Bolod.mn сайт өнгөрсөн долоо хоногт болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд УИХ-ын намрын чуулган албан ёсоор нээлтээ хийлээ. Түүнчлэн таван толгой түлш компанийн ажилчид цалингаа бүтэн өгөхийг шаардан ажил хаяалт зарлалаа. Эдгээр болон бусад мэдээ мэдээллийн тоймыг хүргэж байна.

Намрын чуулган нээлтээ хийлээ

УИХ-ын намрын чуулган аравдугаар сарын 1-н буюу өчигдөр нээлтээ хийлээ. Намрын чуулганы нээлтийн хугацаанд нийт 24 хууль тогтоомжийн төслийг хэлэлцэхээр төлөвлөсөн байна.

УИХ-д хэлэлцэх асуудлын эхэнд Монгол Улсын 2022 оны төсвийн тухай хууль, Төрөөс мөнгөний бодлогын талаар 2022 онд баримтлах үндсэн чиглэл батлах тухай Улсын Их Хурлын тогтоолын төсөл, Зөвшөөрлийн тухай, Монгол Улсын Их Хурлын хяналт шалгалтын тухай, Согтууруулах ундааны эргэлтэд хяналт тавих, архидан согтуурахтай тэмцэх тухай, Хөрөнгийн үнэлгээний тухай, Актив удирдлагын компанийн тухай, Хөгжлийн бодлого, төлөвлөлт, түүний удирдлагын тухай хуульд нэмэлт, өөрчлөлт оруулах тухай, Мэргэжлийн нэгдсэн холбооны эрх зүйн байдлын тухай, Худалдаа, аж үйлдвэрийн танхимын тухай зэрэг хуулиуд багтсан байна.

УИХ-ын намрын чуулганыг нээсэнтэй холбогдуулан УИХ-ын дарга Г.Занданшатар үг хэллээ. Тэрбээр ахмадын баярын өдрийг тохиолдуулан Монгол Улсын их хурлын нэрийн өмнөөс чин сэтгэлийн мэндчилгээ дэвшүүллээ.

Токио-2020 олимпын наадамд амжилт үзүүлсэн тамирчин, дасгалжуулагч шүүгч нарыг урамшууллаа

Монгол Улсын Ерөнхий сайд Л.Оюун-Эрдэнэ олимпын наадмаас медаль хүртсэн тамирчдыг өнгөрсөн даваа гарагт хүлээн авч уулзсан. "Токио-2020" олимпын наадмаас:

жүдо бөхийн эрэгтэйчүүдийн 81 кг-ын жинд Саиед Моллай мөнгөн медаль,
жүдо бөхийн -73 кг-ын жинд Ц.Цогтбаатар хүрэл медаль,
жүдо бөхийн эмэгтэйчүүдийн 48 кг-ын жинд Монгол Улсын гавьяат тамирчин М.Уранцэцэг хүрэл медаль,
чөлөөт бөхийн эмэгтэйчүүдийн 53 кг-ын жинд Б.Болортуяа хүрэл медаль,
паралимпын хүндийг өргөлтийн -107 кг жинд Монгол Улсын гавьяат тамирчин Э.Содномпилжээ алтан медаль тус тус хүртсэн билээ.

Токио-2020 олимп амжилттай оролцсон дээрх тамирчдад Монгол Улсын Засгийн газрын тогтоолоор мөнгөн шагнал болон орон сууцаар шагнан урамшуулсан юм. Тодруулбал, Паралимпын хүндийг өргөлтийн төрөлд алтан медаль хүртсэн Э.Содномпилжээг 3 өрөө орон сууц, 120 сая төгрөг, Жүдо бөхийн эрэгтэйчүүдийн төрөлд мөнгөн медаль хүртсэн Саиед Моллайг 2 өрөө орон сууц, 60 сая төгрөг, Жүдо бөхийн эмэгтэйчүүдийн төрөлд хүрэл медаль М.Уранцэцэг, жүдо бөхийн төрөлд хүрэл медаль хүртсэн Ц.Цогтбаатар нарт тус бүр 2 өрөө орон сууц, 30 сая төгрөг зэргээр урамшуулсан бол Олимпын наадмын боксын төрөлд тавдугаар байрт шалгарсан Үндэсний шигшээ багийн тамирчин Э.Цэндбаатарыг 20 сая төгрөгөөр, Үндэсний шигшээ багийн 3*3 сагсан бөмбөгийн эмэгтэйчүүдийн багийг 30 сая төгрөгөөр, Олимпын наадамд эх орноо төлөөлөн оролцох тамирчин, дасгалжуулагч нарын хувцасыг зохион бүтээсэн Michel&Amazonka брэндийг 10 сая төгрөгөөр тус тус шагнаж, батламж гардууллаа.

Таван толгой түлш ХХК-ын ажилчид ажил хаяалт зарлалаа

Өнгөрсөн пүрэв гарагт Таван толгой түлш ХХК-ын ажилчид ажил хаяалт зарлалаа. Тус компанийн ажилчид ажил хаялт зарлах болсон гол шалтгаан нь өнгөрсөн хугацаанд цалингаа бүтэн авч чадалгүй олон сар болсон, нийгмийн даатгалыг 2020 оны арванхоёрдугаар сараас хойш төлөөгүй, түүнчлэн хортой нөхцөлд ажиллахад ажлын байран дээрх ариун цэвэр хангалтгүй, ээлжийн амны хаалтгүй ажиллуулдаг зэрэг асуудлаас болжээ.

Компанийн удирдлагуудын зүгээс дээрх асуудлыг тайлбарлахдаа компанийн алдагдлаас үүдэлтэй хэмээн тайлбарласан байна. Үүссэн нөхцөл байдалтай холбоотойгоор салбарын сайд ажилчидтай уулзан тэдний зүгээс тавьж байгаа шаардлагыг ойрын хугацаанд шийдвэрлэнэ хэмээсэн юм. Тиймээс Тавантолгой түлш компанийн ажилчид ажил хаялтаа түр зогсоогоод байна. Тэдний зүгээс цалингаа нэмэгдүүлэхдээ анхны цалингын хэмжээнд хүргэхийг, мөн ажлын байрны наад захын эрүүл ахуйн асуудлыг шийдэж өгөх гэсэн хоёр шаардлагыг тавьж байгаа юм байна.

Жолооны үнэмлэхийг цахим хэлбэрт шилжүүллээ

Хиймэл оюун ухаан суурьтай, иргэнд зориулсан платформ буюу E-Mongoliа шинэчилсэн хувилбар ашиглалтад орлоо.

Иргэдийн бичиг баримттай холбоотой мэдээллүүд энэ системд багтах бөгөөд биедээ олон бичиг баримт авч явах шаардлагагүй болохоос гадна төрөөс авдаг лавлагаа, тодорхойлолтуудыг энэхүү системээс авах боломжтой аж. Шинэчлэгдсэн “E-Mongolia” системд бүртгүүлж, нэвтрэн орсон хүн бүрийн иргэний үнэмлэх, жолоочийн үнэмлэхийн мэдээлэл нь цахим хэлбэрээр байршсан байгаа юм.

Тухайлбал, жолооны үнэмлэхээ мартсан эсвэл хаяж үрэгдүүлсэн бол E-Mongolia аппликейшнээс цахим жолооны үнэмлэхээ цагдаагийн алба хаагчид үзүүлэн замын хөдөлгөөнд оролцох боломжтой болсон юм.

Ирэх оны долдугаар сараас хүүхдийн мөнгөний 50 хувийг хуримтлуулдаг болно

Засгийн газрын есдүгээр сарын 29-ны өдрийн хуралдаанаас гарсан шийдвэрүүдийн талаар Сангийн сайд Б.Жавхлан мэдээлэл өглөө. Тэрээр Улсын нэгдсэн төсвийг хэлэлцээд УИХ-д өргөн барихаар тогтсон талаар мэдээлсэн ба ирэх оны төсвийн онцлог нь цар тахлын үеийн эдийн засгийн уналтыг тогтворжуулах зорилготойг дурдлаа. Түүнчлэн ирэх онд хөгжлийн төсөв хийж байгаа аж.

Сар бүр олгодог хүүхдийн мөнгийг халамжаас хуримтлал руу шилжүүлэх бодлогын хүрээнд ирэх оны нэгдүгээр сарын 1-нээс сонголттойгоор өгөхөөр болсон. Хүүхдийн мөнгөний 100 мянган төгрөгийг авч хэрэглэж болно эсвэл хувааж хуримтлуулж болохоор шийдвэрлэсэн. Хадгаламжийн даатгалын корпорацад бүрэн даатгагдаж хамгаалагдсан байх болно хэмээсэн юм.

Харин 2021 оны долоодугаар сараас 50 хувь нь хадгаламж руу шууд шилжиж үлдсэн хувийг сонголттой олгохоор болэнн. Түүнчлэн тэрээр “Халамжийн хэт хавтгайруулах нь эдийн засагт сөрөг талтай тул ийм өөрчлөлтийг шат дараатай хийж эхэлж байна. Дэд бүтцийн хөрөнгө оруулалтад зориулж ЗТХС-ын багцыг долоо дахин, Эрчим хүчний сайдын багцыг 4 дахин нэмж буй” ажээ.

Парламентийн сэтгүүлчид Засгийн газарын мэдээллийг сэтгүүлчдэд ил тод байлга хэмээн шаардах бичиг хүргүүллээ

Парламентын сэтгүүлчид нэгдэн УИХ, Засгийн газрын үйл ажиллагааг нээлттэй сурвалжлах, иргэдийн мэдэх эрхийг хангахыг шаардаж УИХ-ын Тамгын газар, Засгийн газар, Ерөнхийлөгчийн тамгын газарт шаардах бичиг хүргүүллээ.

Сэтгүүлчид Төрийн ордонд ажиллах сэтгүүлчдийн мөрдөх журман дээрх хэвлэлийн эрх чөлөө зөрчсөн заалтуудаа эргэж харахыг шаардаад буй. Тодруулбал, хэвлэл мэдээллийн байгууллагын мэдэх эрх, цаашилбал иргэдийн мэдэх эрхэд халдаж мэдээлэл авах боломжгүй байгаа тул сэтгүүлчдийг төрийн ордонд чөлөөтэй ажиллах, парламентийг үйл ажиллагааг сэтгүүлчдэд нээлттэй байлгахыг шаардаж байна. Хэрэв шаардлагыг биелүүлээгүй тохиолдолд дараа дараагын арга хэмжээ авах болно хэмээж байв.

Хакүхо М.Даваажаргал зодог тайлахаа мэдэгджээ

Мэргэжлийн сумогийн их аварга Ёкозүна Хакүхо М.Даваажаргал зодог тайлахаар болжээ. Зодог тайлахаар болсныхоо учрыг баруун өвдөгний бэртэл гүйцэд эдгэхгүй байгаатай холбон тайлбарлаж буй гэнэ.

Дээрх мэдээллийг Монгол Улсаас Японд суугаа ЭСЯ-ны мэдээлэл баталгаажуулав. Уг мэдээлэлд “Японы мэргэжлийн сүмо бөхийн аварга Хакүхо М.Даваажаргал 2021 оны есдүгээр сарын 27-ны өдөр зодог тайлахаар болсон талаар “Эн-Эйч-Кэй” агентлагаас мэдээлэв. Хакүхо М.Даваажаргал 2007 онд мэргэжлийн сүмо бөхийн 69 дэх аварга буюу ёкозүна цол хүртэж, 14 жилийн турш дээд зиндаанд 45 удаа түрүүлэн 1187 даваа авсан юм. Тэрбээр энэ жилийн Нагоя башёд нэг ч уналгүй 15 даваатайгаар түрүүлж, 45 дахь түрүүгээ хүртэн өөрийн тогтоосон дээд амжилтыг шинэчилсэн билээ.

BOLOD ДОЛОО ХОНОГИЙН ТОЙМ: Намрын чуулган нээлтээ хийж “Тэрбум мод” тарих үндэсний хөдөлгөөн эхлүүлнэ
Tweet
Bolod.mn