BOLOD.MN сайт долоо хоног бүрийн ням гарагт улс төр, эдийн засаг, нийгмийн хүрээнд болж өрнөсөн онцлох үйл явдлуудыг тоймлон хүргэдэг. Эдгээр өдрүүдэд Худалдаа хөгжлийн банкныг тойрсон асуудлаас үүдэн ХХБ-ны ТУЗ-ын дарга Д.Эрдэнэбилэгийг нэг сарын хугацаатай цагдан хорих шийдвэр гаргалаа. Мөн түүнчлэн Худалдаа Хөгжлийн банктай нэр холбогдоод буй УИХ-ын зарим гишүүдийг прокурорын байгууллагаас яллагдагчаар татах тогтоол үйлджээ. Харин иргэдийн бухимдлыг хүргэсэн нэгэн мэдээлэл бол дизель түлшний үнэ нэмэгдсэн үйл явдал байв. Эдгээр болон бусад онцлох мэдээллийг BOLOD ТОЙМ тоймлон хүргэж байна.

Д.Эрдэнэбилэг, М.Мөнхбаатар нарыг цагдан хорилоо

Сүхбаатар, Баянзүрх, Чингэлтэй дүүргийн Эрүүгийн хэргийн анхан шатны шүүхэд Худалдаа хөгжлийн банкны ТУЗ-ийн дарга Д.Эрдэнэбилэг, Монголын Зэс Корпорацийн ТУЗ-ийн дарга Б.Мөнхбаатар нарыг цагдан хорих эсэхийг шийдвэрлэх шүүх хурал боллоо. Шүүхээс Худалдаа хөгжлийн банкны ТУЗ-ийн дарга Д.Эрдэнэбилэг, Монголын Зэс Корпорацийн ТУЗ-ийн дарга М.Мөнхбаатар нарыг энэ сарын 21-ний өдрөөс эхлэн нэг сарын хугацаанд цагдан хорих шийдвэрийг гаргалаа. Нийслэлийн прокурорын газраас тэднийг гэмт хэрэг үйлдэж болзошгүй гэсэн үндэслэлээр шүүхэд хандсан байна. Шүүхээс яллагдагч Д.Эрдэнэбилэгт оноогоод байсан Монгол Улсын хилээр гарахыг хязгаарлах арга хэмжээг өөрчилж, цагдан хорихоор шийдвэрлэв. Түүнчлэн Б.Мөнхбаатарт өмнө оноосон барьцаа авах арга хэмжээг өөрчилж, цагдан хорих шийдвэр гаргасан байна.

Дизель түлшний үнэ литр тутамдаа 200-250 төгрөгөөр нэмэгдлээ

Зарим шатахуун импортлогчид шатахууны үнээ литр тутамд 200-250 төгрөгөөр нэмсэн гэх мэдээлэл олон нийтийн сүлжээнд цацагдав. Энэ талаар Уул уурхай, хүнд түйлдвэрийн яамнаас тодруулахад "АИ-92 шатахууны үнэ огт нэмэгдээгүй, 2300 төгрөг хэвээрээ байгаа" хэмээн мэдээлсэн. Харин дэлхийн зах зээлийн үнээс хамаарч дизель түлшний үнэ 250 төгрөгөөр нэмэгдэж, 3380 төгрөг болсон бол АИ-95 шатахууны үнэ 200 төгрөгөөр нэмэгдэж, 3260 төгрөг болжээ.

Үнийн зөвлөл 2021 оны арваннэгдүгээр сарын 22-нд хуралдаж, АИ-92 шатахууны үнэ чөлөөлөх шийдвэр гаргасан. Тэд хэлэхдээ "Монгол Улс шатахууны үнээ Сингапурын зах зээл дээрх газрын тосны үнэтэй шууд уялдуулж тогтоодог. Иймд гадаад зах зээлд газрын тосны бүтээгдэхүүний үнэ өсвөл шатахууны үнэ огцом нэмэгдэх эрсдэл үүсдэг.

Үүнээс хойш үнийг төр, аж ахуйн нэгж оролцохгүйгээр зах зээлийн хуулиар автоматаар тогтоодог систем рүү шилжиж байгаа юм. Өөрөөр хэлбэл, зах зээлийн эрэлт нийлүүлэлтээс хамаарч гадаадаас шатахуун импортолж буй үнийг сүүлийн зургаан сарын дундаж өртгөөр тооцно гэсэн үг. Энэ үнийг бодоход төр оролцохгүйгээр зах зээлийн үнээ тооцоолж явна. Жишээлбэл, нэг удаагийн өөрчлөлт нийт үнийн таван хувиас хэтрэхгүй байх юм. Одоо жижиглэнгийн үнэ 2050 төгрөг байлаа гэхэд нэмэгдэл 100 төгрөгөөс хэтрэхгүй" хэмээн албаныхан мэдээллээ.

Д.Сүндий, Г.Даваажав нарт анхан шатны шүүхээс оногдуулсан ялыг хэвээр үлдээлээ

Монгол Улсын дээд шүүхийн хяналтын шатны эрүүгийн хэргийн шүүх хуралдаанаар Д.Сүндий, Д.Баттөгс, Г.Даваажав, Т.Батсайхан нарт холбогдох хэргийг шүүгдэгч нарын өмгөөлөгчдийн гаргасан гомдол болон прокурорын эсэргүүцлийн дагуу өнөөдөр /2022.04.20/ хянан хэлэлцэн шийдвэрлэлээ.

Хан-Уул дүүргийн Эрүүгийн хэргийн анхан шатны шүүх уг хэргийг 2021 оны 12 дугаар сарын 3-ны өдөр хянан хэлэлцээд Д.Баттөгсөд прокуророос Эрүүгийн хуулийн 22.4 дүгээр зүйлийн 4 дэх хэсэгт зааснаар яллах дүгнэлт үйлдэж ирүүлсэн хэргийг гэмт хэргийн шинжгүй гэсэн үндэслэлээр хэрэгсэхгүй болгосон. Харин Д.Сүндий, Д.Баттөгс нарыг хахууль өгөх гэмт хэрэг үйлдсэн гэм буруутайд тооцож, Д.Сүндийд нийтийн албанд томилогдох эрхийг 5 жилийн хугацаагаар хасаж, 3 жил хорих, Д.Баттөгсөд нийтийн албанд томилогдох эрхийг 5 жилийн хугацаагаар хасаж, 14 сая төгрөгөөр торгох ял тус тус оногдуулжээ.

Тэгвэл Улсын дээд шүүхийн хяналтын шатны эрүүгийн хэргийн шүүх хуралдаанаар хэргийг хянан хэлэлцээд давж заалдах шатны шүүхийн магадлалын Д.Сүндий, Г.Даваажав нарт холбогдох хэргийг хүчингүй болгож, тэдэнд анхан шатны шүүхээс оногдуулсан ялыг хэвээр үлдээлээ. Харин давж заалдах шатны шүүхээс Т.Батсайханд холбогдох нотлох баримтыг устгасан гэх хэргийг хэрэгсэхгүй болгосныг хэвээр үлдээж, түүнд оногдуулсан ялыг нэмж нэгтгэсэн хэсэгт хууль хэрэглээний өөрчлөлт оруулж, нийтийн албанд томилогдох эрхийг 8 жилийн хугацаагаар хасаж, 3 жил хорих ял болгон өөрчилж шийдвэрлэсэн байна.

УИХ-ын дарга Х.Амартүвшин, Х.Ганхуяг нарыг яллагдагчаар татжээ

Хөгжлийн банкнаас эрх мэдэл, албан тушаалын байдлаа урвуулан ашиглаж, хамаарал бүхий компанидаа давуу байдал олгож, зээл авсан хэрэгт хэд хэдэн УИХ-ын гишүүний нэр холбогдож, хууль хяналтын байгууллагаас шалгаж эхэлсэн байдаг. Тодруулбал, УИХ-ын гишүүн Г.Амартүвшин Хөгжлийн банкны захирал байхдаа эрх мэдлээ ашиглаж, УИХ-ын гишүүн Х.Ганхуяг, Д.Дамдинням нарын хамаарал бүхий аж ахуйн нэгжид давуу байдал олгон, 33 тэрбум төгрөгийн зээл олгосон байдаг.

УИХ-ын гишүүн Х.Амартүвшинийг эрх мэдлээ ашиглаж, бусдад давуу байдал үүсгэж, их хэмжээний зээл олгосон үндэслэлээр яллагдагчаар татах хүсэлт АТГ-аас прокурорт хүргүүлсэн билээ. Мөн УИХ-ын гишүүн Х.Ганхуяг өөрийн хамаарал бүхий компанид хуурамч бичиг баримтаар зээл авахад нөлөөлсөн, эрх мэдлээ урвуулан ашигласан үндэслэлээр яллагдагчаар татах хүсэлт хүргүүлсэн билээ. Тэгвэл прокуророос УИХ-ын гишүүн Г.Амартүвшин, Х.Ганхуяг нарыг яллагдагчаар татах тогтоол үйлджээ. Тун удахгүй яллах тогтоолыг танилцуулах ажээ.

Шуудан илгээмжээр их хэмжээний мансууруулах бодис илгээжээ

Монгол Улсын нэр бүхий иргэдэд улс хоорондын шуудан илгээмжээр өнөөдөр /2022.04.21/ шингэн каннабис, экстаси, ЛСД зэрэг маш хүчтэй үйлчилгээтэй мансууруулах болон сэтгэцэд нөлөөт бодисуудыг илгээснийг Гаалийн ерөнхий газраас илрүүлжээ. Шуудан илгээмж ашиглан АНУ-аас их хэмжээгээр нууцаар нэвтрүүлэхийг завдсан үйлдлийг гаалийн хяналт шалгалтаар илрүүлэн таслан зогсоосон байна.

Улмаар хойшлуулшгүй ажиллагаа явуулан холбогдогч этгээдүүдийг саатуулан шалгаж байна. Гаалийн байгууллага энэ онд энэ төрлийн бодисыг улсын хилээр хууль бусаар нэвтрүүлэхийг завдсан зургаан удаагийн тохиолдлыг илрүүлж, сэжиг бүхий 1.6 литр бодисыг хураан хэргийг хуулийн байгууллагад шилжүүлжээ.

Халх голд гарсан түймрийг цурманд орууллаа

Дорнод аймгийн Халхгол сумын нутгийг хамарсан ой хээрийн түймрийг 21-ны өглөө 05.00 цагийн орчимд цурманд орууллаа. Дөрөвдүгээр сарын 18-ны өдөр дэгдсэн ой хээрийн түймрийг унтраахаар Хилийн цэрэг, Онцгой байдлын газрын алба хаагчид, сумын ЗДТГ-ын ажилчид, иргэд, газар тариалангийн компаниуд хамтран ажилласан байна.

Дорнод аймгийн хувьд 4-р сарын 15-ны өдрөөс хойш хуурайшилтын нэн аюултай зэрэгт шилжээд байсан бөгөөд 18-ны өдөр Дорнод аймгийн хилийн цэргийн 1-р заставын ойролцоогоос хээрийн түймэр гарсан юм байна. Тус түймэр богино хугацаанд, их талбайг эзлэн тархах болсон гол шалтгаан нь цаг агаарын нөхцөл байдал буюу хүчтэй салхи шуурга байсан талаар ОБГ-аас мэдээлж байв. Түймэрийн хор уршигаар Дархан цаазат газрын ойролцоох ан амьтад олноороо цугтаж, зарим нь түймэрт өртсөн талаар тус сумын байгаль орчны байцаагч мэдээлэв. Мөн түүнчлэн ОБГ-ын алба хаагчид автомашингүйн улмаас олон км газрыг явганаар туулж түймрийг унтраасан байна. 170 гаруй хүний бүрэлдэхүүнтэйгээр унтраасан ой хээрийн түймрийн хохирлын хэмжээг гаргах үүргийг Дорнод аймгаас баг гарган ажиллаж байна.

BOLOD ДОЛОО ХОНОГИЙН ТОЙМ: Худалдаа хөгжлийн банкыг тоносон зарим этгээдүүдийг цагдан хорьж, дизель түлшний үнэ огцом нэмэгдсэн ДОЛОО ХОНОГ
Tweet
Bolod.mn