BOLOD.MN сайт долоо хоног бүрийн ням гарагт өнгөрсөн өдрүүдэд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Засгийн газраас хэд хэдэн асуудлуудыг хэлэлцэн баталлаа. Тодруулбал, Манай улс хилээ бүрэн  нээж өндөржүүлсэн бэлэн байдлын улбар шар түвшин цуцалж шар түвшинд хүргэлээ. Ингэснээр үйлчилгээний байгууллагуудын цагийн хуваарьт өөрчлөлт орж цар тахлын өмнөх цагийн хувиараар ажиллахаар боллоо. Мөн Хөгжлийн банктай холбоотой асуудлаар одоо болон өмнөх гүйцэтгэх захиралуудыг АТГ-аас шалгаж байгаа. Энэ хүрээнд тус банкны гүйцэтгэх захирал асан Б.Батбаярыг хэрэгт нөлөөлсөн байж болзошгүй хэмээн нэг сарын хорих шийдвэр гаргалаа. 

• Монгол Улс хилээ нээж, вакцины бүрэн тунтай жуулчдад нээлттэй орон боллоо

Засгийн газрын ээлжит хуралдаанаар гаргасан шийдвэрийн талаар Ерөнхий сайд Л.Оюун-Эрдэнэ мэдэгдэл хийлээ. Мэдэгдлээр өндөржүүлсэн бэлэн байдлыг цуцлах тухай Засгийн газрын тогтоолыг баталлаа. Ингэснээр улбар төвшинд байсан бэлэн байдлын зэргийг шар төвшинд хүргэж Монгол Улс хилээ бүрэн нээж, жуулчдад нээлттэй орон боллоо. Гадаадаас ирэх жуулчдыг вакцины бүрэн тунд хамрагдсан байх ёстойг сануулсан бөгөөд хэрэв зайлшгүй шаардлагаар манай улсад ирсэн жуулчид вакцинд хамрагдаж чадаагүй бол, Монгол улсад вакцинд хамрагдах бүрэн боломжтойг дуулгалаа.

Түүнчлэн ААН-үүдийн үйл ажиллагааг хуучин цагийн хуваарийн дагуу ажиллуулах шийдвэр гарсан. Ингэснээр ресторан, зоогийн газар шөнийн 24 цаг хүртэл, баар караоке цэнгээний газар 05.00 цаг хүртэл ажиллах хэвийн горимд шилжээд байна.

• Хөгжлийн банкны хэрэгт холбогдсон Г.Солтан, Б.Ундармаа, Д.Дамба-Очир, Э.Батзориг, Д.Хаянхярваа нарыг МАН-аас хөөлөө

МАН-ын Хяналтын ерөнхий хороо хуралдаж, Хөгжлийн банкны зээлийн асуудалтай нэр холбогдсон гишүүдийн асуудлыг хэлэлцлээ.

МАН-ын 30-р их хурлаар намын дүрэмд өөрчлөлт оруулж, МАН-ын гишүүн цаг хугацаанаас үл хамаарч авлига, албан тушаалын гэмт хэргээр буруутай нь шүүхээр тогтоогдон, ял шийтгэл эдэлж байсан бол МАН-ын сонгуульт албан тушаалд нэр дэвшихгүй, улс төрийн дэмжлэг авахгүй гэж заасан. Хоёрдугаарт, МАН-аас улс төрийн болон төрийн өндөр албан тушаалд томилогдон ажиллаж байхдаа авлига, албан тушаалын гэмт хэрэгт холбогдсон бол 30 хоногийн дотор албан тушаалаасаа түдгэлзэх хүсэлт гаргах заалтыг ч мөн оруулж өгсөн. Хүсэлтээ ирүүлээгүй тохиолдолд Хяналтын ерөнхий хорооны хурлаар намын гишүүнээс түдгэлзүүлэх заалтыг ч мөн оруулсан байдаг. Гуравдугаарт, авлига, албан тушаалын хэрэг нь шүүхээр тогтоогдсон бол намын гишүүнээс гарсанд тооцох заалтыг мөн нэмж тусгасан билээ. Дээрх заалтын дагуу Г.Солтан, Б.Ундармаа, Д.Дамба-Очир, Э.Батзориг, Д.Хаянхярваа нарыг намын гишүүнээс хөөжээ.

Цаг хугацаанаас үл хамаарч авилга, албан тушаалын хэргээр ял шийтгэл эдэлж байсан гишүүд сонгуульт албан тушаалд томилогдохгүй гэсэн заалтыг үндэслэн судалгаа хийж байгаа аж. Судалгаа бүрэн дуусаагүй ч таван гишүүнийг Бага хурлын гишүүнээс чөлөөлөөд байна. Хөгжлийн банкны зээлийн асуудалд нэр холбогдсон гишүүдийн асуудлыг хууль хяналтын байгууллага шалгаж байгаа. Өнөөдрийн байдлаар дээрх гишүүдийг яллагдагчаар татсан гэсэн мэдээлэл байхгүй. Иймд хууль хяналтын байгууллагад нэр тус бүрээр нь лавлагаа гаргуулах хүсэлт хүргүүлсэн хэмээн МАН мэдэгдлээ.

Дээр нь уг асуудалд нэр холбогдсон гишүүдийг ажлын гурав хоногт багтаан тайлбар ирүүлэхийг үүрэг болгожээ. Үүнд, С.Бямбацогт, Г.Амартүвшин, Х.Ганхуяг, Г.Дамдинням, М.Билэгт, А.Сүхбат, Ш.Лхамсүрэн, Ш.Үнэнбат нар багтаж байгаа ба тэдэнд албан ёсоор тайлбар ирүүлэх үүрэг өгчээ. Тэд яллагдагчаар татагдсан тохиолдолд 30 хоногийн дотор албан тушаалаас түдгэлзэх өргөдлөө өгөх ёстой юм.

• Чанаргүй зээл олгосон Хөгжлийн банкны гүйцэтгэх захирал асан Б.Батбаярыг цагдан хорихоор боллоо

Хөгжлийн банкны чанаргүй зээлүүдтэй холбоотойгоор үе үеийн удирдлагуудыг нь цагдан хорих эсэх шүүх хурал өнөөдөр  буюу   сарын 18-нд Баянзүрх, Чингэлтэй, Сүхбаатар дүүргийн шүүхэд боллоо. 

Тодруулбал, чанаргүй зээл олгосон асуудлаар Хөгжлийн банкны гүйцэтгэх захирал асан Н.Мөнхбат, Б.Батбаяр нарыг болон мөн тухайн үеийн ТУЗ-ийн дарга асан Б.Шинэбаатар болон тэргүүн дэд захирал асан Ч.Энхбат, Д.Дэлгэрсайхан, Б.Батбаяр, Хөгжлийн банкны дэд захирал Ч.Мөнхбаяр нарыг цагдан хорих хүсэлтийг АТГ-аас шүүхэд ирүүлсэн.

Одоогоор гүйцэтгэх захирал асан Б.Батбаярыг гэрчид нөлөөлж болзошгүй гэдэг үндэслэлээр нэг сар хорих шийдвэр гаргалаа.

• Цэцэрлэгийн бага бүлгийн бүртгэл 24-г хүртэл үргэлжилнэ

2019 оны нэгдүгээр сарын 1-ний өдрөөс 2019 оны арванхоёрдугаар сарын 31-ний өдрийн хооронд төрсөн хүүхдийг цэцэрлэгт бүртгэх бүртгэл эхэллээ.  Бүртгэлийг WWW.PARENT.EDU.MN цахим систем болон ESIS мобайл аппликейшнээр зохион байгуулна.

Эхлэх хугацаа: 2022 оны 2 дугаар сарын 18-ны өдрийн 09:00 цаг

Дуусах хугацаа: 2022 оны 2 дугаар сарын 24-ний өдрийн 17:59 цаг

Цахим элсэлтийн үйл ажиллагааг 2022 оны 2 дугаар сарын 25-ны өдрийн 09:00 цагт иргэд, эцэг эхчүүдэд нээлттэйгээр зохион байгуулах бөгөөд элсэлтийн мэдээ эцэг эх, асран хамгаалагчийн бүртгүүлсэн утасны дугаарт мессежээр очно.

Эцэг эх, асран хамгаалагч нь цахимаар бүртгүүлэх боломжгүй бол өөрийн биеэр харьяа дүүргийн Боловсролын хэлтэс болон хамран сургах тойргийн цэцэрлэг дээрээ очиж дэмжлэг авах боломжтой.

Цэцэрлэгийн элсэлттэй холбоотой мэдээллийг elselt@edu.mn и-мэйл хаяг болон 75778080 дугаарын утсаар /08:30-17:30 цагт/ холбогдож авах боломжтой.

• Эрүүл мэндийн яамнаас иргэн бүрийг эрүүл мэндийн үзлэг оношлогоонд хамруулна

Ирэх тавдугаар сарын 1-нээс эхлэн иргэн бүрийг эрүүл мэндийн урьдчилсан үзлэг, эрт илрүүлгийн шинжилгээнд хамруулах болсныг Засгийн газрын ээлжит хуралдааныг үеэр мэдэгдлээ. Манай улсын хувьд 2018 оноос эхлэн насны багцаар ЭМДС-гаас урьдчилан сэргийлэх үзлэгт хамруулахаар болсон хэдий ч нэг жилийн үзүүлэлт 10-аас дээш хувь гардаггүй буюу хангалтгүй байдаг байна.

Урьдчилан сэргийлэх үзлэгт зориулж Эрүүл мэндийн даатгалын санд 60,8 тэрбум төгрөгийг төвлөрүүлсэн ба тавдугаар сарын 1-нээс нийт иргэнийг эрүүл мэндийн урьдчилан сэргийлэх үзлэг, эрт илрүүлгийн шинжилгээнд хамруулах  юм. Ингэснээр иргэдийн эрүүл мэндийн нэгдсэн мэдээллийн сан бүрдэхээс гадна цаашид гарах санхүүгийн эрсдэлээс ч сэргийлэх боломжтой. Монгол Улсын дундаж наслалт эмэгтэйчүүд 70.3, эрэгтэй 60.6 буюу насны зөрүү 9,7 жил байдаг. Засгийн газар 2024 хүртэлх мөрийн хөтөлбөртөө дээрх зөрүүг таван жил болгоно гэсэн зорилт тавьсан байдаг. 

Энэхүү аянг өрнүүлснээр сүүлийн хоёр жилд цар тахал өртсөн иргэд нөхөн сэргээх оношилгоонд хамрагдах, нас баралтын шалтгаан болсон тэргүүлэх таван өвчнийг /зүрх судас, амьсгалын тогтолцоо, хоол боловсруулах эрхтэн, шээс бэлгийн зам, гэмтэл согог/ эрт илрүүлэх зорилготой. Монголд олон улсад хэрэглэж байгаа 24-25 оношилгоо шинжилгээний 17-г хийдэг ба дээрх шинжилгээнд бүх насныхан буюу нярайгаас ахмад үеийн бүх иргэнийг хамруулах зорилтыг тавин бэлтгэл ажлыг хангаж байгаа аж.

• Нийслэлийн 59 ЕБС-ын цагийн хуваарьд өөрчлөлт орууллаа

Даваа гарагаас буюу энэ сарын 14-ны өдрөөс эхлэн ЕБС-ууд болон цэцэрлэгийн үйл ажиллагааг 100% танхимаар хичээллүүлж байгаа. Хичээл сургууль эхэлсэнтэй холбогдуулан замын хөдөлгөөний ачааллыг бууруулах зорилготойгоор Нийслэлийн зарим ЕБС-уудын хичээл эхлэх цагийн хуваарьт өөрчлөлт оруулах саналыг ЗДТГ-аас боловсруулаад байна. Энэ хүрээнд төрийн өмчийн 23,  төрийн бус өмчийн 36 нийт 59 сургуулийн хичээл эхлэх цагийг өөрчилж эхэллээ. Эдгээр 59 сургуулийн 44 нь Их тойрагт байршилтай бол 15 нь Хан-Уул дүүрэг буюу Яармагт байрладаг. Дээрх сургуулиудад нийт 85.207 хүүхэд суралцаж байгаагаас 23.952 буюу 28.1 хувь нь такси болон хувийн унаагаар хичээлдээ явдаг гэсэн судалгаа гарсан.

Тиймээс асуудлыг эцэслэн шийдэхийн тулд олон нийтийн дунд Их тойруу болон Яармагт байрлалтай 59 сургуулийн хичээл эхлэх цагт өөрчлөлт оруулахыг дэмжих эсэх талаарх санал асуулгыг www.ulaanbaatar.mn сайтаар хоёрдугаар сарын 16-ны 14:00 цагаас хоёрдугаар сарын 18-ны 14:00 цаг хүртэл явууллаа.  Судалгаанд хичээлийн цаг өөрчлөх тухай асуулгад оролцсон иргэдийн 74,1 хувь дэмжсэн байна. Санал асуулгын дүн болоод холбогдох тооцоо, судалгааг үндэслэн нийслэлийн зарим ерөнхий боловсролын сургуулийн хичээл эхлэх цагт өөрчлөлт оруулан, зохицуулалт хийх тухай Нийслэлийн Засаг даргын А/217 дугаар захирамж гарсан. Ийнхүү Захирамжийн дагуу төрийн болон төрийн бус өмчийн  ерөнхий боловсролын 59 сургуулийн хичээл эхлэх цагийн хуваарийг өөрчиллөө.

• Элсэлтийн Ерөнхий шалгалтын бүртгэл орон даяар эхэллээ

2022 оны элсэлтийн ерөнхий шалгалтын бүртгэл www.eec.mn цахим хуудсаар орон даяар, Улаанбаатар хотын цагаар 2022 оны хоёрдугаар сарын 14-ний өглөө 09:00 цагт эхэллээ. Бүртгэл 2022 оны дөрөвдүгээр сарын 25-ны 18:00 цаг хүртэл https://eyesh.eec.mn/ цахим хуудсаар явагдана.

Шалгуулагчид Элсэлтийн ерөнхий шалгалтад бүртгүүлэхдээ :

• Элсэлтийн ерөнхий шалгалтад бүртгүүлэхдээ шалгуулагч зөвхөн өөрийн и-мэйл хаягийг ашиглана.
• Элсэлтийн ерөнхий шалгалтад монгол хэл, англи хэл, орос хэл, математик, физик, хими, биологи, газар зүй, монгол улсын түүх, нийгмийн тухай мэдлэг хичээлүүдээс 2-оос багагүйг сонгож бүртгүүлнэ.
• Элсэлтийн ерөнхий шалгалтын нэг хичээлийн төлбөр 5800 төгрөг байна
• Элсэлтийн ерөнхий шалгалтын бүртгэлийн хугацаанд шалгалт өгөх хичээлээ сонгож төлбөрөө төлсөн байна. Төлбөр төлөгдөөгүй тохиолдолд бүртгэл баталгаажихгүй.
• Хөгжлийн бэрхшээлтэй болон тусгай сургуулийн суралцагчид Элсэлтийн ерөнхий шалгалтад бүртгүүлсэн бол холбогдох бичиг баримт /өргөдөл, хүсэлт, эмчийн магадлагаа, тодорхойлолт, сургуулийн албан бичиг/-ыг бүртгэлийн хугацаанд БҮТ-д ирүүлнэ.

• Н.Түвшинбаярын зүйлчлэлийг “Хүнийг онц харгис хэрцгийгээр хөнөөсөн” болгожээ

Өөрийн найз, улсын начин Э.Энхбатыг зодож, хөнөөсөн олимпын аварга Н.Түвшинбаярт холбогдох хэргийн зүйлчлэлийг Хан-Уул дүүргийн Прокурорын Газрын хяналтын прокурор өөрчилсөн байна. Тодруулбал Эрүүгийн хуулийн 11.1-2.1 дэхь хэсгийн "хүний эрүүл мэндэд хүнд хохирол санаатай учруулсан" гэсэн зүйлчлэлээр шалгагдаж байсан түүнд эрүүгийн хуулийн 10.1-2.1-дэхь хэсгийн "Хүнийг онц харгис хэрцгийгээр хөнөөсөн" гэж, эрүүгийн хэрэг үүсгэжээ.