчлөлт оруулах тухай хуулийн төслийг эцэслэн баталсантай холбогдуулж Улсын Их Хурлын Нийгмийн бодлогын байнгын хорооны дарга, Улсын Их Хурлын гишүүн М.Оюунчимэг, хуулийн төслийг санаачлагч, Улсын Их Хурлын гишүүн Т.Энхтүвшин нар хэвлэлийнхэнд мэдээлэл хийлээ.

Нийгмийн даатгалын тухай хуульд өөрчлөлт оруулах тухай хуулийн төсөл батлагдсанаар 2021 оны долдугаар сарын 1-ний өдрөөс эхлэн ажил олгогч болон даатгуулагчаас төлөх тэтгэврийн даатгалын шимтгэлийг тус бүр нэг хувиар бууруулж байна. Өөрөөр хэлбэл, бүх ажил олгогч болон даатгуулагчид тэтгэврийн даатгалын шимтгэлээ 8.5 хувиар төлөх юм.

Мөн сайн дураар даатгуулагчид 12.5 хувийн шимтгэл төлдөг байсан бол 11.5 хувийн шимтгэл төлж эхэлнэ.

2021 оноос ажил олгогч болон даатгуулагчаас төлөх тэтгэврийн даатгалын шимтгэл тус бүр 9.5 хувь болон нэмэгдсэн нь коронавируст цар тахалтай холбоотойгоор аж ахуйн нэгж, иргэний орлогод нөлөөлж байгааг үндэслэн дээрх хуулийн төслүүдийг санаачлан, батлуулсан талаар гишүүд мэдээлэлдээ дурьдлаа гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.

АН-ын талцалыг зогсоохын тулд намын гишүүдээс дэмжлэгэ авахаар болжээ

Ерөнхийлөгчийн сонгуулийн үр дүнтэй холбоотойгоор УИХ-ын гишүүн Б.Пүрэвдорж, АН-ын гишүүн Х.Тэмүүжин, З.Нарантуяа нар зургадугаар сарын 14-ны өдөр хэвлэл мэдээллийн хэрэгслүүдэд мэдээлэл өглөө.

Энэ удаагын сонгуульд АН хамгийн бага санал авсан талаар УИХ-ын гишүүн Б.Пүрэвдорж мэдээлж байсан ба тэрээр АН-ын онц их хурлыг зарлах, нэг удирдлагатай болгох санаачлагыг жирийн гишүүдийн зүгээс маш ихээр ирүүлж байна. Иймээс АН-ын дотоод эв нэгдлийг хангах намын Их хурлыг хуралдуулж, нэг удирдлагатай болгох зорилгоор 100 мянган гишүүний гарын үсэг цуглуулах санаачлагыг энэ өдрөөс эхлүүлж байна. Улсын дээд шүүхэд хэд хэдэн удаа материалаа хүргүүлсэн боловч дотоод эв нэгдлээ хангаад ир гэсэн ганцхан шаардлага тавьсан гэлээ.

АН-ын гишүүн З.Нарантуяа ярицлагадаа бидний гаргаж байгаа санаачлага зөвхөн АН-ын асуудал биш. Монголын парламентад сөрөг хүчнээс тавих хяналтыг чангатгах сөрөг хүчний чадамжийн тухай асуудал. АН эв нэгдэлгүй байгаагийн улмаас сүүлийн УИХ-ын хоёр сонгууль, Ерөнхийлөгчийн сонгуульд маш амжилтгүй оролцлоо. Цаашид хариуцлагаа хүлээж огцорч чаддаг намын удирдлагатай байх улс төрийн соёл суулгахад чухал ач холбогдолтой. Хоорондоо таарч зохицохоо больсон лидерүүдийн улмаас АН тарж бутарна гэсэн ойлголт байхгүй. Сонгуульд оролцоогүй иргэд сонголтгүй учраас саналаа өгөөгүй гэж ойлгож байна хэмээж байлаа.

Монгол Улсын Ерөнхийлөгчийн тангараг өргөх ёслолын журмыг шинэчлэн баталлаа

УИХ-ын өнөөдрийн чуулганаар "Монгол Улсын Ерөнхийлөгчийн тангараг өргөх ёслолын журам батлах тухай” Улсын Их Хурлын тогтоолын төслийг хэлэлцэж, баталлаа.

онгол Улсын Ерөнхийлөгчийн тухай хуулийн 5 дугаар зүйлд “Шинэ сонгогдсон Ерөнхийлөгч нь Улсын Их Хурал Ерөнхийлөгчөөр сонгогдсон гэж үзэж бүрэн эрхийг нь хүлээн зөвшөөрсөн хууль гаргаснаас хойш З0 хоногийн дотор Улсын Их Хуралд Үндсэн хуулиар тогтоосон тангараг өргөнө. Ерөнхийлөгч тангараг өргөх өдрийг Улсын Их Хурал товлон тогтооно” гэж заасан. Хуулийн энэхүү зохицуулалтын дагуу шинэ сонгогдсон Ерөнхийлөгч Ухнаагийн Хүрэлсүхийн Монгол Улсын Ерөнхийлөгчийн тангараг өргөх өдөр, цагийг 2021 оны зургаадугаар сарын 25-ны өдрийн 11 цаг 40 минутад байхаар тогтоож, Улсын Их Хурал тогтоол баталсан.

Мөн Монгол Улсын Ерөнхийлөгчийн тухай хуульд “Ерөнхийлөгчийн тангараг өргөх ёслолын журмыг Улсын Их Хурал тогтооно” гэж заасан. Энэ дагуу Улсын Их Хурлын даргын 2021 оны зургаадугаар сарын 10-ны өдрийн захирамжаар байгуулагдсан Монгол Улсын Ерөнхийлөгчийн тангараг өргөх ёслол, хүндэтгэлийн ажиллагааны бэлтгэлийг хангаж, зохион байгуулах үүрэг бүхий Ажлын хэсэг энэхүү журмын зарим заалтад өөрчлөлт оруулах нь зүйтэй гэж үзсэний дагуу Төрийн ёслолын газраас журамд нэмэлт, өөрчлөлт оруулах санал ирүүлжээ. Иймээс Монгол Улсын Их Хурлын чуулганы хуралдааны дэгийн тухай хуулийн 93 дугаар зүйлийн 93.1 дэх хэсэгт “Улсын Их Хурал шийдвэр гаргахаар хууль тогтоомжид заасан болон хууль хэрэгжүүлэхтэй холбогдсон аливаа зохион байгуулалтын шинжтэй асуудлын талаар хариуцсан байгууллага, эрх бүхий албан тушаалтан саналаа ирүүлсэн бол холбогдох Байнгын хороо хуралдаанаараа хэлэлцэж санал, дүгнэлтээ шийдвэрийн төслийн хамт нэгдсэн хуралдаанд оруулна” гэж заасны дагуу “Монгол Улсын Ерөнхийлөгчийн тангараг өргөх ёслолын журам батлах тухай” Улсын Их Хурлын тогтоолын төслийг боловсруулжээ.

Аймаг сумдын наадмыг хориглож, улсын наадмыг цахимаар хийнэ

Засгийн газрын хуралдаанаар Ерөнхий сайд Үндэсний их баяр наадмыг цахимаар үзэгчгүй зохион байгуулах чиглэл өгчээ. Наадмыг цахимаар буюу үзэгчгүйгээр зохион байгуулахтай холбоотойгоор наадмын төсвөөс хэмнэсэн мөнгийг эрүүл мэндийн салбарт зарцуулахаар болсон. Түүнчлэн бүх аймаг, сумдын баяр наадмыг зогсоох, хориглох шийдвэрийг Засгийн газрын энэ сарын 16-ны өдрийн хуралдаанаар гаргажээ.

Энэ жил Тулгар төрийн 2230, Их Монгол Улс байгуулагдсаны 815, Ардын хувьсгалын 100 жилийн ой тохиож буй. Үүнтэй холбогдуулан Үндэсний их баяр наадмыг зохион байгуулахад 10 тэрбум төгрөг төсөвлөсөн тухай албан бус мэдээ гарсан.

Арбидол зэрэг вирусийн эсрэг эмийн үнийн дээд хязгаарыг тогтоолоо

Эм ханган нийлүүлэх үйлдвэр болон эмийн сангуудад шалгалт хийж байгаа талаар ШӨХТГ-аас мэдээлэл хийлээ. "COVID-19 цар тахлын эмчилгээнд вирусийн эсрэг "Арбидол" эм хэрэглэж байгаа тухай олон нийтийн сүлжээнд тархсан. Сүүлийн үед халдвар авах хүний тоо ихэссэнтэй холбоотой уг эмийн эрэлт ихсэж, үнэ хөөрөгдөж, дамлан худалдаалж байгаа тухай хэрэглэгчдээс гомдол ирсэн ажээ. Цар тахлын эсрэг эмчилгээнд хэрэглэдэг 6,000 төгрөгийн үнэтэй байсан вирусийн эсрэг эм 30,000 гаруй төгрөг болж нэмэгдсэн талаар олон нийтийн сүлжээнд иргэд шүүмжлээд байгаа юм. Уг мэдээллийн дагуу Вирусийн эсрэг эмийн бөөний болон жижиглэнгийн үнэд тогтоосон хязгаарыг Эм эмнэлгийн хэрэгслийн хяналт зохицуулалтын газраас танилцууллаа.

Монгол Улсад коронавирусийн халдварын үед уух гурван нэр төрлийн вирусийн эсрэг эм худалдаалагдаж байна. Эдгээр эмийн үнийг судалж, ААН бүртэй нэг бүрчлэн уулзсаны эцэст эмийн үнийн дээд хязгаарыг тогтоосон байна. Арбидол 100 мг-тай эм БНХАУ, ОХУ-аас орж ирж байгаа юм байна. Ингээд БНХАУ-д үйлдвэрлэгдсэн эмийг бөөний үнийг 15000 төгрөг, жижиглэнгийн үнийг 19500 төгрөгөөр дээд хязгаар тогтоосон байна. Харин ОХУ-аас орж ирсэн Арбидол эмний бөөний үнийг 27720 төгрөг, жижиглэнгийн үнийг 36000 төгрөгөөр дээд хязгаар тавьж өгсөн байна.

Мөн Украйнаас орж ирдэг Арбивир эмийн бөөний үнийг 21500 төгрөг, жижиглэнгийн үнийг 27950 төгрөгөөр үнийн дээд хязгаар тогтоосон байна.

“Таван богд” ХХК-ны 200 ширхэг “Land Cruiser 300” автомашины урьдчилсан захиалга 2 цагийн дотор дүүрчээ

Монголчуудад хэдийнэ танигдсан "Land Cruiser" маркийн автомашины цоо шинэ загвар болох "Land Cruiser 300" загвар нь өнгөрсөн зургадугаар сарын 10-ны өдөр дэлхий дахинд нээлтээ хийсэн билээ.

3,5 литрийн багтаамжтай хос турбо хөдөлгүүр, мөн 10 шатлалт автомат хурдны хайрцагтай, нийт жин 200 кг багассан хэдий ч бат бөх чанар нь 20%-иар сайжирсан, дэлхийн анхны автомат ажиллагаатай тэнцвэржүүлэгч систем буюу e-KDSS системийг ашигласан уг автомашиныг эрэлт Монголд их байна. Манай улсад албан ёсны Таванбогд болон Мөнххада гэх хоёр диллер бий.

Мөнххада ХХК-ийн хувьд "Land Cruiser 300" загварын 120 ширхэг автомашины ирэх долдугаар сарын эхээр оруулж ирэх бөгөөд урьдчилсан захиалга нь зургадугаар сарын 10-ны өдөр эхэлж, хоёр өдрийн дотор дүүрчээ. Харин Таван Богд ХХК-ын хувьд "Land Cruiser 300" загварын 200 ширхэг автомашин ирэх наймдугаар сарын эхээр оруулж ирэх бөгөөд урьдчилсан захиалга нь ердөө хоёрхон цагийн дотор дүүрсэн гэнэ.

Land Cruiser 300 маркийн автомашин хөдөлгүүрийн багтаамж, моделоосоо хамааран 188 саяаас 295 сая төгрөгийн хооронд зарагдах юм байна.

Худалдаа Хөгжлийн банкийг луйвардсан хэрэгт тус банкны хоёр ажилтан холбогджээ

Өнгөрсөн тавдугаар сарын 25 -ны өдөр 50 настай эмэгтэй Худалдаа хөгжлийн банкны "Шангрила" салбараас хуурамч бичиг баримт үйлдэж, хоёр сая ам.доллар залилсан хэрэг гарсан. Тус хэрэгт холбогдсон 41 настай Б.Энхбаатар, 32 настай Б.Бямбадорж, 34 настай Б.Баттулга, 34 настай Э.Золхүү нарыг эрэн сурвалжилж саатуулсан юм.

Уг дөрвөн этгээдийг гэмт хэрэг үйлдэхэд Худалдаа хөгжлийн банкны хоёр ажилтан хамтарсан байж болзошгүй хэмээн шалгаж эхэлсэн тухай зарим хэвлэл мэдээллийн хэрэгслээр гараад буй.

Тодруулбал, Хэрэг шалгах явцад БНХАУ-ын иргэний үүсгэн байгуулсан "Эрдэнэт лайт" компанийн Худалдаа хөгжлийн банкан дахь данснаас хоёр сая ам.доллар луйвардахаас өмнө тус банкны 7 ажилтан дансных нь мэдээлэлд хандсаныг тогтоосон байна. Тэднээс хоёр нь тухайн залилагч нартай холбоотой нь нотлох баримтаар тогтоосон бололтой гэх албан бус мэдээлэл бий юм.

Файзер вакцины эхний ээлжийн 84240 тунг хүлээн авлаа

Япон Улсын Засгийн газрын буцалтгүй тусламжийн хүрээнд 2.35 сая тун Pfizer вакцин манай улсад нийлүүлэгдэхээс эхний 84240 тун вакциныг хүлээн авлаа.

Ирэх долоо хоногт 2 дахь ээлжийн нийлүүлэлтийг хүлээн авах бөгөөд улмаар үлдсэн хэсэг нь 2021 оны хоёрдугаар хагаст ирэх юм. Шадар сайд С.Амарсайхан цар тахлын амаргүй бэрх цагт буцалтгүй тусламж үзүүлж буй Япон Улсын Засгийн газар, НҮБ-ын Хүүхдийн сан (UNICEF)-д Монгол Улсын Засгийн газрын нэрийн өмнөөс талархал илэрхийлэв. Тэрээр мөн манай Стратегийн түнш бөгөөд гуравдагч хөрш Япон Улсын Засгийн газар вакцины тусламжаас гадна Монгол Улсад нэн хөнгөлөлттэй зээл олгох, эрүүл мэндийн тогтолцоог бэхжүүлж, шаардлагатай тоног төхөөрөмж нийлүүлэх, эрүүл мэндийн салбарын боловсон хүчинг бэлтгэх зэргээр хоёр талын болон олон талт хамтын ажиллагааны хүрээнд өргөн хүрээтэй дэмжлэг туслалцаа үзүүлж байгааг онцлон тэмдэглэв.

Эхний ээлжид ирсэн файзeр вакцинаар жирэмсэн болон хөхүүл эхчүүд, 17-гоос доош насны хүүхдүүдийг вакцинжуулна. Мөн энэ үеэр НҮБ-ын Хүүхдийн Сангийн Суурин төлөөлөгч Алекс Хайкенс хэлэхдээ “Монгол Улс цар тахлын эсрэг хэрэгжүүлж буй арга хэмжээнд Япон улсын Засгийн газраас санхүүгийн дэмжлэг үзүүлж байгаад НҮБ-ын Хүүхдийн Сангийн өмнөөс талархалаа илэрхийлэхийн сацуу вакцинжуулалтын ажлыг богино хугацаанд амжилттай хэрэгжүүлж буй Монгол Улсын Засгийн газарт баяр хүргэе. Өнөөдөр бидний хүлээн авч буй вакциныг дархлаажуулалтад хамрагдах боломжгүй байсан иргэдэд зориулж байгаагаараа онцлог юм” гэлээ.

Эцэг эх, асран хамгаалагчийн зөвшөөрөлтэйгөөр 16-17 насны хүүхдийг дархлаажуулж эхэллээ

Эрүүл мэндийн сайдын тушаалаар зургадугаар сарын 18-аас эхлэн 16-17 насны хүүхдүүдийг дархлаажуулалтад хамруулж эхэллээ. Дархлаажуулалтад хамрагдах хүүхдүүдэд Япон улсын буцалтгүй тусламжаар ирсэн Файзер вакцин хийх юм.

Улаанбаатар хотод 16-17 насны 33 мянга гаруй хүүхэд байдаг аж. Вакцин хамрагдах хүүхэд өөрийн эцэг эх, асран хамгаалагчийн зөвшөөрлөөр, сайн дурын үндсэн дээр вакцинжуулалтад хамруулна. Хүүхдээ дархлаажуулалтад хамруулахыг хүссэн эцэг эх, асран хамгаалагч нь дүүргийнхээ Файзер вакцин хийж буй дархлаажуулалтын цэгт хамт очиж, зөвшөөрлийг хуудас бөглөх юм. Эрүүл мэндийн яамнаас баталсан зөвшөөрлийн хуудаст вакцины талаарх танилцуулга, хийлгэсний дараа үзүүлэх урвал зэрэг мэдээлэл багтсан бөгөөд тэдгээр мэдээллээс асууж, тодруулах зүйл байвал дархлаажуулалтын эмчээр тайлбарлуулах боломжтой хэмээн ЭМЯ-аас мэдээлж байв.

Роналду ус уухыг уриалсны дараа “Кока Кола” компани 4 тэрбум ам.долларын алдагдал хүлээв

Криштиану Роналду Европын аварга шалгаруулах тэмцээний эхний тоглолт хийхийн өмнөх хэвлэлийн хурлын үеэр ширээн дээр байсан хоёр колаг холдуулж, оронд нь ус тавьсан билээ.

Харин ус уухыг уриалсан түүний үйлдлийн дараа “Кока кола” компанийн хувьцааны үнэ 1.6 хувиар унаж, дөрвөн тэрбум ам.долларын алдагдал хүлээсэн байна.

BOLOD ДОЛОО ХОНОГИЙН ТОЙМ: Жирэмсэн эх болон 16-17 насны 33 мянга гаруй хүүхдүүдийг дархлаажуулахаар болж, Улсын наадмыг ЦАХИМААР хийх шийдвэртэй ДОЛОО ХОНОГ
Tweet
Bolod.mn