BOLOD.MN сайт долоо хоног бүрийн бямба гарагт улс төрийн, эдийн засаг, нийгмийн хүрээнд болж онцлох үйл явдлыг тоймлон хүргэдэг. Эдгээр өдрүүдэд Хөгжлийн банкны асуудалтай нэр холбогдсон УИХ-ын дөрвөн гишүүний бүрэн эрхийг түтгэлзүүлэх эсэх асуудлыг хэлэлцлээ. Мөн түүнчлэн эрчим хүчний хэмнэлттэй, нараар халаах горимтой эко орон сууц ашиглалтад орж эхний ээлжийн оршин сууцчид түлхүүрээ гардан авлаа. Эдгээр болон бусад мэдээ мэдээллийг тоймлон хүргэж байна.

Дөрвөн гишүүний бүрэн эрхийг түтгэлзүүлэх шаардлагагагүй хэмээн үзжээ

УИХ-ын Хуульзүйн байнгын хороо УИХ-ын гишүүн Н.Алтанхуяг, Ё.Баатарбилэг, Х.Ганхуяг нарын бүрэн эрхийг түтгэлзүүлэх эсэх асуудлыг хэлэлцлээ. Халдашгүй байдлын дэд хорооны дарга Н.Энхболдын мэдээлснээр УЕП-оос УИХ-ын гишүүн Н.Алтанхуяг, Г.Амартүвшин Ё.Баатарбилэг, Х.Ганхуяг нарын бүрэн эрхийг түтгэлзүүэлх асуудлыг УИХ-д оруулж ирсэн. Халдашгүй байдлын дэд хороо хоёр өдөр хуралдсаны эцэст 4 гишүүний бүрэн эрхийг түтгэлзүүлэх шаардлагагүй хэмээн үзжээ.

Лифтний бичлэгт нэр холбогдсон 6 шүүгчдэд хатуу хөл хорионы үеэр цугларсан хэмээн шийтгэл оногдуулсан байна

Шүүхийн Сахилгын хорооны энэ сарын 26-ны өдрийн хуралдаанаар зургаан шүүгчийн асуудлыг хэлэлцэж, шийтгэл оногдуулав.

Тодруулбал:

Сүхбаатар дүүргийн Эрүүгийн хэргийн анхан шатны шүүхийн шүүгч З.Болдбаатарт огцруулах, Улсын дээд шүүхийн шүүгч С.Соёмбо-Эрдэнэ, Нийслэлийн Эрүүгийн хэргийн давж заалдах шатны шүүхийн шүүгч М.Алдар, Т.Өсөхбаяр нарт зургаан сарын хугацаагаар 20 хувиар цалинг бууруулах,

Нийслэлийн Эрүүгийн хэргийн давж заалдах шатны шүүхийн шүүгч Б.Ариунхишиг, Чингэлтэй дүүргийн Эрүүгийн хэргийн анхан шатны шүүхийн Ерөнхий шүүгч Б.Халиун нарт сануулах сахилгын шийтгэл оногдуулж шийдвэрлэв.

Дээрх шүүгчдийн гамшгаас хамгаалах бүх нийтийн бэлэн байдлын зэрэгт хэсэгчилсэн байдлаар шилжүүлсэн цаг хугацаанд цугларсан үйлдэл нь Шүүгчийн ёс зүйн дүрэм зөрчсөн зөрчилд тооцож сахилгын шийтгэл оногдуулжээ.

Эргэн сануулахад, өмгөөлөгч Б.Баасанцогтын зүй бус үйлдэл гаргаж буй бичлэг олон нийтэд ил болсон. Тухайн үед хамт байсан нь бичлэгээр батлагдаж, шүүмжлэлд өртсөн шүүгч нарт сахилгын арга хэмжээ авч, хариуцлага тооцох тухай гомдлыг “Нэхүүл”, “Дархан Монгол Ногоон нэгдэл” ТББ-аас Шүүхийн сахилгын хороонд гаргасан юм.

Эрчим хүчний хэмнэлттэй эко орон сууц ашиглалтад орлоо

Нийслэлд гүнийн цэвэр устай, бохироо 98 хувь хүртэл цэвэршүүлэн дахин ашиглах боломжтой, нарны илчийг 100 хувь өөртөө шингээн халаах технологи бүхий орон сууцтай эко хотхон ашиглалтад орлоо. Дэнжийн 1000-ын гэр хороололд барьсан энэхүү эрчим хүчний хэмнэлттэй жишиг хотхоны нээлт энэ сарын 27-ны өдөр болж, оршин суугч нартаа түлхүүрийг гардуулав.

Тус хотхоныг “Түрээсийн орон сууц корпораци” ТӨХХК, “Hybrid house” компани, ТОС, Германы олон улсын хамтын ажиллагааны GIZ байгууллагын хамтарсан төслөөр барьжээ. Төслийн гүйцэтгэгч “Hybrid house” компанийн захирал Ц.Бат-Эрдэнийн мэдээлснээр, хотхон цэвэрлэх байгууламжтай, үерийн болон бохир ус зайлуулах нэгдсэн системтэй болохыг онцоллоо. Хотхоны хаусууд нь хасах 40 хэмийн хүйтэнд халаагуур ашиглахгүй, гал түлэх шаардлагагүйгээр дулаан өвөлжих, мөн тохилог шийдэлтэй юм.

Түүнчлэн нэг айлын байр ойролцоогоор 78 сая төгрөгийн өртөгтэй бөгөөд иргэд урьдчилгаа 10 хувийг төлөөд, Германы хамтын нийгэмлэгийн төсөлд хамрагдан 18 сая төгрөгийг суутгуулах юм. Ингэснээр үлдэгдэл 52 сая төгрөгийг ногоон зээлд хамрагдан сард дунджаар 490-630 мянган төгрөг төлж, таун хаустай болох боломжтой.

Өөрөөр хэлбэл, иргэд жилд төлдөг халаалт, түлшний зардалтай дүйцэхүйц төсвөөр байраа өмчлөх боломжтой болж байгаа юм.

Тус хотхонд оршин суугч иргэд ногоон зээлд хамрагдан халаалтад зарцуулах мөнгөө ногоон зээлдээ өгч 60 м.кв ашигтай талбай бүхий таун хаустай болох боломжтой юм. Мөн хүнсний нарийн ногоогоо өөрсдөө тариад хэрэглэж болох өвлийн хүлэмжтэй, хаус бүр ногоон байгууламж, тоглоомын талбайтай байхаар шийдэгджээ.

Эрчим хүчний хэмнэлттэй амины орон сууцыг олноор нь барьснаар агаар, хөрсний бохирдлыг бууруулах, гэр хорооллын өнгө үзэмжийг сайжруулах, айл өрх бүр эрүүл, тохилог орчинд амьдрах боломжтой болохыг “ТОСК” ТӨХХК-ийн гүйцэтгэх захирал Л.Батжаргал онцлон тэмдэглэж, нийслэл болон орон нутагт хэрэгжүүлэх тал дээр анхаарч ажиллах болно хэмээлээ.

Ингэснээр олон улсын банк, санхүүгийн байгууллагаас бага хүүтэй зээл авах боломж бүрдэж, иргэд ч мөн хүү багатай ипотекийн зээлд хамрагдан, орон сууцаа авах боломжтой”-г нийслэлийн Засаг даргын Барилга, орон сууц, үйлдвэр, технологийн парк хариуцсан орлогч Б.Сүхбаатар дурдлаа.

Н.Түвшинбаярын шүүх хуралыг ирэх сарын 12-нд 10 гэрчийг оролцуулан хаалттай хуралдахаар боллоо

Олимпийн аварга Н.Түвшинбаярт холбогдох хэргийн урьдчилсан хэлэлцүүлэг энэ сарын 29-ны өдөр Хан-Уул дүүргийн анхан шатны шүүхэд 10 цагаас товлогдсон. Шүүх хурлыг ирэх сарын 12-ны өдөр нэр бүхий 10 гэрчийн хамт хаалттайгаар хуралдуулахаар хойшлуулжээ.

Хохирогч талын өмгөөлөгчийн мэдээлснээр хохирогчийн хууль ёсны төлөөлөгчийн зүгээс шүүх хуралдаанд гэрч оролцуулах, хувь хүний нууцтай холбоотой асуудал яригдах учир шүүх хуралдааныг хаалттай явуулах хүсэлт гаргасан байна. Шүүхээс уг хүсэлтийг хангаж, шүүх хуралдааныг ирэх тавдугаар сарын 12-ны өдөр товложээ.

Орон нутгийн автобус осолдож 12 хүний биеийн байдал хүнд байна

Энэ сарын 27-ны өдөр Улаанбаатараас Ховд аймаг руу зорчиж явсан автобус онхолдсон ноцтой осол гарсан. Ослын дуудлага тухайн өдрийн өглөөний 05:00 цагт Баянхонгор аймгийн онцгой байдлын хэлтэст ирсэн. Тодруулбал, тус аймгийн Бууцагаан сумын Наран багийн Цагаан гол хэмээх газарт осол болж, нэг хүн газар дээрээ амьсгал хураажээ.

Онцгой байдлын ерөнхий газрын мэдээлснээр Бууцагаан сум дахь Гал түймэр унтраах, аврах 72 дугаар ангийн алба хаагчдыг очиход Улаанбаатар хотоос Ховд аймгийн Цэцэг сумын чиглэлд 21 зорчигчтой зорчиж явсан орон нутгийн автобус замын хажуу руу унасан байжээ.

Алба хаагчид талийгаачийн цогцсыг гаргаж цагдаагийн байгууллагад шилжүүлсэн байна.

Энэ талаар аймгийн Онцгой байдлын газрын даргаастодруулахад Ослын улмаас нэг хүн амь насаа алдсаныг эмнэлэг, цагдаагийн байгууллагад шилжүүлсэн бол 12 хүн гэмтсэн. Тэдний 5 нь нэн хүнд, 7 нь хүндэвтэр байгаа бөгөөд аймгийн төвөөс мэргэжлийн эмч нар ирж, автобусанд зорчиж явсан хүмүүсийг Бууцагаан сумын төвд хүргүүлжээ.

Мөн түүнчлэн “Мега сервес” ХК-иас Улаанбаатар хотоос нисэх онгоц захиалсан тул аймгийн эрүүл мэндийн төвөөс гэмтсэн хүмүүсээ биеийн байдлаар нь ангилж, Улаанбаатар хот руу хүргүүлж эмчилгээ хийлгэхээр ажиллажээ. Түүнчлэн урьдчилсан байдлаар ослын шалтгааныг мэдээлэх боломжгүй гэдгийг аймгийн Онцгой байдлын газраас мэдээлэв.

Дундговь аймагт хурдан морины сунгаанд оролцож байсан хүүхэд амиа алджээ

Өнгөрөгч амралтын өдөр Дундговь аймгийн Сайнцагаан суманд зохион байгуулсан хурдан морины уралдааны сунгааны үеэр унаач хүүхэд мориноос унаж, амь насаа алдсан харамсалтай хэрэг гарсан.

Унаач хүү 14 настай байсан ба хүүг гэмтсэн даруйд аймгийн нэгдсэн эмнэлэгт хүргэсэн боловч ухаан оролгүй байсаар амьсгал хураажээ. Засгийн газраас “Өвөл, хаврын улиралд хурдан морины уралдааныг хориглох тухай” тогтоол баталж, жил бүрийн аравдүгээр сарын 1-нээс тавдугаар сарын 1-ний хугацаанд хурдан морины уралдаан, сунгаа, үсэргээ зохион байгуулахыг хориглоод байгаа ч хүүхдийн аминд хүрсэн уралдааныг хөдөө, орон нутагт явуулсаар байна.

Хурдан морь унаач хүүхдийн хөдөлмөр нь хүүхдийн хөдөлмөрийн тэвчишгүй хэлбэрийн нэг бөгөөд Засгийн газрын 2011 оны 303 дугаар тогтоолын хавсралтаар батлагдсан Хүүхдийн хөдөлмөрийн тэвчишгүй хэлбэрийг устгах үндэсний хөтөлбөрт хурдан морь унаач хүүхдийн хөдөлмөр хамгаалал, аюулгүй байдлыг хангах асуудлыг тусгайлан авч үзсэн төдийгүй ийм төрлийн хөдөлмөр эрхлүүлсний улмаас хүүхдийн амь нас, эрүүл мэнд нь хохирсон бол гэм буруутай этгээдээс нөхөн төлбөр гаргуулах эрх зүйн орчинг бүрдүүлэх зорилт тавьсан байдаг. Гэвч албаныхны өгч буй мэдээллээр, хурдан морины уралдаан болон сунгааны үеэр сүүлийн хоёр жилд 13 хүүхэд нас барсан гэх бөгөөд хүүхдийн амь нас эрүүл мэндийг эрсдэлд оруулсан этгээдүүд нөхөн төлбөр өгсөн тохиолдол байдаггүй ажээ.

BOLOD ДОЛОО ХОНОГИЙН ТОЙМ: Эко орон сууц ашиглалтад орж, Хөгжлийн банктай нэр холбогдсон гишүүдийн бүрэн эрх хэвээр үлдлээ
Tweet
Bolod.mn