BOLOD.MN сайт долоо хоног болгоны ням гарагт өнгөрөгч өдрүүдэд нийгэм, улс төрийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд шатахууны нийлүүлэлтийн талаарх мэдээлэл, СХД-ийн нөхөн сонгууль болон спортын талаарх олон сонирхолтой мэдээ мэдээллүүд өрнөөд буй. Мөн түүнчлэн ДАШТ-д оролцох сорил тэмцээн болон Монгол банкны талаарх мэдээллүүд онцолж байна.

Нөхөн сонгуулийн сурталчилгааны хугацаа дууслаа

УИХ-ын 18, 28-р тойрогт явагдах УИХ-ын гишүүний нөхөн сонгуульд нэр дэвшигчдийн сурталчилгаа есдүгээр сарын 18-ны өдрөөс эхлүүлсэн бөгөөд өчигдөр буюу 8-ны өдрийн 23:59 минутаас бүрэн зогсоох ёстой. 

Дурдсан хугацаанаас хойш сурталчилгаа гаргасан радио, телевизийн байгууллагын олон суваг дамжуулах үйлчилгээ эрхлэгчийн сүлжээгээр дамжих эрхийг Харилцаа холбооны зохицуулах хороо зөрчил гарсан өдрөөс эхлэн гурван сар хүртэл хугацаагаар хязгаарлах хуулийн зохицуулалттай. Мөн сонгуулийн сурталчилгаа явуулах эрх бүхий этгээд нь сурталчилгааны 21 хоногоос бусад хугацаанд сонгуулийн сурталчилгаа хийсэн бол хүнийг хорин мянган нэгжтэй тэнцэх хэмжээний /20 сая/ төгрөгөөр, хуулийн этгээдийг хоёр зуун мянган нэгжтэй тэнцэх хэмжээний /200 сая/ төгрөгөөр торгоно. 

Энэ сарын 7-ны өдрийн хувьд нэр дэвшигч, нам, эвсэл нэр дэвшихтэй холбоотойгоор авсан хандив болон сонгуулийн зардлын зарцуулалтын явцын тайлангаа нийтэд ил тод мэдээлж, төрийн аудитын дээд байгууллагад хүргүүлсэн байх учиртай. 

Ирэх сарын 15-ны дотор зээлээ төлөөгүй төгсөгчдийг Монголбанкны муу зээлдэгч ангилалд оруулна

Боловсролын зээлийн сангийн 2008-2016 онд хөнгөлөлттэй зээлээр сурч төгссөн төгсөгчдийг ирэх арваннэгдүгээр сарын 15-ний дотор төлбөр болон төлбөрийн үлдэгдлээ 

төлж барагдуулаагүй тохиолдолд дипломыг өгөхгүйгээс гадна Монголбанкны зээлийн мэдээллийн санд муу зээлдэгч ангилалд оруулахаар болжээ. Өнөөдрийн байдлаар Боловсролын зээлийн сангаас зээл авч, их, дээд сургууль төгссөн 13650 оюутан зээлээ төлж, дипломоо аваагүй байгаа аж. 1993-2016 оны хооронд дотоодын их, дээд сургуульд суралцаж байсан оюутнууд дипломоо барьцаанд тавьдаг байсан бол гадаадын их, дээд сургуульд суралцаж байгаа оюутнууд үл хөдлөх хөрөнгө барьцаанд тавьж. зээл авдаг байсан ба энэ хугацаанд 40 гаруй тэрбум төгрөгийн хөнгөлөлттэй зээлийг  30 орчим оюутанд олгосон байдаг аж.

Фейсбүүк сүлжээ дэлхий даяар 7 цагийн турш тасарсны дараа хэвийн ажиллаж эхэллээ

Дэлхийн хамгийн том сошиал платформ болох Фэйсбүүкийн үйлчилгээ бараг долоон цагийн турш тасалдсаны эцэст ажиллаж эхэллээ.

Улаанбаатарын цагаар аравдугаар сарын 4-оос 5-нд шилжих шөнө дундын орчимд тус үйлчилгээнд нэвтрэх боломжгүй болсон бөгөөд үүнээс 30 минут орчмын дараа Фэйсбүүк компани твиттер хуудсандаа үйлчилгээ нь тасалдсаныг хүлээн зөвшөөрч, сэргээхээр шуурхай ажиллаж байгаагаа мэдэгдсэн юм. 

Мөн түүнчлэн Фэйсбүүкийн эзэмшилд байдаг WhatsApp, Instagram үйлчилгээнүүд мөн тасалджээ. Онлайн үйлчилгээнүүдийн тогтвортой ажиллагааг хянадаг Downdetector байгууллага ийм хэмжээний уналтыг урьд өмнө нь үзээгүйгээ мэдэгдсэн байна. Тус байгууллага Фэйсбүүкийн тасалдалтай холбоотой 10.6 сая орчим гомдлыг дэлхийн олон орны хэрэглэгчдээс хүлээж авчээ.

Улаанбаатарын цагаар өглөөний 6 цагийн орчмоос эхлэн Фэйсбүүкийн сүлжээ алхам алхмаар хэвийн ажиллагаанд шилжиж эхэлсэн байна.

2 тэрбум орчим идэвхтэй хэрэглэгчтэй Фэйсбүүк компани сүүлийн хоёр өдөр дараалан хүнд байдалд ороод байгаа юм. Ням гарагт тус компанийн нэрээ нууцалсан ажилтан худал хуурмаг, сөрөг мэдээ мэдээллийг орлогоо өсгөхөд ашигладаг Фэйсбүүкийн үйл ажиллагааны талаар хэвлэлд дэлгэсэн нь дуулиан дэгдээсэн байна. Уг дуулианы улмаас Фэйсбүүкийн хувьцааны ханш Даваа гарагийн арилжааг уналттай эхэлсэн бол үйлчилгээнд нь тасалдал гарсны дараа үдээс хойш дахин унаж, нийтдээ 5.3 хувиар уруудсан юм.

Үүний улмаас Фэйсбүүкийн үүсгэн байгуулагч Марк Закербэргийн хөрөнгийн хэмжээ $6 тэрбумаар хорогдсон байна. Аюулгүй байдлын мэргэжилтнүүд энэ удаагийн тасалдлыг дотоод үйл ажиллагааны алдаа, тэр дотроо хэн нэг ажилтных нь хорлон сүйтгэх ажиллагаа байх магадлалтай гэж дүгнэжээ. Фэйсбүүк компани яг ямар шалтгааны улмаас үйлчилгээ нь тасалдсан талаар тодорхой тайлбар өгөөгүй байна. Тус компанийн үйлчилгээ энэ оны гурав, долдугаар саруудад бас тасалдаж байсан ч энэ удаагийнх шиг өргөн хүрээг хамраагүй юм.

АИ-92 шахатууны нийлүүлэлт хэвийн байна

Улаанбаатар хотод шатахууны хомстол үүсэж болзошгүй гэх хуурамч мэдээллээр иргэд шатахуун түгээх газруудад оочер дараалал үүсгэн их хэмжээгээр худалдан авах болсон. Уг үйл явдал холбогдох байгууллагаас мэдээлэл хийсэн билээ.

Монгол Улсын хэмжээнд АИ-92 авто бензиний 7 хоногийн, Улаанбаатар хотод 5 хоногийн ердийн нөөцтэй, нийлүүлэлт хэвийн байгааг УУХҮЯ-наас  энэ сарын 6-ны өдөр мэдээлэв. 

Тодруулбал, БНХАУ-аас өнгөрсөн сарын 27-ноос энэ сарын 2-нд 200 вагон буюу 10 131 тонн, өнгөрсөн сарын 27-30-нд ОХУ-аас 1 573 тонн шатахуун орж ирсэн. Энэ сард ОХУ-аас 54 880 тонн шатахуун оруулж ирэхээс эхний ээлжийн 33 вагоныг энэ сарын 2-нд орж ирсэн байна. Харин БНХАУ-аас энэ сард 12 700 тонн шатахуун оруулж ирэхээс эхний 50 вагон 4-нд орж ирсэн ба дараагийн 100 вагон буюу 5000 тонныг Замын-Үүдийн Шингэн түлш шилжүүлэн ачих байгууламжид шилжүүлэн ачиж байна.

Өмнөд хилээр орж ирсэн шатахууныг шилжүүлэн ачих ажлыг “Шингэн түлш шилжүүлэн ачих байгууламж” ТӨҮГ 24 цаг бүтэн ээлжээр ажиллаж, хоногт 50 вагон бүтээгдэхүүнийг Улаанбаатар хот руу нийлүүлж байна. Мөн ОХУ-аас энэ сарын 02-нд ОХУ-ын “Роснефть” компаниас 13 вагон 787 тонн, 3-нд 5 вагон 302 тонн,  4-нд 368 тонн, 10 сарын 5-н буюу өнгөрсөн мягмар гарагт 542 тонн газрын тосны бүтээгдэхүүн ачсан бөгөөд эхний ээлжийн бүтээгдэхүүнүүдийг импортлогч компанийн агуулахуудад нийлүүлж эхэлжээ.

БНХАУ, ОХУ-аас импортолж буй АИ-92 авто бензинийг төмөр замын хуваарьт оруулах, төмөр замын тээвэрлэлтийг саадгүй, шуурхай гүйцэтгэх, Сүхбаатар, Замын-Үүд боомтоор яаралтай татан авах ажлыг УУХҮЯ, ГХЯ, ЗТХЯ, Монгол Улсаас ОХУ, БНХАУ-д суугаа Элчин сайдын яамд, Улаанбаатар төмөр зам, Шингэн түлш шилжүүлэн ачих байгууламж болон бусад байгууллагууд зохион байгуулж байгаа аж.

О.Тулга ДАШТ-д өрсөлдөнө

ДАШТ-д оролцох эрхийн төлөө боксчин О.Тулга болон Э.Цэндбаатар нарын халз тулаан  энэ сарын 3-ны өдөр Орхон аймгийн "Сэлэнгэ" амралтын баазад болох байсан. Дүрмийн дагуу тамирчид 10-р сарын 3-ны өдрийн өглөөний 07:00-08:00 цагийн хооронд эрүүл мэндийн үзлэгт орх ёстой байсан. Гэтэл ОУХМ О.Тулга цагтаа үзлэгтээ орж, жиндээ тэнцсэн бол МУГТ Э.Цэндбаатар эрүүл мэндийн үзлэгтээ ирээгүй юм. Тэгвэл сорилт тэмцээн болохын өмнөх орой МУГТ Д.Цэндбаатарын багш Б.Энхтайван : "Бид хоёр маргаашийн сорилд оролцох боломжгүй боллоо" гэсэн гар утасны мессеж илгээсэн байжээ. Ийнхүү ДАШТ-д О.Тулга оролцохоор болсон юм.

Харин сүүлийн өдрүүдэд Казкастан улсаас МУГТ У.Цэндбаатарт ДАШТ-д оролцох бүрэн эрх олгосон гэх мэдээлэл цацагдсан. Казкастан улсаас Э.Цэндбаатарт сарын 15 сая төгрөгийн цалин, байр орон сууцаар хангах юм байна. Харин Э.Цэндбаатар одоогоор уг хүсэлтэд ямар нэгэн хариу өгөөгүй байгаа ажээ.

Шүүхээс Ю.Цэдэнбалыг цагаатгах шийдвэр гаргалаа

Сүхбаатар дүүргийн Иргэний хэргийн анхан шатны шүүхэд Монголын төрийг 44 жил удирдсан Ю.Цэдэнбалыг цагаатгах өргөдлийг хэлэлцэх шүүх хурал гурав дахь удаагаа болж, түүнийг хэлмэгдүүлсэнд тооцож, цагаатгажээ.

Шүүх хуралд өргөдөл гаргагч түүхийн шинжлэх ухааны доктор профессор, Юмжаагийн Цэдэнбалын намтар судлаач Ц.Жамбалсүрэн, гавьяат хуульч, өмгөөлөгч С.Нарангэрэл, өмгөөлөгч Ж.Жавзандулам нар оролцжээ.

Сануулахад, Юмжаагийн Цэдэнбал нь Увс аймгийн Давст сум Дөрвөд гэр бүлд төржээ. Цэдэнбал нь 11 хүүхэдтэй айлд тав дахь нь болж төрсөн байна. 1925 онд Ховд хотын бага сургуульд элсэж, 1929 онд төгссөн. Мөн онд Цэдэнбал боловсролоо үргэлжлүүлэхээр Эрхүү рүү явжээ. 9 жилийн турш тэрээр Эрхүү, Улаан-Үдийн хооронд аялж 1938 онд Сибирийн Санхүү, Эдийн засгийн институтыг онц дүнтэй төгсөж санхүү эдийн засагчийн мэргэжил эзэмшжээ.

1984 оны 8 сард хөгшрөлт, оюуны доройтол гэх зэрэг шалтгаар Цэдэнбалыг тэтгэвэрт нь гаргаж, МАХН-ын Төв Хорооны Ерөнхий нарийн бичгийн даргаар Жамбын Батмөнх сонгогдсон. Ю.Цэдэнбалыг Зөвлөлтийн Улсыг Аюулаас Хамгаалах Хороо /КГБ/ монголын удирдагчаар томилж байсан бол түүнийг албан тушаалаас нь зайлуулах ажиллагааг мөн л зөвлөлтийн КГБ зохион байгуулсан хэмээн зарим судлаачид үздэг. Ю.Цэдэнбал нас барах хүртлээ Москвад бараг гэрийн хорионд амьдарч байсан. Ю.Цэдэнбал Монголдоо очих талаар ЗХУКН-ын Төв Хороо, Москва дахь Монголын Элчин сайдын яаманд удаа дараа хүсэлт гаргаж байсан боловч хэн ч түүний хүсэлтийг хүлээж аваагүй юм. Ю.Цэдэнбал 1991 онд Москвад нас барахад шарилыг нь Улаанбаатарт авчирч, Алтан-Өлгийд оршуулжээ. Цэдэнбалын оршуулах ажиллагаанд түүний гэргий А.Филатова оролцохоор Москвагаас Улаанбаатарт ирээд байхад нь монголын прокурорын байгууллага түүнээс байцаалт авахыг оролдож байжээ.Энэ нь монголын хууль хяналтын байгууллага ёс зүй байхгүй, тухайн үед коммунист хандлагаасаа салаагүй байсан гэдгийг харуулж байгаа юм.

ОУХМ М.Лхагвагэрэл хүнд жинд ДАШТ-ий анхны медальтан боллоо

“Токио-2020” олимпийн тавдугаар байрын шагналт, 23 хүртэлх насны ДАШТ-ий хүрэл медальт, залуучуудын болон 23 хүртэлх насны Азийн дэд аварга, үндэсний шигшээ баг, “Даян” дэвжээ, “Жем Интернэшнл” компанийн тамирчин ОУХМ Мөнхтөрийн Лхагвагэрэл Ослогийн “Жордал Амфи” ордонд Монголын багийн анхны хүрэл медалийг авчирлаа. Тэрбээр Монголын чөлөөт бөхийн түүхэнд хамгийн хүнд жинд буюу 125 кг-ын жинд дэлхийн дэвжээнээс анхны медалийн эзэн болж байна.

Тэрбээр өчигдөр 1/8 шигшээд дэлхийн гурван удаагийн аварга Гүржийн алдарт бөх Гено Петриашвилид оноогоор цэвэр ялагдсан ч өнөөдөр дагахад Австрийн Йоханнес Людуширыг 4:0-ээр, медальтай үлдэх эсэхээ шийдэх шийдвэрлэх барилдаанд энэ жилийн Азийн аварга, Казахстаны туршлагатай бөх Олег Болтиныг 5:3-аар ялав.

Манай хүнд жингийн бөхчүүдээс насанд хүрэгчдийн ДАШТ-д ОУХМ Ж.Чулуунбат 2011 онд Бакуд, 2015 онд Лас-Вегаст, Н.Золбоо 2017 онд Парист хүрэл медалийн төлөө хүч үзэж хараахан медаль хүртэж чадаагүй байсан. Тэгвэл М.Лхагвагэрэлд жингийнхээ ах нарынхаа авч чадаагүй медалийг эх орондоо авчирлаа.

Монголын бодибилдинг, фитнессийн баг тамирчид ДАШТ-ээс 12 медаль хүртлээ

Дэлхийн Бодибилдинг Фитнессийн Холбоо (WBPF)-ны 12 дахь удаагийн Дэлхийн аварга шалгаруулах тэмцээн энэ сарын 4-6 ны өдрүүдэд Узбекистан улсын нийслэл Ташкент хотод амжилттай зохион байгуулагдаж өндөрлөлөө.

ДАШТ-д нийт 26 орны 270 тамирчин 42 ангилалд өрсөлдөж шилдгүүдээ тодрууллаа.

Манай улсаас 10 тамирчин 18 ангилалд өрсөлдөж 3 Алтан медаль , 6 Мөнгөн медаль , 3 Хүрэл медаль , 1 шагналт 4-р байр эзэлсэн амжилт үзүүллээ.

-Men’s senior fitness open ангилалд Э.Лхагва-Очир Алтан медаль,

-Men’s master bodybuilding 50-60 years old, up to 80kg ангилалд С.Дуламрагчаа Алтан медаль,

-Ladies women’s model physique 30-40 years ангилалд Б.Бадамханд Алтан медаль,

-Women’s senior fitness open ангилалд Т.Болор Мөнгөн медаль,

-Women’s junior fitness up to 21years ангилалд Т.Болор Мөнгөн медаль,

-Men’s senior fitness open ангилалд Ж.Баянмөнх Мөнгөн медаль,

-Women’s senior model physique up to 155cm ангилалд Д.Энхбилэг Мөнгөн медаль,

-Women’s senior model physique up to 170cm ангилалд Б.Бадамханд Мөнгөн медаль,

-Ladies women’s model physique over 40 years ангилалд З.Оюун-Ундрах Мөнгөн медаль,

-Women’s senior fitness open ангилалд Д.Энхбилэг Хүрэл медаль,

-Women’s senior sport physique up to 165cm ангилалд Т.Болор Хүрэл медаль,

-Women’s senior model physique up to 160cm ангилалд З.Оюун-Ундрах Хүрэл медаль,

-Эмэгтэй багийн дүнгээр Хүрэл медаль хүртсэн амжилт үзүүллээ.