МАН-ын бүлэг өнөөдөр гурван асуудал хэлэлцсэний хоёрыг хаалттай хэлэлцжээ. Нэгдүгээрт, хоёр хөрш улстай олон жил ужгирсан зарим харилцааны асуудлыг ярилцсан байна. Ерөнхий сайд Л.Оюун-Эрдэнэ ОХУ, манай улс хоорондын харилцаанд гарч буй зарим нэг тулгамдсан асуудлуудыг шийдвэрлэх талаар, мөн БНХАУ-тай харилцааны, ялангуяа нүүрс тээвэртэй холбоотой зэрэг олон асуудлыг ярилцсан гэж мэдээллээ. Зарим нь нууцын зэрэглэлтэй асуудлууд учраас мэдээлэх боломжгүй тул товч мэдээлэл өгч байгаа юм байна. Бүлгийн зүгээс төмөр зам, шатахуун, агаарын тээвэр, хийн хоолой гэх мэт асуудлуудыг шуурхай шийдвэрлэх шаардлагатай байна гэж үзжээ.

Хоёрдугаарт, төмөр замын талаар төрөөс баримтлах бодлогод өөрчлөлт оруулах тухай асуудлыг өнгөрсөн долоо хоногт УИХ-аар хэлэлцсэн. Засгийн газраас нууцын зэрэглэлтэй өргөн барьсан учраас хаалттай хэлэлцсэн юм. Төмөр замын талаар төрөөс баримтлах бодлогод хоёр асуудал багтаж байгаа юм байна. Үүнд, Монгол Улс хэвтээ болон босоо тэнхлэгийн төмөр замын асуудал ярьж байгаа бөгөөд 416км Зүүнбаянгийн төмөр зам, 267км Гашуунсухайтын төмөр зам баригдаж байна. Цаашид ч төмөр зам барих шаардлагатай, гэхдээ дандаа ашиглалтын концессын гэрээгээр барих нь зүйтэй гэсэн байр суурьтай байгаа юм. Баруун чиглэлд Шивээхүрэн чиглэлийн төмөр замыг, зүүн чиглэлд Чойбалсан, Хөөт, Бичигт чиглэлд, Улаанбаатарын эргэн тойронд Богдхан төмөр замыг ашиглалтын концессоор бариулах нь зүйтэй гэж үзжээ. Эдгээр төмөр замыг бодлогод нь тусгаж өгч байгаа бөгөөд Засгийн газраас өргөн барьсан төслүүдийг зарчмын хувьд дэмжих нь зүйтэй гэж бүлэг шийдвэрлэжээ.

Мөн өмнө нь баригдаж эхэлсэн Гашуунсухайт, Зүүнбаянгийн төмөр замуудын явцын талаарх мэдээллийг сонссон байна.

Нээлттэй хэлэлцсэн асуудал нь МАН-ын бүлэгт хоёр гишүүн нэмэгдэж, Э.Батшугар, Ц.Идэрбат нарыг албан ёсоор намын бүлэгт бүртгэснээр 62 гишүүнтэй болж байгаа юм.

Ингээд сэтгүүлчдийн асуултад хариулт өглөө.

-УБТЗ-ын даргыг томилох асуудлыг бүлгийн хуралдаанаар орсон уу. АМГТГ-ын дарга Хэрлэнг энэ албан тушаалд томилохоор саналаа хүргүүлсэн гэсэн мэдээлэл байна. Өмнө нь хэд хэдэн удаа нэрс явуулаад буцаагдсан. Шаардлага хангахгүй хүнийг санал болгоод байгаа болохоор буцаагдаад байна гэсэн ойлголт байгаа. Ер нь салбарын бус хүнийг яагаад зүтгүүлээд байгаа юм бэ. Дотроо тохироо хийсэн юм уу, Ерөнхийлөгч зүтгүүлээд байгаа юм уу. Энэ тал дээр МАН-ын бүлэг хэрхэн анхаарч ажиллаж байгаа вэ?

-ОХУ-тай харилцах асуудлын хүрээнд УБТЗ-ын даргын томилгоо багтаж байгаа. Хүний нэрийг бид огт яриагүй. ОХУ-ын талаас орос захирал байна гэдэг шаардлагыг тавиад байгаа юм. Харин бид монгол захирал байна гэдэг л саналаа хүргүүлж, ярилц гэсэн чиглэл өгсөн. Түүнээс биш хүн огт яригдаагүй. Хэнийг явуулах, ямар хүн томилох асуудал бол ОХУ-тай байгуулсан дүрэм, журмын хүрээнд Монгол Улсын хуулиараа Засгийн газар шийдвэрлэдэг асуудал юм.

-Тэгвэл ойрын хугацаанд төмөр замын даргын асуудлыг ярихгүй гэсэн үг үү. Томилгоо нь нэлээд удлаа?

-Харин хурдан ярь, Монгол хүн байлгах талаас нь ярь, ажилла, хурдлах хэрэгтэй гэсэн чиглэл өгсөн. Гэхдээ тэрийг энийг ярь гэдэг чиглэл өгөөгүй.

-Томилгоотой холбоотой асуудлыг Ерөнхий сайдаас оруулж ирж байна уу, бүлэг дотроо томилгооны эргэн тойронд ярьсан зүйл байна уу. Өмнө нь санал буулгасан хүмүүс буцаагдсан шалтгаан нь юу байсан бэ?

-Тэр шалтгаанаа Их хурал дээр, бүлэг дээр огт яриагүй. Нөгөө талаас л орос захиралтай бай гэж шаардлага тавьж байна. Томилгоо бол УИХ дахь намын бүлэг УИХ-тай холбоотой томилгоо, шаардлагатай бол Засгийн газраас оруулж ирсэн томилгоо дээр бодлогоо гаргадаг. Төмөр замын даргын асуудал дээр бидний гол барьж байгаа зарчим бол Монголын талынхаа байр суурийг хадгалах юм. Энд гацсан саатсан зүйл байхгүй, ойрын үед тодорхой болно гэж ойлгож байгаа.

-Өнгөрсөн долоо хоногт МАН-ын бүлэг Оюутолгойн асуудлыг хаалттай хэлэлцсэн. Өнөөдөр энэ асуудлыг дахин хэлэлцсэн болов уу. Учир нь Рио Тинтогийн зүгээс Засгийн газарт дахин санал тавьсан захидлыг ирүүлж, улмаар манай талд оногдох 70 хувийн өрийг тэглэх тухай дурдсан байсан. Энэ асуудлыг хэлэлцсэн үү?

-Өнгөрсөн долоо хоногт бүлэг Оюутолгойн хэлэлцээрийн явцыг сонссон. Оюутолгой ХК, МУ-ын Засгийн газрын хооронд хэлэлцээр явж байгаа. 2019 онд УИХ-аас баталсан 92-р тогтоолоор шаардлагатай гэж үзвэл 2015 оны Дубайн гэрээг хүчингүй болго, 2009 оны хөрөнгө оруулалтын гэрээнд өөрчлөлт оруул гэсэн шийдвэрийг гаргаж өгсөн юм. Үүний дагуу Х.Нямбаатар сайдаар ахлуулсан ажлын хэсгийг Засгийн газраас томилж хэлэлцээр хийгээд явж байна. Энэ хүрээнд л бид ярилцсан. Шийдсэн зүйл байхгүй. Бүлгээс аль болох 92-р тогтоолд нийцүүл, хэрэгжүүл гэдэг чиглэлийг ажлын хэсэгт өгсөн.

-Шинээр барих төмөр замуудын ТЭЗҮ гарч эхэлсэн үү?

-Одоо бидний хэлэлцэж байгаа нь бодлогын бичиг баримт. Хаагуур ямар хэмжээний төмөр зам барих вэ гэдэг ерөнхий маршрут бодлогын бичиг баримт. Үүний дараа ТЭЗҮ, зураг төслүүд бэлэн болно. Тэр дагуу дараагийн ажлууд бэлэн болдог.

-Бүлэг дээр хил хаасан асуудлаар цаашдаа ямар нэгэн арга хэмжээ авах, эрсдэл хохирлын үнэлгээг хийх зэргээр хэлэлцэж байгаа зүйл байна уу?

-БНХАУ-тай тулгамдаж байгаа асуудлын нэг бол энэ. Хятадын зүгээс тавьж байгаа шаардлага бол ковидтой холбоотой. Ковид гарвал бид бүх юмаа хаана гэж байгаа. Тэгэхээр нөгөө улсын шаардлагыг хангахаас өөр арга байхгүй. Дараа дараагийн тестүүдээ аваад нээж өгнө л гэсэн. Өвлийн олимп хоёрдугаар сард Бээжинд болохтой холбоотойгоор дотооддоо халдвар алдахгүй гэж хатуу дэглэм барьж байгаа юм билээ. Нийт БНХАУ-ын эргэн тойронд байгаа хуурай замаар хиллэдэг 8 улсад энэ зарчмаа барьж байгаа юм байна. ГХЯ, ХХААХҮЯ Эрээн хаагдсан ч бусад мужуудаас нийлүүлэлт, хангамжийн асуудал дээр анхаарлаа хандуулж хятадын талтай ярьж байгаа гэсэн. Мөн олимпоос гадна Хятадын Коммунист намын том хурал болох гэж байгаа учраас чанга дэглэм баримталж байгаа юм билээ.

МАН-ын бүлэг: ОХУ-ын талаас УБТЗ-ын даргаар орос хүн томилох шаардлагыг тавьсан
Tweet
Bolod.mn